¿Kʼu yuʼun muʼyuk chchikinta skotol orasion li Diose?

Li Jtotik ta vinajele tskʼupin tajek kʼalal ta sjunul koʼontontik ta jkʼopontike. Pe li Jeovae muʼyuk tstakʼ skotol li orasione. ¿Kʼu yuʼun? ¿Kʼusi skʼan jtsaktik ta venta kʼalal ta jpastik orasione? Kʼelavil kʼusi chal li Vivliae.

Oy jayvoʼ krixchanoetik ti te oyik ta chʼulnae yakal ta xchanik ta jun livro li s-orasionike.

«Kʼalal chapas orasione, mu me xachaʼalilan li kʼusi avaloj [xae]» (Mateo 6:7).

Li Jeovae mu skʼan ti jaʼuk xkalbetik li kʼusi komem xa ta joltike o li kʼusi jchanojtik ta jlikuk livroe. Jaʼ kʼupil sba chaʼi kʼalal ta koʼontontik chlokʼ li kʼusi chkalbetike. Nopo avaʼi ta stojolal junuk avamigo ti koʼol-o kʼusi chalilanbot jujun kʼakʼale. ¡Tsta chkaʼitik, ¿jechuke?! Li buchʼutik yamigo sbaik ta melele jamal kʼusi chalbe sbaik xchiʼuk ep kʼusi tsloʼiltaik. Mi jech ta jchiʼintik ta loʼil li Dios eke, chkakʼbetik yil ti jaʼ kamigotike.

Jun vinik skʼeloj muyel ta vinajel kʼalal yakal ta xjux jlik svunal loteriae.

«Kʼalal chakʼanike, muʼyuk chavichʼik, yuʼun jaʼ sventa kʼusi chopol chtun avuʼunik kʼalal chakʼanike» (Santiago 4:3).

Mi oy kʼusi ta jkʼanbetik Dios ti mu skʼupine, mu me jnoptik ti tstakʼbutik li j-orasiontike. Jech kʼuchaʼal liʼe, jnoptik noʼox ti oy buchʼu chtajin sventa spas kanal takʼine, vaʼun tskʼanbe Dios ti x-akʼbat suertee. Li Jeovae, ¿mi tstakʼ van li orasion taje? Mu lekuk ti jech jnoptike, yuʼun li stuke mu skʼan ti oy kʼusi jpichʼ oʼontatike o ti jchʼuntik ta sventa suertee (Isaias 65:11; Lukas 12:15). Yoʼ stakʼ j-orasiontik li Diose, skʼan jaʼuk jkʼanbetik li kʼusi lek chil jech kʼuchaʼal chal li Vivliae.

Jun jbabe ta relijion yakal tspas orasion ta stojolal soltaroetik.

«Li buchʼu mu skʼan xchikinta mantale toj chopol kʼalal ta s-orasion» (Proverbios 28:9).

Li ta voʼnee, li Diose muʼyuk la xchikintabe s-orasion li buchʼutik mu xchʼunik mantale, jaʼ jech-o tsnop li avie (Isaias 1:15, 16; Malakias 3:6). Mi ta jkʼantik ti stakʼbutik li Diose, skʼan xkakʼbetik yipal ta xchʼunbel li smantaltake. Mi oy kʼusi chopol la jpastik ta voʼnee, ¿mi jaʼ skʼan xal ti muʼyuk xa chchikinta j-orasiontik li Diose? Moʼoj ta melel. Mi laj kakʼbetik yil ti jsutesoj xa koʼontontike xchiʼuk ti ta jkʼan ta jpasbetik li kʼusi oy ta yoʼontone, oy ta yoʼonton chakʼutik ta perton (Echos 3:19).

«Li buchʼu chnopaj ta stojolal Diose skʼan xchʼun ti oye xchiʼuk ti ch-akʼbat smotonik li buchʼutik ta sjunul yoʼonton tsaʼike» (Ebreos 11:6).

Kʼalal ta jpastik orasione, maʼuk noʼox sventa jlokʼestik li kʼusi ta jvul-o koʼontontike. Jaʼ jtos kʼuxi chkichʼtik ta mukʼ li Diose xchiʼuk chkakʼbetik yil ti jpatoj koʼontontik ta stojolale. Li jchankʼop Santiagoe laj yal ti skʼan oyuk xchʼunel koʼontontik kʼalal oy kʼusi ta jkʼanbetik li Jeovae, yuʼun mi mu jechuke, muʼyuk me kʼusi chakʼbutik (Santiago 1:6, 7). Pe sventa oyuk xchʼunel koʼontontik ta stojolal Diose, skʼan jchʼakbetik yorail xchiʼuk xkakʼtik persa xchanel Jvivliatik sventa xkojtikintike. Mi jech la jpastike, ta jnaʼtik li kʼusi oy ta yoʼontone xchiʼuk ta jpat koʼontontik ti chaʼi li kʼusi chkalbetike.