1, 2. Jech kʼuchaʼal chal Esekiel 47:1 kʼalal ta 12, ¿kʼusi laj yil li Esekiele xchiʼuk kʼusi laj yakʼ venta? (Kʼelo li lokʼol ta slikebal kapituloe).

JCHAʼKʼELTIK li kʼusi laj yichʼ ilel ta temploe. Oy kʼusi labal sba laj yil li Esekiele, yuʼun laj yil ti te chlokʼ tal voʼ ta temploe. Nopo noʼox avaʼi, li j-alkʼope te skʼeloj batel ti bu chbein batel li voʼe (kʼelo Esekiel 47:1-12). Li voʼe te chlokʼ talel ta yolon yochebal templo xchiʼuk chbein batel ta yochebal mukʼta amakʼ ti skʼeloj batel slokʼeb kʼakʼale. Li anjele laj yikʼ batel Esekiel ta spat li temploe xchiʼuk la spʼis batel li ukʼume. Jech xtok, ep ta velta albat Esekiel ti xtuchʼ jelavel li voʼe, vaʼun li j-alkʼope laj yakʼ venta ti ta anil pas ta jun ukʼum ti jaʼ xa noʼox ta nux xuʼ xjelave.

² Li Esekiele laj yakʼ venta ti te chkʼot ta nab Muerto li yok ukʼume, vaʼun li voʼ ti chiʼpikʼane chlik lekubuk xchiʼuk ch-ayan ep xchoyal. Jech xtok, laj yil ti lik chʼiuk jeltos teʼetik ta stiʼiltak ukʼume. Jujun u chchʼi tal yan sat li teʼetike xchiʼuk chpoxtavan li yanale. Kʼalal jech la yil li Esekiele, jun van yoʼonton kom xchiʼuk la sta spatobil yoʼonton. Li Esekiel xchiʼuk li buchʼutik chukbil batike, ¿kʼuxi laj yaʼibeik smelolal li kʼusi laj yil Esekiel ta sventa li temploe? Xchiʼuk ¿kʼuxi chkaʼibetik smelolal li avi eke?

Li judaetike, ¿kʼuxi laj yaʼibeik smelolal li ukʼume?

3. Li judaetik ta skʼakʼalil Esekiele, ¿kʼu yuʼun xuʼ xkaltik ti muʼyuk la snopik ti jaʼ batsʼi ukʼum li kʼusi laj yil Esekiele?

³ Li judaetik ta skʼakʼalil Esekiele melel onoʼox ti muʼyuk la snopik ti jaʼ skʼoplal batsʼi ukʼum li kʼusi laj yichʼ ilele. Jech xtok, li kʼusi laj yal Esekiele xuʼ van jaʼ vulesbat ta sjolik yan albil kʼop ti chal ti chchaʼta yav li melel yichʼel ta mukʼ Diose, jaʼ li kʼusi laj yal Joel ti oy xa ox mas ta chib siglo yaloje (kʼelo Joel 3:18). Xi la stsʼiba li Joele: «Te chlik lokʼuk chiʼil vino li ta vitstike, chlik nojuk ta leche li bikʼtal vitsetike [...]. Te chlik tʼomuk tal voʼ li ta sna Jeovae». Pe kʼalal la xchan judaetik li albil kʼop laj yal Joele, muʼyuk la snopik ti batsʼi jech tajek chkʼot ta pasele. Jaʼ yuʼun, laj yaʼibeik smelolal ti maʼuk batsʼi ukʼum li kʼusi laj yil Esekiele.a Vaʼun chaʼa, ¿kʼusi tskʼan ch-akʼbat snaʼik yuʼun li Jeovae? Li Vivliae jamal chakʼ ta ilel kʼusi smelolal junantik kʼusitik laj yil Esekiele. Avie, jkʼeltik batel oxtos kʼusitik ti persa chkʼot ta pasel ti ta jtatik li ta albil kʼope xchiʼuk ti chakʼ ta ilel ti chkʼanvan li Jeovae.

4. 1) ¿Kʼusitik bendisional smalaojik ch-akʼbatik judaetik kʼalal laj yaʼibeik skʼoplal li ukʼum laj yil Esekiele? 2) ¿Kʼusi smelolal kʼalal voʼ xchiʼuk ukʼum chal ta junantik tekstoe? (Kʼelo li rekuadro «Li bendisionetik chakʼ Jeovae»).

⁴ Bendisionetik ti xkoʼolaj ta ukʼume. Kʼalal chakʼ talel bendision li Jeovae, li Vivliae ep ta velta tskoʼoltas ta voʼ xchiʼuk ta ukʼum. Li Esekiele laj yil ti jaʼ jech li ukʼum ti te chlokʼ talel ta temploe, ¿kʼusi van la snopik li steklumal Diose? Jaʼ ti ch-akʼbatik talel epal bendision yuʼun Jeova mi chichʼik ta mukʼ jech kʼuchaʼal tskʼane. ¿Kʼusitik bendision ch-akʼbatik? Jaʼ ti chbeiltasatik ta mantal yan velta yuʼun li paleetike. Jech xtok, chlik yakʼik yan velta milbil matanaletik li ta temploe, vaʼun li jteklume xuʼ jpʼel ta yoʼontonik ti chchʼaybat li smulike (Esek. 44:15, 23; 45:17). Sak chkomik yan velta, yuʼun xkoʼolaj ti la sakubtas sbaik li ta ukʼum chlokʼ talel ta temploe.

5. Li kʼusi laj yil Esekiele, ¿kʼuxi chakʼ ta ilel ti jech-o tstaik bendision skotolike?

⁵ ¿Mi jech-o tstaik bendision skotolik? Li kʼusi laj yichʼ ilele chakʼ ta ilel ti mu persauk tsvul yoʼontonik ta sventa taje, yuʼun ta kʼunkʼun chmuy yok li ukʼume. ¡Yuʼun li bikʼit ukʼume pas ta mukʼta ukʼum! (Esek. 47:3-5). Xuʼ van epajik li judaetik kʼalal sut ta slumalike, jaʼ yuʼun epaj li bendision akʼbatik yuʼun Jeova sventa oyuk li kʼusitik chtun yuʼunike. Li ukʼum taje laj yakʼ ta ilel ti ep kʼusi ch-ayan yuʼunik xchiʼuk ti jun yoʼontonike.

6. 1) ¿Kʼuxi tspat oʼontonal li kʼusi laj yil Esekiele? 2) ¿Kʼuxi pʼijubtasvan? (Kʼelo li tsʼib ta yok vune).

⁶ Voʼ ti chakʼ kuxlejale. Li ukʼum laj yil Esekiele te to chkʼot ta nab Muerto xchiʼuk chlekub yuʼun jutuk mu skotoluk li voʼe. Lik epajuk jeltos xchoyal li ukʼume jech kʼuchaʼal li ta Mukʼta nabe, jaʼ xkaltik, li nab Mediterraneoe. Jech xtok, li ta stiʼil nab Muertoe oy toʼox krixchanoetik ti jaʼ jtsak choyetik ti likemik ta chib lumetik ti nom xil sbaik yaʼeluke. Xi laj yal li anjele: «Chkuxi skotol li kʼusitik oy ti bu ch-echʼ batel li yok voʼe». ¿Mi jaʼ skʼan xal ti chkʼot ta sjunul nab Muerto li voʼ chlokʼ talel ta sna Jeovae? Moʼoj, yuʼun li anjele laj yal ti muʼyuk chkʼot ti bu achʼeltik tajeke. Xi onoʼox laj yale: «Jech-o chiʼpikʼan chkomik» (Esek. 47:8-11).b Taje tspat tajek oʼontonal, yuʼun chchaʼta yav li melel yichʼel ta mukʼ Diose, vaʼun jun noʼox yoʼonton li jteklume. Pe chpʼijubtasatik xtok, yuʼun mu skotolikuk chchʼamik li bendisionetik chakʼ Jeovae, jaʼ xkaltik, mu skotolikuk chlekubik.

7. Li judaetik ti chukbil toʼox batike, ¿kʼusi akʼbat yilik ta sventa li teʼetike?

⁷ Teʼetik ti stakʼ lobel sate xchiʼuk ti chpoxtavane. ¿Kʼusi xuʼ xkaltik ta sventa li teʼetik ti chchʼi ta stiʼiltak ukʼume? Li kʼusi laj yil Esekiele mas to kʼupil sba laj yichʼ ilel ta skoj li teʼetike. Pe oy kʼusi skʼan xal li teʼetik taje. Li Esekiel xchiʼuk li yan judaetike lek van laj yaʼiik ti slobeik sat li teʼetik taje. Nopo noʼox avaʼi, jujun u chakʼ sat li teʼetike. Pe maʼuk noʼox, yuʼun akʼbatik yil ti chmakʼlinatik ta mantal yuʼun li Jeovae. Jech xtok, chpoxtaatik yuʼun li yanal teʼetik taje (Esek. 47:12). Pe ¿kʼu yuʼun laj yal Jeova ti chichʼik poxtaele? Yuʼun snaʼoj ti mi sut ta slumalik li judaetik ti chukbil toʼox batike, jaʼ mas toj jtunel yuʼunik ti chpoxtajik ta mantale. Li ta kapitulo 9 li ta livro liʼe, te chal kʼuxi la xchaʼta yav li melel yichʼel mukʼ Diose.

8. Li kʼusi laj yil Esekiele, ¿kʼu yuʼun xuʼ xkaltik ti mas toj tsots skʼoplal chkʼot ta pasel ta jelavele?

⁸ Jech kʼuchaʼal la jchantik li ta kapitulo 9, li buchʼutik chukbilik toʼox batel ti sutik ta Jerusalene oy noʼox kʼuk sjalil la skʼupinik li bendisionetike. Taje jaʼ ta smul stukik, yuʼun muʼyuk la xchʼunbeik smantal li Jeovae, lik spasik kʼusitik chopol xchiʼuk muʼyuk xa laj yichʼik ta mukʼ. Li buchʼutik tukʼ yakʼoj sbaike laj yat tajek yoʼontonik xchiʼuk chopol laj yaʼi sbaik ta skoj li kʼusitik chopol la spasik li vaʼ judaetike. Akʼo mi jech, li buchʼutik tukʼ yakʼoj sbaike snaʼojik ti chkʼot onoʼox ta pasel li kʼusi yaloj Jeovae (kʼelo Josue 23:14). Pe li kʼusi laj yil Esekiele ta to xkʼot ta pasel ta jelavel ti mas toj tsots skʼoplale, ¿bakʼin?

Yakal chanav avi li yok ukʼume

9. Li kʼusi laj yil Esekiele, ¿kʼusi to ora ti mas to chkʼot ta pasele?

⁹ Jech kʼuchaʼal laj jchantik li ta kapitulo 14 li ta livro liʼe, li templo akʼbat yil Esekiele oy to skʼoteb ta pasel «li ta slajebaltik kʼakʼale», yuʼun mas to chichʼ toybel skʼoplal li melel yichʼel ta mukʼ Dios ti muʼyuk bu jech ilbil-oe (Is. 2:2). ¿Kʼuxi yakal chkʼot ta pasel avi li kʼusi laj yil Esekiele?

10, 11. 1) ¿Kʼusi bendisional jtaojtik li avie? 2) ¿Kʼuxi epajem talel li veʼlil ta mantal li ta slajebaltik kʼakʼale?

¹⁰ Bendisionetik ti xkoʼolaj ta ukʼume. ¿Kʼusi bendisionetik tsvules ta joltik kʼalal ta jchanbetik skʼoplal li voʼ chlokʼ talel ta sna Jeovae? Jaʼ tsvules ta joltik skotol li veʼlil ta mantal sventa lekuk noʼox oyutike. Li bendision ti mas tsots skʼoplale jaʼ ti cham ta jkojtik li Jesuse. Yuʼun xuʼ xkichʼtik sakubtasel, jaʼ xkaltik, ti xuʼ xkichʼtik chʼaybel li jmultike. Jech xtok, li chanubtaseletik ta Vivlia ti chʼulik tajeke xkoʼolaj ta sakil voʼ ti chlekubtasvane xchiʼuk ti chakʼ kuxlejale (Efes. 5:25-27). ¿Kʼu yelan yakal chkichʼtik bendision li avie?

¹¹ Li ta sjabilal 1919, jutuk toʼox tajek li yajtuneltak Jeovae xchiʼuk xmuyubajik ti chichʼik akʼbel li veʼlil ta mantale. Pe epajem-o talel, yuʼun li avie oy mas ta vaxakib miyon yajtuneltak Jeova. ¿Mi jech-o yakal chkichʼtik akʼbel li veʼlil ta mantale? Jech, yuʼun solel busul li veʼlil ta mantal kuʼuntike. Leʼ xa onoʼox talel ta sien jabile, li yajtunelutik Diose ta smiyonal xa noʼox Vivliaetik oy kuʼuntik, livroetik, revistaetik, foyetoetik xchiʼuk tratadoetik. Anil noʼox epajem talel li veʼlil ta mantale, yuʼun staojik li kʼusi jtunel yuʼunik ta mantal li krixchanoetike; xkoʼolaj kʼuchaʼal li ukʼum laj yil Esekiele. Jaʼ yuʼun oy xa ta epal jabil ti yakal ta jpastik imprimir li jvuntike. Avie, li ta jpajinatik ta jw.org xuʼ te jtatik vunetik ti oy mas ta jmil jeltos kʼopetike xchiʼuk xuʼ jkʼeltik ta selular, ta tavleta o ta yan kʼusitike. Skotol taje, ¿kʼuxi tstabeik sbalil li buchʼutik oy ta yoʼontonik mantale?

12. 1) ¿Kʼuxi aviloj ti tstabeik sbalil krixchanoetik li kʼusi chakʼ ta chanel li Vivliae? 2) ¿Kʼu yelan tspʼijubtasutik avi li kʼusi laj yil Esekiele? (Kʼelo li tsʼib ta yok vune).

¹² Voʼ ti chakʼ kuxlejale. Xi laj yaʼi li Esekiele: «Chkuxi skotol li kʼusitik oy ti bu ch-echʼ batel li yok voʼe». Nopo avaʼi skʼoplal liʼe, ¿kʼuxi staojbeik sbalil li epal veʼlil ta mantal li buchʼutik ochemik ta steklumal Jeovae? Li chanubtaseletik ta Vivliae skoltaoj ta smiyonal noʼox krixchanoetik sventa xakʼ xchʼunel yoʼontonik ta stojolal li Jeovae. Tspʼijubtasutik xtok li avie, yuʼun oy junantike chiktaik xchʼunel kʼusi chal li Vivliae. Tsta yorail ti mu xa skʼan xchʼunik li mantaletike xchiʼuk mu xa skʼan xakʼ ta xkuxlejalik. Li vaʼ krixchanoetike xkoʼolajik kʼuchaʼal li «tsʼantsʼan voʼtik xchiʼuk li achʼeltik ti te nopol oy» ta nab ti laj yil Esekiele.c ¡Mu me xkakʼtik ti jech xkʼot ta jtojolaltike! (Kʼelo Deuteronomio 10:16-18).

13. ¿Kʼusi chakʼ jchantik li teʼetik laj yil Esekiele?

¹³ Teʼetik ti stakʼ lobel sate xchiʼuk ti chpoxtavane. ¿Mi oy kʼusi chakʼ jchantik li teʼetik ti te oy ta stiʼiltak ukʼume? Oy, yuʼun li teʼetik taje chakʼ sat jujun u xchiʼuk chpoxtavan li yanaltake (Esek. 47:12). ¿Kʼusi chakʼ kiltik taje? Jaʼ ti chijtun ta stojolal jun Dios ti oy slekil yoʼonton, ti tsmakʼlinutik xchiʼuk ti chpoxtautik ta mantale. Yan li buchʼutik muʼyuk chtunik ta stojolal li Jeovae mu xaʼibeik smelolal li kʼusi chakʼ ta chanel li Vivliae. Nopo noʼox avaʼi skotol li kʼusitik yakʼojbutik Jeovae. ¿Mi mu jechuk ti jun avoʼonton chakom kʼalal chachan jlikuk revista, mi la akʼejinta li slajeb kʼejoj ta junuk asamblea, mi la akʼel junuk video o junuk programa ta JW Broadcasting? ¡Ta melel lek makʼlinbilutik ta mantal! (Is. 65:13, 14). Taje tskoltautik sventa lekuk oyutik ta mantal. Li tojobtaseletik ta Vivliae tskoltautik sventa mu xijtsʼuj ta mulivajel, ta xpichʼetel oʼontonal, ti chʼabal xchʼunel koʼontontike o yan kʼusitik. Maʼuk noʼox, yuʼun li Jeovae chakʼbutik li kʼusitik chtun kuʼuntik sventa xijtsatsub ta mantal mi la jsaʼ tsots jmultike (kʼelo Santiago 5:14). Li teʼetik laj yil Esekiele chakʼ ta ilel ti lek chabibilutike.

14, 15. 1) ¿Kʼusi chakʼ jchantik li achʼeltik ti muʼyuk xlekub laj yil Esekiele? 2) ¿Kʼusi bendisional yakal ta jkʼupintik li avie?

¹⁴ Jech xtok, oy kʼusi chakʼ jchantik li achʼeltik ti muʼyuk xlekube. Mu jkʼan jechutik kʼuchaʼal li krixchanoetik ti mu xakʼ sbaik ta lekubtasel yuʼun li Diose (Mat. 13:15). Yuʼun mi jech la jpastike, muʼyuk me chakʼbutik tal sbendision li Jeovae. Li voʼotike ta jkʼupintik li bendisionetik ti xkoʼolaj kʼuchaʼal li ukʼum laj yil Esekiele. ¿Kʼusi van ora chvul ta joltik li ukʼum taje? Jaʼo kʼalal ta sjunul koʼonton ta jchʼamtik kʼusi chal Vivliae, kʼalal chijlokʼ ta cholmantale, kʼalal chkichʼtik koltael, patbel koʼontontik xchiʼuk tojobtasel yuʼun li moletik ti yichʼojik chanubtasel yuʼun li tukʼil xchiʼuk pʼijil mosoile. Mu ventauk bu ch-echʼ batel li ukʼum laj yil Esekiele, chlik lekubuk xchiʼuk chkuxi skotol li kʼusitik oye.

¹⁵ ¿Kʼuxi chkʼot ta pasel ta jelavel li kʼusi laj yil Esekiele? Jech kʼuchaʼal ta jkʼeltik batele, mas to tstsatsaj yok ukʼum li ta Paraisoe.

¿Kʼuxi chkʼot ta pasel ta Paraiso li kʼusi laj yil Esekiele?

16, 17. 1) ¿Kʼuxi chnatub yok li voʼ ti chakʼ kuxlejal ta Paraisoe? 2) ¿Kʼuxi ta jtabetik sbalil ta Paraiso li voʼ taje?

¹⁶ Nopo noʼox avaʼi ti te xa oyot ta Paraiso xchiʼuk avutsʼ avalal xchiʼuk avamigotake. ¿Kʼusi tskoltaot sventa teuk xa akʼeloj yilele? Jaʼ mi mas to la achanbe skʼoplal li ukʼum laj yil Esekiele. Jaʼ yuʼun, jchaʼkʼeltik li oxtos kʼusitik laj yil Esekiel ti chakʼ ta ilel ti chkʼanvan li Jeovae.

¹⁷ Bendisionetik ti xkoʼolaj ta ukʼume. Li ta Paraisoe xkoʼolaj ti mas to chnatub yok li ukʼume, maʼuk noʼox ta jtabetik sbalil ta mantal, yuʼun ta jkʼupintik yan bendisionetik xtok. ¿Kʼusi chkʼot ta pasel li Ajvalilal ta Jmil Jabil yuʼun Jesuse? Li buchʼutik tukʼ chakʼ sbaike mas to tstabeik sbalil li pojelal laj yakʼ Jesuse, yuʼun ta kʼunkʼun chtukʼibik batel. Chlaj skʼoplal li chameletike, li poxiletike, li ospitaletike, li doktoretike xchiʼuk li koltael chakʼ ajvaliletik sventa jpoxta jbatike (seguros médicos). Li «epal krixchanoetik» ti kuxul chkomik ta Armajedone ta skʼupinik li epal bendisionetike (Apok. 7:9, 14). Toj labal sba li bendisionetik ta jkʼupintik ta slikebale, pe mu xkoʼolaj xchiʼuk li bendisionetik chtal ta jelavele. Jech kʼuchaʼal laj yil li Esekiele, li ukʼume mas to natub batel yok sventa masuk to xichʼ tabel sbalil.

18. Li ta Jmil Jabile, ¿kʼuxi tspas ta mukʼta ukʼum li voʼ ti chakʼ kuxlejale?

¹⁸ Voʼ ti chakʼ kuxlejale. Kʼalal jaʼo xyaket li jmil jabile li ‹ukʼum sventa kuxlejale› ta spas ta jun mukʼta ukʼum (Apok. 22:1). ¡Ta smiyonal noʼox krixchanoetik ta xchaʼkuxiik tal xchiʼuk xuʼ xkuxiik ta sbatel osil! Li Ajvalilal yuʼun Diose mu albajuk yepal krixchanoetik chchaʼkuxes ti pasemik ta pukuke, ti «mu xa kʼusi stakʼ spasik ta lajelale» (Is. 26:19). Pe ¿mi ta van xkuxiik ta sbatel osil skotolik?

19. 1) ¿Kʼusi chakʼbutik-o Jeova li ta Paraisoe, xchiʼuk kʼuxi jnaʼojtik? 2) ¿Kʼusi skʼan xal ti oy junantik ti jech-o chiʼpikʼan chkomik li ta Paraisoe?

¹⁹ Jaʼ oy ta sbaik mi tskʼan chkuxiik ta sbatel osil. Li vaʼ orae, chichʼ jamel achʼ balbalvunetik ti yichʼoj talel kʼusitik achʼ xchiʼuk beiltaseletik ta mantal ti xkoʼolaj kʼuchaʼal ukʼume. ¡Labal sba maʼ taje! Pe kʼux ta aʼiel ti oy junantik muʼyuk chchʼamik li bendisionetike xchiʼuk chlik stoy sbaik ta stojolal li Jeovae. Mi oy buchʼu lik stoy sba li ta jmil jabile, muʼyuk ch-akʼbat ti sokes li jun oʼontonal ta Paraisoe (Is. 65:20). Xuʼ van jaʼ chtal ta joltik li achʼeltik la yil Esekiel ti muʼyuk xlekube, yuʼun ‹jech-o chiʼpikʼan komik›. ¡Solel mu xtojobik snopel! Yuʼun muʼyuk la skʼan laj yuchʼik li voʼ ti chakʼ kuxlejale. Mi tsʼaki xa ox li jmil jabile, oy jtsop krixchanoetik ti chlik smojin sjolik xchiʼuk li Satanase. Skotol li buchʼutik tspʼajbeik smantal Jeovae ta xichʼik lajesel ta sbatel osil (Apok. 20:7-12).

20. Li ta jmil jabile, ¿kʼusi tspas Jeova ti jaʼ tsvules ta joltik li teʼetik laj yil Esekiele?

²⁰ Teʼetik ti stakʼ lobel sate xchiʼuk ti chpoxtavane. Li Jeovae tskʼan ti xijkuxi ta sbatel osile. Sventa xkʼot ta pasel taje, li stuke oy kʼusi achʼ tspas sventa xkʼot ta pasel li kʼusi laj yil Esekiel ta sventa li teʼetike. Li ta Paraisoe maʼuk noʼox ta jtabetik sbalil ta mantal, yuʼun ta jkʼupintik yan bendisionetik. Kʼalal yakal li jmil jabile, li Jesus xchiʼuk li 144 mile chkʼotik ta ajvalil. Jech xtok, chkʼotik ta paleal sventa tskolta sbaik yoʼ xichʼ tabel lek sbalil li pojelal laj yakʼ Kristoe xchiʼuk tskoltaik li buchʼutik tukʼ yakʼoj sbaik sventa xkʼotik ta tukʼil krixchanoetik (Apok. 20:6). Li teʼetik laj yil Esekiel ti stakʼ lobel sat xchiʼuk ti chpoxtavan li yanaltake xkoʼolaj xchiʼuk li albil kʼop laj yal li jtakbol Juane (kʼelo Apokalipsis 22:1, 2). Li yanaltak teʼetik laj yil Juane jaʼ sventa xpoxtaobil lumetik. Ta smiyonal xa noʼox krixchanoetik tstabeik sbalil li kʼusi tspasik li 144 mil ti chtunik ta paleale.

21. 1) ¿Kʼu yelan chavaʼi aba mi la anopbe skʼoplal li ukʼum laj yil Esekiele? (Kʼelo li rekuadro «¡Lik mukʼibuk yok li ukʼume!»). 2) ¿Kʼusi ta jkʼeltik batel li ta yan kapituloe?

²¹ Kʼalal mi la jnopbetik skʼoplal li ukʼum laj yil Esekiele, ¿mi mu jechuk ti tspat koʼontontik xchiʼuk ti chakʼbutik jun oʼontonale? ¡Toj lek li kʼusi jmalaojtik chkʼot ta pasele! Leʼ xa talel ta smilal jabile, li Jeovae yaloj albil kʼopetik sventa jnopbetik skʼoplal kʼu yelan li Paraisoe. Jech xtok, yakal-o tstakutik ta ikʼel sventa xkil ta jsat jtuktik ti kʼu yelan chkʼot ta pasel li kʼusi yaloje. ¿Mi te xa oyot chavil? Xuʼ van xi chajakʼbe abae: «¿Mi ta van xkil li Paraisoe?». Jkʼeltik li slajeb kʼusi akʼbat yil Esekiel ti chakʼbutik ta ilel ti chkʼot ta pasele.

1, 2. 1) ¿Kʼusi albat yuʼun Jeova li Esekiele? 2) ¿Kʼusi ta jtakʼtik batel?

LI TA sjabilal 593 kʼalal muʼyuk toʼox talem Jesuse, li Esekiele oy kʼusi akʼbat yil ti jaʼ vulesbat-o ta sjol li kʼusi kʼot ta pasel ta skʼakʼalil Moises xchiʼuk Josue ti oy xa ox van ta baluneb sien jabile. Li vaʼ orae, li Moisese albat yuʼun Jeova bu to kʼalal xkʼot stsʼak li Albil Balumile. Ta mas tsʼakale, albat Josue kʼu yelan chichʼik chʼakbel yosilik li snitilulal Israele (Num. 34:1-15; Jos. 13:7; 22:4, 9). Li Jeovae jaʼtik jech laj yalbe Esekiel xchiʼuk li buchʼutik chukbilik toʼox batele, yuʼun albatik kʼu yelan skʼan xchʼakik li Albil Balumil sventa xichʼik li snitilulal Israele (Esek. 45:1; 47:14; 48:29).

² Li kʼusi laj yakʼ ta ilel Jeovae, ¿kʼusi akʼbat snaʼik li Esekiel xchiʼuk li buchʼutik chukbil toʼox batele? ¿Kʼuxi tspat koʼontontik avi li yajtunelutik Diose? ¿Mi ta to van xkʼot ta pasel ta tsʼakal?

Li chantos sprevailtake

3, 4. 1) Li kʼusi akʼbat yil Esekiele, ¿kʼusi chantos sprevailtak akʼbat yilik li buchʼutik chukbilik toʼox batele? 2) ¿Kʼusi ta jkʼelbetik kʼoplal li ta kapitulo liʼe?

³ Li slajeb kʼusi akʼbat yil Esekiele smakoj baluneb kapitulo li ta slivroe (Esek. 40:1-48:35). Jech xtok, chakʼ ta ilel chantos sprevailtak ti persa chchaʼta yav li melel yichʼel ta mukʼ Dios ta Israele. Jkʼelbetik batel skʼoplal. 1) Jaʼ ti chlik yichʼik ta mukʼ Dios yan velta li ta stemploe. 2) Mi laj xa ox sta yav li jteklume jaʼ xa chchabiatik yuʼun paleetik xchiʼuk tukʼil jchabichijetik. 3) Skotol li buchʼutik tsutik batel ta Israele chichʼ akʼbel yuni osilik. 4) Jaʼ ti te chchiʼinatik yuʼun Jeovae.

⁴ Li ta kapitulo 13 xchiʼuk 14 li ta livro liʼe, te chal li baʼyel chib sprevailtake: jaʼ ti chchaʼta yav li melel yichʼel ta mukʼ Diose xchiʼuk chchabiatik yuʼun li tukʼil jchabichijetike. Li ta kapitulo liʼe, jaʼ chkalbetik skʼoplal li yoxtosal sprevaile: jaʼ ti chichʼ akʼbel yuni osilike. Li ta yan kapituloe, jaʼ ta jkʼeltik kʼuxi ti te chchiʼinatik yuʼun Jeovae (Esek. 47:13-21; 48:1-7, 23-29).

Chavichʼik akʼbel li balumil liʼe sventa xkʼot ta arextoik

5, 6. 1) ¿Bu xkom li osil laj yil Esekiel ti chichʼ chʼakele? (Kʼelo li lokʼol ta slikebal kapituloe). 2) ¿Kʼu yuʼun ti jech laj yakʼ ta ilel li Jeovae?

⁵ (Kʼelo Esekiel 47:14). Li Jeovae laj yalbe Esekiel ti oy jsep osil ti chkʼot kʼuchaʼal nichimaltik Edene (Esek. 36:35). Xi to jamal laj yal li Jeovae: «Liʼe jaʼ li osil ti chachʼakik sventa xkʼot ta xrexto osil li 12 ta vokʼ nitilulal yuʼun Israele» (Esek. 47:13). ¿Bu xkom li osil ti chichʼik chʼakbele? Jaʼ li jteklum Israel ti bu chchaʼsutik li buchʼutik chukbilik toʼox batele xchiʼuk ti chchaʼta yave. Jech kʼuchaʼal chal Esekiel 47:15 kʼalal ta 21, li Jeovae lek la xchap ta alel bu ch-echʼ stsʼaktak li osil taje.

⁶ ¿Kʼu yuʼun ti jech laj yakʼ ta ilel li Jeovae? Ti lek akʼbatik ta ilel ti bu ch-echʼ li stsʼaktak osile, akʼbat snaʼ Esekiel xchiʼuk yan judaetik ti persa chchaʼta yav li slumalike. ¡Taje patbat van tajek yoʼontonik li buchʼutik chukbilik toʼox batele! Pe ¿mi ta melel laj yichʼ yosilik li steklumal Diose? Laj.

7. 1) ¿Kʼusi kʼot ta pasel li ta sjabilal 537 kʼalal muʼyuk toʼox talem Jesuse? ¿Kʼusi tsvules ta joltik taje? 2) ¿Kʼusi ta jchantik batel?

⁷ ¿Kʼusi kʼot ta pasel li ta sjabilal 537 kʼalal muʼyuk toʼox talem Jesus xchiʼuk ti te van 56 jabil ti oy kʼusi laj yil Esekiele? Jaʼ ti ta smilal xa noʼox li buchʼutik chukbilik toʼox batele sutik ta Israel xchiʼuk te nakiik. Taje tsvules ta joltik ti jaʼtik jech kʼotem ta stojolal li yajtuneltak Dios avie, yuʼun xkoʼolaj ti yichʼoj yosilik eke. ¿Kʼuxi taje? Yuʼun li Jeovae laj yakʼ ochikuk yajtuneltak ta jun osil ti xkoʼolaj ta jun paraiso xchiʼuk ti te xnakiike. Jech oxal, ti kʼuxi la xchaʼta yav li voʼne Albil Balumile xuʼ skoltautik ta yaʼibel smelolal kʼuxi la xchaʼta yav li osil ti xkoʼolaj ta jun paraiso ti yakal tskʼupinik avi li yajtuneltak Diose. Pe yoʼ to mu jkʼeltik batel li kʼusi chakʼ jchantike, baʼyel jtakʼtik liʼe: ¿kʼusi chakʼ jchʼuntik ti ta melel oy jun osil ti xkoʼolaj ta jun paraisoe?

8. 1) ¿Buchʼu la stʼuj ta achʼ jteklum li Jeovae? 2) ¿Kʼusi jaʼ li osil ti xkoʼolaj ta jun paraisoe? 3) ¿Bakʼin vul ta lokʼel li osil taje, xchiʼuk buchʼutik te oyik?

⁸ Kʼalal albat yuʼun Jeova li Esekiel ti chchaʼta yav li melel yichʼel ta mukʼ Diose, albatem xa onoʼox ti oy to yan bu chkʼot ta pasele. ¿Kʼusi ora kʼot ta pasel? Ta 1914, jaʼo kʼalal lik ajvalilajuk David ti jaʼ li Jesukristoe (Esek. 37:24). Li vaʼ jabile, li Jeovae voʼne xa onoʼox ti maʼuk steklumal chil li Israele, yuʼun la stʼuj jun achʼ jteklum ti jaʼ li Israel yuʼun Diose, jaʼ xkaltik, li buchʼutik tʼujbil chbatik ta vinajele (kʼelo Mateo 21:43; 1 Pedro 2:9). Pe li Jeovae maʼuk noʼox la stʼuj jun achʼ jteklum, yuʼun la sjel li yosilal Israel ta jun osil ti xkoʼolaj ta jun paraisoe (Is. 66:8). ¿Kʼusi jaʼ li osil ti xkoʼolaj ta jun paraisoe? Jech kʼuchaʼal laj kiltik li ta kapitulo 17, jaʼ skʼoplal skotol li kʼusitik tspasik sventa xichʼik ta mukʼ Jeova li buchʼutik tʼujbil chbatik ta vinajel ti liʼ to oyik ta balumile, taje xkoʼolaj ta jun osil ti bu chabibilik ta mantal xchiʼuk ti te lik spas yabtelik leʼ xa tal ta 1919 (kʼelo li rekuadro 9B «¿Kʼu yuʼun chkaltik ti jaʼ ta 1919?»). Ta mas tsʼakale, oy to buchʼutik lik nakiikuk li ta osil taje, jaʼik li yan chijetik ti smalaojik chkuxiik ta balumile (Juan 10:16). Akʼo mi yantik chmukʼib batel li paraiso taje, pe jaʼ to ta jkʼupintik skotol li bendisionetik kʼalal mi echʼ xa ox Armajedone.

Parejo laj yichʼ chʼakel li osile

9. ¿Kʼu yelan laj yal mantal Jeova ti skʼan chʼakel li osile?

⁹ (Kʼelo Esekiel 48:1, 28). Kʼalal laj xa ox yakʼbeik stsʼakiltak li jteklume, li Jeovae laj yal mantal kʼu yelan skʼan xchʼakik li osile. Laj yal ti skʼan parejo chichʼ yosilik li 12 ta vokʼ nitilulal yuʼun Israel ti te chlik tal ta norte ta snitilulal Dan kʼalal to ta sur ti jaʼ snitilulal Gade. Li jujusep osile kʼatajtik ta xichʼ chʼakel ti te chlik stsʼak ta slokʼeb kʼakʼal xchiʼuk te chpaj ta Mukʼta nab o nab Mediterraneo ti te oy ta smaleb kʼakʼale (Esek. 47:20).

10. Li kʼusi akʼbat yil Esekiele, ¿kʼuxi patbat yoʼontonik li buchʼutik chukbilik toʼox batele?

¹⁰ Li kʼusi akʼbat yil Esekiele, ¿kʼuxi patbat yoʼontonik li buchʼutik chukbilik toʼox batele? Li Esekiele lek chapal albat yuʼun Jeova ti kʼu yelan chichʼ chʼakel li osile. Jech xtok, ti parejo laj yichʼ yosilik li 12 ta vokʼ nitilulale jaʼ sprevail ti persa chichʼ yosilik li buchʼutik tsutik tal ta Israel ti xchaʼtaoj xa yave. Yuʼun mi junuk buchʼu chʼabal yosil chkom.

11. ¿Kʼusi chakʼ jchantik li kʼusi akʼbat yil Esekiele? (Kʼelo li rekuadro «Ti kʼu yelan laj yichʼ chʼakel li osile»).

¹¹ ¿Kʼusi chakʼ jchantik li kʼusi akʼbat yil Esekiele? Maʼuk noʼox li paleetik, li jlevietik xchiʼuk li bankilaletik ti ta xichʼ yosilik li ta Albil Balumil ti xchaʼtaoj xa yave, yuʼun ta xichʼik ek li 12 ta vokʼ nitilulale (Esek. 45:4, 5, 7, 8). Li avi eke, ¿buchʼutik ch-ochik li ta osil ti xkoʼolaj ta jun paraisoe? Maʼuk noʼox ch-ochik li buchʼutik tʼujbil chbatik ta vinajel ti liʼ to oyik ta balumil xchiʼuk li «epal krixchanoetik» ti jaʼ tsbeiltasik li steklumal Diose (Apok. 7:9).a Yuʼun jkotoltik jtaojtik kuni osiltik xchiʼuk tsots skʼoplal li abtelal ta jpastik li ta osil taje, akʼo mi muʼyuk tsots skʼoplal yilel li kʼusi ta jpastik ta s-organisasion Jeovae. Taje, ¡tspat tajek koʼontontik!

Chaʼtos sjelbenal xchiʼuk kʼusi chakʼ jchantik

12, 13. ¿Kʼu yelan laj yal mantal Jeova ti skʼan chʼakbel yosilik li nitilulaletike?

¹² Toj labal van sba laj yaʼi Esekiel li mantal albat yuʼun Jeova ta sventa ti kʼu yelan chichʼ chʼakel li osile, yuʼun mu xkoʼolaj kʼusi albat li Moisese. Jkʼeltik batel chaʼtos sjelbenal. June jaʼ ta sventa li osile, li yan xtoke jaʼ ta sventa li jnaklejetik tee.

¹³ Li osile. Li Moisese albat yuʼun Jeova ti mas ep xakʼbe xrextoik li nitilulal ti mas epike (Num. 26:52-54). Yan li Esekiele xi albat mantal yuʼun Jeova ti kʼu yelan skʼan chʼakbel yosilik li nitilulaletike: «Koʼol yepakil chavichʼik» o jech kʼuchaʼal chal li tsʼib ta yok vune «koʼol yepakil chavichʼik xchiʼuk li achiʼiltakike» (Esek. 47:14). Jaʼ yuʼun, li jujusep osil ti kʼatajtik chichʼ chʼakbel li jujuvokʼ nitilulale parejo smukʼul chichʼik akʼbel ti te chlik ta norte kʼalal ta sure. Skotol li j-israeletik ti mu ventauk bu nitilulal likemike xuʼ skʼupinik li kʼusitik lekik x-ayan li ta Albil Balumile.

14. ¿Kʼusi sjelbenal li kʼusi albat yuʼun Jeova li Esekiel xchiʼuk li Smantal Moises ta sventa li jyanlumetike?

¹⁴ Li jnaklejetike. Li kʼusi chal Smantal Moisese chchabi li jyanlumetik ti te nakalike xchiʼuk chal ti xuʼ xichʼik ta mukʼ Jeovae, akʼo mi jech mu xuʼ xichʼ jsepuk yosilik (Lev. 19:33, 34). Pe li kʼusi albat yuʼun Dios li Esekiele mu xkoʼolaj li kʼusi laj yal ta Smantal Moisese, yuʼun xi laj yale: «Ti bu junukal nitilulal chkʼot ta naklej li jyanlume, jaʼ te skʼan xichʼ akʼbel xrexto». Kʼalaluk jech laj yale, te laj-o skʼoplal yuʼun ti jelelik li jbatsʼi j-israeletik xchiʼuk li jyanlumetike (Esek. 47:22, 23). Kʼalal laj yil Esekiel ti xchaʼtaoj xa yav li osile, laj yil xtok ti jun noʼox yoʼontonik li jnaklejetike xchiʼuk ti jmoj tsobol chichʼik ta mukʼ li Jeovae (Lev. 25:23).

15. ¿Kʼusi mantal laj yal Jeova ta sventa li osil xchiʼuk li jnaklejetik tee?

¹⁵ Li chaʼtos mantal akʼbat Esekiel ta sventa li osil xchiʼuk li jnaklejetik tee patbat van tajek yoʼonton li buchʼutik chukbilik toʼox batele. Laj yaʼibeik smelolal ti tsta xrextoik skotol li buchʼutik chichʼik ta mukʼ Jeovae, mu ventauk mi jyanlumetik o batsʼi j-israeletik (Esd. 8:20; Neem. 3:26; 7:6, 25; Is. 56:3, 8). ¿Kʼusi yan laj yakʼ ta ilel li kʼusi laj yal Jeovae? Jaʼ ti parejo tsots skʼoplal chil li yajtuneltake xchiʼuk muʼyuk chjel-o li snopbene (kʼelo Ajeo 2:7). Taje tspat koʼontontik, mu ventauk mi liʼ chijnaki ta balumil o mi ta vinajel.

16, 17. 1) ¿Kʼusi chakʼ jchantik li kʼusi laj yal Jeova ta sventa li osil xchiʼuk li jnaklejetike? 2) ¿Kʼusi ta jkʼeltik li ta yan kapituloe?

¹⁶ ¿Kʼusi chakʼ jchantik li kʼusi laj yal Jeova ta sventa li osil xchiʼuk li jnaklejetike? Taje chakʼ kiltik ti skotol li yajtuneltak Jeova ta spʼejel balumile skʼan jmoj tsobolikuk, yuʼun mu snaʼ xtʼujvan li Jeovae. Jaʼ yuʼun, xi skʼan jakʼbe jbatike: «¿Mi chkakʼ persa ti jchanbe stalelal li Jeovae? ¿Mi chkichʼ ta mukʼ skotol ermanoetik ti mu ventauk stsʼunbalik, bu likemik tal o kʼu yelan xkuxlejalike?» (Rom. 12:10). Xijmuyubaj tajek ti chakʼ Jeova ti xij-och li ta osil ti xkoʼolaj ta jun paraisoe, yuʼun jaʼ noʼox xuʼ te xkichʼtik ta mukʼ Jeova ta sjunul koʼontontik xchiʼuk ti jkʼupintik li bendisionetik chakʼe (Gal. 3:26-29; Apok. 7:9).

¹⁷ Li ta yan kapituloe, ta jkʼeltik li xchantosal sprevail laj yil Esekiele: jaʼ ti te chchiʼinatik yuʼun Jeova li buchʼutik chukbilik toʼox batele xchiʼuk ta jkʼeltik batel li kʼusi chakʼ jchantike.

1, 2. 1) ¿Kʼu yuʼun laj yichʼ vokʼel komel li jsep osile? (Kʼelo li lokʼol ta spat livroe). 2) Li kʼusi laj yil Esekiele, ¿kʼu yuʼun patbat van tajek yoʼonton li buchʼutik chukbil batike?

LI SLAJEB kʼusi laj yil Esekiel ta sventa li jsep osil ti skʼan chʼakel komele, oy kʼusi chtun-o ta mas tsʼakal. Li jsep osil taje muʼyuk laj yichʼik akʼbel mi junuk snitilulal Israel, yuʼun laj yichʼ vokʼel komel sventa Jeova. Jech xtok, chalbe skʼoplal jun jteklum ti labal sba kʼu yelan laj yichʼ akʼbel sbie. Li kʼusi laj yil Esekiele patbat van tajek yoʼonton li buchʼutik chukbil toʼox batike, yuʼun te chchiʼinatik yuʼun Jeova mi sut ta slumalike.

² Lek la xchapbe skʼoplal Esekiel li osil ti vokʼbil sventa Diose. Mi la jkʼeltik batel li loʼil taje, te chkakʼtik venta ti tsots skʼoplal chkaʼitik li yajtunelutik Jeovae.

Vokʼbil chkom sventa xkʼot ta jsep chʼul osil xchiʼuk ta jteklum

3. Li osil la xchʼak Jeova ta voʼchʼake, ¿kʼusi sbitak xchiʼuk kʼusi chtun-o? (Kʼelo li rekuadro «Skʼan xachʼakik komel jsep osil ti vokʼbil sventa Diose»).

³ Li ta osil ti vokʼbil sventa Diose oy yan jsep osil ta yut ti 25 mil xukʼubil sjamlej ta norte xchiʼuk li ta sure, jech xtok, 25 mil xukʼubil sjamlej ta slokʼeb kʼakʼal xchiʼuk li ta smaleb kʼakʼale. Li osil taje jaʼ kuadrado ti jaʼ sbi: «Sjunul li osil ti vokʼbil sventa Diose» xchiʼuk yichʼoj chʼakel ta oxchʼak ti kʼatajtik yichʼoj pasele. Li jvokʼ osil ta akʼole jaʼ sventa li jlevietike; yan li ta oʼlole jaʼ chʼakbil sventa templo xchiʼuk paleetik. Li chaʼvokʼ osil taje jaʼ li jsep chʼul osile. Li yan jvokʼ osil ta olone jaʼ mas bikʼit xchiʼuk chʼakbil «sventa jmoj stunesik li jteklume» (Esek. 48:15, 20).

4. ¿Kʼusi chakʼ jchantik li osil ti vokʼbil sventa Jeovae?

⁴ ¿Kʼusi chakʼ jchantik li osil ti vokʼbil sventa Jeovae? Jech kʼuchaʼal laj xa jkʼeltik tale, baʼyel laj yichʼ chʼakel li jsep osil ti jaʼ sventa Diose, jaʼ tsʼakal to laj yichʼ chʼakbel yosilik li snitilultak Israele. Jaʼ jech laj yakʼ ta ilel Jeova ti tsots skʼoplal li jvokʼ osil taje, yuʼun jaʼ sventa yichʼobil ta mukʼ (Esek. 45:1). Ti kʼu yelan laj yichʼ chakʼel li osile, ¿kʼusi akʼbat xchanik li buchʼutik chukbil toʼox batike? Jaʼ ti skʼan baʼyel xakʼ ta xkuxlejalik li melel yichʼel ta mukʼ Jeovae. ¿Kʼusi ti mas tsots skʼoplal chkaʼi ta jkuxlejaltik eke? Jaʼ ti jchan Jvivliatike, ti xijbat ta tsobajeletike xchiʼuk ti jcholtik mantale. Mi jaʼ ta jchanbetik li Jeovae jaʼ baʼyel chkakʼ ta jkuxlejaltik li yichʼel ta mukʼe.

«Li jteklume te chkom ta oʼlol»

5, 6. 1) ¿Buchʼu xuʼ stunesik li jteklume? 2) ¿Kʼusi ti maʼuk skʼoplal li jteklume, xchiʼuk kʼu yuʼun?

⁵ (Kʼelo Esekiel 48:15). ¿Kʼusi smelolal li jteklum xchiʼuk li osil ta spat xokone? (Esek. 48:16-18). Li Jeovae xi laj yalbe Esekiel ta sventa li yav jteklume: «Li osil taje jaʼ chuʼunin li jteklum Israele» (Esek. 45:6, 7). Jaʼ yuʼun, li jteklum xchiʼuk li kʼusitik ta spat xokone maʼuk te skʼoplal li jsep chʼul osile o jech kʼuchaʼal laj yal li Diose «li jsep osil ti chachʼakik komel ta sventa Jeovae» (Esek. 48:9). Jaʼ yuʼun, jkʼeltik kʼusi chakʼ jchantik ta sventa li jteklume.

⁶ Li jteklume maʼuk skʼoplal li Jerusalen ti laj yichʼ chaʼmeltsanele xchiʼuk li templo tee. ¿Kʼu yuʼun? Yuʼun li ta jteklum laj yil Esekiele chʼabal junuk templo. Jech xtok, maʼuk skʼoplal jun jteklum ti la xchaʼta yav li ta Israele. ¿Kʼu yuʼun ti jech chkaltike? Yuʼun muʼyuk la smeltsanik junuk jteklum kʼalal sut ta slumalik li buchʼutik chukbilik toʼox batel mi jaʼuk li snitilulalik kʼuchaʼal laj yil Esekiele. Jech xtok, maʼuk skʼoplal jun jteklum ta vinajel. ¿Kʼu yuʼun? Yuʼun li osil ti bu laj yichʼ meltsanele muʼyuk chʼul, jaʼ xkaltik, maʼuk jsep osil ti chtun sventa teuk xichʼ ichʼel ta mukʼ li Diose (Esek. 42:20).

7. ¿Kʼusi jaʼ li jteklum laj yil Esekiele? ¿Kʼusi chakʼ ta aʼiel kʼalal jteklum xie? (Kʼelo li lokʼol ta slikeb kapituloe).

⁷ Vaʼun chaʼa, ¿kʼusi jaʼ li jteklum laj yil Esekiele? Jvules ta joltik ti jaʼ Esekiel laj yil li jteklum xchiʼuk osile (Esek. 40:2; 45:1, 6). Li Vivliae chal ti maʼuk batsʼi osil li kʼusi laj yichʼ ilele, jaʼ jech ta sventa li jteklum eke. ¿Kʼusi chakʼ ta aʼiel kʼalal jteklum xie? Jaʼ chakʼ ta aʼiel krixchanoetik ti lek chapal kʼusi tspasike. Jaʼ yuʼun, li jteklum laj yil Esekiel ti lek kuadradoe, xuʼ van jaʼ skʼan xal jtsop krixchanoetik ti lek chapal kʼusi tspasike.

8. ¿Bu tspas yabtelik li jtsop krixchanoetik taje, xchiʼuk kʼuxi jnaʼojtik?

⁸ ¿Bu tspas yabtelik li jtsop krixchanoetik taje? Li jteklume te oy li ta yut osil laj yil Esekiele. Jaʼ yuʼun, li kʼusitik lek chapal tspasike te chichʼ pasel ta yut steklumal Jeova ti bu tspasik li kʼusitik sventa mantale. ¿Kʼusi skʼan xal ti muʼyuk chʼul ti bu oy li jteklume? Chakʼ ta ilel ti maʼuk ta vinajel oye, yuʼun liʼ oy ta balumile. Skotol li kʼusitik lek chapal spasojik tal li jtsop krixchanoetik taje jaʼ sventa stabeik sbalil li jnaklejetik ti chichʼik ta mukʼ Jeovae.

9. 1) ¿Buchʼutik jaʼ skʼoplal ti lek chapal kʼusitik tspasik ta balumile? 2) ¿Kʼusi tspas Jesus kʼalal jaʼo yakal li Jmil Jabile?

⁹ ¿Buchʼutik jaʼ skʼoplal ti lek chapal kʼusitik tspasik ta balumile? Li buchʼu sbainoj jteklum laj yil Esekiele jaʼ li bankilale (Esek. 45:7). Maʼuk jlevi mi jaʼuk pale ti buchʼu sbainoj skʼelel li jteklume. Jaʼ yuʼun, taje chakʼ kiltik ti jaʼik li moletik ta tsobobbaile, maʼuk li buchʼutik tʼujbil chbatik ta vinajele. Li vaʼ ermanoetik ti ta slekil yoʼonton chchabivanike te skʼoplalik li ta yan chijetik ti bikʼit yakʼoj sbaike xchiʼuk ti chtunik ta stojolal li Ajvalil Kristoe (Juan 10:16). Kʼalal yakal li Ajvalilal ta Jmil Jabile, li Jesuse oy buchʼutik tstʼuj ta spʼejel balumil xchiʼuk tsbiiltas «ta bankilal j-abteletik» o moletik ti lek xtojobike (Sal. 45:16). Jaʼik li buchʼutik oy ta sbaik skʼelel li steklumal Dios kʼalal jaʼo yakal li Jmil Jabile xchiʼuk jaʼ chbeiltasatik yuʼun li Ajvalilal svaʼanoj Diose.

«Te oy li Jeovae»

10. ¿Kʼusi sbi li jteklume, xchiʼuk kʼu yuʼun ti jech sbie?

¹⁰ (Kʼelo Esekiel 48:35). Li jteklume jaʼ sbi: «Te oy li Jeovae». ¿Kʼu yuʼun ti jech sbi li jteklume? Yuʼun te oy li Jeovae. Kʼalal akʼbat yil Esekiel li jteklum ti te oy ta oʼlol osile, xkoʼolaj ti xi ch-albatik yuʼun Jeova li buchʼutik chukbilik toʼox batele: «Ta jchiʼinoxuk yan velta». ¡Patbat van tajek yoʼontonik!

11. Li kʼusi laj yil Esekiele, ¿kʼusi chakʼ jchantik ta sventa li jteklum xchiʼuk li sbie?

¹¹ ¿Kʼusi chakʼ jchantik li albil kʼop laj yil Esekiele? Li sbi jteklume o li kʼusitik xchapanoj Jeovae chakʼbe yil li tukʼil yajtuneltak ti te chchiʼinatik-o ta sbatel osil liʼ ta balumile. Li sbi jteklume oy kʼusi tsots skʼoplal chakʼ jchantik, yuʼun li jteklume maʼuk laj yichʼ pasel sventa xichʼ akʼbel tsots yabtel junuk krixchano, yuʼun jaʼ sventa xichʼ chʼunel li slekil mantaltak Jeovae. Kalbetik jun skʼelobil, li Jeovae maʼuk yakʼoj akʼo snop stuk kʼu yelan chchʼakik osil li buchʼutik tsots yabtelike. ¿Kʼusi oy ta yoʼonton Jeova ti akʼo spasike? Jaʼ ti xichʼik ta mukʼ li abtelal yakʼanojbe yajtuneltak akʼo mi muʼyuk mas tsots skʼoplal yilel (Prov. 19:17; Esek. 46:18; 48:29).

12. 1) ¿Kʼusi xuʼ jchantik ta sventa li jteklume, xchiʼuk kʼusi chakʼ kaʼitik? 2) ¿Kʼusi tsots skʼoplal ch-akʼbat xchanik li moletike?

¹² ¿Kʼusi yan xuʼ jchantik ta sventa li jteklum ti jaʼ sbi: «Te oy li Jeovae»? Li jteklumetik ta voʼnee lek joybil ta muroetik ti chʼabal ep stiʼtake. Yan li jteklum laj yil Esekiele oy 12 stiʼtak (Esek. 48:30-34). Ta skoj ti oy oxib stiʼtak ta jujun xokon li jteklum ti kuadradoe, chakʼ ta aʼiel ti oy ta yoʼonton tskoltaik li yajtuneltak Dios li buchʼutik akʼbil yabtelik yuʼun Jeovae. Jech xtok, ti oy 12 stiʼtak li jteklume chakʼ ta aʼiel ti jamal sventa skotol «li jteklum Israele» (Esek. 45:6). Taje oy kʼusi tsots skʼoplal ch-akʼbat xchanik li moletike: li Jeovae tskʼan ti stakʼikuk kʼoponel xchiʼuk ti ta slekiluk yoʼonton tskoltaik skotol li buchʼutik te nakalik ta osil ti xkoʼolaj ta jun paraisoe.

Te ch-ochik sventa xichʼik ta mukʼ Dios xchiʼuk chkoltavanik li ta jteklume

13. Li krixchanoetik laj yalbe skʼoplal li Jeovae, ¿kʼusitik abtelal tspasik?

¹³ Jchaʼkʼelbetik skʼoplal li osil laj yichʼ chʼakel ti laj yil Esekiele. Li Jeovae te laj yalbe skʼoplal krixchanoetik ti jeltos kʼusitik te tspasike. Li paleetik ti chtunik ti bu chʼule skʼan xakʼik milbil matanaletik xchiʼuk chnopajik ta stojolal Jeova yoʼ spasbeik li kʼusi tskʼane. Li jlevietik ti chtunik ta temploe jaʼ oy ta sbaik «li kʼusitik skʼan pasel tee xchiʼuk sventa spasik skotol li abtelaletik tee» (Esek. 44:14-16; 45:4, 5). Jech xtok, li Esekiele laj yil ti oy krixchanoetik ti te nopol ch-abtejik li ta jteklume. ¿Buchʼutik taje?

14. ¿Mi oy kʼusi tsvules ta joltik li buchʼutik te nopol ch-abtejik ta jteklume?

¹⁴ Li buchʼutik te nopol ch-abtejik ta jteklume likemik tal ta skotol snitilulal Israel xchiʼuk te oyik sventa xkoltavanik. Te ch-abtejik ta osiltik xchiʼuk «li kʼusitik chlokʼ tee jaʼ tslajesik li j-abteletik te ta jteklume» (Esek. 48:18, 19). Ti kʼu yelan chapanbil taje, ¿mi oy kʼusi tsvules ta joltik li avie? Oy. Skotol li jnaklejetik ta osil ti xkoʼolaj ta jun paraisoe oy ta sbaik spasel abtelaletik sventa skoltaik li yermanotak Kristo ti tʼujbil chbatik ta vinajele. Jech xtok, oy ta sbaik skoltael li «epal krixchanoetik» ti yichʼojik tʼujel yuʼun Jeova sventa tsbeiltasutik xchiʼuk ti xakʼbutik mantaletike (Apok. 7:9, 10). ¿Kʼuxi chkakʼtik ta ilel ti ta jkolta jbatike? Jaʼo kʼalal ta sjunul koʼonton ta jchʼuntik li kʼusi chalbutik li tukʼil xchiʼuk pʼijil mosoile.

15, 16. 1) ¿Kʼusi to yan chakʼ jchantik li kʼusi laj yil Esekiele? 2) ¿Kʼusi abtelaletik xuʼ jpastik?

¹⁵ Oy to yan kʼusi chakʼ jchantik li kʼusi laj yil Esekiel ti te tsakal skʼoplal li abtelal ta jpastik ta stojolal Jeovae. ¿Kʼusitik abtelal taje? Li Jeovae laj yal ti te ch-abtejik ta yamakʼil templo junantik j-israeletik li 12 ta vokʼ nitilulal ti maʼuk jlevietike, yan li jlome te ch-abtejik ta yaxaltik li ta jteklume. ¿Kʼusi abtelal te tspasik? Li ta yamakʼil stemplo Jeovae, skotol li nitilulale ch-ochik batel sventa xakʼik milbil matanaletik yoʼ xichʼik ta mukʼ li Jeovae (Esek. 46:9, 24). Li ta osil ti te oy ta sjoylejal jteklume chtal koltavanikuk skotol li nitilulaletik sventa xabtelanik li osile. ¿Kʼusi chakʼ jchantik ta stojolal li j-abteletike?

¹⁶ Li avie, li buchʼutik te skʼoplalik li ta epal krixchanoetike xuʼ skolta sbaik ta spasel li abtelaletik jech kʼuchaʼal akʼbat yil li Esekiele. Xkoʼolaj ti te chkichʼtik ta mukʼ Jeova li ta templo sventa jkʼupil kʼoptatike (Apok. 7:9-15). ¿Butik ta jpasik taje? Jaʼo kʼalal ta jcholtik mantale, kʼalal chkakʼ jloʼiltik ta jujun tsobajele xchiʼuk kʼalal chijkʼejine. Yuʼun tsots skʼoplal chkiltik ti chkichʼtik ta mukʼ li Jeovae (1 Kron. 16:29). Jech xtok, ep buchʼutik tskolta sbaik ta s-organisasion Jeova ta spasel jeltos abtelaletik. Kalbetik skʼoplal liʼe, tskolta sbaik ta svaʼanel xchiʼuk skʼelel Salonetik sventa Tsobobbail, Beteletik xchiʼuk yan kʼusitik ti chichʼ pasel ta s-organisasion Jeovae. Yantik xtoke chakʼik matanal takʼinetik. Kʼalal jech tspasike xkoʼolaj ti chabtelanik li osil «sventa xichʼ mukʼibtasbel skʼoplal» li Diose (1 Kor. 10:31). Ta sjunul yoʼonton tspasik li abtelaletike, yuʼun snaʼojik ti «lek tajek chil Dios li milbil matanaletik taje» (Ebr. 13:16). ¿Mi yakal ta jkolta jbatik ti bu kʼalal xuʼ kuʼuntike?

Oy achʼ vinajel xchiʼuk jun achʼ balumil ti jmalaojtike

17. 1) Li kʼusi laj yil Esekiele, ¿mi oy to yan bu chkʼot ta pasel? 2) ¿Buchʼutik tstabeik sbalil ta Jmil Jabil li abtelal tspasik li buchʼutik tʼujbilik ta balumile?

¹⁷ Li kʼusi laj yil Esekiel ta sventa li jsep osil ti vokʼbil sventa Diose, ¿mi oy to yan bu chkʼot ta pasel? Oy. Nopo ta sventa liʼe: li osil laj yil Esekiel ti «jsep chʼul osil» sbie jaʼ te xkom ta oʼlol «li stemplo Jeovae» (Esek. 48:10). Taje tspat koʼontontik, yuʼun mu ventauk bu chijnakiutik mi nel xa ox li Armajedone, te chchiʼinutik-o li Jeovae (Apok. 21:3). Kʼalal jaʼo xyaket li Jmil Jabile, li buchʼutik tʼujbilik sventa xchabibeik li steklumal Diose ta sbeiltasik xchiʼuk ta slekil yoʼontonik tskoltaik li buchʼutik te skʼoplalik li ta jun achʼ balumile, jaʼ xkaltik, li krixchanoetike (2 Ped. 3:13).

18. 1) Li buchʼutik tʼujbilik ta balumile, ¿kʼu yuʼun xuʼ jchʼuntik ti jaʼ tspasik li kʼusi chal Ajvalilale? 2) ¿Kʼuxi tspat koʼontontik li sbi jteklume?

¹⁸ Li jteklum laj yil Esekiel ti jaʼ skʼoplal li buchʼutik tʼujbilik sventa xchabibeik li steklumal Diose jaʼ tspasik li kʼusi chal li Ajvalilal yuʼune. ¿Kʼu yuʼun ti jech chkaltike? Yuʼun li jun jteklum ta balumil ti oy 12 stiʼtak chal Vivliae jaʼ skʼelobil li «Achʼ Jerusalen» ti oy 12 stiʼtak ti te oy ta vinajele, taje jaʼ skʼoplal li 144 mil ti ch-ajvalilajik xchiʼuk Kristo ta jelavele (Apok. 21:2, 12, 21-27). Li buchʼutik tʼujbilik sventa xchabibeik li steklumal Diose chchʼunik li kʼusi chal li Ajvalilal yuʼun Diose xchiʼuk tskʼelik ti jechuk xichʼ pasele. Li jteklum ti jaʼ sbi: «Te oy li Jeovae», tspat tajek koʼontontik, yuʼun chakʼ ta ilel ti te oy-o ta sbatel osil li melel yichʼel ta mukʼ Dios li ta Paraisoe. ¡Toj kʼupil sba li kʼusi jmalaojtike!