XCHANOBIL 37
¿Kʼusi chal Vivlia ta sventa li abtelal xchiʼuk takʼine?
¿Mi oy avatoj avoʼonton ta skoj ti chʼabal atakʼin o ti chʼabal avabtele? Vokol onoʼox chkaʼitik ti jsaʼtik li kʼusi chtun kuʼuntike xchiʼuk ti xkichʼtik ta mukʼ Jeova jech kʼuchaʼal tskʼane. Li Vivliae chakʼbutik lekil tojobtaseletik ti xuʼ skoltautike.
1. ¿Kʼusi chal Vivlia ta sventa li abtelale?
Li Diose oy ta yoʼonton ti jkʼupin li kabteltike. Xi chal li Vivliae: «Ti kʼusi mas to lek xuʼ spas li jun vinike jaʼ ti [...] skʼupin li kʼusi tsots laj yabtelane» (Eklesiastes 2:24). Li Jeovae baxbol ta abtel. Kʼalal ta jchanbetik Jeova xchiʼuk ti baxbolutik ta abtel eke, jaʼ yakal ta jpastik li kʼusi lek chile xchiʼuk jun no’ox koʼontontik.
Tsots onoʼox skʼoplal ti xij˗abteje, pe skʼan ti mu jaʼuk xbat ta koʼontontik ti jaʼ xa muʼyuk chkichʼtik ta mukʼ li Jeovae (Juan 6:27). Mi jaʼ mas tsots skʼoplal chkil ta jkuxlejaltik ti xijtun ta stojolale, jamal chal ti chakʼbutik li kʼusi chtun kuʼuntike.
2. ¿Kʼusi skʼan xal ti oy noʼox spʼisol skʼan xkiltik li takʼine?
Li Vivliae chal ti chpojvan li takʼine, pe tspʼijubtasutik xtok ti maʼuk chakʼ jmuyubajeltik ta melele (Eklesiastes 7:12). Jech oxal, xi tspʼijubtasutike: «Maʼukuk me batem ta avoʼontonik skʼanel takʼin [...], muyubajanik noʼox me ta skoj ti kʼusi oy avuʼunik avie» (kʼelo Ebreos 13:5). Kʼalal xijmuyubaj noʼox ta skoj li kʼusi oy kuʼuntike, muʼyuk xa ta jsaʼtik mas. Jech xtok, muʼyuk me bu jecheʼ noʼox ta jtikʼ jbatik ta ilil (Proverbios 22:7). Maʼuk noʼox, yuʼun tskoltautik sventa mu jtikʼ jbatik ta tajimoletik o ta spasel yan kʼusitik ti mu persauk jmil jbatik ta abtel sventa xijpas ta jkʼuleje.
3. ¿Kʼuxi xuʼ jtunes lek li kuni takʼintike?
Li Jeovae jaʼ jun Dios ti toj lek yoʼontone. Kʼalal chkakʼtik ta ilel slekil koʼontontik xchiʼuk ti muʼyuk kʼusi ta jalanbetik li yantike, jaʼ jech ta jchanbetik stalelal (1 Timoteo 6:18). Jtos ti kʼuxi xuʼ lek jtunes li jtakʼintike jaʼ ti jkolta jbatik ta stojel li kʼusitik chtun ta tsobobbaile xchiʼuk ti jkoltatik li buchʼutik chtun yuʼunike, mas to li kermanotaktike. Li kʼusi mas tsots skʼoplal chil Jeovae maʼuk ti kʼu yepal chkakʼtike, jaʼ li kʼusi tstij koʼontontik yakʼele. Mi ta sjunul koʼontontik chkakʼtike, xijmuyubaj noʼox xchiʼuk chmuyubaj kuʼuntik li Jeovae (kʼelo Echos 20:35).
JCHANTIK TO BATEL MAS
Jkʼeltik batel kʼusi sbalil ta jtatik kʼalal oy noʼox spʼisol chkiltik li abtelale xchiʼuk kʼalal jun noʼox koʼontontik ta sventa li kʼusi oy kuʼuntike.
4. Lek skʼoplal chkom avuʼun Jeova mi baxbolote
Kʼalal lek xkil jbatik xchiʼuk li Jeovae, tskoltautik sventa jnaʼtik kʼu yelan skʼan xkiltik li abtelale. Kʼelik li VIDEOE xchiʼuk albeik skʼoplal li sjakʼobiltak liʼe:
¿Kʼusi lek chavil ti k’u yelan chil yabtel li Jasone?
¿Kʼusi la spas sventa ta spʼisoluk noʼox x˗abteje?
Kʼelik Kolosenses 3:23, 24 xchiʼuk albeik skʼoplal li sjakʼobil liʼe:
¿Kʼu yuʼun tsots skʼoplal ti ‹ta sjunuluk koʼontontik› xij˗abteje?
Tsots onoʼox skʼoplal ti xij˗abteje, pe skʼan ti mu jaʼuk xbat ta koʼontontik ti jaʼ xa muʼyuk chkichʼtik ta mukʼ li Jeovae.
5. Junuk noʼox koʼontontik ta sventa li kʼusi oy kuʼuntike
Ep krixchanoetike tstsob tajek stakʼinik ti bu kʼalal xuʼ yuʼunike, pe li Vivliae jelel kʼusi chalbutik. Kʼelik 1 Timoteo 6:6-8 xchiʼuk albeik skʼoplal li sjakʼobil liʼe:
¿Kʼusi tojobtasel chalbutik li Vivliae?
Xuʼ xijmuyubaj akʼo mi juteb noʼox kʼusi x˗ayan kuʼuntik. Kʼelik li VIDEOE xchiʼuk albeik skʼoplal li sjakʼobil liʼe:
¿Kʼu yuʼun xmuyubajik noʼox avil li utsʼ alaliletik akʼo mi muʼyuk mas stakʼinike?
Pe ¿kʼusi xuʼ jpastik mi ta jkʼantik to mas mi oy xa kuʼuntik ne? Li Jesuse laj yal ta jun loʼil ti xibal sba mi jech ta jnoptike. Kʼelik Lukas 12:15-21 xchiʼuk albeik skʼoplal li sjakʼobil liʼe:
¿Kʼusi chakʼ achan li kʼusi laj yal Jesuse? (Kʼelik li versikulo 15).
Kʼelik Proverbios 10:22 xchiʼuk koʼoltasik xchiʼuk 1 Timoteo 6:10. Mi laje, albeik skʼoplal li sjakʼobiltak liʼe:
¿Kʼusi ti mas tsots skʼoplale: mi jaʼ ti chkamigointik li Jeovae o mi jaʼ ti ep jtakʼintike? ¿Kʼu yuʼun ti jech chavale?
¿Kʼusitik xuʼ jnuptantik mi ta jkʼantik to mas jtakʼintike?
6. Li Jeovae chakʼ li kʼusi chtun kuʼuntike
Kʼalal chʼabal lek kabteltik xchiʼuk chʼabal lek jtakʼintike, xuʼ me skoltautik sventa xkakʼtik venta kʼu to yepal jpatoj koʼontontik ta stojolal li Jeovae. Jkʼeltik avil kʼusi xuʼ jpastik mi jaʼ jech la jnuptantike. Kʼelik li VIDEOE xchiʼuk albeik skʼoplal li sjakʼobiltak liʼe:
¿Kʼusitik la snuptan avil li ermanoe?
¿Kʼusi la spas sventa teuk stsaket batele?
Kʼelik Mateo 6:25-34 xchiʼuk albeik skʼoplal li sjakʼobil liʼe:
¿Kʼusi tspas Jeova ta stojolal li buchʼutik baʼyel tsaʼik li Ajvalilal yuʼune?
JUNANTIKE XI CHALIKE: «Skʼan tsots xi˗abtej sventa jmakʼlin li kutsʼ kalale. Jaʼ yuʼun, mu xuʼ kuʼun xibat jujun xemana li ta tsobajele».
¿Kʼusi tekstoal chakʼ avil ti skʼan jaʼuk mas tsots skʼoplal xkiltik li yichʼel ta mukʼ Jeovae?
¿KʼUSI LA ACHAN?
Tsots onoʼox skʼoplal ti xij˗abteje xchiʼuk ti oyuk kuni takʼintike, pe skʼan mu smakutik sventa xijtun ta stojolal li Jeovae.
Svulesobil ta joltik
¿Kʼusi xuʼ skoltaot sventa ta spʼisoluk noʼox xavil li abtelale?
¿Kʼuxi chatabe sbalil mi jun noʼox avoʼonton ta skoj li kʼusi oy avuʼune?
Li Jeovae chal ti chakʼbe kʼusi chtun yuʼun li yajtuneltake, ¿kʼuxi xuʼ xavakʼ ta ilel ti apatoj avoʼonton ta stojolale?
XUʼ TO XAKʼEL LIʼE
Kʼelavil mi chal Vivlia mi chopol li takʼine.
«¿Mi jaʼ ta smul takʼin li kʼusitik chopol chkʼot ta pasele?» (Xuʼ te xata ta jw.org)
Kʼelavil kʼusi skʼan stij koʼontontik kʼalal chkakʼtik matanale.
«¿Kʼusi chal Vivlia ta sventa li yakʼel kʼusi x-ayan kuʼuntike?» (Xuʼ te xata ta jw.org)
¿Mi chopol van ti xijtajinutik ta takʼine?
«Li kʼusi chal Vivliae: Li tajimol ta takʼine» (¡Vikʼiluk me jsatik!, marso ta 2015)
Kʼelavil kʼu yuʼun la sjel xkuxlejal jun vinik ti ch˗elkʼaj toʼox xchiʼuk ti chtajin ta takʼine.
«Ta jk’upin to’ox tajek li anilajel ta ka’e» (Li Jkʼel-osil ta toyole, 1 yu‘un noviembre ta 2011)