¿K’u yuʼun muʼyuk ta jtikʼ jbatik ta paskʼop jech kʼuchaʼal tspasik to’ox li j-israeletike?

KʼALAL yakal li Xchibal Mukʼta Paskʼop ta spʼejel Balumile, jun bankilal soltaro yuʼun li jnazietike xi tsots laj yalbe li testigotak Jeovae: «Ta me xavichʼik milel mi muʼyuk chakoltavanik ta stsakel ta kʼop li Francia xchiʼuk Inglaterrae». Tukʼ laj yakʼ sbaik li kermanotaktike akʼo mi te nopol oyik li epal soltaroetik ta SS xchiʼuk ti oy lek yabtejebike. ¡Tsots tajek yoʼontonik laj yakʼik ta ilel! Liʼe jaʼ jun skʼelobil ti chakʼ ta ilel ti muʼyuk tstikʼ sbaik ta paskʼopetik li stestigotak Jeovae akʼo mi ch-albatik ti chichʼik milele.

1. JMOJ TOʼOX SLUMALIK SKOTOL LI YAJTUNELTAK DIOSE

Li ta voʼnee, li Jeovae la stʼuj jun steklumal, jaʼ li Israele. Xi laj yalbe li j-israeletike: «Chakʼotik ta jteklumal ti stuk xa noʼox jech ta skotol li yan jteklumetike» (Eks. 19:5). Laj yakʼanbe yosilik ti bu no’ox stak’ xnakiike. Jaʼ yuʼun, kʼalal ch-albatik ti akʼo xbat stsakik ta kʼop yan lume, li j-israeletike muʼyuk tstsakik ta kʼop mi jaʼuk bu tsmilik li yajtuneltak Diose.a

Li avie, li yajtuneltak Jeovae «likemik tal ta skotol lumetik, nitilulaletik, jteklumetik xchiʼuk yantik ti jeltos [skʼopike]» (Apok. 7:9). Ti xbatikuk ta paskʼope, xuʼ van stsakik ta kʼop o staik ta milel li yermanotakike.

2. LI JEOVAE TSTAK TOʼOX BATEL TA PASKʼOP LI J-ISRAELETIKE

Li ta voʼnee, li Jeovae jaʼ toʼox chal bakʼin xchiʼuk kʼu yuʼun skʼan xbatik ta paskʼop li j-israeletike. Jech kʼuchaʼal liʼe, laj yalbe ti xbat stsakik ta kʼop li jkanaanetik ta skoj ti jaʼ batem ta yoʼontonik yichʼel ta mukʼ pukujetik, chmulivajik xchiʼuk chakʼik ta milbil matanal li yalab xnichʼnabike. Li Jeovae laj yalbe j-israeletik ti akʼo xchʼaybeik skʼoplal jkanaanetik li ta Albil Balumil sventa mu xlik xchanbeik stalelalik (Lev. 18:24, 25). Kʼalal te xa ox nakalik ta Albil Balumil li j-israeletike, li Jeovae oy bateltik laj yakʼbe permiso ti akʼo spak skʼoplalik kʼalal oy tstsakatik ta kʼop yuʼun li yajkontraike (2 Sam. 5:17-25). Pe muʼyuk onoʼox albatik ti xuʼ xbatik ta paskʼop kʼalal jaʼo tskʼan yoʼonton stukike. Kʼalal batik ta paskʼop ti muʼyuk jech albilik yuʼun Jeovae, ep ta velta muʼyuk lek kʼusi kʼot ta stojolalik (Num. 14:41-45; 2 Kron. 35:20-24).

Li avie, li krixchanoetike muʼyuk albilik yuʼun Jeova ti akʼo xbatik ta paskʼope. Yuʼun jaʼ noʼox tskʼan tspasik li kʼusi tskʼan yoʼonton stukike, maʼuk li kʼusi tskʼan Diose. Xuʼ van stikʼ sbaik ta paskʼop ta skoj ti tskʼan tsventainik yan balumil, ta skoj takʼin o ta skoj politika. Pe ¿kʼusi xuʼ xkaltik ta stojolal li buchʼutik chalik ti lek la chil Dios ti xbat tsakvananikuk ta kʼop ta skoj li kʼusi xchʼunojik o sventa smilbeik li yajkontratak Diose? Muʼyuk lek ch-ilatik yuʼun Dios li buchʼutik jech tspasik taje. Li Jeovae chal ti jaʼ tspoj stuk li melel yajtuneltake xchiʼuk ti tslajes ta Armajedon li yajkontratake (Apok. 16:14, 16). Li ta paskʼop taje, jaʼ noʼox tspasik kʼop li anjeletike, maʼuk li yajtuneltak liʼ ta balumile (Apok. 19:11-15).

3. LI J-ISRAELETIKE KUXUL LAJ YIKTAIK LI BUCHʼUTIK LAJ YAKʼ XCHʼUNEL YOʼONTONIK TA STOJOLAL JEOVAE

Li ta voʼnee, li soltaroetik ta Israele ep ta velta laj yakʼbeik ta ilel xkʼuxul yoʼontonik li buchʼutik laj yakʼ xchʼunel yoʼontonik ta stojolal li Diose xchiʼuk jaʼ noʼox la smilik li buchʼutik albatik yuʼun Jeovae. Kalbetik chib skʼelobil. Li Jeovae laj yal ti akʼo xakʼbeik slajeb li jteklum Jerikoe, pe ta skoj ti laj yakʼ ta ilel xchʼunel yoʼonton li Raabe, li j-israeletike kuxul laj yiktaik xchiʼuk li yutsʼ yalale (Jos. 2:9-16; 6:16, 17). Ta mas tsʼakale, akʼatik ta perton li jteklum Gabaon ta skoj ti la stsakik ta mukʼ li Diose (Jos. 9:3-9, 17-19).

Li avie, li soltaroetik ti tspasik kʼope ta smilik li krixchanoetik ti yakʼoj xchʼunel yoʼontonik ta stojolal Diose xchiʼuk li buchʼutik muʼyuk smulike.

4. LAJ YICHʼIK ALBEL YUʼUN DIOS LI J-ISRAELETIK TI KʼU YELAN SKʼAN SPASIK KʼOPE

Li ta voʼnee, li Jeovae laj yalbe kʼu yelan skʼan spasik kʼop li soltaroetik yuʼun Israele. Jech kʼuchaʼal liʼe, bakʼintike laj yalbe li j-israeletik ti baʼyel skʼan spasik jun «akuerdo sventa mu xlik kʼop» xchiʼuk li yajkontraike (Deut. 20:10). Li Jeovae laj yalbe mantal li soltaroetik ti skʼan sakikuk xchiʼuk chʼulikuke xchiʼuk ti jechuk li skarpanaik eke (Deut. 23:9-14). Laj yalanbe xtok ti mu stakʼ xilbajinik li antsetik li ta lumetik ti ch-och ta skʼobike, jech kʼuchaʼal nopem xaʼiik spasel li soltaroetik ta yan lumetike. Mi oy junuk soltaro ta Israel ti tskʼan chnupun xchiʼuk junuk ants ti la xchukik batel kʼalal la stsalik junuk jteklume, skʼan smala jun u sventa xuʼ xikʼ (Deut. 21:10-13).

Li avie, jutuk mu skotoluk li lumetike yakʼoj yeik ti kʼu yelan skʼan spasik kʼope. Akʼo mi jaʼ sventa mu xil svokol li jnaklejetike, muʼyuk kʼotem ta pasel yuʼunik li kʼusi yalojike.

5. LI DIOSE LA SPOJ LI STEKLUMALE

Li ta voʼnee, li Jeovae la skolta ta paskʼop li j-israeletike xchiʼuk ep ta velta la spas skʼelobiltak juʼelal sventa xkuch yuʼunik. Jech kʼuchaʼal liʼe, la skoltaan sventa stsalik li Jerikoe. Li j-israeletike la xchʼunik li kʼusi albatik yuʼun Jeovae. «Kʼalal tsots avanik sventa paskʼope, jin li muroe», vaʼun li Jeovae laj yakʼ ti x-och ta skʼobik li Jerikoe (Jos. 6:20). Ta tsʼakale, ¿kʼuxi la stsalik li j-amorreoetike? Xi chal li Vivliae: «Li Jeovae laj yakʼ talel mukʼtik bot ta vinajel ti xkoʼolaj ta tone. [...] Mas ep chamik li ta mukʼtik bote, jaʼ mu sta ti kʼu yepal milatik ta espada yuʼun li j-israeletike» (Jos. 10:6-11).

LI YAJTSʼAKLOMUTIK KRISTOE MUʼYUK TA JTIKʼ JBATIK TA PASKʼOP

Jech kʼuchaʼal laj kiltike, mu xkoʼolaj jkuxlejaltik xchiʼuk li j-israeletik ta voʼnee. Pe oy to yan srasonal ti kʼu yuʼun muʼyuk ta jtikʼ jbatik ta paskʼope. Jtose jaʼ ti Diose yaloj xa onoʼox ti muʼyuk «chchanik paskʼop» mi jaʼuk tstikʼ sbaik ta paskʼop li buchʼutik chnopajik ta stojolal li ta slajebal kʼakʼale (Is. 2:2-4). Jech xtok, li Kristoe laj yal ti muʼyuk te kapal skʼoplalik ta balumil li yajchankʼoptake, jaʼ yuʼun muʼyuk tstikʼ sbaik li ta paskʼopetike (Juan 15:19).

Li Kristoe laj yalbe yajchankʼoptak ti oy to kʼusi yan skʼan spasike. Jech kʼuchaʼal ti mu snakʼ skʼakʼal yoʼontonik, mu x-ilinik xchiʼuk ti mu spasik li kʼusi xuʼ xlik-o kʼope (Mat. 5:21, 22). La xchanubtasan ti kʼu yelan xuʼ jun yoʼontonik xchiʼuk li yantike xchiʼuk ti akʼo skʼanik li yajkontraike (Mat. 5:9, 44).

¿Kʼusi chchanubtasutik taje? Melel onoʼox ti muʼyuk chijbat ta paskʼope. Pe ¿mi oy kʼusi chopol ta koʼontontik ti xuʼ xchʼakutik o ti xlik-o kʼop xchiʼuk li kermanotaktike? Jechuk-o xkakʼ kipaltik sventa jlokʼes ta koʼontontik mi oy jech chkaʼi jbatike (Sant. 4:1, 11).

Li yajtsʼaklomutik Kristoe muʼyuk ta jtikʼ jbatik li ta paskʼopetike. Yuʼun jaʼ ta jkʼantik ti lekuk xkil jbatik xchiʼuk li yantike xchiʼuk ti jkʼanan jbatik ta jujuntale (Juan 13:34, 35). Yoʼ to mu xkʼot yorail ti tslajesbe skʼoplal sbatel osil paskʼop li Jeovae, mu me jtikʼ jbatik li ta paskʼopetike (Sal. 46:9).