«Tskʼanik ti xkakʼ venta jtuk bu li melele»

LI JKUXLEJAL TOʼOXE:

Livokʼ ta Santo Domingo, jaʼ kapital yuʼun República Dominicana; chanvoʼunkutik ta vokʼel, voʼon li mas bikʼitune. Li jtot jmeʼe lek chanunajemik, jaʼ yuʼun tskʼanik ti lekil krixchanoetik noʼox jchiʼinkutik-o kʼalal lichʼikutik tale. Kʼalal skʼan toʼox chanib jabil xivokʼe, li jtot jmeʼe laj yojtikinik jayvoʼ jmormonetik ti misioneroetike. Toj lek laj yilik ti lek li skʼuʼ spokʼ slapojike, lek smeltsanoj sbaik xchiʼuk lek x-ichʼvanik ta mukʼ. Mu ta sjaliluke, li ta República Dominicanae voʼonkutik baʼyel li-ochkutik li ta srelijion Iglesia de Jesucristo de los Santos de los Últimos Días, ti jmormonetik ojtikinbilik xtoke.

Li voʼone te xitijet ta spasel li kʼusi chchʼay-o yoʼontonik li ta jrelijione, pe li kʼusi mas lek chkile jaʼ ti tsots skʼoplal chilik li utsʼ alalile xchiʼuk li lekil talelaletike. Ximuyubaj yuʼun li jrelijione xchiʼuk laj kakʼ ta koʼonton ti chikʼot ta misioneroe.

Kʼalal vaxaklajuneb xaʼox jabilale, libatkutik ta naklej ta Estados Unidos sventa xichanunaj ta junuk lekil universidad. Kʼalal jun xaʼox jabil jkʼotelkutike, kʼot svulaʼanunkutik ta Florida jun juntot xchiʼuk junmeʼ ti jaʼik stestigo Jeovae, vaʼun laj yal ti xbat jchiʼinkutik ta jun mukʼta tsobajel ti te chichʼ chanel Vivliae. Toj lek laj kil ti tsaʼik ta Vivlia skotolik li tekstoetik chalike xchiʼuk ti yakal tstsʼibaik li kʼusi ch-echʼe, jaʼ yuʼun la jkʼan jlikuk vun xchiʼuk junuk lapisero sventa jtsʼiba ek.

Kʼalal laj li mukʼta tsobajele, li juntot xchiʼuk junmeʼe laj yalbeikun ti tskʼan tskoltaikun sventa jchan lek Vivlia ta skoj ti ta jkʼan chikʼot ta misioneroe. Lek laj kaʼi taje, yuʼun jutuk tajek kʼusi jchanoj ta sventa li Vivliae, jaʼ mas ep kʼusi jnaʼ ta sventa li Livro yuʼun Mormón (Libro de Mormón).

TI KʼUYELAN LA SJEL JKUXLEJAL LI VIVLIAE:

Kʼalal sutik batele, jaʼ xa noʼox ta telefono chiloʼilajkutik ta sventa Vivlia. Ta onoʼox xalilanbeikun ti akʼo jkoʼoltas ta Vivlia li kʼusitik jchʼunoje. Tskʼanik ti xkakʼ venta jtuk bu li melele.

Ep li kʼusitik chakʼik ta chanel ta jrelijione kaloj mi melel, pe mu toʼox jnaʼ mi koʼol xchiʼuk li kʼusi chchanubtasvan li Vivliae. Li junmeʼe la stakbun tal jun revista ¡Despertad!, jaʼ li lokʼ ta 8 yuʼun noviembre ta 1995 ti pasbil yuʼun stestigotak Jeovae, taje yichʼoj chib mantaletik ti chalbe skʼoplal li srelijion jmormonetike. Toj labal sba laj kil ti ep kʼusitik mu toʼox xkojtikin ti chakʼik ta chanel ta jrelijione, jaʼ yuʼun la jsaʼ ta jpajinakutik ta Internet mi melel kʼusi chal li revistae, jaʼ to laj kile jech onoʼox ta melel. Jech xtok, kʼalal li-ay ta smuseo jmormonetik ta Utahe te la jta mas sprevailtak.

Ta jnop toʼox ti jaʼ tstsʼakubtas sba xchiʼuk Vivlia li slivro jmormonetike. Pe kʼalal lik jchan lek li Vivliae laj kakʼ venta ti tskontrain sbaike.

Ta skoj ti jelel li chanubtaseletik taje xchiʼuk ti jun noʼox lum lek chilik li jmormonetike jaʼ la jvul-o koʼonton. Yuʼun chalik xtok ti nichimaltik Edene te toʼox la oy li ta lum ti jaʼ xa sbi Jackson (Misuri, Estados Unidos). Jech xtok, li j-alkʼopetik ta jrelijione chalik ti «kʼalal mi lik ajvalilajuk li Ajvalilal yuʼun Diose te jokʼol lek chkom li svandera Estados Unidos ti jaʼ la skʼelobil kolebale xchiʼuk ti tsakbil ta venta sderecho li krixchanoetike».

Ta toʼox jakʼbe jba kʼusi chkʼot ta pasel ta jlumal xchiʼuk ta yantik lum mi jech chkʼot ta pasel taje. Jun mal kʼakʼale kʼopoj tal jun kerem ti yakal chchanunaj sventa xkʼot ta misionero ti xkojtikin onoʼoxe, vaʼun la jakʼbe ta sventa taje. Xi la jakʼbee: «Ti spas kʼop xchiʼuk yan lum li alumale, ¿mi ta van xatsak ta kʼop li jmormonetik ta lum taje?». Toj labal to sba laj kaʼi kʼalal laj yal ti tanae. Laj to jsabe mas skʼoplal li kʼuyelan chchanubtasvanik ta jrelijione xchiʼuk la jakʼbe li jbabeetik mas ichʼbilik ta mukʼe, laj yalbeikun ti mu to la stakʼ naʼel stakʼobil li kʼusitik ta jakʼe.

Ti kʼuyelan la stakʼbeikune chibaj-o koʼonton. Lik jnop lek kʼusi la stijbun koʼonton ti ta jkʼan chikʼot ta misioneroe, te laj kakʼ venta ti jaʼ noʼox sventa jkolta li krixchanoetik jech kʼuchaʼal tspas jun organisasione. Jech xtok, laj kakʼ venta ti jaʼ noʼox lek chkil ti xichʼikun ta mukʼ eke. Pe mu toʼox xkojtikin lek li Diose. Akʼo mi ep ta velta jkʼeloj jayibuk tekstoetik ta Vivlia, mu toʼox masuk tsots skʼoplal chkil li Vivliae. Mu toʼox jnaʼ xtok ti oy kʼusi tskʼan tspas ta sventa Balumil xchiʼuk sventa krixchanoetik li Diose.

KʼUSITIK SBALIL JTAOJAN:

Kʼalal lik jchan Vivlia xchiʼuk li stestigotak Jeovae ep kʼusitik la jchan: ti kʼusi sbi li Diose, ti kʼusi chkʼot ta jtojolaltik kʼalal chijchame, ti kʼusi yabtel Jesús sventa xkʼot ta pasel li kʼusi tskʼan tspas Diose xchiʼuk yan kʼusitik. Jaʼ to lik kojtikin ta melel li Vivliae, ti jaʼ jun labal sba livroe xchiʼuk ¡ta jkʼupin tajek yalbel yantik li kʼusi yakalun xchanele! Jnaʼoj onoʼox ti oy li Diose, pe li avie xuʼ jamal xa lek jkʼopon kʼuchaʼal jun kamigo ti mas lek xkil jba xchiʼuke. Laj kichʼ voʼ kʼuchaʼal stestigo Jeova ta 12 yuʼun julio ta 2004, vaʼun kʼalal echʼ xaʼox vakib ue lik jchol mantal ta tsʼakal ora.

Li-abtej voʼob jabil ta Betel ta Brooklyn (Nueva York). La jkʼupin tajek ti likoltavan ta spasel imprimir epal Vivlia, vunetik xchiʼuk yan kʼusitik sventa stabeik sbalil ta smiyonal noʼox krixchanoetik ta spʼejel Balumil. ¡Ximuyubaj tajek ti oy xa ta jayib jabil yakalun skoltael krixchanoetik sventa xojtikinik li Diose!