Mantaletik sventa li Tsobajel sventa Tunelale
Li ta Kabteltik sventa Dios liʼe ta xjel junantik sbi ti kʼuyelan chichʼ toʼox tunesel sventa chichʼ alel kʼuyelan ch-echʼ li mantaletik ta Tsobajel sventa Tunelale. Li kʼusitik chichʼ alel liʼe jaʼ sventa chichʼ jambel smelolal xchiʼuk chichʼ jelel junantik li kʼusi laj yichʼ alel toʼox li ta mantal «Kʼuxi ta jchapan jbatik sventa li Tsobajel sventa Tunelale», ti lokʼ ta Kabteltik sventa Dios yuʼun mayo ta 2009.
◼ Mantal. Liʼe jaʼ skʼoplal ti ch-echʼ yakʼ mantal jun ermanoe. Li kʼusi ch-echʼ yalbe skʼoplale, te tsakal tal bu chlokʼ. Muʼyuk chakʼ sloʼilik li buchʼutik te ta tsobajele. Li buchʼu chetʼes mantale jaʼ chalbe lek smelolal li kʼusitik mas chtun yuʼun li tsobobbaile.
◼ Chichʼ jakʼel xchiʼuk chichʼ takʼel. Jech chichʼ pasel kʼuchaʼal chichʼ chanel Li Jkʼel osil ta toyole, ta xichʼ jakʼel ta skotol li parafoetike. Li buchʼu chetʼese chakʼbe slikeb xchiʼuk slajeb sloʼil. Li buchʼu chetʼes li mantale akʼo spas persa ti mu epuk xloʼilaje. Ti bu kʼalal xakʼ yoraile xuʼ xichʼ kʼelel li tekstoetik mas tsotsik skʼoplale. Jaʼ to mi jech tsʼibabil tal ti skʼan kʼelel li parafoetike, skʼan xichʼ kʼelel.
◼ Mantal ti xuʼ xichʼ jakʼele. Li liʼe xuʼ stakʼik jun chibuk kʼusitik li buchʼutik te ta tsobajele. Xuʼ xkaltik ti kapal ta jvokʼ sjakʼobil xchiʼuk stakʼobil li mantal taje.
◼ Skʼelobiltak xchiʼuk chichʼ jakʼel loʼil. Kʼalal te tsʼibabil ti skʼan xjelav junuk skʼelobile, li buchʼu chetʼes mantale jaʼ me oy ta sba ti x-echʼe, akʼo mi mu persauk jaʼ sjelubtas stuk. Jech xtok, skʼan stʼuj jcholmantaletik ti lek ta chanbel stalelalik xchiʼuk ti xtojobik ta sjelubtasele. Ti bu kʼalal xuʼe, skʼan me baʼyuk xa onoʼox xichʼ chapanel li skʼelobile. Li achʼ jcholmantaletike jaʼ me lek ti mu sjelubtasik junuk skʼelobil chol mantale; mi ta jkʼantik chjelavike, junantike xuʼ x-echʼik kʼuchaʼal jkoltavanejetik noʼox. Kʼalal ch-echʼik ta plataforma li buchʼutik tsjelubtasik junuk skʼelobile mu me svalopatinik li ermanoetike. Jech xtok, kʼalal oy buchʼu chichʼ jakʼbel sloʼile skʼan xmuy ta plataforma, maʼuk noʼox te ta xchotleb. Skʼan me baʼyel xchanilanik o xchapanik li buchʼutik chichʼ jakʼbel sloʼilike xchiʼuk li buchʼutik tsjelubtasik skʼelobil chol mantale. Mi mu xakʼ yorail chil xchiʼuk ti skʼan sjutukajes kʼusi chal li buchʼu chetʼes mantale, mu me stakʼ ti muʼyuk xa chjelav yuʼun li skʼelobil chol mantal chapanbile o li buchʼu chichʼ jakʼbel sloʼile. Li yajkoltaobba moletike ta sjakʼbeik li jbabe yuʼun moletik (o yan mol) kʼalal skʼan toʼox stʼujik li buchʼutik chjelavike.
Mi oy to kʼusi yan chichʼ alel sventa junuk parte ta Kabteltik sventa Dios[e] jech skʼan xichʼ pasel. Jpatoj koʼontonkutik ti skotol li mantaletik yichʼ alel liʼe chkoltavan sventa «oyuc me smelol stuqʼuil scotol li cʼusitic» chichʼ pasel ta Tsobajel sventa Tunelale (1 Cor. 14:40).