«Aʼyo avaʼyic, ta jpas ta achʼ scotol li cʼusitic oye»

¿Mi chakʼan ti mu xa-ipajik xchiʼuk avutsʼ avalal xchiʼuk ti jal chakuxiike? ¿Kʼu van yelan chavaʼi ti chakuxi ta jun balumil ti bu muʼyuk xa kʼux ip, vokolil mi jaʼuk lajelale? Mu xanop ti muʼyuk ta xkʼot ta pasel taje. Moʼoj, yuʼun jutuk xa skʼan xkʼot ta pasel ti yaloj Dios ta spas jun tukʼil achʼ balumile. Kʼelo kʼuxi chkʼot ta pasel ti te chal ta Apocalipsis 21:3-5 (kʼelo).

«Li Diose ta scusbe loqʼuel scotol yaʼlel satic.» (Apocalipsis 21:4.) ¿Kʼusi jtosukal yaʼlel satil ti ta skuse? Maʼuk skʼoplal li yaʼlel satil ta skoj muyubajele mi jaʼuk li bu tskusbe skʼaʼepal jsatike. Jaʼ skʼoplal li yaʼlel satil ta skoj li vokolil xchiʼuk li at-oʼontone. Li Diose maʼuk noʼox ta skus li yaʼlel satile, yuʼun ta slajesbe skʼoplal skotol li kʼusi chakʼ okʼele, jech kʼuchaʼal li vokolil xchiʼuk li at-oʼontone.

«Muʼyuc xa bochʼo chcham.» (Apocalipsis 21:4.) Li kʼusi mas lokʼem-o yaʼlel jsatik yuʼune jaʼ li lajelale. Akʼo mi jech, li Jeovae ta spoj lokʼel ta stojolal lajelal li krixchanoetik ti chchʼunik mantale. ¿Kʼuxi? Jaʼo kʼalal ta slajesbe skʼoplal li kʼusi chijlajutik-o yuʼune: li mulil ti la sjelubtasbutik li Adane (Romanos 5:12). Koliyal ti laj yakʼ ta matanal xkuxlejal li Jesuse, li Jeovae ta spas ti akʼo xkʼotik ta tukʼil krixchanoetik li buchʼutik ta xchʼunik mantale.a Vaʼun «li slajeb yajcontra chulese jaʼ li lajele» (1 Corintios 15:26). Li tukʼil krixchanoetike xuʼ xkuxiik sbatel osil ti muʼyuk xa ta x-ipajike, jech kʼuchaʼal oy onoʼox ta yoʼonton Dios ta slikebale.

«Muʼyuc xa bochʼo cʼusi cʼux chaʼay.» (Apocalipsis 21:4.) ¿Kʼusi jtosukal kʼux ip ta xlaj skʼoplal? Jaʼ li kʼusi kʼux chkaʼitik ta jnopbentik, ta koʼontontik xchiʼuk ta jbekʼtaltik ta skoj li mulile xchiʼuk li jchopoliltik ti ta smiyonal krixchanoetik chakʼbe svokole.

Jutuk xa skʼan xlaj skʼoplal okʼel, lajelal xchiʼuk kʼux ip. Pe xuʼ van xi chajakʼbe abae: «¿Bu ta xkʼot ta pasel taje? ¿Mi te van ta vinajel chkʼot ta pasel li kuxlejal chal Diose?». Moʼoj. Jkʼeltik kʼu yuʼun. Baʼyel, yuʼun li ta slikeb sloʼilal kʼusi yaloj tspas Diose, xi chale: «Liʼi jaʼ xa snaic xchiʼuc cristianoetic li Diose». Li krixchanoetike liʼ nakalik ta Balumile (Apocalipsis 21:3). Xchibal, li kʼusi yaloj tspas Diose te chalbe skʼoplal jun balumil ti bu «muʼyuc xa bochʼo chcham[e]», jaʼ xkaltik, jun balumil ti bu oy toʼox lajelale, pe ti chʼabal xa li vaʼ kʼakʼale. Muʼyuk onoʼox lajelal li ta vinajele, pe li ta Balumile jal xa tajek ti oy li lajelale. Jaʼ yuʼun, lek jamal ta ilel ti kʼusi yaloj tspas li Diose ta xkʼot ta pasel liʼ ta Balumile, jun kuxlejal ti mas toj leke.

Li Jeovae tskʼan ti jchʼuntik ti yaloj chichʼ talel jun tukʼil achʼ balumile. Kʼalal yaloj xaʼox li bendisionetik chichʼ tale, xi laj yale: «Aʼyo avaʼyic, ta jpas ta achʼ scotol li cʼusitic oye», xchiʼuk xi to laj yale: «Tsʼibao ta vun, yuʼun li jcʼop liʼi jaʼ melel scotol» (Apocalipsis 21:5). Li yajtuneltak Dios ti xmuyubajik noʼoxe chilik chkʼot ta pasel. ¿Kʼu yuʼun mu xachanbe mas skʼoplal sventa teuk akʼoplal xchiʼuk li avutsʼ avalale?