¿Mi anaʼoj xa?

¿Kʼu yuʼun jun tajek yoʼonton Esteban kʼalal te oy ta yeloval li yajkontratake?

LI ESTEBANE te vaʼal ta yeloval 71 jchapanvanejetik ti toj chopolike ti jaʼik li Sanedrine o li Mukʼta Chapanobbail yuʼun judaetike. Taje jaʼik junantik li buchʼutik tsots tajek yabtelik li ta jteklume. Li bankilal pale Kaifase jaʼ li buchʼu tsobvan xchiʼuk jaʼ onoʼox li buchʼu laj yakʼ ta chapanel Jesus sventa xichʼ milel leʼ xa talel jayibuk ue (Mat. 26:57, 59; Ech. 6:8-12). Xlokʼ x-och noʼox jecheʼ testigoetik sventa stikʼbeik smul li Estebane. Pe li Sanedrine, oy kʼusi toj labal to sba laj yilik kʼalal la skʼelik echʼel li Estebane, yuʼun «xkoʼolaj kʼuchaʼal sat anjel li sate» (Ech. 6:13-15).

¿Kʼu yuʼun jun yoʼonton Esteban kʼalal yakal tsnuptan tsatsal vokolile? Yuʼun kʼalal skʼan toʼox xichʼ tsatsal ikʼel batel ta Sanedrine, koltaat yuʼun xchʼul espiritu Jeova sventa jaʼuk batem ta yoʼonton spasel li abtelal ta tsobobbaile (Ech. 6:3-7). Vaʼun li ta yorail chapanele, jaʼ patbat yoʼonton yuʼun li chʼul espiritue xchiʼuk la skolta sventa junuk noʼox yoʼonton xaʼi sba (Juan 14:16). Li ta kapitulo 7 ta Echose, chal ti kʼalal la spak skʼoplal ta stojolal jchapanvanejetik li Estebane, vulesbat ta sjol yuʼun chʼul espiritu te van 20 tekstoetik ta Vivlia li ta Tsʼibetik ta Evreo Kʼope (Juan 14:26). Tsatsubtasbat xchʼunel yoʼonton xtok kʼalal akʼbat yil ti te vaʼal ta sbatsʼikʼob Dios li Jesuse (Ech. 7:54-56, 59, 60).

Yikʼaluk van xkichʼtik kontrainel ek xchiʼuk sibtasel ta mas jelavel ta sventa li kʼusi jchʼunojtike (Juan 15:20). Pe mi nopem xkaʼitik ti ta jmakʼlin jbatik li ta Skʼop Diose xchiʼuk mi jaʼ batem ta koʼontontik spasbel li yabtel Diose, jaʼ me jech ch-abtej ta jtojolaltik li xchʼul espiritu Diose. Maʼuk noʼox, yuʼun chakʼbutik jtsatsaltik sventa xkuch kuʼuntik li kontrainele xchiʼuk chakʼbutik li jun oʼontonale (1 Ped. 4:12-14).