¿Mi xvul ta ajol?

¿Mi akʼupinoj skʼelel Li Jkʼel osil ta toyole, ti achʼik to lokʼem tale? Mi jeche, paso preva mi xtakʼ avuʼun li kʼusitik liʼe:

• ¿Kʼu yuʼun cham li Jesuse?

Kʼalal tukʼ laj yakʼ sba kʼalal to ta slajeb li Jesuse, jamal lek laj yakʼ ta ilel ti xuʼ chichʼ ta mukʼ Dios li tukʼil krixchanoe akʼo mi tsots spase ta preva. Jech xtok, jaʼ sventa tspojutik lokʼel li ta mulil ti jkuchojbetik Adane, vaʼun jaʼ jech xuʼ jtatik li kuxlejal sbatel osile (15/12, pajina 22, 23).

• ¿Kʼusi smakoj li chiʼinejbail ta loʼil ti oy sbalil xchiʼuk li alab-nichʼnabiletike?

Ti lek ta jchiʼintik ta loʼil li kalab jnichʼnabtike maʼuk noʼox ti ta jkʼopontike: te smakojbe skʼoplal ti ta jakʼbetike xchiʼuk ti ta jtsʼet chikintatik lek li kʼusi tstakʼike. Ep utsʼ-alaliletike yakʼojik venta ti xuʼ lek xchiʼin sbaik ta loʼil kʼalal chveʼike (15/1, pajina 18, 19).

• ¿Kʼusi skʼan stsak ta venta jun krixchano mi tsnop chichʼ voʼ yan veltae?

Yikʼaluk van xuʼ jech snop mi mu lekuk stalelal kʼalal laj yichʼ voʼe o ti jaʼo yakal spasel ta mukul junuk tsatsal mulil ti sta-o xichʼ lokʼesel ta tsobobbail li jun yajtsʼaklom Cristo ti yichʼoj voʼe (15/2, pajina 22).

• Li ta lokʼolkʼop ta sventa li trigo xchiʼuk chopol jobele, ¿kʼusi smelolal li stsʼunel bekʼ trigoe?

Li Jesucristo, li «Xnichʼon cristiano[e]» la xchapan li osil kʼalal la xchol mantal ta Balumile. Li ta Pentecostés ta sjabilal 33 lik stsʼun li lekil bekʼ trigo kʼalal lik stʼuj ta chʼul espiritu li yajtsʼaklomtak Cristoe, jaʼ xkaltik, «li xnichʼnab Diose» (15/3, pajina 20).

• ¿Kʼuxi yakal chichʼ tsobel ta snail trigo li trigo ta slokʼolkʼop Jesuse?

Li trigo ta babakʼop ti chichʼ tsobel ta snail strigo Jeovae lik yichʼ tsobel li ta «slajebal cʼacʼale». Jech ta melel, «li xnichʼnab Diose», jaʼ xkaltik, li tʼujbil yajtsʼaklomtak Cristoe chichʼik tsobel ta snail strigo Jeova kʼalal chichʼik chʼamel ta stsobobbail yajtsʼaklomtak Cristo ti chaʼlekubtasbile o jaʼo kʼalal chichʼ smotonik ta vinajele (15/3, pajina 22).

• ¿Buchʼu laj yal kʼusitik livroal te ch-och skʼoplal li ta tsʼibetik ti laj yakʼ ta naʼel Dios (ti canon sbie) li ta Tsʼibetik ta Griego Kʼop ti chalbe skʼoplal Cristo?

Mu jaʼuk laj yalik mantal li jbabeetik ta relijion Katolikae, mi jaʼuk jun bankilal ta yan relijion. Jaʼik li melel yajtsʼaklomtak Cristo ti beiltasbilik ta chʼul espiritu ti laj yakʼik venta kʼusi livroal ti jaʼ yakʼoj ta naʼel Diose. Jech, li Vivliae chal ti jtos kʼusi koltavan ta spasel li xchʼul espiritu Dios li ta slikebaltik sjaylajunebal jabil li ta stsobobbail yajtsʼaklomtak Cristoe jaʼ ti «oy bochʼo ch-acʼbat snaʼic me jaʼ yabtel Chʼul Espíritu li cʼusi chcʼot ta pasele, o me mu jaʼuc» (1 Corintios 12:4, 10; 1/4, pajina 28).