Tsotsuk-o me li spatobil koʼontontike

1. ¿Kʼusi yaloj chakʼbutik li Jeovae?

LI Jeovae yaloj chakʼbutik jkuxlejaltik sbatel osil. Junantik yajtuneltake spatoj yoʼontonik ti chkuxiik ta vinajel kʼuchaʼal kuxlejaletik ti mu xvinaj ta kʼelel xchiʼuk ti muʼyuk xa chchamike (1 Kor. 15:50, 53). Pe jutuk mu skotolikuke spatoj yoʼontonik ti chkuxiik sbatel osil ta balumile, ti bu chmuyubajik noʼoxe xchiʼuk ti muʼyuk xa ch-ipajike (Apok. 21:3, 4). Toj ep sbalil chkiltik li spatobil koʼontontike, mu ventauk mi liʼ chijkuxi ta balumil o mi ta vinajel.

2. ¿Kʼu yuʼun ti oy spatobil koʼontontike, xchiʼuk kʼu yuʼun ti jech chkaltike?

² Kʼalal chalbe skʼoplal spatobil koʼontontik li Vivliae, xuʼ xakʼ ta aʼiel ti oy kʼusitik lekik chkʼot ta pasele. Jchʼunojtik lek ti chkʼot ta pasele, yuʼun jaʼ yaloj stuk li Jeovae (Rom. 15:13). Jnaʼojtik li kʼusitik yaloj tspase xchiʼuk ti ta onoʼox xkʼot ta pasel yuʼune (Num. 23:19). Jchʼunojtik lek ti oy ta yoʼonton Jeova xchiʼuk ti spas yuʼun skotol li kʼusi chale. Jaʼ yuʼun, li spatobil koʼontontike maʼuk noʼox ta skoj ti jech oy ta koʼontontike, yuʼun oy lek sprevailtak kuʼuntik ti chkʼot ta pasele.

3. ¿Kʼusi ta jkʼeltik li ta xchanobil liʼe? (Salmo 27:14).

³ Li Jtotik ta vinajele skʼanojutik xchiʼuk tskʼan ti jpat koʼontontik ta stojolale (kʼelo Salmo 27:14). Mi jpatoj lek koʼontontik ta stojolal Jeovae, chkuch kuʼuntik li jvokoltike xchiʼuk chijmuyubaj noʼox mu ventauk li kʼusi jnuptantike. Li ta xchanobil liʼe ta jkʼeltik kʼuxi chchabiutik li spatobil koʼontontike. Baʼyel ta jkʼeltik kʼu yuʼun chkaltik ti xkoʼolaj ta jun ankla xchiʼuk ta smak jolil. Laje, ta jkʼeltik kʼusi xuʼ jpastik sventa lekuk tsots li spatobil koʼontontike.

XKOʼOLAJ KʼUCHAʼAL JUN ANKLA LI SPATOBIL KOʼONTONTIKE

4. ¿Kʼu yuʼun xkoʼolaj ta jun ankla li spatobil koʼontontike? (Ebreos 6:19).

⁴ Li ta karta la stakbe batel j-ebreoetik li jtakbol Pabloe, laj yal ti xkoʼolaj kʼuchaʼal jun ankla li spatobil koʼontontike (kʼelo Ebreos 6:19). Ta skoj ti nopolik noʼox chanav ta varkoe, snaʼoj ti toj jtunel li anklae. Jun velta kʼalal jaʼo te tikʼil batel ta jkot varkoe, tal tsatsal ikʼaloʼ. Vaʼun, te laj yil ti la sjipik yalel ankla li j-abteletik ta varko sventa mu smaj sba ta tontik li varkoe (Ech. 27:29, 39-41). Li anklae chtun sventa mu xtal xbatuk li jkot varkoe, jaʼ jech li spatobil koʼontontike tskoltautik sventa mu jchʼak jbatik ta stojolal Jeova kʼalal oy kʼusi tsots ta jnuptantik ti xkoʼolaj kʼuchaʼal tsatsal ikʼaloʼe. Mi jpatoj lek koʼontontik ta sventa li kʼusi chtal ta tsʼakale, tskoltautik yoʼ xkuch kuʼuntik li jvokoltike. Teuk ta joltik ti yaloj xa onoʼox Jesus ti chkichʼtik kontrainele (Juan 15:20). Jaʼ yuʼun, kʼalal ta jnopbetik skʼoplal li kʼusi yaloj chakʼbutik Jeovae, tskoltautik sventa jechuk-o xijtun ta stojolal.

5. Kʼalal jutuk xa ox skʼan xcham li Jesuse, ¿kʼuxi koltaat-o li spatobil oʼontonale?

⁵ Jkʼeltik batel kʼuxi koltaat-o Jesus li spatobil oʼontonal sventa tukʼuk xakʼ sba akʼo mi snaʼoj ti toj kʼux ti kʼu yelan chichʼ milele. Li ta skʼakʼalil Pentekostes ta sjabilal 33, li jtakbol Pedroe laj yal jun albil kʼop ti lokʼem ta Salmose, ti bu chal ti jun noʼox yoʼonton laj yakʼ ta ilel li Jesuse xchiʼuk ti spatoj lek yoʼontone. Xi laj yale: «Oy spatobil koʼonton; yuʼun muʼyuk te chaviktaun li ta Mukinale mi jaʼuk chavakʼbe kʼaʼuk sbekʼtal li buchʼu tukʼ yoʼonton chakʼ sba ta atojolale [...]; chavakʼbun tajek xkuxetel koʼonton kʼalal te oyun ta atojolale» (Ech. 2:25-28; Sal. 16:8-11). Akʼo mi snaʼoj onoʼox Jesus ti chchame, spatoj lek yoʼonton ti chchaʼkuxesat yuʼun li Diose xchiʼuk ti tsut xchiʼin Stot yan veltae (Ebr. 12:2, 3).

6. ¿Kʼusi laj yal jun ermano ta sventa li spatobil oʼontonale?

⁶ Epal ermanoetike kuchem yuʼunik epal prevaetik koliyal li spatobil oʼontonale. Kalbetik skʼoplal li Leonard Chinn, jun ermano ti te nakal ta Inglaterra. Kʼalal jaʼo echʼ li Baʼyel Mukʼta Paskʼop ta spʼejel Balumile, laj yichʼ tikʼel ta chukel ta skoj ti mu skʼan x-och ta soltaroale. Chib u laj yichʼ chukel, laje sujat ta spasel tsatsal abtelal. Ta tsʼakale, xi laj yale: «Ta skoj li kʼusi la jnuptane, laj kakʼ venta ti skʼan oyuk spatobil koʼontontik sventa xkuch kuʼuntik li vokoliletike. Li kʼusi la spas Jesus, li jtakboletik, li j-alkʼopetik xchiʼuk li kʼusi yaloj Vivliae tskoltautik sventa oyuk spatobil koʼontontik xchiʼuk ti xkuch kuʼuntike». Li spatobil oʼontonale xkoʼolaj kʼuchaʼal jun ankla laj yaʼi li Leonarde. Taje xuʼ me jaʼ jech xkaʼitik ek.

7. Kʼalal ta jnuptantik prevaetike, ¿kʼuxi tstsatsub li spatobil koʼontontike? (Romanos 5:3-5; Santiago 1:12).

⁷ Li spatobil koʼontontike tstsatsub kʼalal chkuch kuʼuntik li prevaetike, yuʼun chkiltik ti tskoltautik li Jeovae xchiʼuk ti lek chilutike (kʼelo Romanos 5:3-5; Santiago 1:12). Ti kʼu xa sjalil kojtikinojtik tal mantale, mas tsatsubem talel li spatobil koʼontontike. Li Satanase tskʼan ti xijchibaj-o kʼalal ta jnuptan jvokoltike, pe li Jeovae tskoltautik sventa xkuch kuʼuntik.

XKOʼOLAJ KʼUCHAʼAL SMAK JOLIL LI SPATOBIL KOʼONTONTIKE

8. ¿Kʼu yuʼun xkoʼolaj ta smak jolil li spatobil oʼontonale? (1 Tesalonisenses 5:8).

⁸ Li Vivliae chal xtok ti spatobil koʼontontike xkoʼolaj ta smak jolil (kʼelo 1 Tesalonisenses 5:8). Li jun soltaroe tslap smak sjol sventa mu xlaj li sjole. Ta skoj ti yakal tstsakutik ta kʼop li Satanase, skʼan jchabi li jnopbentike. Yuʼun tsloʼlautik xchiʼuk oy kʼusitik tspukbe skʼoplal sventa sokes li jnopbentike. Jech kʼuchaʼal li smak sjol jun soltaroe, li spatobil koʼontontike chchabi jnopbentik sventa tukʼuk-o xkakʼ jbatik ta stojolal Jeova.

9. ¿Kʼusi tspasik li krixchanoetik ti muʼyuk kʼusi spatoj-o yoʼontonike?

⁹ Ti jpatoj koʼontontik ti xuʼ xijkuxi sbatel osile tskoltautik sventa lekuk kʼusi xkʼot ta nopel kuʼuntik. Pe mi jaʼ noʼox ta jnopbetik skʼoplal li kʼusi tskʼan koʼontontike, xuʼ van mu xa jchʼuntik lek li kʼusi jmalaojtike. Kalbetik skʼoplal li kʼusi kʼot ta stojolal junantik yajtsʼaklomtak Kristo ta Korintoe. Mu xa ox xchʼunik ti chkʼot ta pasel li chaʼkuxesel yaloj Diose (1 Kor. 15:12). Li Pabloe laj yal ti buchʼutik mu xchʼunik ta sventa li chaʼkuxesele jaʼ noʼox tspasik li kʼusi tskʼan yoʼontonike (1 Kor. 15:32). Li avie, ep buchʼutik mu xchʼunik li kʼusitik yaloj tspas Diose, jaʼ yuʼun tspasik skotol li kʼusi xal yoʼontonike. Pe li voʼotike jmalaojtik li kʼusi chakʼbutik Dios ta jelavele. Li spatobil koʼontontike xkoʼolaj ta smak jolil, yuʼun chchabi jnopbentik xchiʼuk tskoltautik sventa mu jaʼuk jpastik li kʼusi tskʼan koʼontontike, ti jaʼ muʼyuk xa lek chkil jbatik-o xchiʼuk Jeovae (1 Kor. 15:33, 34).

10. Li spatobil koʼontontike, ¿kʼuxi tskoltautik sventa mu chopoluk kʼusi jnop ta jtojolaltik?

¹⁰ Li spatobil koʼontontik ti xkoʼolaj ta smak jolile tskoltautik sventa mu jnoptik ti muʼyuk onoʼox lek chilutik li Jeovae. Jech kʼuchaʼal liʼe, xuʼ van oy buchʼu xi tsnope: «Muʼyuk onoʼox ta jta li kuxlejal sbatel osile. Yuʼun muʼyuk toj lek jtalelal xchiʼuk mu onoʼox spas kuʼun li kʼusi tskʼan Diose». Pe teuk ta joltik ti jaʼtik jech albat yuʼun Elifas li Jobe ti jaʼ yamigo ta alele. Xi albate: «¿Kʼusi yabtel li jun krixchano ti snaʼ xcham sventa sakuk x-ilate [...]? ¡Kʼelavil! Muʼyuk spatoj yoʼonton ta stojolal li yaj-anjeltake xchiʼuk muʼyuk sak chil xtok li vinajele» (Job 15:14, 15). ¡Taje mu meleluk! Jvules ta joltik ti jaʼ tskʼan ti jechuk jnoptik li Satanase. Yuʼun snaʼoj ti mi jech-o te xijnopnune, ta kʼunkʼun chchʼay batel li spatobil koʼontontike. Jaʼ yuʼun, mu jchʼuntik taje, jaʼ lek kakʼ ta koʼontontik li kʼusitik yaloj Jeovae. Jpʼeluk ta koʼontontik ti tskʼan Jeova ti xkuxi sbatel osil skotol li yajtuneltake xchiʼuk tskolta sventa staike (1 Tim. 2:3, 4).

¿KʼUXI XUʼ TSOTSUK-O LI SPATOBIL KOʼONTONTIKE?

11. ¿Kʼu yuʼun skʼan oyuk smalael kuʼuntik yoʼ to mu xkʼot ta pasel li kʼusi jmalaojtike?

¹¹ Oy vokol chkaʼitik ti tsotsuk-o li spatobil koʼontontike. Bakʼintike, mu xa van xmalaj kuʼuntik ti xkʼot ta pasel li kʼusi yaloj tspas Diose. Pe ta skoj ti kuxul-o sbatel osil li Jeovae, li kʼusi jal tajek chkiltike, muʼyuk jal chil li stuke (2 Ped. 3:8, 9). Ta onoʼox xkʼot ta pasel yuʼun li kʼusi yaloje, pe xuʼ van maʼuk li kʼusi ora ta jkʼantike. Yoʼ to mu xkʼot ta pasel li kʼusi yaloj tspas Diose, ¿kʼusi tskoltautik sventa tsotsuk-o li spatobil koʼontontik xchiʼuk ti oyuk-o smalael kuʼuntike? (Sant. 5:7, 8).

12. Jech kʼuchaʼal chal Ebreos 11:1 xchiʼuk 6, ¿kʼuxi te snitojbe sba skʼoplal li spatobil oʼontonal xchiʼuk li xchʼunel oʼontonale?

¹² Kʼalal tsots li spatobil koʼontontike, nopol oyutik ta stojolal Jeova, yuʼun jaʼ yalojbutik ti chkʼot ta pasele. Li Vivliae chal ti sventa oyuk spatobil koʼontontike, skʼan jchʼuntik ti oy li Jeovae xchiʼuk «ti ch-akʼbat smotonik li buchʼutik ta sjunul yoʼonton tsaʼike» (kʼelo Ebreos 11:1, 6). Mi kuxul chkiltik ta melel li Jeovae, mas to ta jchʼuntik ti tspas li kʼusitik yaloje. Jkʼeltik kʼusi xuʼ jpastik sventa masuk to lek xkamigointik xchiʼuk ti jechuk-o tsots li spatobil koʼontontike.

13. ¿Kʼuxi xuʼ xkamigointik li Diose?

¹³ Jpastik orasion xchiʼuk jchantik li Vivliae. Melel onoʼox ti mu xkiltik li Jeovae, pe xuʼ xijkʼot ta yamigo. Xuʼ jkʼopontik kʼalal ta jpastik orasione, yuʼun jnaʼojtik ti chchikintabutike (Jer. 29:11, 12). Xuʼ jchikintatik li kʼusi chalbutik kʼalal ta jchantik li Skʼope xchiʼuk kʼalal ta jnopbetik skʼoplale. Jech xtok, kʼalal ta jchantik kʼuxi la skolta yajtuneltak ta voʼne li Jeovae, tstsatsub mas li spatobil koʼontontike. Yuʼun skotol li kʼusi chal ta Vivliae «laj yichʼ tsʼibael sventa jchanubtaseltik, sventa oyuk spatobil koʼontontik ta skoj ti chkuch kuʼuntik xchiʼuk ti tspat koʼontontik li Tsʼibetike» (Rom. 15:4).

14. ¿Kʼu yuʼun lek ti jnopbetik skʼoplal li kʼusitik spasoj Jeova ta stojolal yantike?

¹⁴ Jnopbetik skʼoplal kʼuxi kʼot ta pasel yuʼun Jeova li kʼusitik yaloje. Kalbetik skʼoplal li kʼusi la spas ta stojolal li Abraan xchiʼuk Sarae. Ta skoj ti oy xa sjabilalike, mu xa xuʼ xil yalab xnichʼnabik. Pe li Diose laj yalbe ti chil jun skeremike (Jen. 18:10). ¿Kʼu yelan laj yaʼi li Abraane? Xi chal li Vivliae: «Laj yakʼ xchʼunel yoʼonton yoʼ chkʼot ta totil yuʼun li epal [lumetike]» (Rom. 4:18). Yileluke, mu xkʼot ta pasel. Pe li Abraane jpʼel ta yoʼonton ti chkʼot ta pasel li kʼusi yaloj Jeovae. Jech onoʼox kʼot ta pasel li kʼusi albate (Rom. 4:19-21). Li loʼiletik kʼuchaʼal liʼe tskoltautik sventa jchʼuntik ti chkʼot ta pasel li kʼusi chal Jeovae akʼo mi mu chʼunbajuk chkaʼitik.

15. ¿Kʼu yuʼun skʼan jnopbetik skʼoplal li kʼusitik spasoj ta jtojolaltik li Jeovae?

¹⁵ Jnopbetik skʼoplal li kʼusi spasoj Jeova ta jtojolaltike. ¿Mi oy jnopojbetik skʼoplal kʼuxi kʼotem ta pasel ta jtojolaltik li kʼusi yaloj tspas Diose? Jech kʼuchaʼal liʼe, li Jesuse laj yal ti chakʼbutik kʼusi chtun kuʼuntik jujun kʼakʼal li Stote (Mat. 6:32, 33). Laj yal xtok ti chakʼbutik xchʼul espiritu li Jeova mi ta jkʼanbetike (Luk. 11:13). Li Jeovae kʼotem ta pasel yuʼun taje. Xuʼ van xtal ta joltik yan kʼusitik yalojbutik Jeova ti kʼotem ta pasel yuʼune, jech kʼuchaʼal ti chakʼutik ta pertone, ti tspat koʼontontike xchiʼuk ti chakʼbutik li kʼusi chtun kuʼuntik ta mantale (Mat. 6:14; 24:45; 2 Kor. 1:3). Mi ta jnopbetik skʼoplal li kʼusitik spasoj ta jtojolaltik li Jeovae, mas ta jchʼuntik ti chkʼot ta pasel li kʼusi yaloj tspas ta jelavele.

MUYUBAJANIK TA SKOJ LI SPATOBIL OʼONTONALE

16. ¿Kʼu yuʼun jaʼ jun mukʼta matanal li spatobil oʼontonale?

¹⁶ Ti jpatoj koʼontontik ti xuʼ xijkuxi sbatel osile jaʼ jun mukʼta matanal yakʼojbutik Jeova. Oy xa ta koʼontontik ti xkiltik li kʼusi kʼupil sba jmalaojtike, yuʼun jnaʼojtik ti ta onoʼox xkʼot ta pasele. Li spatobil oʼontonale xkoʼolaj kʼuchaʼal jun ankla, yuʼun tskoltautik sventa stsal kuʼuntik li prevaetike, li kontrainele o ti xkichʼtik milele. Xkoʼolaj xtok kʼuchaʼal smak jolil ti chchabi li jnopbentike xchiʼuk tskoltautik sventa jpʼajtik li kʼusi chopole xchiʼuk ti jaʼuk-o xkakʼ ta koʼontontik li kʼusi leke. Li spatobil oʼontonal chakʼbutik Vivliae tsnopajesutik mas ta stojolal Dios xchiʼuk jaʼ te chakʼ ta ilel ti skʼanojutik tajeke. Ta me jtabetik sbalil mi jech-o tsots li spatobil koʼontontike.

17. ¿Kʼu yuʼun xijmuyubaj-o li kʼusi jmalaojtik chtal ta jelavele?

¹⁷ Li Pabloe xi la stsʼibabe batel ta karta li yajtsʼaklomtak Kristo ta Romae: «Kuxetuk avoʼontonik yuʼun li spatobil oʼontonale» (Rom. 12:12). Li Pabloe xmuyubaj tajek, yuʼun jpʼel ta yoʼonton ti chkuxi sbatel osil ta vinajel mi tukʼ laj yakʼ sba ta stojolal Jeovae. Li voʼotik eke xijmuyubaj ta skoj li kʼusi jmalaojtik chtal ta tsʼakale, yuʼun jnaʼojtik ti ta onoʼox xkʼot ta pasel yuʼun li Jeovae. Xi laj yal jun jtsʼibajom yuʼun salmoe: «Xmuyubaj noʼox li buchʼu [...] spatoj yoʼonton ta stojolal li Jeova ti jaʼ Dios yuʼune, [...] ti jaʼ li buchʼu tukʼ-o yakʼoj sba ta sbatel osile» (Sal. 146:5, 6).