¿Kʼusi xuʼ xchanik ta jtojolaltik kʼalal chilutik yantike?

1. ¿Kʼusi la xchanik li yajtsʼaklomtak Cristo kʼalal laj yilik li Jesuse?

¹ Li Jesuse xi laj yale: «Jaʼ cuchic li icatsil cuʼune, jaʼ chanic cʼu xʼelan coʼnton» (Mat. 11:29). Lek jamal xvinaj ti maʼuk noʼox ta skʼopojel ta xchanubtasvane, moʼoj, chakʼ ta ilel ta stalelal xtok. Nopo avaʼi li kʼusi laj xchanik yajtsʼaklomtak kʼalal laj yilike. Toj lek yoʼonton xchiʼuk lek snaʼ xkʼanvan (Mat. 8:1-3; Mar. 6:30-34). Bikʼit laj yakʼ sba (Juan 13:2-5). Kʼalal chiʼinat ta chol mantal yuʼun li yajtsʼaklomtake, laj yilik ti jaʼ jun j-abtel ti mu snaʼ xlub ta xchanubtasel lek ta sventa kʼusi melel li krixchanoetike (Luc. 8:1; 21:37, 38). ¿Kʼusi van ta snopik li buchʼutik chilutik ta chol mantale?

2. ¿Kʼusi xuʼ lek xkʼot ta stojolal yantik mi lek jpat jxokontik xchiʼuk mi lek jtalelaltike?

² Li krixchanoetik ta jkʼopontike. Mi lek noʼox li jpat jxokontike, li jtalelaltike xchiʼuk mi melel oy ta koʼontontik li yantike xuʼ xkʼot ta yoʼonton li kʼusi chkalbetike (2 Cor. 6:3; Fili. 1:27). Jech xtok chakʼik venta ti nopolik noʼox ta jtunestik li Vivliae, xchiʼuk lek chaʼiik kʼalal ta jchikintabetik li kʼusi chalike. Mu me xchʼay xavaʼi, mi lek atalelale jaʼ me jtos kʼusi tsots skʼoplal sventa xaʼiik krixchanoetik li lekil aʼyej ta sventa Ajvalilal yuʼun Diose.

3. ¿Kʼusi xuʼ jpastik sventa oyuk kʼusi lek xchanik li kermanotaktike?

³ Li kermanotaktike. Nopo avaʼi xtok kʼusi xuʼ lek xkʼot ta pasel kuʼuntik ta stojolal li kermanotaktike. Mi baxbolutik ta chol mantale xuʼ me xchanik li yantike. Jech kʼuchaʼal li takʼine tskʼan juxbel ye ta takʼin noxtok, jech ek, mi lek ta jchapantik junuk skʼelobil chol mantale xuʼ xtijbat yoʼonton yantik sventa mas slekubtasik li chol mantal tspasike (Pro. 27:17). Mi chkakʼ kiptik ta jtsakbetik sbiik ta vun li buchʼutik lek chaʼiike xchiʼuk chi jsut noʼox skʼelele, jech me tspasik li yantik eke. Kʼalal lek ta jpastik batel li kabteltik ta chol mantale, xuʼ xchanik jech ek li kermanotaktike (2 Tim. 4:5).

4. ¿Kʼu yuʼun skʼan jkʼel jbatik bakʼintik ti kʼuyelan chkakʼ ta ilel li jtalelaltike?

⁴ Sventa xa naʼ mi oy kʼusi xuʼ xchanik ta atojolal li yantike, ¿kʼu yuʼun mu xa kʼel bakʼintik li kʼusi cha pase xchiʼuk li kʼusi chavale? Ta jlekubtasbetik yoʼonton Jeova mi lek li jtalelaltike xchiʼuk jech chkaʼi jbatik kʼuchaʼal li jtakbol Pabloe, ti xi laj yale: «Jaʼ chanic cʼusi ta jpase jech chac cʼu chaʼal jaʼ ta jchan cʼusi la spas li Cristoe» (1 Cor. 11:1).