Ta jchantik li livro “Ven, sé mi seguidor” sbie
1. ¿Kʼusitik stakʼ jpastik batel li ta Xchanel Vivlia ta Tsobobbail li xtal uetike?
1 Li ta xchanibal Evanjelioetike lek tajek chalbe skʼoplal kʼuyelan echʼ xkuxlejal xNichʼon Dios kʼalal ay ta Balumile. Ta skoj ti ta jtsʼaklintik batele, ta melel skʼan jchapan jbatik xchiʼuk jchikintatik lek kʼalal mi lik jchantik ta Xchanel Vivlia ta Tsobobbail li livro “Ven, sé mi seguidor” ta xemanail 1 yuʼun marsoe (1 Ped. 2:21; Mar. 10:21). Jaʼ mas chkakʼtik ta mukʼ li kʼusi tstsatsubtas koʼontontik sventa chol mantale.
2. ¿Kʼuxi xuʼ tskoltautik li stalelal Jesús ta sventa ti kuch yuʼune?
2 Li Jesuse laj yakʼ kiltik. Kʼalal cha chol mantal ta naetike, ¿kʼuyelan chavaʼi aba kʼalal oy buchʼu chopol cha stakʼbote? Xuʼ xvul ta ajol li kʼusi laj yal Jesuse: «Me laj yutsʼintaicun ec li vuʼune, jaʼ noʼox jech chayutsʼintaoxuc ec» (Juan 15:20). Kʼalal mu lekuk ta stakʼike maʼuk skʼan xal ti chkichʼtik nutsele. Li kʼusi koltaat-o Jesús sventa xkuch yuʼun kʼusuk prevail xchiʼuk vokoliletike jaʼ ti albil noʼox ti tsta muyubajele. Li voʼotik eke mi jaʼ chkakʼ ta koʼontontik ti lek xilutik li Jeovae xchiʼuk li matanal xuʼ jtatik ta skoj ti tukʼ-o chkakʼ jbatike, jaʼ tskoltautik sventa mu xlaj stsatsal koʼontontik xchiʼuk jech mu xchibaj-o koʼontontik (Heb. 12:2, 3; Pro. 27:11). Mi mu xkikta jbatik li ta chol mantale, xuʼ jpat koʼontontik ti tskoltautik li Cristo Jesuse (Mat. 28:20).
3. ¿Kʼuxi chkakʼtik ta ilel ti jech chkiltik chol mantal kʼuchaʼal li Jesuse?
3 «Jaʼ ta sventa ti tacbilun tale.» Jaʼ baʼyel laj yakʼ ta xkuxlejal Jesús li xcholbel skʼoplal Ajvalilal yuʼun Diose (Luc. 4:43). Laj yakʼ tajek ta yoʼonton spasel li chol mantale. Yuʼun anil skʼan pasel laj yil, jech oxal la saʼilanbe lek yorail butik xuʼ chalbe skʼoplal li Ajvalilale. Pe li voʼotik eke jaʼ yajtunelutik, jech oxal, ¿mi yakal ta jchanbetik batel ek? Li ta jujun kʼakʼale, ¿mi oy van krixchanoetik ti xuʼ jcholbetik li lekil aʼyeje? Ti kʼuyepal jkʼanojtik Cristoe jaʼuk akʼo stij koʼontontik sventa xkakʼbetik yipal xcholel mantal ti bu kʼalal xuʼ kuʼuntike (2 Cor. 5:14).
4. ¿Kʼuxi xuʼ mas jlekubtastik li chol mantal ta jpastike?
4 «Me junuc cristiano muʼyuc bochʼo jech chloʼilaj.» Chʼayal to kʼot yoʼonton yuʼun krixchanoetik ti kʼuyelan ichanubtasvan li Jesuse (Juan 7:46; Mat. 7:28, 29). ¿Kʼu yuʼun? ¿Kʼusi ti jelel-o xchiʼuk li yan jchanubtasvanejetike? Yuʼun skʼanoj li kʼusitik laj yakʼ ta chanele, li krixchanoetike xchiʼuk jelel ti kʼutik yelan ichanubtasvane. Kʼalal ta jchanbetik li mukʼta jchanubtasvaneje, li voʼotike xuʼ jchantik mas ti kʼuyelan ta jcholtik mantale (Luc. 6:40).
5. ¿Kʼusi skʼan xkakʼ ta koʼontontik spasel kʼalal ta jchantik li livro “Ven, sé mi seguidor” sbie?
5 Li kʼusi laj xa jkʼeltik tale jaʼ noʼox junantik kʼusitik toj ep sbalil ti xuʼ jchantik ta stojolal Jesuse. ¿Kʼusitik to yan ti ep sbalil xuʼ jchanbetike? Kʼalal ta jchanbetik batel mas xkuxlejal li ta Xchanel Vivlia ta Tsobobbaile, akʼo me ta avoʼonton «[yojtikinel li] cʼanel yuʼun Cristoe», chanbo me skʼopojel xchiʼuk li kʼusitik la spase (Efe. 3:19).