Skotoluk me ora oyuk ta joltik li Jeovae
«Scotol ora liʼ oy o ta jtojol li Mucʼul Diose.» (SAL. 16:8.)
1. ¿Kʼuxi ta jtabetik sbalil ti chkojtikinbetik li sloʼilal xkuxlejal krixchanoetik albil ta Vivliae?
LI Tsʼibetike labal sba chalbe skʼoplal ti kʼuyelan xil sbaik xchiʼuk Dios li krixchanoetike. Te chalbe skʼoplal epal krixchanoetik ti la skolta sbaik sventa xkʼot ta pasel li kʼusi tskʼan yoʼonton Diose. Melel onoʼox chaʼa, li sloʼilalik tsʼibabil komel ta Vivliae maʼuk sventa chʼayob oʼontonal, moʼoj, yuʼun jaʼ sventa chi snopajesutik mas ta stojolal Dios (Sant. 4:8).
2, 3. ¿Kʼu yelan skʼan xkaʼibetik smelolal li kʼusi chal Salmo 16:8?
2 Jtekeltik oy kʼusi ep ta jchantik ta sventa li krixchanoetik ti mas ojtikinbil ta Vivliae, jech kʼuchaʼal Abraham, Sara, Moisés, Rut, David, Ester xchiʼuk li jtakbol Pabloe. Pe kʼelavil, oy yan krixchanoetik ti jutuk noʼox ojtikinbilik ti jech ep kʼusi xuʼ jchanbetik eke. Mi ta jnopbetik lek skʼoplal li kʼusi chal Vivlia ta sventaik taje, ta me stij koʼontontik ta xchanbel li jtsʼibajom yuʼun Salmo ti xi laj yale: «Scotol ora liʼ oy o ta jtojol li Mucʼul Diose, jech muʼyuc bochʼo xuʼ chisjipun ta lum, yuʼun liʼ oy ta jbatsʼicʼob[e]», xi (Sal. 16:8). Pe, ¿kʼusi smelolal taje?
3 Li ta pas kʼope, ta sbatsʼi kʼob onoʼox tstom yespada li soltaroe, yan li smakobbaile jaʼ ta stsʼet kʼob tstsak, jaʼ jech jamal chkom li xokon ta sbatsʼi kʼobe. Pe mi chmakbat yuʼun yan xchiʼil li xokon taje, jaʼ jech pojbil-o. Jaʼ jech chi spojutik li Jeova ek mi ta jtsaktik ta mukʼe xchiʼuk mi ta jchʼunbetik li kʼusi chale. Tana un, ta jkʼeltik jayibuk loʼiletik ta Vivlia ti tstsatsubtas xchʼunel koʼontontike xchiʼuk ti tskoltautik sventa «scotol ora liʼ oy o ta [jtojolaltik] li Mucʼul Diose», jaʼ xkaltik, ti oyuk-o ta joltike.
Tstakʼ j-orasiontik li Jeovae
4. Albo junuk skʼelobil ta Vivlia ti chakʼ ta ilel ti tstakʼ j-orasiontik li Diose.
4 Mi oy-o ta joltik li Jeovae ta me stakʼ li j-orasiontike (Sal. 65:2; 66:19). Jun skʼelobile jaʼ li yajtunel Abraham ti mas oy sjabilale, ti jaʼ van ta melel li Eliezere. Li vinik taje bat ta Mesopotamia balumil, yuʼun la xchʼunbe smantal yajval ti akʼo xbat sabe tal yajnil Isaaque, jun ants ti chtun ta stojolal Jeovae. La skʼopon Dios, la skʼanbe koltael, vaʼun kʼalal laj yil ti tskʼan chakʼbe yuchʼ yoxoʼ kameyoetik li Rebecae, te laj yakʼ venta ti laj yichʼ takʼbel li s-orasione. Ta sventa ti jaʼ jun vinik ti lek xaʼi spasel orasione la sta li buchʼu jaʼ chkʼot ta skʼanben ajnil Isaaque (Gén. 24:12-14, 67). Akʼo mi mu jechuk tsots skʼoplal kabtel akʼbilutik kʼuchaʼal li yajtunel Abrahame, ¿mi mu skʼanuk jech jpat sjunul koʼontontik ta stojolal Jeova ti tstakʼ j-orasiontike?
5. ¿Kʼuxi jnaʼojtik ti oy stakʼobil li orasion akʼo mi jlikel noʼox xchiʼuk akʼo mi kʼun noʼox chichʼ pasele?
5 Bateltike jlikel noʼox ta jpastik orasion ta skoj ti oy kʼusi ta jnuptantike. Jun veltae, li ajvalil ti likem ta Persia ti Artajerjes sbie la skʼan la snaʼ kʼu yuʼun chat yoʼonton li j-akʼ yaʼyel tsʼusub yuʼune, ti Nehemías sbie. Kʼalal yakal chloʼilajike xi la sjakʼbee: «¿Cʼusi chacʼan un?», xut. Vaʼun, xi laj yal li Nehemiase: «Lic jcʼopan ta coʼnton li Dios ta vinajele», xi. Li orasion la spase jlikel noʼox van xchiʼuk kʼun noʼox van laj yal, pe li Jeovae la stakʼ. Li Nehemiase laj yichʼ koltael yuʼun li ajvalil sventa tsvaʼanbe skoraltonal o smuroal li Jerusalene (kʼelo Nehemías 2:1-8). Jech kʼuchaʼal chkiltike, akʼo mi jlikel noʼox xchiʼuk mi kʼun noʼox chichʼ pasel li orasione oy stakʼobil.
6, 7. 1) Ta sventa li spasel orasione, ¿kʼusi la xchanubtasutik komel li Epafrase? 2) ¿Kʼu yuʼun skʼan jpastik orasion ta stojolal yantik?
6 Li Vivliae chal xtok ti jkʼoponbe jbatik Diose, akʼo mi mu skotoluk velta chkichʼtik takʼbel ta ora li j-orasiontike (Sant. 5:16). Jech kʼuchaʼal liʼe, li Epafrase «ti jun yoʼnton chtun yuʼun Cristo[e]», la spasilan orasion ta stojolal li xchiʼiltak ta chʼunolajele. Kʼalal te ta Roma li Pabloe xi la stsʼibae: «Chabanuc xayalboxuc tal li Epafrase, jaʼ li achiʼilique, jaʼ li yajtunel Cristoe. Scotol cʼacʼal yacʼoj persa tscʼopan Dios ta atojolic, yuʼun tscʼan ti acʼo junuc avoʼntonic o ta stojol Diose, ti acʼo tsatsubanic leque, xchiʼuc ti acʼo anaʼic lec scotol cʼusi tscʼan Diose. Vuʼun quiloj jtuc ti solel oyoxuc ta yoʼntone, xchiʼuc oy ta yoʼnton noxtoc li jchʼunolajeletic ta lum Laodiceae, xchiʼuc ta lum Hierapolise», xi (Col. 1:7; 4:12, 13).
7 Li lum Hierápolis, Laodicea xchiʼuk Colosase te onoʼox jmoj oyik li ta yosilal Asia Menore. Li ta Hierapolise te jmoj nakalik xchiʼuk yajtsʼaklomtak Cristo li buchʼutik chichʼik ta mukʼ li jecheʼ meʼ dios Cibelese. Li ta Laodiceae jaʼ batem-o yoʼontonik li saʼel kʼulejale. Yan li ta Colosase jaʼ xibal sba li chanubtasel yuʼun krixchanoetike (Col. 2:8). Muʼyuk bu labal chkaʼitik chaʼa ti chat yoʼonton ta skʼoponbel Dios li ermanoetik ta slumal li Epafrase, ti te likem ta Colosase. Manchuk mi muʼyuk chal Vivlia kʼuyelan takʼbat li s-orasione, muʼyuk onoʼox bu xikta sba ta spasel orasion ta stojolal li yermanotake. Skʼan jech ta jpasilantik orasion ek ta stojolal li kermanotaktike. Akʼo mi muʼyuk bu ta jtikʼ jbatik ta xkuxlejal li yantike, yikʼaluk van jnaʼojtik ti yakal chil vokol li kutsʼ kalaltike o li kamigotaktike. Jtos ti kʼuyelan xuʼ jkoltatike jaʼ ti jkʼoponbetik Dios ta stojolalike. Lek tajmek kʼusi kʼot ta pasel ta stojolal Pablo li orasion la spas yermanotake, li orasion ta jpastik eke xuʼ me jech lek kʼusi xkʼot ta pasel yuʼun ta stojolal yantik (2 Cor. 1:10, 11).
8. 1) ¿Kʼuxi jnaʼojtik ti tsots skʼoplal chilik orasion li moletik ta Efesoe? 2) ¿Kʼu yelan skʼan xkiltik li orasione?
8 ¿Mi ojtikinbilutik kʼuchaʼal jun krixchano ti tsots skʼoplal chkiltik li spasel orasione? Kʼalal la stsob sbaik xchiʼuk moletik ta Éfeso li Pabloe, «la squejan sba scotolic; la scʼopanbe Dios ta stojolic». Laj une «iliquic ta oqʼuel scotolic; la smeyic li Pabloe, la stsʼutsʼic. Batsʼi ep laj yat yoʼntonic ta sventa ti iʼalbatic ti muʼyuc xa ta xilbeic sat yan veltae» (Hech. 20:36-38). Mu jnabetik sbi li moletik taje, pe li kʼusi jnaʼojtike jaʼ ti jaʼ viniketik ti tsots skʼoplal chilik li orasione. Li voʼotik eke skʼan me jaʼ jun mukʼta matanal xkiltik spasel li orasione. Tukʼuk-o koʼontontik, «acʼo [jtoy jkʼobtik] ta stojol Dios», yuʼun jnaʼojtik ti tstakʼ j-orasiontik li jTotik ta vinajele (1 Tim. 2:8).
Jchʼunbetik me ta skotolal li Diose
9, 10. 1) ¿Kʼusi toj lek xuʼ jchanbetik li stsebetak Zelofehade? 2) ¿Kʼusi xuʼ xchanbeik li j-israel tsebetik li jchʼunej mantal kerem-tsebetik yajtsʼaklomtak Cristo ti chʼabal snup xchiʼilike?
9 Mi skotol ora oy ta joltik li Jeovae, ta me jchʼunbetik ta skotolal; vaʼun ta me xkichʼtik epal bendision (Deu. 28:13; 1 Sam. 15:22). Jech ta melel, skʼan me mu xchʼay ta joltik xchʼunbel smantal li Jeovae. Jnoptik avaʼiik li stalelal laj yakʼik ta ilel li svoʼobal stsebetak Zelofehade, ti jaʼo kuxiik ta skʼakʼalil Moisese. Ti kʼuyelan stalelal li j-israeletike jaʼ ti jaʼ chiktabeik komel kʼusitik yuʼunik li skeremike, maʼuk li stsebike. Pe ta skoj ti chʼabal toʼox skerem kʼalal icham li Zelofehade, laj yal Jeova ti jaʼ akʼo yakʼbeik li stsebetake. Pe oy kʼusi skʼan stsakik ta mukʼ: jaʼ noʼox stakʼ xnupunik xchiʼuk li viniketik ta jvokʼ nitilulal yuʼun Manasese, sventa mu xjelav echʼel ta yan jvokʼ nitilulal li kʼusi yuʼunike (Núm. 27:1-8; 36:6-8).
10 Li stsebetak Zelofehade snaʼojik ta melel ti lek kʼusi chkʼot ta pasel mi ta xchʼunbeik li smantal Diose. Li Vivliae xi chale: «Li Maala, Tirsa, Hogla, Milca, xchiʼuc Noae, jaʼ li stsebetic Zelofehade, la spasic jech chac cʼu chaʼal albil yuʼun Mucʼul Dios li Moisese. Jaʼ noʼox la smalinic xnichʼon sjuntotic ta sventa stotic, jaʼ smomnichʼnab li Manasés xnichʼon Josee. Jech li spuculal osilique te noʼox icom o ta stojolic li jchop bu liquem stotique», xi (Núm. 36:10-12). Li jchʼunej mantal antsetik taje la xchʼunik li kʼusi chal Jeovae (Jos. 17:3, 4). Li yajtsʼaklomtak Cristo ti yijik xa ta mantal ti chʼabal snup xchiʼilik avi eke jaʼ jech tspasik: spatoj yoʼontonik ta stojolal Dios xchiʼuk chchʼunbeik smantal ti jaʼ noʼox chnupun xchiʼukik li buchʼu «xchʼunoj Cajvaltique» (1 Cor. 7:39).
11, 12. ¿Kʼuxi laj yakʼ ta ilel ti spatoj yoʼonton ta stojolal Dios li Calebe?
11 Jech noxtok, skʼan jchanbetik li Calebe, yan j-israel vinik ti la xchʼunbe Jeova ta skotolale (Deu. 1:36). Kʼalal laj yichʼ koltael lokʼel ta Egipto li steklumal Israel ta svaklajunebal siglo kʼalal maʼuk toʼox jkʼakʼaliltike, li Moisese la stak batel lajchaʼvoʼ jpaʼivanejetik ta Canaán. Pe ta skotolik taje, jaʼ noʼox chaʼvoʼik ti laj yalbeik krixchanoetik ti akʼo spat yoʼontonik ta stojolal Jeovae xchiʼuk ti x-ochik li ta balumil taje, jaʼ li Josué xchiʼuk Calebe (Núm. 14:6-9). Te van 40 jabiluk ta mas tsʼakale, li Caleb xchiʼuk Josuee —ti jaʼ itʼujat yuʼun Dios ta sbeiltasel jteklum sventa x-ochik li ta Albil Balumile— kuxulik-o, tukʼ yakʼoj sbaik ta stojolal Jeova. Yan li lajuneb jpaʼivanejetike, yaʼeluke chamik ti kʼalal ixanav 40 jabil ta taki xokol balumil li Israele (Núm. 14:31-34).
12 Ta sventa ti kuxul ikom li ta xanbal taje, li Calebe xi laj yal ta sat Josuee: «Li vuʼune jʼechʼel la jchʼun o li mucʼul Dios cuʼuntique», xi (kʼelo Josué 14:6-9). Kʼalal 85 xaʼox jabil yichʼoje, laj yal ti tskʼan li toyolaltik ti albil onoʼox yuʼun Jeovae, manchuk mi oy toʼox te mukʼtik lumetik ti lek tsotsik ti te nakajtik li yajkontratak Israele (Jos. 14:10-15).
13. ¿Kʼusi ta jpastik akʼo mi oy jvokoltik sventa lek chilutik li Diose?
13 Mi «jʼechʼel jun [koʼontontik] ta stojol li mucʼul Diose», ta me xi skoltautik, jech kʼuchaʼal la skolta li tukʼil xchiʼuk jchʼunej mantal Calebe. Jaʼ jech, manchuk mi jtatik makel ta be xchiʼuk vokoliletik, pe mi ta jchʼunbetik ta skotolal li kʼusi chal Jeovae, lek me ta xilutik. Pe li xanbal ta sbe Dios ta sjunul jkuxlejaltik jech kʼuchaʼal la spas Calebe, mu toj kʼunuk. Jech kʼuchaʼal liʼe, li ajvalil Salomone lek tajmek la slikes li ajvalilal yuʼune, pe kʼalal imalub echʼele loʼlaat yuʼun yajniltak ta yichʼel ta mukʼ jecheʼ diosetik, jaʼ yuʼun «muc tucʼuc la spas sba ta stojol Mucʼul Dios jech chac cʼu chaʼal li Davide, jaʼ li stote» (1 Rey. 11:4-6). Jaʼ yuʼun chaʼa, jchʼunbetik me ta skotolal li Diose xchiʼuk oyuk-o me ta joltik, manchuk mi jnuptantik kʼusiuk vokolil.
Skotoluk me ora jpat koʼontontik ta stojolal Jeova
14, 15. ¿Kʼuxi chchanubtasutik li sloʼilal Noemí ti skʼan jpat koʼontontik ta stojolal Diose?
14 Skʼan me jpat koʼontontik ta stojolal Dios, mas to mi yuʼun mu nabajuk chkiltik li kʼusi chtal okʼom-chaʼej ti xuʼ van chkat-o koʼontontike. Jnoptik avaʼiik ta stojolal Noemí, ti kʼalal jaʼo te oy ta Moab ti icham smalal xchiʼuk li chaʼvoʼ yole. Kʼalal isut batel ta Judae, xi laj yat yoʼonton li meʼel ants taje: «Mu xa xavalbicun Noemí [«xcuxet yoʼnton chcʼopoj», tsʼib ta yok vun]. Mara [«chʼa», tsʼib ta yok vun] xavalbicun, yuʼun li Dios ti echʼem svuʼele tsots laj yacʼbun jvocol. Cʼalal lilocʼ batel liʼi, noj sbel jcʼob. Pero xocol xa jcʼob lisut tal, yuʼun jech la scʼan li Mucʼul Diose. Mu xa smeloluc chavalbicun Noemí, yuʼun li Mucʼul Dios ti echʼem svuʼele laj xa yacʼbun ep jvocol», xi (Rut 1:20, 21).
15 Melel onoʼox ti chat tajmek yoʼonton li Noemie. Akʼo mi jech, kʼalal lek tajmek ta jchanbetik skʼoplal li slivroal Rute te chkakʼtik venta ti mu jsetʼuk laj yikta sba ta spatel yoʼonton ta stojolal Jeovae. ¡Jel ta jyalel li xkuxlejal ti jech la spat yoʼonton ta stojolal Jeovae! Li yalib ti Rut sbie, ti meʼonal ants ikome, inupun xchiʼuk Booz (Boaz) xchiʼuk laj yil jun yolik. Jech noxtok, li Noemie la sta jun smoton, jaʼ ti la xchiʼes li smome. Li loʼile xi chale: «Li antsetic ti nopol nacalic xchiʼuc Noemie jech laj yalic: –Ivocʼ xa jun squerem li Noemie –xiic. Obed laj yacʼbeic sbi li quereme. Li Obede jaʼ stot li Isaie (Jesé); jaʼ smoltot li Davide», xi (Rut 4:14-17). Kʼalal mi chaʼkuxi talel li Noemie, ta me sta sbaik xchiʼuk li Rute xchiʼuk te me chaʼi ti ikʼot ta snamtal yaya Mesías li yalibe (Mat. 1:5, 6, 16). Jech kʼuchaʼal Noemie, toj vokol ta naʼel chkaʼitik kʼuxi chchap li jkʼoptike. Jaʼ yuʼun jpat sjunul koʼontontik ta stojolal Jeova, jech kʼuchaʼal chi yalbutik Proverbios 3:5, 6: «Jaʼ noʼox pato avoʼnton ta stojol li Mucʼul Diose; mu me jaʼuc xapat avoʼnton yuʼun li abijil atuque. Acʼo sventain Mucʼul Dios scotol li cʼusi chapase, yuʼun jaʼ xuʼ chayicʼot batel ta tuqʼuil be».
Kakʼtik akʼo sbeiltasutik li chʼul espiritue
16. ¿Kʼuxi la skolta jayibuk moletik ta voʼneal Israel li xchʼul espiritu Diose?
16 Mi skotol ora oy ta joltik li Jeovae ta me sbeiltasutik ta xchʼul espiritu (Gál. 5:16-18). Li Diose laj yakʼbe xchʼul espiritu li 70 moletik laj yichʼik tʼujel sventa tskoltaik Moisés ta sbeiltasel batel li xchiʼiltakik ta Israele. Manchuk mi jaʼ noʼox chalbe sbi Eldad xchiʼuk Medad, li chʼul espiritue laj yakʼbe spʼijil skotolik sventa spas yuʼun li yabtelike (Núm. 11:13-29). Ta melel, li viniketik leʼe oy spʼijilik, yichʼojik ta mukʼ Dios, tukʼ xkʼopojik xchiʼuk mu xchʼam smotonik, jech kʼuchaʼal li yantik ti laj yichʼik tʼujel ta baʼyele (Éxo. 18:21). Jaʼ jech stalelalik ojtikinbilik li moletik avi eke.
17. ¿Kʼuxi ikoltavan chʼul espiritu ta sventa li svaʼanel chʼulna pasbil ta nukule?
17 Li xchʼul espiritu Jeova noxtoke tsots skʼoplal yabtel la spas li ta taki xokol balumil ta sventa li svaʼanel chʼulna pasbil ta nukule. Li Jeovae la svaʼan ta j-abtel ta spasel kʼusitik kʼupil sba xchiʼuk ta bankilal jvaʼanej na li Bezaleele, xi laj yale: «Ta jʼechʼel laj cacʼ ochuc ti jcuxlejal [o jchʼul espiritu] ta stojole yoʼ jech oy ti sbijile, ti snopbenal yuʼune, ti ta yojtiquinele, xchiʼuc ti scʼabalil ta slocʼtaele», xi (Éxo. 31:3-5, Ch). Li Bezaleel, li yajkoltaobba ti Ohliab sbie xchiʼuk li yantik viniketik ti «bochʼotic oy cʼusi lec snaʼic spasele» jaʼ la spasik li lekil abtelal taje. Jech noxtok, li xchʼul espiritu Jeovae la stijbe yoʼonton «scotol li bochʼotic chcʼot ta yoʼnton, ti yutsil yoʼnton chaqʼuique», ti jech akʼo yakʼik ta sjunul yoʼontonik li kʼusi oy yuʼunike (Éxo. 31:6; 35:5, 30-34). Li espiritu taje jaʼ tstijbe yoʼonton li yajtuneltak Dios avi ti akʼo spas bu kʼalal xuʼ yuʼunik ta sventa li Ajvalilal yuʼun Diose (Mat. 6:33). Kʼuk yelanil ti kʼusi xi jtojob spasele, skʼan onoʼox me jkʼantik li chʼul espiritue xchiʼuk ti jchʼuntik echʼel li beiltasel chakʼe, jaʼ noʼox me jech xuʼ spas kuʼuntik li kabteltik yakʼojbutik Jeovae (Luc. 11:13).
Kichʼtik-o me ta mukʼ Jeova li bankilal yuʼun soltaroetike
18, 19. 1) ¿Kʼusi chakʼ oyuk ta koʼontontik li chʼul espiritue? 2) ¿Kʼusi la achanbe li Simeón xchiʼuk Anae?
18 Ti chakʼ oyuk ta koʼontontik yichʼel ta mukʼ Dios li chʼul espiritue jaʼ me tskoltautik ti teuk-o ta joltik li Jeovae. Li ta voʼnee, xi laj yichʼ albel mantal li steklumal Diose: «Jaʼ noʼox stuc Chʼul Dios xavilic li Mucʼul Dios ti echʼem svuʼele. Jaʼ noʼox xavichʼic ta mucʼ», xi (Isa. 8:13). Li Simeón xchiʼuk Ana ti jaʼ yajtuneltak Dios ti nakalik ta Jerusalén kʼalal vokʼ li Jesuse, jaʼ jech laj yakʼ ta ilel stalelalik ek (kʼelo Lucas 2:25-38, Ch). Akʼo mi mol xaʼox tajmek li Simeone, «smalaoj ti ta xtal jun ajvalil yuʼunique yuʼun jaʼ ta xcoltaatic loqʼuel», yuʼun oy xchʼunel yoʼonton li ta albil kʼopetik sventa Mesiase. Albat yuʼun s-espiritu Dios ti kuxul to la kʼalal chtal Mesiase, vaʼun jaʼ jech ikʼot ta pasel. Jun kʼakʼal ta sjabilal 2 kʼalal maʼuk toʼox jkʼakʼaliltike, li Jesuse ikʼe batel yuʼun María ta chʼulna, li smeʼe xchiʼuk li José ti jaʼ xchaʼtote. Noj ta chʼul espiritu li Simeone, jaʼ yuʼun lik yal albil kʼopetik ta sventa li Mesiase xchiʼuk laj yal ti kʼu to xkʼuxul chaʼi María li vokol chil Jesús kʼalal bajbil xaʼox ta jtel teʼe. Pe ¡nopo xa noʼox avaʼi kʼu to yepal chmuyubaj Simeón kʼalal la spet «li Cristo ti tʼujbil yuʼun Dios[e]»! Li vinik ti chichʼ ta mukʼ Dios taje toj lek kʼusi xuʼ xchanbeik li yajtuneltak Dios avi kʼakʼale.
19 Ana, jun meʼonal ants ti 84 xa sjabilale, «scotol cʼacʼal tey ta xbatilan ta yamaqʼuil templo». Kʼakʼal-akʼobal chichʼ ta mukʼ li Jeovae yuʼun «ta xicta ixim [xchiʼuk] ta scʼopan Dios». Ta skoj ti te oy ta chʼulna ek li vaʼ kʼakʼal taje, laj yil ek li neneʼe. ¡Laj van stoj tajmek ta vokol ti laj yil ta sat li buchʼu chkʼot ta Mesiase! Ta anil noʼox «la stojbe ta vocol ec li Diose yuʼun ital xa li Jcoltavaneje. Tsʼacal to lic spucbe scʼoplal li olole, laj yalbe scotol xchiʼiltac tey ta Jerusalén, jaʼ li bochʼotic smalaoj ti chcolique». Li Anae mu stakʼ chaʼi ti chʼanxie; skʼan onoʼox xal echʼel li lekil aʼyeje. Jech kʼuchaʼal li Simeón xchiʼuk Anae, li yajtsʼaklomtak Cristo ti oy xa sjabilalike xmuyubajik noʼox ti snaʼojik ti mu toj mol-meʼelikuk xa sventa chtunik ta stojolal Jeova xchiʼuk ti chkʼotik ta yajrextikotake.
20. Kʼuk yepal li jabilaltike, ¿kʼusi skʼan jpastik, xchiʼuk kʼu yuʼun?
20 Kʼuk yepal li jabilaltike, jkotoltik me skʼan oyuk ta joltik li Jeovae. Yuʼun me jaʼ jech chakʼbe bendision li kabteltik ta yalbel batel yantik krixchanoetik li yabtel ta ajvalilale xchiʼuk li labalik sba yabtele (Sal. 71:17, 18; 145:10-13). Pe kʼelavil, sventa xkichʼtik ta mukʼ li Jeovae skʼan me jchʼies jtalelaltik ti lekuk chile. Jkʼeltik batel yan loʼiletik ta Vivlia sventa jchantik batel mas ta sventa li talelaletik taje.
¿Kʼusi cha takʼ?
• ¿Kʼuxi jnaʼojtik ti tstakʼ j-orasiontik li Jeovae?
• ¿Kʼu yuʼun skʼan jchʼunbetik ta skotolal li Diose?
• ¿Kʼu yuʼun skʼan jpat-o koʼontontik ta stojolal Jeova akʼo mi chkat koʼontontik?
• ¿Kʼuxi tskoltabe steklumal Dios li chʼul espiritue?
[Lokʼol ta pajina 4]
Li orasion la spas Nehemiase oy kʼusi lek ikʼot ta pasel yuʼun
[Lokʼol ta pajina 5]
Ti kʼuyelan ichapaj li svokol Noemie jaʼ chakʼ tajmek spatobil koʼontontik ta stojolal Jeova
[Lokʼol ta pajina 6]