Kʼanbo Dios ti akʼo xakʼbot sbendisione

Li Diose yakʼoj jmotontik ti stuk noʼox jeche: ti xuʼ jchiʼintik ta loʼile xchiʼuk ti xkalbetik ti kʼu yelan chkaʼi jbatike. Li j-alkʼop Davide (Daud) xi laj yalbe li Diose: «Voʼot ti chachikinta orasione, buchʼuuk noʼox krixchanoal chtal ta atojolal» (Salmo 65:2). Pe ¿kʼu yelan xuʼ jpastik orasion sventa xaʼibutik li Diose xchiʼuk ti xakʼbutik sbendisione?

ALO KʼU YELAN CHAVAʼI ABA XCHIʼUK BIKʼIT XAVAKʼ ABA

Xi chal ta Salmo 62:8: «Albo skotol li kʼusi oy ta avoʼontonike». Kʼalal ta jkʼopontik ta orasion li Diose, xuʼ xkalbetik li kʼusi oy ta yutil to koʼontontike. Li Buchʼu skotol xuʼ yuʼune toj lek ta xil kʼalal ta sjunul koʼontontik ta jpastik orasione.

TA SBI XAK’OPON LI DIOSE

Akʼo mi ep ta tos ti kʼu yelan chichʼ biiltasel li Diose, jech kʼuchaʼal, Jpasvanej, Jkʼuxubinvanej xchiʼuk li Buchʼu lek yoʼontone, pe jun noʼox li sbie. «Voʼon Jeovaun, taje jaʼ jbi» (Isaias 42:8). Li sbi Dios ti jaʼ Jeovae te chvinaj mas ta vukmil ta velta li ta Skʼop Diose. Epal j-alkʼopetik la stunesbeik li sbie. Li j-alkʼop Abraane xi laj yale: «Avokoluk Jeova, [...] akʼo to kʼopojkun» (Jenesis 18:30). Li voʼotik eke skʼan jkʼopontik ta sbi li Dios ti jaʼ li Jeovae.

PASO ORASION TA ABATSʼIKʼOP ATUK

Li Diose xaʼibe smelol li kʼusi ta jnoptike xchiʼuk ti kʼu yelan ta xkaʼi jbatike mu ventauk kʼusi kʼopal ta xijkʼopojutik. Xi chalbutik ta jamal li Skʼope: «Mu snaʼ xtʼujvan li Diose, yuʼun buyuk noʼox slumal lek ilbil li buchʼu chiʼta xchiʼuk ti tspas kʼusi tukʼe» (Echos 10:34, 35).

Sventa xakʼbutik sbendision li Diose, mu baluk noʼox ti ta jkʼopontik ta orasione. Li ta yan mantaletik chtale, ta jkʼeltik kʼusitik mas skʼan jpastik.