Li kʼusitik xuʼ jpastik sventa xkaʼibetik smelolal li Vivliae
1. Jkʼanbetik koltael ti buchʼu la spase
«Leʼ toʼox tale nopem xkaʼi skʼelel Vivlia kʼalal skʼan toʼox xbat vaykune —xi chal Ninfa, ti te nakal ta Italiae—. Jnaʼoj ti jaʼ jun livro ti laj yakʼ ta naʼel li Diose xchiʼuk oy ta koʼonton snaʼel li kʼusitik laj yakʼ ta tsʼibaele. Jaʼ yuʼun manchuk mi mu jkʼupin skʼelel vun, laj kakʼ ta koʼonton skʼelel sliklej. Ta slikebe kʼun ikaʼi, pe kʼalal la jta jun-chib loʼiletik ti vokolik ta aʼyele, te chibaj-o koʼonton, jaʼ yuʼun laj kikta.»
MU LABALUK ti jech chkʼot ta pasel taje, jech kʼuchaʼal li Ninfae, ep buchʼutik jech kʼotem ta stojolalik ek. Pe jech kʼuchaʼal laj kiltik li ta baʼyel jvokʼ mantale, li Jeova Dios ti jaʼ buchʼu la spas li Vivliae, tskʼan ti akʼo xkaʼibetik smelolal jkotoltike. ¿Kʼuxi xuʼ jpastik taje? Baʼyel, skʼan jkʼanbetik koltael.
Jchanbetik skʼoplal li yajtakboltak Jesuse. Li stukike muʼyuk bu x-ayik ta xchanob vun jrabinoetik sventa xchanubtasatik ta sventa yichʼel ta mukʼ Dios, jech oxal albat skʼoplalik ti «muʼyuc chanubtasbilic, xchiʼuc ti muʼyuc yabtelique» (Hechos 4:13). Pe taje maʼuk skʼan xal ti mu stakʼ xaʼibeik smelolal li sKʼop Diose. ¿Kʼuxi xuʼ jnaʼtik taje? Yuʼun xi albatik yuʼun li Jesuse: «Yan li Jpojvanej ta stacboxuc tal ta jventa ti Jtote, jaʼ li Chʼul Espiritue. Jaʼ ta xacʼboxuc anaʼic scotol; jaʼ ta xchanubtasoxuc. Jaʼ ta svulesboxuc ta ajolic scotol li cʼusi laj calboxuque» (Juan 14:26). Li chʼul espiritu taje jaʼ li yip ch-abtej Dios ti jaʼ la spas-o li kuxlejal xchiʼuk Balumile (Génesis 1:2, NM). Li yip taje jaʼ la stunes xtok sventa chakʼbe snaʼ kʼusitik ta stsʼibaik ta Vivlia li 40 viniketike (2 Pedro 1: 20, 21). Jech ta melel, li chʼul espiritu taje jaʼ chakʼbe li buchʼutik tskʼan chaʼibeik smelolal li sKʼope.
Sventa xakʼbutik li xchʼul espiritue, skʼan ta sjunul koʼonton jkʼanbetik. Oy van bateltike maʼuk noʼox jun velta skʼan jkʼanbetik. Xi laj yal li Jesuse: «Cʼanilambeic ti Diose asta chayacʼboxuc» (Lucas 11:9, Jaʼ ti Achʼ Testamentoe, ta skʼop Huixtán). Xi laj yal ta tsʼakal xtoke: «Voʼoxuc ti [...] xanaʼic cʼusi lec chavacʼbeic li anichʼnabique. ¡Buuc xa li Atotic te oy ta vinajele Chʼul Espíritu chacʼbe li bochʼotic ta scʼanique!» (Lucas 11:13). Lek jamal ta aʼyel un chaʼa, ti Diose chakʼbe xchʼul espiritu li buchʼutik tskʼanbeik ta sjunul yoʼontonike. ¿Kʼuxi tskoltautik li yip Dios taje? Baʼyel, tskoltautik ta yaʼibel lek smelolal li kʼusi chal Vivlia ti leʼ xa ta jaymiluk jabil laj yichʼ tsʼibaele. Xchibal, chakʼ ti kʼuyepal chtun kuʼun jpʼijiltik sventa xkakʼ ta jkuxlejaltik li tojobtaseletike (Hebreos 4:12; Santiago 1:5, 6).
Jech oxal un chaʼa, kʼalal cha kʼel li aVivliae, kʼopono Dios sventa cha kʼanbe xchʼul espiritu yoʼ xa skoltaot ta yaʼibel smelolal.