Kaloj mi yakal xa ta jkʼupin li jkuxlejale

LI JKUXLEJAL TOʼOXE:

Te livokʼ ta jun bikʼit lum ta Polonia, ti stsʼakinoj Alemaniae. Jun toʼox koʼonton ti bu nakalune, oy ep ranchoetik xchiʼuk teʼtikaltik. Toj lek yoʼontonik li jtot jmeʼe xchiʼuk chalbeikun ti lekuk jtalelale, ti lekuk xichanunaje xchiʼuk ti xibat ta universidade.

Kʼalal bat jchan Derecho ta jun universidad ta jteklum Wroclaw te lik skotol li jvokoltake. Kʼalal chʼabal xaʼox te oyun ta jnae, la jta jchopol amigotak. Ta onoʼox jkʼupin li tajimol ta futbole, pe kʼalal la sujikun li kamigotake, jaʼ xa mas bat tajek ta koʼonton. Li jkʼupil ekipoe jaʼ Varsovia. Buyuk noʼox ti chtajinike chbat jkʼel jujun sabado o domingo. Kʼalal chibatkutike chiyakubkutik, ta jlajeskutik droga, xchiʼuk oy bakʼintike, ta jmaj jbakutik xchiʼuk li buchʼutik jaʼ lek chilik li yan ekipoe. Kaloj mi tskoltaun sventa jchʼay ta jol ti solel sujomun kʼusitik ta jpas jujun kʼakʼale, akʼo mi jnaʼoj lek ti xuʼ xilokʼ-o ta universidad mi la staikun ta tsakel li polisiaetike.

Chibat xchiʼuk kamigotak ta clubs nocturnos xchiʼuk ta diskotekaetik, li teye jutuk mu skotoluk velta ta jlikeskutik majbail. Ep ta velta la stsakikun li polisiaetike, pe oy onoʼox kʼusi la jpas yoʼ mu xikʼikun batele, bakʼintike chkakʼbeik takʼin. Kaloj mi yakal ta jkʼupin li jkuxlejale; pe li jol koʼontone chalbun ti muʼyuk lek li kʼusi ta jpase. Jaʼ yuʼun, sventa junuk koʼonton xkaʼi jbae, chibat ta chʼulna li ta jujun domingoe.

TI KʼU YELAN LA SJEL JKUXLEJAL LI VIVLIAE:

Li ta 2004, ay svulaʼanikun ta jna chaʼvoʼ stestigotak Jeova xchiʼuk la jchʼam ti xchanubtasikun ta Vivliae. Kʼalal yakal ta jchan batel kʼusi skʼan spas li jun melel yajtsʼaklom Kristoe, solel toj chopol chkaʼi jba yuʼun. Jnaʼoj ti skʼan xkikta li yakubele, li slajesel drogae xchiʼuk xchiʼinel li krixchanoetik ti muʼyuk chakʼ ta xkuxlejalik li kʼusi chal Vivliae. La jchan xtok ti skʼan xkikta li saʼkʼope. Akʼo mi jnaʼoj ti skʼan jel li jkuxlejale, pe jech-o la jpas batel li kʼusi nopem xkaʼie.

Pe oy jun akʼobal ti tey lik jeluk-o tal li jkuxlejale. Jaʼo kʼalal la jmaj jba xchiʼuk vaxakvoʼ krixchanoetike. Xvul ta jol kʼalal telelun xaʼox ta kayee laj to smajikun xchiʼuk la sjlikbeikun ta tekʼel jol. Kaloj mi te xa chicham, jaʼ yuʼun xi la jpas orasione: «Jeova, akʼun ta perton ti muʼyuk la jchʼun li Akʼope. Mi muʼyuk lichame, chkalbot ta melel ti ta jchan Vivlia xchiʼuk li avajtestigotake xchiʼuk ta jel li jkuxlejale». Akʼo mi ep laj kichʼ majel, muʼyuk xicham. Kʼot ta pasel kuʼun li kʼusi laj kale: lik jchan li Vivliae.

Li ta 2006 libat ta naklej ta Inglaterra. Ta jkʼan ox ta jtsob jtakʼin sventa xisut batel ta Polonia yoʼ jta junuk jtitulo sventa Derecho ti mas tsots skʼoplale. Kʼalal yakal ta jchan batel li Vivliae la jta jun teksto ti labal sba tajek laj kile. Xi la stsʼiba li jtakbol Pabloe: «Ta melel mu kʼusi xtun-o skotol chkil xtok ta skoj ti toj echʼ xa noʼox ep sbalil li yojtikinel Kristo Jesus ti jaʼ Kajvale. Jaʼ ta skoj ti kiktaoj skotol li kʼusitike xchiʼuk jech xa chkil kʼuchaʼal jtsop kʼaʼep sventa jaʼ chkʼot ta jkanal li Kristoe» (Filipenses 3:8). Li Pabloe chanunaj ta sventa mantaletik xchiʼuk toj simaron toʼox jech kʼuchaʼal li voʼone (Echos 8:3). Pe laj yaʼibe smelolal ti oy kʼuxi xuʼ skʼupin lek xkuxlejale: jaʼ ti xtun ta stojolal Diose xchiʼuk ti xakʼ yipal ta xchanbel stalelal li Jesuse. Kʼalal la jnopbe skʼoplal li xkuxlejal Pabloe, laj kakʼ venta ti maʼuk chakʼbun muyubajel li spasel kanal takʼine o li saʼkʼope. Vaʼun la jnop ti mi jel xkuxlejal li Pabloe, xuʼ xjel li voʼon eke. Jaʼ yuʼun te likom ta Inglaterra xchiʼuk muʼyuk xa lichanunaj batel mas.

Kʼalal mas chkojtikin li Jeovae, mas nopol chkaʼi jba ta stojolal. La stijbun koʼonton kʼalal la jchan ti oy ta yoʼonton chakʼ ta perton li buchʼu tskʼan tsjel xkuxlejal ta melele (Echos 2:38). Kʼalal ta jnop ta sventa li kʼusi chal li 1 Juan 4:16 ti chal ti «jaʼ kʼanelal li Diose», chkaʼibe smelolal ti kʼu yuʼun tspʼaj li majbaile.

La stijbun koʼonton xtok li stalelal stestigotak Jeovae. Jamal chvinaj ti chakʼbeik yipal ta spasel ta xkuxlejalik li mantaletik ta Vivliae. Ta jkʼan ti teuk oyun li ta jun jteklum ti xmuyubajik noʼoxe. Kʼalal laj kakʼ persa sventa jel li jkuxlejale, li ta 2008 laj kichʼ voʼ xchiʼuk lipas ta stestigo Jeova.

KʼUSITIK SBALIL JTAOJAN:

Jaʼ toʼox batem ta koʼonton saʼel li kʼusi ta jkʼan jtuke, saʼel kʼop, slajesel droga, chiyakub xchiʼuk batem ta koʼonton li futbole, pe li Vivliae la sjelbun li jkuxlejale yuʼun ta jkʼupin xa xchanubtasel ta mantal li yantike. Ta to jkʼupin li futbole, pe jaʼ xa noʼox sventa ta jchʼay-o koʼonton.

Ximuyubaj xchiʼuk li kajnil Esthere, ti jaʼ jun lekil yajtsʼaklom Kristoe. Toj lek chkaʼikutik xchanubtasel ta Vivlia li krixchanoetik ti chkʼopojik ta polaco ti tey nakalik ta snoroesteal Inglaterrae. Sba to velta jech ximuyubaj tajek, lek li jol koʼontone xchiʼuk oy xa sbalil chkaʼi li jkuxlejale.