Jesucristo, li Mukʼta misioneroe
«Te liquemun tal ta stojol. Jaʼ stuc la stacun tal.» (JUAN 7:29.)
1, 2. ¿Kʼusi jaʼ li jun misioneroe, xchiʼuk buchʼu ti xuʼ xichʼ biiltasel ta Mukʼta misioneroe?
¿BUCHʼU cha nopbe skʼoplal kʼalal chavaʼi li jpʼel kʼop misioneroe? Oy jlome jaʼ tsnopbeik skʼoplal li misioneroetik yuʼunik li buchʼutik skuyoj sbaik ta yajtsʼaklom Cristoe, ti tskap sbaik ta politika xchiʼuk ta sventa stakʼin li balumiletik bu chtunike. Pe li kʼusi mas chtal ta joltik ta melel kʼuchaʼal yajrextikoutik Jeovae, jaʼ van li misioneroetik ti chichʼik takel batel yuʼun Jtsop Jbeiltasvanejetik ta xcholel li lekil aʼyej ta spʼejel Balumile (Mat. 24:14). Li yajtsʼaklomtak Cristo taje, muʼyuk kʼusi smalaoj ch-akʼbatik ti yakʼoj yipik xchiʼuk xchʼakoj skʼakʼalik ta spasel li alakʼ sba abtel ta yakʼbel yil krixchanoetik kʼuxi xuʼ xnopajik ta stojolal Jeova xchiʼuk kʼuxi xuʼ lek xil sbaik xchiʼuke (Sant. 4:8).
2 Melel onoʼox ti muʼyuk ta jtatik ta Vivlia ta tsotsil li jpʼel kʼop misionero xchiʼuk misioneroetik, ti xie. Pe li ta Efesios 4:11 ta Xchʼul Cʼop ti Jtotic Diose, li jpʼel kʼop ta griego ti jelubtasbil kʼuchaʼal «[j-al] lequil achʼ cʼope» xuʼ xichʼ jelubtasel kʼuchaʼal misionero xtok. Veno, li Jeovae jaʼ li mukʼta j-al lekil aʼyeje, manchuk mi jech, mu stakʼ xkaltik ti jaʼ mukʼta misioneroe, yuʼun li jun misioneroe chaʼa, jaʼ ti buchʼu chichʼ takel batel ta spasel junuk abtelale, pe li Jeovae muʼyuk bu takbil ta spasel junuk abtelal. Yan li Jesuse xi laj yal ta stojolale: «Te liquemun tal ta stojol. Jaʼ stuc la stacun tal», xi (Juan 7:29). Jaʼ jech, li Jeovae la stak tal ta Balumil li jun noʼox xNichʼone, yuʼun skʼanoj ta jyalel li krixchanoetike (Juan 3:16). Yan srasonal xtok ti la stak tal ta Balumile jaʼ sventa «c[h]al li cʼusi melele» (Juan 18:37). Jaʼ yuʼun xuʼ xkaltik ti jaʼ lekil xchiʼuk Mukʼta misionero echʼ ta Balumil li Jesuse. Toj lek kʼot ta pasel yuʼun li yalel lekil aʼyeje, yuʼun kʼalal to ta jkʼakʼaliltik ta jtabetik sbalil li yabtel ta misioneroale. ¿Kʼuxi ta jtabetik sbalil? Jech kʼuchaʼal liʼe, manchuk mi maʼuk misioneroutik, jkotoltik xuʼ jech chi jchanubtasvan ti kʼuyelan la spase.
3. ¿Kʼusitik ta jtakʼtik ta jlikel?
3 Kʼalal ta jchanbetik skʼoplal li yabtel Jesús ta yalel lekil aʼyeje, xuʼ xi ta jakʼtike: ¿Kʼusitik laj yil ta xkuxlejal liʼ ta Balumile? ¿Kʼu yuʼun toj lek li chanubtasel laj yakʼe? ¿Kʼusi ti toj lek kʼot-o ta pasel yuʼun li yabtel ta stojolal Diose?
Ta slekil yoʼonton itun ta jun achʼ kuxlejal
4-6. ¿Kʼusitik la snopes sba ta spasel Jesús kʼalal take tal ta Balumile?
4 Li misioneroetik ta jkʼakʼaliltik xchiʼuk li buchʼutik chbatik ti bu chtun tajmek jchol mantaletike, ta me snopes sbaik ta jun kuxlejal ti mu sta jech slekil kʼuchaʼal toʼox kuxulike. Pe mu xnop kuʼuntik kʼu to yepal jelel li xkuxlejal Jesús liʼ ta Balumile xchiʼuk li xkuxlejal te ta vinajele, ta stsʼel sTot xchiʼuk ta stsʼel anjeletik ti tukʼ chtunik ta stojolal Jeovae (Job 38:7). Kʼalal la xchiʼin ta naklej li jmulavil krixchanoetik ta jun chopol balumile toj jelel ti kʼu toʼox yelan nopem xaʼie (Mar. 7:20-23). Jech xtok, la stsʼikbe xchopolal li yajtsʼaklomtak ti lek xilane, yuʼun laj yitʼixan sbaik (Luc. 20:46; 22:24). Manchuk mi jech, li Jesuse lek tukʼ la skʼelbe skʼoplal li kʼusitik la snuptan kʼalal echʼ ta Balumile.
5 Mu ta skʼelobiluk juʼelal lik kʼopojuk ta sneneʼal li Jesuse, moʼoj, yuʼun kʼunkʼun lik xchan kʼuchaʼal onoʼox chchan kʼopojel li neneʼetike. ¡Pe jnoptik xa noʼox avaʼi un, ti ta vinajele ta toʼox spas ta mantal li anjeletike! Li Jesuse laj onoʼox xchanbe junuk «scʼop [li] cristianoetic» liʼ ta balumile ti jelel tajmek li «ta scʼop jʼalmantaleti[ke]» (1 Cor. 13:1). Akʼo mi jech, mu junuk krixchano stabe ta be li slekil kʼopojel Jesuse (Luc. 4:22).
6 Jnopbetik skʼoplal yan kʼusitik xtok ti la snopes sba spasel li xNichʼon Dios kʼalal take tal ta Balumile. Manchuk mi muʼyuk bu la xkuchbe smul li Adane, li Jesuse jaʼ mero krixchano echʼ, jech kʼuchaʼal li buchʼutik kʼot ta «xchiʼiltac ta voqʼuele», o li yajtsʼaklomtak ti yichʼojik tʼujele (kʼelo Hebreos 2:17, 18). Kʼalal jvoy xaʼox skʼan xcham li Jesuse, la stsʼik sba ta skʼanbel sTot «echʼem ta lajuneb xchanvinic (70,000) ta mil jʼalmantaletic» sventa chkoltaat, manchuk mi jaʼ toʼox bankilal ta vinajel yuʼun li anjeletike, yuʼun li Miguel, li bankilal anjele jaʼ toʼox tspas ta mantal (Mat. 26:53; Jud. 9). Melel ti la spas skʼelobiltak juʼelal li Jesuse, pe mi ta jkoʼoltastik li kʼusitik la pas ta Balumile chkakʼtik venta ti jaʼ jutuke, ti jaʼ mas ep kʼusitik kʼot ta pasel yuʼun jechuk ti teuk oy ta vinajele.
7. ¿Kʼu yelan laj yilik Mantal li judioetike?
7 Kʼalal mu toʼox bu talem kʼuchaʼal krixchanoe, yikʼaluk van li Jesús, «li Cʼope», itun ta yajkʼopojel Dios kʼalal la sbeiltas ta taki xokol balumil li j-israeletike (Juan 1:1; Éxo. 23:20-23). Pe li stukike, manchuk mi «[laj yichʼ] ta [s]cʼobic li mantaletic ti laj yal yajʼalmantaltac Dios ta voʼonee», muʼyuk bu «[x]chʼunic» (Hech. 7:53; Heb. 2:2, 3). Jech xtok li ta baʼyel sigloe, li jbabeetik ta relijion yuʼun judioetike la sjelbeik smelolal li Mantale. Li mantal ta sventa sabadoe jaʼ jun skʼelobil (kʼelo Marcos 3:4-6). Li jchanubtasvanejetik xchiʼuk li fariseoetike la «[skomtsanik] ti bu toj tsots scʼoplal ta smantal Diose; jaʼ ti tscʼan pasel cʼusi tuqʼue, li cʼuxubinvaneje, xchiʼuc ti tscʼan jun coʼntontique» (Mat. 23:23). Manchuk mi jech, li Jesuse muʼyuk bu xchibaj; la xchol-o batel li kʼusi melele.
8. ¿Kʼu yuʼun xuʼ tskoltautik li Jesuse?
8 Li Jesucristoe oy onoʼox ta yoʼonton abtel. Ta sventa ti skʼanoj li krixchanoetike jaʼ chtijbat-o yoʼonton ta skoltael xchiʼuk oy-o ta yoʼonton xcholel mantal. Koliyal ti tukʼ laj yakʼ sba ta stojolal Jeova kʼalal liʼ oy ta Balumile, «jech jaʼ icʼot ta yajval xcuxlejalic sventa sbatel osil scotol li bochʼotic ta xchʼunique». Jech xtok, «ta sventa ti laj yaʼay lec ta sbecʼtal stuc li prevae, jech xuʼ yuʼun tscolta ta sventa svuʼel li bochʼotic jech chtal preva ta stojolic [jech kʼuchaʼal voʼotik] eqʼue» (Heb. 2:18; 5:8, 9).
Jun jchanubtasvanej ti toj lek chapale
9, 10. ¿Kʼusi chanubtasel laj yichʼ Jesús kʼalal mu toʼox chtake tal ta Balumile?
9 Li avie, kʼalal mu to tstak batel ti bu chtunik misioneroetik li Jtsop Jbeiltasvaneje, baʼyel tskʼel lek ti akʼo xichʼik chapanele. ¿Mi laj yichʼ chapanel Jesús kʼalal mu toʼox chichʼ tʼujel ta Mesiase? Laj, pe maʼuk li ta chanob vun yuʼunik li jchanubtasvanejetike mi jaʼuk bu chanubtase yuʼun junuk jbabe ta relijion ti lek ojtikinbile (Juan 7:15; koʼoltaso xchiʼuk Hechos 22:3). Vaʼun chaʼa, ¿kʼu yuʼun toj lek echʼ ta jchanubtasvanej?
10 Kʼuk yepal ti kʼusitik la xchan ta stojolal smeʼ ti María sbie xchiʼuk ta stojolal li xchaʼtot ti José sbie, li chanubtasel ti mas tsots skʼoplal laj yichʼe, te lik tal ti bu toj mas xa noʼox leke. Xi laj yal Jesús ta sventa taje: «Maʼuc laj cal cʼusi oy ta coʼnton jtuc. Jaʼ Jtot laj yalbun mantal cʼusi xuʼ chcal, xchiʼuc cʼu xʼelan chicʼopoj, jaʼ li bochʼo la stacun tale», xi (Juan 12:49). Kʼelavil, li Nichʼonile laj yichʼ lek mantal ta sventa ti kʼusi chakʼ ta chanele. Jech ta melel, kʼalal mu toʼox xtal ta Balumil li Jesuse jal tajmek laj yichʼ chapanel yuʼun sTot. ¿Mi oy to van yan lekil chanubtasel?
11. ¿Bu to kʼalal laj yakʼ ta ilel Jesús li slekil yoʼonton sTot ta stojolal li krixchanoetike?
11 Kʼalal onoʼox laj yichʼ pasel li Jesuse, toj lek laj yil sba xchiʼuk li Jeovae. Kʼalal te toʼox ta vinajele, laj yil kʼuyelan tstsak ta mukʼ krixchanoetik li sTote xchiʼuk laj yakʼ venta ti kʼusi oy ta yoʼonton ta stojolalike. Jech oxal chaʼa, la xchanbe slekil yoʼonton sTot ta stojolal li krixchanoetike. Jech onoʼox, li Jesuse jaʼ li pʼijilal ti batsʼi kuxule, jaʼ yuʼun xi laj yale: «Toj jun coʼnton ta stojol li cristianoetique», xi (Pro. 8:22, 31).
12, 13. 1) ¿Kʼusi la xchan Jesús ta sventa ti kʼuyelan la spas Jeova ta stojolal li j-israeletike? 2) ¿Kʼuxi la stunes Jesús li kʼusi la xchan ta vinajele?
12 Li chanubtasel laj yichʼ Jesús noxtoke jaʼ ti laj yil kʼuyelan la spas Jeova kʼalal chlik vokolile. Jnopbetik skʼoplal li j-israeletik ti pimik ta mantale. Nehemías 9:28 xi chal ta stojolalike: «Cʼalal jun xa yoʼntonic avuʼune, lic stoy sbaic ta atojol yan velta. Jech lic avacʼ ochicuc ta scʼob yajcontraic noxtoc, lic yichʼic utsʼintael. Tsʼacal lic scʼanic coltael ta atojol yan velta. Pero ta sventa ti toj echʼem smucʼul avoʼntone, laj avaʼibe tal scʼopic cʼalal ta vinajel, ep ta velta laj acolta», xi. Ta skoj ti abtej xchiʼuk sTote xchiʼuk ti nopol yiloj kʼusi tspase, jaʼ jech la xkʼuxubin krixchanoetik ti bu la xchol mantal li Jesuse (Juan 5:19).
13 Jech xtok, la spas ta stojolal yajtsʼaklomtak li kʼusi la xchan ta vinajel li Jesuse, yuʼun la xkʼuxubinan. Kʼalal jvoy xa noʼox skʼan xchame, li yajtakboltak ti skʼanojan tajmeke, «ijatovic batel scotolic; stuc xa te la scomtsanic li Jesuse» (Mat. 26:56; Juan 13:1). ¡Li jtakbol Pedroe oxib to velta laj yal ti mu xojtikine! Manchuk mi jech, li Jesuse muʼyuk bu la smakbe sbelel sventa tsutik tal. Jaʼ yuʼun xi laj yalbe li Pedroe: «Laj xa jcʼopanbot Dios ta atojol, yuʼun jech mu me xchʼay o li xchʼunojel avoʼntone. Cʼalal ta xlic asutes avoʼntone, voʼot chatsatsubtasbe yoʼnton li achiʼiltaque», xut (Luc. 22:32). Jech ta melel, «li yajtacbolaltac Jesuse xchiʼuc li jʼalcʼopetique» kʼotik ta yoyal o snakleb li Israel sventa Diose. Jech noxtok, li tonetik sventa snakleb li smuroal Achʼ Jerusalene yichʼojbe sbi li lajchaʼvoʼ yajtakboltak Chʼiom Chije, li Jesucristoe. Li yajtsʼaklomtak Cristo avi ti yichʼojik tʼujele xchiʼuk li xchiʼiltakik ti yantik chijetik sbiike, kʼotemik ta jchʼiel organisasion ti yakʼoj sbaik ta xcholbel skʼoplal li Ajvalilal yuʼun Diose, koltabilik ta stsatsal Dios xchiʼuk chbeiltasatik yuʼun li skʼanbil Nichʼone (Efe. 2:20; Juan 10:16; Apo. 21:14).
¿Kʼuxi chanubtasvan li Jesuse?
14, 15. ¿Kʼuxi jelel-o li chanubtasel yuʼun Jesús li ta chanubtasel chakʼik li jchanubtasvanejetik xchiʼuk li fariseoetike?
14 Kʼalal chanubtasvan li Jesuse, la stunes li kʼusi xchanoje. Kʼalal ta jkoʼoltastik ti kʼuyelan chanubtasvan xchiʼuk li jbabeetik ta relijion yuʼun li judioetike, jamal xkiltik ti xjelav to yutsil li chanubtasel laj yakʼe. Li jchanubtasvanejetik xchiʼuk li fariseoetike la spʼajbeik «smantal Dios ta scoj ti jaʼ [y]ichʼojic li [s]talelic onoʼoxe». Yan li Jesuse jaʼ laj yakʼ ta chanel li snopben sTote, maʼuk li kʼusi tsnop stuke (Mat. 15:6; Juan 14:10). Jech skʼan jpastik ek.
15 Oy to yan kʼusi ti jelel-o tajmek Jesús li ta jbabeetik ta relijion ta skʼakʼalile. Xi laj yale: «Chʼunic me li smantal Dios chayalboxu[k] [li jchanubtasvanejetik xchiʼuk li fariseoetike], pasic me. Jaʼ noʼox mu me xapasic jech chac cʼu chaʼal ta spasique; yuʼun jaʼ noʼox chalic, mu spasic», xi (Mat. 23:3). Pe li Jesuse la spas li kʼusi chakʼ ta chanele. Kalbetik junuk skʼelobil avil.
16. ¿Kʼuxi jnaʼojtik ti jech yelan kuxi Jesús kʼuchaʼal laj yal ta Mateo 6:19-21?
16 «Tsobo acʼulejalic te ta vinajel», xi la stijbe yoʼonton yajtsʼaklomtak li Jesuse (kʼelo Mateo 6:19-21). ¿Mi jech laj yakʼ ta ilel ta xkuxlejal kʼuchaʼal chale? Jech kʼuxi un. Yuʼun xi laj yal ta stojolale: «Li vetetique oy xchʼenic; li mutetique oy stasic. Pero vuʼun ti Xnichʼon cristiano licʼote muʼyuc bu xuʼ ta jmochan jba», xi (Luc. 9:58). Lek noʼox sba ikuxi, yuʼun li kʼusi mas tsots skʼoplal laj yile jaʼ ti chcholbe skʼoplal li lekil aʼyej sventa Ajvalilal yuʼun Diose. Ta stalelal laj yakʼ ta ilel ti xuʼ jun yoʼonton xkuxi li krixchanoe, ti muʼyuk bu jech la svul yoʼonton jech kʼuchaʼal li buchʼutik tstsob skʼulejalik ta Balumile. Jech noxtok, laj yal ti jaʼ mas toj lek mi ta jtsob jkʼulejaltik ta vinajele, «ti bu mu xlaj ta chil, xchiʼuc ti bu mu xcuxin, ti mu xbat ta eleqʼue». ¿Li voʼotik une? ¿Mi yakal ta jchʼuntik li mantal ti akʼo jtsob jkʼulejaltik ta vinajele?
Stalelaltak ti jaʼ kʼane-o yuʼun krixchanoetike
17. ¿Kʼusi talelaletik ti jaʼ pasat-o ta lekil jchol mantal li Jesuse?
17 ¿Kʼusi ti pasat-o ta lekil jchol mantal li Jesuse? June jaʼ li kʼuyelan yoʼonton ta stojolal krixchanoetike. La xchanbe stalelal sTot, laj yakʼ ta ilel talelaletik kʼuchaʼal liʼe: bikʼitik laj yakʼ sba, kʼanvan xchiʼuk kʼuxubinvan. Kalbetik skʼoplal li talelaletik taje, ti nopaj-o tal epal krixchanoetike.
18. ¿Kʼu yuʼun chkaltik ti bikʼit laj yakʼ sba li Jesuse?
18 Sventa chkʼot ta pasel yuʼun li yabtel akʼbil ta Balumile, li Jesuse «la scomtsan [skotol], ay spas sba jech chac cʼu chaʼal mozo, la scoʼoltsan sba jech chac cʼu chaʼal cristiano; xcoʼlaj xchiʼuc vinic ivul liʼ ta banamil[e]» (Fili. 2:7). Taje jaʼ svinajeb ti toj bikʼit laj yakʼ sbae. Jech noxtok, muʼyuk bu la spʼaj li krixchanoetike xchiʼuk muʼyuk bu xtoyet xa stalelal chal ti akʼo xchikintabat skʼop ta skoj ti likem tal ta vinajele. Muʼyuk bu xvulvunet xa chalbe skotol krixchanoetik ti jaʼ Mesías jech kʼuchaʼal tspasik li jecheʼ mesiasetike. Bateltike laj yalbe krixchanoetik ti mu me xalbeik yantik ti buchʼue xchiʼuk ti kʼusi la spase (Mat. 12:15-21). Tskʼan ti akʼo snop stukik mi tskʼan tstsʼakliik o mi moʼoj ta sventa ti kʼusi chilike. Jech xtok, muʼyuk la suj yajtsʼaklomtak ti akʼo tukʼ xakʼ sbaik kʼuchaʼal li anjeletik ti la xchiʼin ta naklej ta vinajele.
19, 20. ¿Kʼuxi tijbat-o yoʼonton Jesús ta skoltael krixchanoetik li kʼanelal xchiʼuk li xkʼuxul yoʼontone?
19 Laj yakʼ ta ilel kʼanelal xtok li Jesuse, jtos stalelal sTot ta vinajel ti toj lek xvinaje (1 Juan 4:8). Li kʼanelale jaʼ tijbat-o yoʼonton ta xchanubtasel li krixchanoetike. Jnopbetik skʼoplal jun kerem ajvalil ti nopaj ta stojolale (kʼelo Marcos 10:17-22). Li Jesuse «icʼuxubaj ta yoʼnton» xchiʼuk la skʼan la skolta manchuk mi muʼyuk xtuchʼ ta yoʼonton li kʼusitik oy yuʼun li kerem sventa x-och ta yajchankʼope.
20 Yan stalelal ti jaʼ kʼanat-o yuʼun li krixchanoetike jaʼ ti kʼuxubinvane. Li Jesuse snaʼoj ti oy onoʼox svokolik li buchʼutik chkʼot ta yoʼontonik li mantal chale, yuʼun jmulavil krixchanoetik. Jaʼ yuʼun la xkʼuxubin xchiʼuk la xchanubtas. Jun veltae, li Jesús xchiʼuk li yajtakboltake solel mu xokobik tajmek, mi jaʼuk kʼuxut xveʼik. ¿Pe kʼusi la spas Jesús kʼalal laj yil li epal krixchanoetike? «Icʼuxubaj ta yoʼnton, yuʼun jaʼ jechic jech chac cʼu chaʼal chijetic ti muʼyuc xchabielique. Jech lic xchanubtas; ep cʼusitic laj yacʼ ta chanel.» (Mar. 6:34.) Laj yil ti kʼux ta albel skʼoplalik li krixchanoetik ti bu chchol mantale, jaʼ yuʼun, manchuk mi chil viʼnal o lubel, laj yakʼ ta yoʼonton xchanubtasel xchiʼuk spasel skʼelobiltak juʼelal ta stojolalik. Li kʼupilik sba stalelale jaʼ nopajik-o ta stojolal jlom li krixchanoetik taje, vaʼun jaʼ ikʼotik-o ta yajtsʼaklomtak li kʼusi laj yale.
21. ¿Kʼusi ta jkʼeltik li ta yan xchanobile?
21 Jech kʼuchaʼal chkiltik ta yan xchanobile, ep to kʼusitik xuʼ jchantik ta sventa li yabtel la spas Jesuse. ¿Kʼusitik to yan xuʼ jech jpastik kʼuchaʼal Jesucristo, li Mukʼta misioneroe?
¿Kʼusi cha takʼ?
• ¿Kʼusi chanubtasel laj yichʼ Jesús kʼalal muʼyuk toʼox talem ta Balumile?
• ¿Kʼu yuʼun xjelav to yutsil li chanubtasel laj yakʼ Jesuse ti mu sta jech kʼuchaʼal li jchanubtasvanejetik xchiʼuk li fariseoetike?
• ¿Kʼusi stalelaltak Jesús ti jaʼ kʼanat-o yuʼun li krixchanoetike?
[Lokʼol ta pajina 15]
¿Kʼu yelan la xchanubtas krixchanoetik li Jesuse?
[Lokʼol ta pajina 14]