¿Kʼu yelan skʼan jkʼopontik Dios sventa xaʼibutike?

JKʼOPONTIK JEOVA TA SBI JESUS

«Kʼusiuk noʼox ti chakʼanbeik li Totile jaʼ chakʼboxuk ta jbi» (Juan 16:23).

Li kʼusi laj yal Jesuse chakʼ kiltik ti jaʼ noʼox skʼan jkʼopontik li Jeovae, ti muuk jtunestik kʼusi yan sventa jkʼopontike: jech kʼuchaʼal lokʼoletik, santoetik, anjeletik o junuk kutsʼ kalaltik ti chamem xae. Jech xtok, tskʼan ti jelubtasbetik ta sbi li Jesukristoe. Kʼalaluk ta jkʼopontik ta sbi Jesuse, chkakʼbetik yil Dios ti jnaʼojtik ti chaʼibutik ta skoj li kʼusi la spas ta jtojolaltik li Jesuse, xi laj yal li Jesuse: «Muʼyuk buchʼu xuʼ xtal ta stojolal li Totile, jaʼ noʼox ta jventa» (Juan 14:6).

TA SJUNULUK KOʼONTONTIK JKʼOPONTIK

«Albo skotol li kʼusi oy ta avoʼontonike» (Salmo 62:8).

Kʼalaluk ta jkʼopontik li Jeovae, skʼan jechuk xkiltik kʼuchaʼal jun totil ti skʼanojutike. Mu chanbiluk ta jlikuk livro o jkomes ta joltik kʼalal ta jkʼopontik li Diose, yuʼun skʼan xlokʼ ta koʼontontik xchiʼuk ti xkichʼtik ta mukʼe.

JAʼUK JKʼANBETIK LI KʼUSI LEK CHILE

«Kʼusiuk noʼox ti ta jkʼanbetike chaʼibutik mi jech ta jkʼanbetik jech kʼuchaʼal tskʼan yoʼontone» (1 Juan 5:14).

Li ta Vivliae, chalbutik li kʼusi tspas ta jtojolaltik li Diose xchiʼuk li kʼusi tskʼan akʼo jpastik ta stojolale. Sventa xaʼi li j-orasiontike, skʼan jechuk jkʼopontik jech kʼuchaʼal tskʼan yoʼontone. Sventa spas kuʼuntike, skʼan jchantik li Vivliae, vaʼun jaʼ jech chkojtikintik lek. Ta sjunul yoʼonton chaʼibutik mi jech la jpastike.

¿KʼUSITIK XUʼ JKʼANTIK TA ORASION?

Jkʼantik li kʼusitik chtun kuʼuntike. Xuʼ jkʼanbetik Dios li kʼusitik chtun kuʼuntike, jech kʼuchaʼal jveʼeltik, jkʼuʼtik o ti bu xuʼ xijnakiutike. Xuʼ xkalbetik xtok ti skoltautik sventa lekuk kʼusi xbat ta nopel kuʼuntike xchiʼuk ti xakʼ kipaltik sventa xkuch kuʼuntik li prevaetike. Jech xtok, xuʼ jkʼanbetik vokol ti xakʼutik ta pertone, ti xakʼ mas xchʼunel koʼontontike xchiʼuk ti xchabiutike (Lukas 11:3, 4, 13; Santiago 1:5, 17).

Jpastik orasion ta stojolal yantik. Li lekil totil meʼiletike lek tajek chilik ti skʼanojan sbaik li yalab xnichʼnabike. Li Jeovae jaʼ Jtotik, jaʼ yuʼun tskʼan ti jchabi jbatik ta jujuntal eke. Toj ep sbalil mi ta jpastik orasion ta stojolal li jnup jchiʼiltike, li kalab jnichʼnabtike, li kutsʼ kalaltike o ta stojolal li kamigotaktike. Xi laj yal li jchankʼop Santiagoe: «Pasbo me abaik orasion» (Santiago 5:16).

Jtojtikuk ta vokol. Xi chal Vivlia ta sventa li kʼusi la spas ta stojolal yantik li Jpasvanej kuʼuntike: «Akʼbatik talel voʼ ta vinajel xchiʼuk lek laj yakʼ sat li kʼusitik tstsʼunike, akʼbat lek sveʼelik xchiʼuk xkuxet tajek yoʼontonik» (Echos 14:17). Mi ta jnopbetik skʼoplal skotol li kʼusitik spasoj ta jtojolaltik li Diose, chlokʼ ta koʼontontik stojbel ta vokol. Jech xtok, kʼalal ta jchʼunbetik li smantaltake, yakal me ta jtojtik ta vokol (Kolosenses 3:15).

OYUK SMALAEL KUʼUNTIK XCHIʼUK JPASILANTIK-O ORASION

Bakʼintike, xuʼ van chopol chkaʼi jbatik ta skoj ti muʼyuk chkichʼtik takʼbel ta anil li j-orasiontik ti ta sjunul koʼonton ta jpastike. ¿Mi jaʼ skʼan xal ti muʼyuk oyutik ta yoʼonton li Diose? Mu jechuk ta melel. Bakʼintike, jaʼ noʼox skʼan jpasilantik-o orasion. Jkʼeltik batel junantik skʼelobil ti jech chakʼ ta ilele.

Li ta baʼyel xchanobile, laj kalbetik skʼoplal li Steve, xi to chal sloʼile: «Voʼne xa lilubtsaj jechuk ti muʼyukuk la jpas orasione». ¿Kʼusi koltaat-o? Lik xchan li Vivliae xchiʼuk laj yakʼ venta ti skʼan spasilan-o orasione. Xi to chal li Steve: «Ta jtojbe ta vokol Dios ta sventa li koltael xchiʼuk li kʼanelal chakʼbeikun ta ilel li kamigotake; mas xa ximuyubaj li avie».

¿Kʼusi kʼot ta stojolal Jenni ti mu sta-o chaʼi ti xchikintabat yuʼun li Diose? Xi chale: «Kʼalal chopol tajek chkaʼi jbae, la jkʼanbe vokol Dios ti skoltaun ta yaʼibel smelolal kʼu yuʼun ti muʼyuk tajek jbalil chkaʼi jbae». ¿Kʼuxi koltaat yuʼun li orasione? «Xchiʼinel ta loʼil li Diose la skoltaun sventa jechuk xkil jba ti kʼu yelan chilun li stuke. Akʼo mi oy tajek jmul chkaʼi jba, laj kakʼ venta ti mu jechuk chilun li Diose, la skoltaun xtok sventa mu xilubtsaj». ¿Kʼusi kʼot ta pasel un? «Li orasione la skoltaun sventa jaʼuk jun jtukʼil amigo xkil li Jeovae, jun Totil ti skʼanojune xchiʼuk ti kuxuluk xkil li Diose. Te chchiʼinun skotol ora xchiʼuk tskoltaun mi chkakʼbe yipal spasel li kʼusi lek chile».

Kalbetik skʼoplal li kʼusi la snuptan Isabele. Kʼalal xchiʼuk toʼox yole, albat yuʼun doktoretik ti tsots ip chvokʼ li yole. Lajem tajek ikom. Oy buchʼutik laj yalik ti jaʼ mas lek ti syales li yole. Xi chale: «Li vaʼ orae, la jnop ti muʼyuk xa ch-echʼ kuʼune». ¿Kʼusi la spas? «Ep ta velta la jkʼopon Dios sventa skoltaun». Vokʼ onoʼox ta tsʼakal li skereme, Gerard laj yakʼbe sbi xchiʼuk tsots ip kʼalal vokʼe. ¿Mi takʼbat s-orasion yuʼun Dios laj yaʼi li Isabele? Ta melel jech. ¿Kʼuxi takʼbat li s-orasione? Xi chale: «14 xa sjabilal li jkerem Gerarde. Kʼalal chkil ti tskʼupin xkuxlejal akʼo mi ip li jkereme, jaʼ stakʼobil j-orasion ta xkil xchiʼuk jaʼ jun mukʼta bendision chkil li jkereme».

Taje chvul-o ta joltik li kʼusi laj yal jun jtsʼibajom yuʼun salmoe: «Chachikintabe kʼusi tskʼanik li manxoetike, Kajval Jeova. Chavakʼ ti staojuk-o yav li yoʼontonike xchiʼuk chatsʼet chikinta li kʼusi chalike» (Salmo 10:17). Jaʼ yuʼun, oy lek srasonal kuʼuntik sventa mu xkikta jbatik ta spasel orasion.

Li ta Vivliae, xuʼ te jtatik li orasionetik la spas Jesuse. Li orasion laj yakʼbe xchan li yajchankʼoptake jaʼ li mas ojtikinbile. ¿Kʼusi chakʼ jchantik taje?