¿Mi chapalot sventa xavuʼunin li balumile?

JKOTOLTIK ta jkʼantik ti xkʼot ta pasel li kʼusi xi laj yal Jesuse: «Xmuyubajik noʼox li manxoetike, yuʼun jaʼ chuʼuninik li balumile» (Mat. 5:5). Li buchʼutik chbatik ta vinajele chuʼuninik balumil kʼalal mi ochik ta ajvalil ta vinajel xchiʼuk li Jesuse (Apok. 5:10; 20:6). Jutuk mu skotoluk li yajtsʼaklomtak Kristoe oy ta yoʼontonik chuʼuninik li balumil ta sbatel osile. Tspasik ta tukʼil krixchano, chmuyubajik noʼox xchiʼuk jun noʼox yoʼonton chkuxiik. Pe sventa jkʼupintik taje, oy kʼusi skʼan jpastik ti tsots skʼoplale. Li ta xchanobil liʼe ta jkʼeltik oxtos: jpastik ta paraiso li balumile, xkakʼbetik kʼusi chtun yuʼunik li buchʼutik chchaʼkuxiik tale xchiʼuk ti jchanubtastike. Jech xtok, ta jkʼeltik kʼusi xuʼ xapas avi sventa xavakʼ ta ilel ti oy ta avoʼonton jech chapas li ta achʼ balumile.

¿MI CHAPALOT SVENTA XAPAS TA PARAISO LI BALUMILE?

Kʼalal xi laj yalbe krixchanoetik li Jeovae: «Nojesik li balumile, ventainik» xie, laj yakʼ ta aʼiel ti chkʼot yorail ti tspas ta paraiso spʼejel li balumile (Jen. 1:28). Li buchʼutik te chkuxiik ta Paraisoe skʼan xchʼunik li mantal laj yal ta voʼne li Jeovae. Kʼalal mi echʼ li Armajedone, maʼuk ti paraiso xa ta anil li balumile, yuʼun li nichimaltik Edene voʼne xa laj skʼoplal. Ep kʼusi skʼan lekubtasel ti sokesoj li krixchanoetike. ¡Ep abtel skʼan pasel!

Jaʼtik jech la snuptanik li j˗israeletik kʼalal sut batel ta slumalike, yuʼun 70 jabil muʼyuk buchʼu te xnaki ta skoj ti chukbil batik ta Babiloniae. Pe koltaatik yuʼun Jeova sventa xchaʼmeltsan li steklumalike. Xi xa onoʼox yaloj li j˗alkʼop Isaiase: «Tspas kʼuchaʼal Eden li takixokol balumil tee xchiʼuk tspas kʼuchaʼal nichimaltik yuʼun Jeova li stenlejaltik ti takin tajeke» (Is. 51:3). Li j˗israeletike kʼupil sba kom yuʼun li slumalike. Jech kʼuchaʼal la skolta steklumal Dios ta voʼnee, jaʼ jech ta skolta li buchʼutik chuʼuninik balumil sventa skʼatajesik ta paraisoe. Avie, oy kʼusi xuʼ xapas sventa xavakʼ ta ilel ti oy ta avoʼonton chakoltavan sventa spas ta paraiso li balumile.

Junantik kʼusi xuʼ xapase jaʼ ti xavakʼ persa ti bu kʼalal xuʼ avuʼun sventa lekuk sak xchiʼuk chʼubabiluk li anae xchiʼuk li spat xokone. Xuʼ jech xapas akʼo mi muʼyuk nopem jech li alakʼnatake. Mi xuʼ avuʼun xtoke, xuʼ xakoltavan ta xchʼubael xchiʼuk ta smeltsanel li kʼusitik tsokanuk ta Salonetik sventa Tsobobbail xchiʼuk li ta Salonetik sventa Asambleae. Mi xuʼ avuʼune, xuʼ xbat akolta li ermanoetik ti chil svokolike. Mi jech la apase, chavakʼ ta ilel ti oy ta avoʼonton chakolta li buchʼutik chtun yuʼunike. Xiuk xajakʼbe abae: «¿Mi oy kʼusi xuʼ jchan spasel ti xuʼ xtun kuʼun mi laj yakʼ kuʼunin balumil li Jeovae?».

Junantik ermanoetike tskolta sbaik ta skʼelel xchiʼuk xchʼubael li Salon sventa Tsobobbaile.

¿MI CHAPALOT SVENTA XAVAKʼBE KʼUSI CHTUN YUʼUN LI BUCHʼUTIK CHCHAʼKUXIIKE?

Kʼalal la xchaʼkuxesbe stseb Jairo li Jesuse, laj yal ti akʼo xakʼbeik sveʼele (Mar. 5:42, 43). Mu vokoluk ta akʼbel kʼusi chtun yuʼun jun tseb ti 12 sjabilale. Jnoptik no’ox avaʼi kʼu to yepal abtel smakoj mi kʼot ta pasel li kʼusi laj yal Jesus liʼe: «Skotol li buchʼutik oy ta smukinalike chaʼibeik yechʼomal ye, vaʼun chlokʼik tal» (Juan 5:28, 29). Akʼo mi muʼyuk jamal chal Vivlia kʼusi chtun yuʼunik li buchʼutik chchaʼkuxiike, xuʼ jnoptik ti skʼan onoʼox sveʼelik, snaik xchiʼuk skʼuʼ spokʼik. Jaʼ yuʼun, xiuk jnoptike: «Li kʼusi ta jpas avie, ¿mi chakʼ ta ilel ti chapalun xa sventa xikoltavan ta mas jelavele?». Nopbo skʼoplal li sjakʼobiltak chtale.

Li avie, ¿kʼusi xuʼ xapas sventa xavakʼ ta ilel ti chapalot sventa xavuʼunin li balumile?

Junantik ermanoetike xmuyubaj chchʼamik li buchʼutik talik li ta asamblea internasional ta Paríse.

Kʼalal chalik ta atsobobbail ti chkʼot li jkʼelvanej ta sirkuitoe, ¿mi chavikʼ ta veʼel? Jech xtok, ¿mi xuʼ xakolta ta stael bu xuʼ xnaki jun ermano ti muʼyuk xa chtun ta Betel o li buchʼu muʼyuk xa chtun ta jkʼelvanej ta sirkuitoe? Mi te ch˗echʼ junuk asamblea rejional o junuk asamblea ti stuk xa noʼox jech ti bu nakalote, ¿mi xuʼ xakoltavan kʼalal skʼan toʼox xlik xchiʼuk kʼalal mi tsutse? ¿Mi xuʼ xachʼam li ermanoetik ti likemik tal ta yantik lume?

¿MI CHAPALOT SVENTA XACHANUBTAS LI BUCHʼUTIK CHCHAʼKUXIIKE?

Li kʼusi chal ta Echos 24:15 chakʼ ta ilel ti ta smiyonal noʼox krixchanoetik chchaʼkuxiik tale. Ep li buchʼutik chchaʼkuxiik tale muʼyuk laj yojtikinik Jeova, pe li ta achʼ balumile xuʼ xojtikinik.a Li yajtuneltak Jeova ti jal tunemik talel ta stojolale chkoltavanik ta xchanubtasel li buchʼutik chchaʼkuxiik tale (Is. 11:9). Jun ermana ti Charlotte sbi ti xcholoj mantal ta Europa, Sudamérica xchiʼuk ta Áfricae xi xmuyubaj chale: «Ta jkʼan xa ta jchanubtas li buchʼutik chchaʼkuxiik tale. Kʼalal ta jkʼelbe skʼoplal kʼu yelan echʼ li xkuxlejalike, xi ta jnope: ‹Ti lajuk yojtikinik Jeovae, jelel tajek jechuk li xkuxlejalike›. Oy xa tajek ta koʼonton chkalbeik ti oy kʼusitik muʼyuk la skʼupinik ta skoj ti muʼyuk xojtikinik li kʼusi melele».

Li yajtuneltak Jeova ti kuxiik kʼalal skʼan toʼox xtal li Jesus ta balumile ep kʼusi skʼan xchanik ek. Jech kʼuchaʼal liʼe, xijmuyubaj chkalbetik Daniel kʼuxi kʼot ta pasel li albil kʼopetik la stsʼiba ti muʼyuk xaʼibe smelolale (Dan. 12:8). Jech xtok, xuʼ xkalbetik Rut xchiʼuk Noemi ti te lik talel li Mesias ta snitilulalike. Toj kʼupil sba ti xuʼ jkolta jbatik ta xchanubtasel li buchʼutik chchaʼkuxiike, yuʼun muʼyuk xa chchʼay koʼontontik li kʼusitik oy ta balumil avie.

Jun ermana chakʼbe jlik tratado jun ants ta jun lavandería.

¿Kʼuxi xuʼ xavakʼ ta ilel ti chakʼan chakoltavan li ta chanubtasvaneje? Jaʼ kʼalal chavakʼ persa ti masuk to xlekub ti kʼu yelan chachanubtasvan avi xchiʼuk ti xakoltavan ta xcholel mantal ta spʼejel balumile (Mat. 24:14). Xuʼ van oy kʼusitik mu spas avuʼun ta skoj li ajabilale o ti oy kʼusitik yan chanuptane, pe vuleso me ta ajol ti kʼalal chavakʼ persa ti bu kʼalal xuʼ avuʼune, jaʼ me jech chavakʼ ta ilel ti chapalot sventa xachanubtas li buchʼutik chchaʼkuxiik tale.

Pe li kʼusi tsots skʼoplale jaʼ liʼe: ¿mi ta melel chakʼan chavuʼunin li balumile?, ¿mi oy xa ta avoʼonton chakʼatajes ta jun paraiso?, ¿mi chakʼan chavakʼbe kʼusitik chtun yuʼun li buchʼutik chchaʼkuxiik tale xchiʼuk ti xachanubtase? Kʼalal oy kʼusitik chapas ti xkoʼolaj kʼuchaʼal li abtelaletik chichʼ pasel ta Paraisoe, jaʼ me jech chavakʼ ta ilel ti chapalot sventa xavuʼunin li balumile.

a Kʼelo li mantal ti xi sbie: «Chikʼik tal yantik ta spasel li kʼusi tukʼe» ti lokʼ li ta revista Li Jkʼel-osil ta toyol ta septiembre ta 2022.