Mu me xaxiʼ
1. ¿Bu van ti skʼan xavakʼ ta ilel stsatsal avoʼontone, xchiʼuk kʼu yuʼun?
1 ¿Mi oy junuk velta muʼyuk acholoj mantal li bu chachanunaj ta skoj ti chaxiʼ mi chavichʼ naʼleele? Melel onoʼox ti skʼan tsotsuk avoʼonton sventa xapas taje, mas to mi xatsʼijet noʼoxe. Jkʼeltik kʼusi xuʼ xaskoltaot.
2. Kʼalal chacholmantal ta chanobvune, ¿kʼuxi chavakʼ ta ilel apʼijil?
2 Oyuk apʼijil. Manchuk mi voʼot noʼox chacholmantal li bu chachanunaje, mu me persauk ti xavalbe skʼoplal Vivlia skotol li achiʼiltak ta chanun jech kʼuchaʼal ta jcholtik mantal ta naetike. Oyuk apʼijil sventa xanaʼ bakʼin xuʼ xacholmantal (Ecl. 3:1, 7). Xuʼ van oy junuk atarea o kʼusuk abtelal ti xuʼ xatunes sventa xaval li kʼusi achʼunoje. O xuʼ van sjakʼbot junuk achiʼil ta chanun ti kʼu yuʼun muʼyuk chapas jtosuk kʼusie. Oy jlom yajtsʼaklomtak Cristoe chalbe smaestroik ti jaʼik yajrextiko Jeova kʼalal chlik li chanun ta jujun jabile xchiʼuk chakʼbeik vunetik ti te chalbe smelolal li kʼusi jchʼunojtike. Li kʼusi spasojik yantike jaʼ ti tskajanik komel ta xmexaik li vunetik lokʼemik ta Vivlia sventa oyuk kʼusi xjakʼbatik yuʼun xchiʼilike.
3. ¿Kʼuxi xuʼ xachapan aba sventa xacholmantal li ta chanobvune?
3 Chapano aba. Mas me mu xaxiʼ mi chachapan abae (1 Ped. 3:15). Jaʼ yuʼun, kak nopo li kʼusi xuʼ sjakʼboxuke xchiʼuk ti kʼuxi xuʼ xatakʼbee (Pro. 15:28). Mi xuʼe, ichʼo batel li Vivliae, li livro Los jóvenes preguntan o Razonamiento xchiʼuk li yan vunetik ti chalbe skʼoplal li kʼusitik spasoj Dios sventa xatunes kʼalal sta-o chavile. Jech noxtok, xuʼ xavalbe li atot ameʼ sventa xavakʼik ta ilel kʼusi xuʼ xapasik li ta yichʼel ta mukʼ Jeova ta avutsʼ avalalike.
4. ¿Kʼu yuʼun ep sbalil mi chachol-o mantal li ta chanobvune?
4 Junuk noʼox me avoʼonton. Mu xanop ti ta onoʼox slabanoxuk skotol ora li achiʼiltak ta chanun kʼalal chacholmantale. Oy van jlome yan to sba chilik ti tsots avoʼontone xchiʼuk ti xuʼ xchikintaboxuk li kʼusi chavale. Pe mi mu buchʼu skʼan xchikintabote, mu me xchibaj avoʼonton. Ti jech la vakʼ persa spasele jaʼ chmuyubaj-o li Jeovae (Heb. 13:15, 16). Kʼanilanbo koltael Jeova sventa xakʼbot «stsatsal [avoʼonton]» kʼalal chacholmantale (Hech. 4:29; 2 Tim. 1:7, 8). Nopo noʼox avaʼi ti kʼu to yepal chamuyubaj mi oy buchʼu la xchikinta li kʼusi chavale. Yuʼun xuʼ me xkʼot ta yajtunel Jeova ta mas tsʼakal li krixchano taje.