Xuʼ xijkuxi sbatel osil ta skoj ti chaʼkuxi li Jesuse

TA SKOJ ti voʼne xa tajek laj yichʼ chaʼkuxesel li Jesuse, maʼuk skʼan xal ti muʼyuk xa tsots skʼoplal chkaʼitik li avie. Li jtakbol Pabloe xi laj yalbe skʼoplale: «Li Cristoe ichaʼcuxi loqʼuel ta smuquinal. Jaʼ sba sat icʼot yuʼunic li bochʼotic ichamic xae. Ta sventa jun vinic iʼoch li lajele; jaʼ jech ta sventa jun vinic oy chaʼcuxesel noxtoc. Jech chac cʼu chaʼal ta sventa Adán chijchamutic jcotoltique; jaʼ jech ta sventa Cristo chijchaʼcuxiutic jcotoltic» (1 Corintios 15:20-22).

Li Jesuse chaʼkuxi ta 16 yuʼun nisán ta sjabilal 33. Taje jaʼ skʼakʼalil yuʼun judioetik sventa chakʼbeik Jeova ta chʼulna ta Jerusalén li sba sat kʼusi sba velta stsʼunojike. Li Pabloe kʼalal «sba sat» xi laj yalbe skʼoplal li Jesuse, laj yakʼ ta aʼiel ti oy to yan buchʼutik chichʼik chaʼkuxesele.

Li jtakbole laj yalbe skʼoplal kʼusi sbalil xuʼ xichʼ tael ti chaʼkuxi li Jesuse, xi laj yale: «Ta sventa jun vinic iʼoch li lajele; jaʼ jech ta sventa jun vinic oy chaʼcuxesel noxtoc». Ta skoj ti la sjelubtasbutik mulil li Adane xchiʼuk ti muʼyuk jtukʼiltike, jkotoltik chijchamutik. Akʼo mi jech, kʼalal laj yakʼ ta matanal li stukʼil kuxlejal sventa tspojutike, jech lijkol lokʼel yuʼun li ta mulile, jech xtok ti chaʼkuxie tspojutik lokʼel li ta lajelale. Li ta Romanos 6:23 xi chalbe lek skʼoplal li Pabloe: «Li stojol mulile jaʼ ti chijchamutique; yan li jmotontic chijyacʼbutic Dios ta sventa ti jun oyutic jchiʼuctic li Cajvaltic Cristo Jesuse jaʼ li cuxlejal sventa sbatel osile».

Li Jesús eke laj yal kʼusi sbalil xuʼ jtabetik ti chame xchiʼuk ti chaʼkuxie. Xi laj yal ta sventa ti kʼu yuʼun chchaʼkuxi onoʼoxe: «Jech xuʼ chcuxiic sbatel osil li bochʼotic ta xchʼunicune. Yuʼun toj ep la xcʼuxubin scotol cristianoetic ta banamil li Diose, jech laj yacʼ li jun noʼox Xnichʼon oye, yuʼun jech mu chʼayeluc chbat li bochʼotic ta xchʼunic ti jaʼ Jcoltavanej yuʼunique; jaʼ ta xcuxiic o sbatel osil» (Juan 3:14-16).

Nopo xa noʼox avaʼi, ¡jun kuxlejal ta sbatel osil ti muʼyuk xa kʼusi kʼux-ip, mi jaʼuk vokolile! (Apocalipsis 21:3, 4.) ¡Taje toj lek li spatobil koʼontontik jmalaojtike! Jun krixchano ti lek xchanoje, xi laj yale: «Li mukinaletike tsvules ta joltik ti muʼyuk jal kuxulutike, yan li chaʼkuxesele jaʼ chakʼ jchʼuntik ti muʼyuk jal li lajele». ¡Xuʼ jchʼuntik ta melel ti xuʼ xijkuxi sbatel osil ta skoj ti chaʼkuxi li Jesuse!