Jvokʼ ti bu oy sjakʼobile
◼ Li totil meʼiletike, ¿kʼuxi xuʼ xchabi yalab xnichʼnabik kʼalal chlokʼik ta cholmantale?
Kʼalal chlokʼik ta cholmantal li totil meʼiletike skʼan me ti xikʼik batel xchiʼuk xchapanik ta yalel li lekil aʼyej sventa Ajvalil yuʼun Dios li yalab xnichʼnabike. Mi jeche, skʼan me skʼelik lek li yalab xnichʼnabik ti bikʼitik toe, yuʼun xuʼ van oy kʼusi xibal sba xkʼot ta pasel manchuk mi lek noʼox yilel li bu ta jcholtik mantale. Ta skoj ti kuxulutik ta skʼakʼalil «tsots vocol[e]», li pichʼ-oʼontonal xchiʼuk mulivajel ti muʼyuk xa noʼox smelolale yantik x-epaj batel tajek, jech oxal ep buchʼutik chilbajinik li kʼox kerem tsebetike (2 Tim. 3:1-5). Li totil meʼiletike skʼan me skʼelik lek li yalab xnichʼnabik ti bikʼitik to sventa chchabiik ta stojolal li buchʼutik tskʼan ch-ilbajinvanike. ¿Kʼusi van xuʼ spasik?
Li Vivliae chal ti skʼan pʼijukutik xchiʼuk ti jnoptik ti oy kʼusi xuʼ xibal sba xkʼot ta pasele (Pro. 22:3; Mat. 10:16). Maʼuk yuʼun ta jkʼan chkakʼkutik junuk mantal, pe jaʼ me lek ti kʼalal chlokʼik ta cholmantal li alab nichʼnabiletike skʼan ti chiʼinbiluk yuʼun junuk stot smeʼe o yan yijil krixchanoe. Mi jmoj chcholik mantal chaʼvoʼ chex kerem tsebetike, jaʼ lek ti teuk-o sat li stot smeʼike o ti xkʼelatik yuʼun yan yijil krixchanoe. Pe kʼalal chchʼiik xa li alab nichʼnabiletik xchiʼuk chakʼik iluk ti mas xa xtojob xchabi sbaike li totil meʼiletike xuʼ snopik mi persa to chchabiik tajek li yalab xnichʼnabike (kʼelo xtok La caja de preguntas ta Nuestro Ministerio del Reino yuʼun oktuvre ta 1992).
Jech xtok skʼan me oyuk jpʼijiltik kʼalal chijxanav ta karo o kʼalal oyutik ta bee. Kʼalal chkichʼ jpʼijiltike jaʼ tskoltautik sventa mu kʼusi chopol jnuptantik xchiʼuk mu jecheʼuk xkat koʼontontik, jtojtik poxiletik xchiʼuk ti mu jta jmultik ta stojolal li ajvaliletik liʼ ta balumil ti jaʼ xa noʼox batem ta yoʼontonik spasel letoe.
Li kerem tsebetike toj lek me ti «[x]albeic slequilal sbi li Mucʼul Diose» (Sal. 148:12, 13). Ti lek chkʼopojik xchiʼuk ti lek stalelalik ta cholmantale labal sba chilik li krixchanoetike xchiʼuk tskʼupil kʼoptaik li Jeovae. Totil meʼiletik pasik me ti bu kʼalal xuʼ avuʼunik sventa lek xcholik mantal li avalab anichʼnabike xchiʼuk chabiik me sventa mu kʼusi xibal sba xkʼot ta pasel ta stojolalik.