Kʼalal ta jkʼan ta jnaʼtik kʼusi chtal ta tsʼakale

¿Mi oy anopojbe skʼoplal kʼusi chkʼot ta atojolalik xchiʼuk li avutsʼ avalale? ¿Mi ep van kʼusi chlik ayanuk avuʼunik, mi chavichʼik kʼanel o mi chavil avokolik xchiʼuk mi atuk van chavaʼi abaik? ¿Mi jal van chakuxiik o mi muʼyuk? Taje jech onoʼox tsjakʼbe sbaik li krixchanoetik leʼ xa tal ta sjaymilal jabile.

Li avie, oy krixchanoetik ti chalik li kʼusi xuʼ xkʼot ta pasel ta mas tsʼakale, pe baʼyel ta xchanbeik lek skʼoplal. Akʼo mi ep kʼotemik ta pasel li kʼusitik yalojbeik skʼoplale, muʼyuk onoʼox bu kʼotemik ta pasel skotol. Jech kʼuchaʼal liʼe, li ta sjabilal 1912, li Guglielmo Marconi ti jaʼ la smeltsan jtos kʼopojebal ti muʼyuk skavlealtake xi laj yale: «Koliyal ti oy xa kʼusitik pasbil ti mu xa persauk skavlealtake chlaj skʼoplal li paskʼopetike». Jech xtok, li ta sjabilal 1962, li buchʼu sbainoj jun empresa sventa spasobil gravar musika ti jaʼ sbi Decca Record muʼyuk la xchʼam li jtij guitarraetik ti Beatles sbiike, yuʼun la snop ti chchʼay skʼoplal li jtij guitarraetike.

Junantik krixchanoetike chbat sjakʼik ta stojolal espiritista li kʼusi chkʼot ta stojolalike. Yantike chbatik ta stojolal jkʼelkʼanaletik. Li oroskopoetike oy xa onoʼox lek yavil akʼbil li ta jlik periodiko o ta jlik revistae. Jlom xtoke chbatik ta stojolal jtʼunoletik o ta stojolal li buchʼutik chalik ti snaʼik li kʼusi chkʼot ta pasel ta tsʼakale, ti tstunesik numeroetik, tskʼelik yut kʼobil o tstunesik svarajail tarot.

Jlom krixchanoetik ta voʼnee chbatik ta stojolal oráculos, jaʼ xkaltik, ta stojolal jun pale o meʼ pale ti jaʼ ch-albat yuʼun sdiosik li kʼusi chkʼot ta pasel ta tsʼakale. Taje jaʼ li kʼusi la spas yaʼeluk li Creso ti jaʼ ajvalil ta Lidiae, yuʼun kʼalal skʼan toʼox stsal sbaik xchiʼuk li ajvalil Ciro ta Persiae, la stakbe batel epal matanaletik li pale o li meʼ pale ta Delfos (Grecia) sventa snaʼ ti kʼu yelan tstsuts li paskʼope. Laj yichʼ albel ti tslajes jun mukʼta jteklum mi la stsak ta kʼop li Ciroe. Ta skoj ti la xchʼun ti jaʼ tspas kanale, bat onoʼox stsak ta kʼop li Ciroe. Pe mu jechuk kʼot ta pasel, yuʼun jaʼ laj ta tsalel li slumale.

Li kʼusi laj yal li pale o meʼ palee solel muʼyuk kʼusi tun-o, yuʼun muʼyuk laj yal buchʼu ti tspas kanale. Muʼyuk lek kʼusi kʼot ta pasel ta skoj li kʼusi albat Cresoe, yuʼun jaʼ te laj-o li slumale. ¿Mi mas xa lek kʼusitik kʼotem ta stojolalik li buchʼutik jelel xa kʼusi tstunesik avi sventa snaʼik li kʼusi chkʼot ta pasele?