¿Kʼuxi xuʼ skoltaot li orasione?

Tsots tajek ip li Pamelae, jaʼ yuʼun la saʼ kʼuxi xuʼ xpoxta sba. Pe la skʼopon li Dios xtoke xchiʼuk la skʼanbe ti akʼo x-akʼbat yipal sventa xkuch yuʼun li kʼusi yakal tsnuptane. ¿Kʼusi sbalil la stabe ti la spas orasione?

Xi chal kaʼitike: «Kʼalal yakal chkichʼ poxtael ta sventa li kansere, ep ta velta lixiʼ. Pe jun koʼonton chkaʼi jba kʼalal ta jkʼopon li Jeovae xchiʼuk mas lek kʼusi ta jnop. Yokel-o ep kʼusi kʼux chkaʼi, pe kʼalal ta jpas orasione, tskoltaun sventa mu chopoluk tajek xkaʼi jba. Kʼalal tsjakʼbeikun yantik ti kʼu yelan oyune, xi ta xkalbeike: ‹Muʼyuk lek oyun, pe jun koʼonton›».

Mu persauk oy kʼusi tsots jnuptantik sventa jkʼopontik li Diose. Jkotoltik oy jvokoltik, mu ventauk mi ep o mi jutuk. Jaʼ yuʼun, chtun kuʼuntik koltael sventa xkuch batel kuʼuntik. ¿Mi xuʼ skoltautik li orasione?

Xi chal li Vivliae: «Akʼbo sbain Jeova li avikatse, vaʼun jaʼ chikot. Mi jaʼuk onoʼox chakʼ yaluk ta lum li buchʼu tukʼe» (Salmo 55:22). ¡Toj echʼ xa noʼox tspat koʼontontik! Vaʼun chaʼa, ¿kʼuxi tskoltautik li orasione? Mi jech ta jkʼopontik Dios kʼuchaʼal lek chile, chakʼbutik li kʼusi chtun kuʼuntik sventa jtsaltik li jvokoltike (kʼelo li jvokʼ mantal ti xi sbie: «Oy sbalil kʼalal ta jpastik orasione»).

Oy sbalil kʼalal ta jpastik orasione

Jun koʼontontik

«Albeik Dios ta orasion li kʼusi chavul-o avoʼontonike, [...] vaʼun li jun oʼontonal yuʼun Dios ti toj echʼ xa noʼox lek ti jaʼ mu sta li snopben krixchanoetike chchabi avoʼontonik xchiʼuk anopbenik ta stojolal li Kristo Jesuse» (Filipenses 4:6, 7). Mi chkalbetik skotol Dios li kʼusi ta jvul-o koʼontontike, chakʼ ti junuk noʼox koʼontontik xchiʼuk ti lekuk kʼusi jpastik akʼo mi tsots kʼusi ta jnuptantik.

Jpʼijiltik

«Mi oy junuk avuʼunik ti skʼan to spʼijile, akʼo skʼanilanbe Dios, yuʼun tskʼupin yakʼel xchiʼuk muʼyuk bu ch-ilin, vaʼun ch-akʼbat li buchʼu tskʼane» (Santiago 1:5). Kʼalal tsots kʼusi ta jnuptantike, xuʼ van mu lekuk xa kʼusi xkʼot ta nopel kuʼuntik. Pe mi ta jkʼanbe jpʼijiltik li Diose, xuʼ svules ta joltik lekil beiltaseletik ti te chal ta Vivliae.

Chakʼ kipaltik xchiʼuk tspat koʼontontik

«Oy jtsatsal sventa jpas skotol ta skoj li buchʼu chakʼbun juʼele» (Filipenses 4:13). Li Jeovae jaʼ li Dios ti skotol xuʼ yuʼune, jaʼ yuʼun xuʼ xakʼ kipaltik sventa jtsaltik li kʼusi ta jnuptantike o ti xkuchuk kuʼuntike (Isaias 40:29). Li Vivliae chal xtok ti jaʼ «li Dios ti tspat koʼontontik ta skotole, ti tspat koʼontontik ta skotol li prevaetik ta jnuptantike» (2 Korintios 1:3, 4).

Xuʼ skoltaot ek li orasione

Melel onoʼox ti muʼyuk tsujot Jeova sventa xakʼopone, pe ta slekil yoʼonton chalbot ti jechuk xapase (Jeremias 29:11, 12). Pe ¿kʼusi xuʼ xapas mi oy xa akʼoponoj Dios, pe ti muʼyuk la stakʼbot yileluke? Mu xalubtsaj. Li totil meʼiletik ti oy ta yoʼonton yalab xnichʼnabike mu skotoluk velta jech tskoltaik kʼuchaʼal tskʼanike. Xuʼ van li totil meʼile jelel kʼusi snopojik sventa xkoltavanik. Li kʼusi jpʼel skʼoplal tspasik li totil meʼiletike jaʼ ti skotol ora tskolta li yalab xnichʼnabike.

Li Jeova ti jaʼ jkʼanvanej Totil kuʼuntike tskʼan tskoltaot ek. Mi la anopbe lek skʼoplal li beiltaseletik laj xa jkʼeltike xchiʼuk mi avakʼ persa ta yakʼel ta akuxlejale, li Diose tstʼujbe lek yorail sventa stakʼbot li a-orasione (Salmo 34:15; Mateo 7:7-11).