Jkoltatik li buchʼutik chil svokolike

1. ¿Kʼusi tspas Jeova sventa stakʼbe s˗orasion li yajtuneltake?

¿MI ANAʼOJ ti xuʼ stunesot Jeova sventa stakʼbe s˗orasion junuk ermanoe? Xuʼ stunesutik mu ventauk mi molutik ta tsobobbail, siervo ministerial, prekursor, jcholmantal, kerem tsebutik, mi oy xa jabilaltik, vinikutik o antsutik. Kʼalal oy jun ermano o ermana tskʼanbe koltael li Jeovae, li Diose ep ta velta tstunes li moletik ta tsobobbail o yan yajtuneltak sventa spatbe yoʼonton (Kol. 4:11). Jaʼ jun mukʼta matanal ti xuʼ jech xijtun ta stojolal Jeova xchiʼuk ta stojolal li kermanotaktike. Xuʼ jech jpastik kʼalal chtal tsatsal chamel ta spʼejel balumile, kʼalal oy kʼusi ta jnuptantik ta anile o kʼalal chkichʼtik kontrainele.

KʼALAL CHTAL TSATSAL CHAMELE

2. ¿Kʼu yuʼun mu stakʼ lek jkoltatik kermanotaktik kʼalal chtal jtosuk tsatsal chamele?

² Kʼalal chtal jtosuk tsatsal chamel ti chpuk batel ta spʼejel balumile, yikʼaluk mu xa stakʼ lek jkoltatik li yantike. Jech kʼuchaʼal liʼe, yikʼaluk ta jkʼan chbat jvulaʼantik li ermanoetike, pe mu stakʼ xijbatutik. O xuʼ van ta jkʼan chkikʼtik ta veʼel li buchʼu yakal chil svokolik ta takʼine, pe mu stakʼ xtok. Oy van tajek ta koʼontontik ta jkoltatik li yantike, pe yakal chil svokol li kutsʼ kalaltik eke. Akʼo mi jech, oy onoʼox ta koʼontontik skoltael li ermanoetike. Li Jeovae xmuyubaj kʼalal chil ti jech ta jpastike (Prov. 3:27; 19:17). Jaʼ yuʼun, ¿kʼuxi xuʼ xijkoltavan?

3. ¿Kʼusi chakʼ jchantik li moletik ta stsobobbail Desie? (Jeremias 23:4).

³ Li kʼusi xuʼ spasik li moletik ta tsobobbaile. Mi molot ta tsobobbaile, ojtikino lek li ermanoetike (kʼelo Jeremias 23:4). Li Desib ti laj kalbetik skʼoplal li ta xchanobil echʼe xi chale: «Li moletik ta jgrupoe chchiʼinunkutik ta cholmantal xchiʼuk oy kʼusi jmoj ta spasik xchiʼuk voʼonkutik». Koliyal li kʼusi la spas li moletike, mas kʼun laj yaʼiik ta skoltael Desi kʼalal cham junantik yutsʼ yalal ta skoj li COVID-19.

4. Li moletik ta tsobobbaile, ¿kʼu yuʼun mu vokoluk laj yaʼiik ta skoltael li Desie, xchiʼuk kʼusi ch˗akʼbat xchan li moletike?

⁴ Xi chal li Desie: «Ta skoj ti jaʼ xa onoʼox kamigotak li moletik ta tsobobbaile, muʼyuk vokol laj kaʼi ta yalbel ti kʼu yelan chkaʼi jbae xchiʼuk li kʼusi ta jvul˗o koʼontone». ¿Kʼusi ch˗akʼbat xchanik li moletik ta tsobobbaile? Chabiik li ermanoetike xchiʼuk paso ta avamigoik kʼalal skʼan toʼox xtal jtosuk tsatsal vokolile. Mi mu stakʼ xbat avulaʼanik li ermanoetik ta skoj li tsatsal chamele, kʼelik kʼuxi xuʼ xakʼoponik. Xi to chal li Desie: «Bakʼintike, ta jun noʼox kʼakʼale oy jayvoʼ moletik tskʼoponikun ta telefono o tstakbeikun mensaje. Li tekstoetik tskʼelbeikune chkʼot ta koʼonton akʼo mi jnaʼoj xa onoʼox li kʼusi chale».

5. Li moletik ta tsobobbaile, ¿kʼuxi xuʼ snaʼik li kʼusi chtun yuʼunik li ermanoetike, xchiʼuk kʼuxi xuʼ skoltaik?

⁵ Jtos ti kʼuxi xuʼ snaʼik li moletik ta tsobobbail li kʼusi chtun yuʼun li ermanoetike jaʼ ti oyuk kʼusi sjakʼbeike, pe skʼan me xichʼ spʼijilik (Prov. 20:5). ¿Mi oy noʼox li kʼusi chtun yuʼunik jujun kʼakʼal jech kʼuchaʼal li sveʼelike xchiʼuk li xpoxilike? ¿Mi jech˗o van oy yabtelik xchiʼuk snaik? ¿Mi tskʼanik van chiʼinel sventa xbat skʼanik li koltaeletik chakʼ ajvalile? Li Desie akʼbat yuʼun junantik ermanoetik li kʼusi chtun yuʼune. Pe li kʼusi mas koltaat˗o yuʼun li moletike jaʼ li ta mantale xchiʼuk ti patbat yoʼontone. Xi chale: «Li moletik ta tsobobbaile jmoj la spasik orasion xchiʼuk voʼon. Mu xvul lek ta jol li kʼusi laj yalike, pe xvul lek ta jol ti kʼu yelan laj kaʼi jbae. Xkoʼolaj ti xi yakal chalbun li Jeovae: ‹Mu atukuk›» (Is. 41:10, 13).

6. ¿Kʼuxi xuʼ komon jkolta jbatik li ta tsobobbaile? (Kʼelo li lokʼoletike).

⁶ Ti kʼuxi xuʼ xkoltavan li ermanoetike. Li moletik ta tsobobbaile jaʼ oy ta sbaik skʼelel li kʼusi chtun yuʼun li ermanoetike. Pe li Jeovae chalbutik ti jpatbetik yoʼonton xchiʼuk ti jkoltatik li yantike (Gal. 6:10). Akʼo mi muʼyuk mas tsots skʼoplal yilel li kʼusi ta jpastik ta stojolal li buchʼu ipe, xuʼ me xpatbat˗o yoʼonton. Li ololetike xuʼ me spasik jlikuk tarjeta o junuk divujo sventa spatbeik yoʼonton junuk ermano. Li kerem tsebetike xuʼ van skoltaik ta smanel li kʼusi chtun yuʼun junuk ermanae. Li yantik xtoke xuʼ van smeltsanbeik echʼel sveʼel li buchʼu ip chaʼie. Kʼalal pukem tajek li chamele, jkotoltik ta jkʼantik patbel koʼontontik. Jaʼ yuʼun, lek van ti te to xijkomutik jlikeluk kʼalal mi tsuts li tsobajel sventa jchiʼintik ta loʼil li ermanoetike akʼo mi ta videoconferencia noʼox oyutik. Skʼan me patbel yoʼontonik li moletik ta tsobobbail eke. Junantik ermanoetike tstsʼibabeik jlikuk uni vun sventa stojbeik ta vokol li yabtelike, yuʼun kʼalal jaʼo oy tsatsal chamel ta spʼejel balumile, mas to oy yabtelik. Lek me ti jchʼuntik li kʼusi chal li teksto liʼe: «Jech˗o xapatbe aba avoʼontonik xchiʼuk xatsatsubtasbe aba avoʼontonik ta jujuntal» (1 Tes. 5:11).

KʼALAL OY KʼUSI TA JNUPTANTIK TA ANILE

7. ¿Kʼusi vokolil chakʼ kʼalal oy kʼusi ta jnuptantik ta anile?

⁷ Kʼalal oy kʼusi ta jnuptantik ta anile, xuʼ me xjelbat˗o xkuxlejal li jun krixchanoe. Xuʼ van xlaj li kʼusitik oy yuʼune, jech kʼuchaʼal li snae o chcham junuk yutsʼ yalal. Taje jaʼ jech tsnuptan li kermanotaktike. ¿Kʼuxi xuʼ xijkoltavan?

8. ¿Kʼusi xuʼ spasik li moletik ta tsobobbail xchiʼuk li totil meʼiletik kʼalal oy kʼusi ta jnuptantik ta anile?

⁸ Li kʼusi xuʼ spasik li moletik ta tsobobbaile. Moletik ta tsobobbail, koltaik li ermanoetik sventa xchapan sbaik mi oy kʼusi la snuptanik ta anile. Kʼelik me ti snaʼikuk kʼusi stakʼ spasik li ermanoetik mi oy kʼusi kʼot ta pasele xchiʼuk ti kʼuxi xuʼ xavichʼik tael ta kʼoponele. Xi chal li Margaret ti laj kalbetik skʼoplal li ta xchanobil echʼe: «Li moletik ta tsobobbaile laj yetʼesik jun mantal ta sventa li kʼusitik chtun ta tsobobbaile, te la svules ta jolkutik ti muʼyuk to echʼem li yorail kolemal kʼokʼe. Laj yalbunkutik ti xilokʼkutik batel ta anil mi jech laj yalbunkutik li buchʼutik oy yabtelike o mi toj xibal xa sba chkilkutike». Sta˗o tajek li mantal laj yetʼesike, yuʼun voʼob xemana ta tsʼakale jaʼo kol kʼokʼ. Totil meʼiletik, kʼalal chapasik li yichʼel ta mukʼ Diose, albeik skʼoplal li kʼusitik xuʼ xapasik mi oy kʼusi la anuptanik ta anile. Mi chapaloxuk noʼox xchiʼuk li avalab anichʼnabike, xuʼ me mas jun avoʼontonik.

9. Li moletik ta tsobobbaile, ¿kʼusi skʼan spasik kʼalal skʼan toʼox xchiʼuk mi echʼ xa ox li kʼusi xuʼ jnuptantik ta anile?

⁹ Mi jaʼot jkʼelvanej ta grupo sventa cholmantale, mu me jaʼuk to xamala ti oy kʼusi xkʼot ta pasel ta anil sventa xakʼel mi jaʼ avichʼojbe li snumeroal stelefonoik li ermanoetik ta agrupoe. Pasbo junuk slistail xchiʼuk kʼelo mi jaʼo to snumeroik li ermanoetike. Vaʼun, mi oy kʼusi kʼot ta pasel ta anile, xuʼ me xakʼopon echʼel ta anil li ermanoetike xchiʼuk xakʼel li kʼusitik chtun yuʼunike. Mi laje, albo li kordinador yuʼun moletike, vaʼun li stuke tskʼopon batel li jkʼelvanej ta sirkuitoe. Lek me kʼusi chkʼot ta pasel mi jmoj tsobol chij˗abteje. Kʼalal echʼ xa ox li kolemal kʼokʼe, li jkʼelvanej ta sirkuito ti bu oy Margarete muʼyuk xvay 36 ora sventa xchapan li kʼusitik xuʼ spas li moletik ti yakal tsaʼik xchiʼuk tskʼelik li kʼusitik chtun yuʼunik li ermanoetike, te van 450 ermanoetik ti lokʼ batel ta snaike (2 Kor. 11:27). Koliyal ti jech la spasike, laj yichʼ tael ti bu xuʼ xkomik li ermanoetike.

10. ¿Kʼu yuʼun tsots skʼoplal chilik li moletik ta tsobobbail ti lekuk oy li ermanoetike? (Juan 21:15).

¹⁰ Li moletik ta tsobobbaile jaʼ oy ta sbaik skoltael ta mantal xchiʼuk spatbel yoʼonton li ermanoetike (1 Ped. 5:2). Kʼalal chtal nikel, nojelal ta voʼ o yan kʼusitike, skʼan skʼelik ti lekuk oy li ermanoetike, ti oyuk sveʼelik, skʼuʼ spokʼik xchiʼuk ti bu xuʼ xkomike. Pe yikʼaluk van jech˗o tskʼanik koltael ta mantal xchiʼuk patbel yoʼontonik kʼuk sjalil li buchʼutik laj yil svokolike (kʼelo Juan 21:15). Li Harold ti chtun ta Komite sventa Betel xchiʼuk ti xchiʼinanoj ta loʼil li buchʼutik yiloj svokol ta skoj nikel, nojelal ta voʼ o yan kʼusitike xi chale: «Mu aniluk chchʼay xkaʼitik li kʼusitik la jnuptantike. Li ermanoetike xuʼ van xlekub yan velta li xkuxlejalike, pe xuʼ van xvul ta sjolik li kʼusi la snuptanike, jech kʼuchaʼal ti cham junuk yuts’ yalalik, ti laj li kʼusitik oy yuʼunike o ti xibal sba li kʼusi la snuptanike. Kʼalal jech chvul ta sjolike, xuʼ van svul yoʼontonik yan velta. Pe taje maʼuk skʼan xal ti muʼyuk xchʼunel yoʼontonike, yuʼun stalel onoʼox ti jech chkaʼi jbatike».

11. ¿Kʼu yelan skʼan xichʼ koltael kʼuk sjalil li utsʼ alaliletike?

¹¹ Li moletik ta tsobobbaile lek me ti xchʼunik li tojobtasel liʼe: «Okʼan me achiʼukik li buchʼutik ch˗okʼike» (Rom. 12:15). Li buchʼutik laj yil svokolik ta nikel, nojelal ta voʼ o yan kʼusitike skʼan vulesbel ta sjolik ti jech˗o kʼanbilik yuʼun Jeova xchiʼuk li ermanoetike. Li moletik ta tsobobbaile xuʼ skoltaik li utsʼ alaliletik sventa jechuk˗o spasik orasion, xchanunajik, xbatik ta tsobajeletik xchiʼuk xcholik mantale. Jech xtok, xuʼ stijbeik yoʼonton li totil meʼiletik sventa xakʼbe xchan yalab xnichʼnabik ti oy kʼusitik muʼyuk chlaj ta nikel, nojelal ta voʼ o yan kʼusitike. Totil meʼiletik, vulesbo ta sjol avalab anichʼnabik ti jech˗o kʼanbilik yuʼun Jeova xchiʼuk ti muʼyuk onoʼox ch˗iktaatike. Alanbo xtok ti oy yutsʼ yalalik ta spʼejel balumil ti jech˗o oy ta yoʼontonik chkoltavanike (1 Ped. 2:17).

12. ¿Kʼusi xuʼ spasik li ermanoetik sventa skoltaik li buchʼutik chil svokolike? (Kʼelo li lokʼole).

¹² Ti kʼuxi xuʼ xkoltavan li ermanoetike. Mi nopol nakalot ti bu echʼ nikel, nojelal ta voʼ o yan kʼusitike, jakʼbo li moletik ta tsobobbail ti kʼuxi xuʼ xakoltavane. Yikʼaluk van xuʼ xavakʼ ta chʼom anaik sventa te xkom li ermanoetik ti laj yikta komel snaike o ti xakolta li buchʼutik chil svokolike. Xuʼ van xakoltavan ta yakʼbel sveʼelik o li kʼusitik chtun yuʼunike. ¿Pe kʼuxi xuʼ xakoltavan mi nom to xkom li kʼusi kʼot ta pasele? Paso orasion ta stojolal li buchʼutik laj yil svokolike xchiʼuk xuʼ xavakʼ matanal takʼin ta sventa li abtelal ta spʼejel balumil sventa xichʼ koltael li ermanoetik ti chil svokolike (2 Kor. 1:8-11; 8:2-5). Mi xuʼ avuʼun xabat ti bu oy kʼusi kʼot ta pasele, jakʼbo li moletik ta tsobobbail ti kʼuxi xuʼ xakoltavane. Mi laj yalboxuk ti xuʼ xabate, yikʼaluk van xavichʼ lek chanubtasel sventa xakoltavan kʼalal oy kʼusi chkʼot ta pasel ta anile o ti xabat ti bu chtun yuʼunik mas koltaele.

KʼALAL CHKICHʼTIK KONTRAINELE

13. ¿Kʼusitik tsnuptanik li ermanoetik ti bu mu x˗akʼbat spasik kabteltike?

¹³ Kʼalal chichʼik kontrainel li ermanoetike, mas to chil˗o svokolik. Li ermanoetik ti te nakalik ti bu mu x˗akʼbat spas kabteltike chil svokolik xtok ta takʼin, ch˗ipajik xchiʼuk chcham yutsʼ yalalik. Ta skoj li kʼusitik mu xakʼik jpastike, li moletik ta tsobobbaile vokol chaʼiik chkoltavanik o mu stakʼ lek spatbeik yoʼonton li ermanoetike. Taje jaʼ li kʼusi kʼot ta stojolal li Andréi ti laj kalbetik skʼoplal li ta xchanobil echʼe. Oy jun ermana li ta sgrupo sventa cholmantale laj yil svokol ta takʼin xchiʼuk oy kʼusi la snuptan ta skarro. Ep ta velta laj yichʼ operasion xchiʼuk mu stakʼ x˗abtej. Akʼo mi oy kʼusitik mu x˗akʼbat spasik yuʼun li j˗abteletike xchiʼuk akʼo mi oy chamel, li ermanoetike la skʼelik kʼu yelan xuʼ skoltaik li ermanae. Li Jeovae laj yil skotol li kʼusitik kʼot ta pasele.

14. ¿Kʼuxi chakʼik ta ilel li moletik ta tsobobbail ti spatoj yoʼontonik ta stojolal Jeovae?

¹⁴ Li kʼusi xuʼ spasik li moletik ta tsobobbaile. Li Andréi la skʼopon Jeova xchiʼuk la spas ti bu kʼalal stakʼe. ¿Kʼuxi la stakʼ li Jeovae? La stunes yan ermanoetik ti mas ep kʼusitik xuʼ spasike. Junantike laj yikʼik batel ta doktor li ermanae, yantike la skoltaik ta takʼin. Li Jeovae koltavan ta skoj ti jmoj tsobol oyike xchiʼuk ta skoj li kʼusitik la spasike (Ebr. 13:16). Moletik ta tsobobbail, mi jech la spajes kabteltik li ajvaliletike, albeik yantik ti akʼo skoltaoxuke (Jer. 36:5, 6). Pato me avoʼontonik ta stojolal Jeova, yuʼun jaʼ tskoltaoxuk sventa xuʼ xakoltaik li ermanoetike.

15. ¿Kʼusi skʼan jpastik sventa jmojuk oyutik kʼalal jaʼo chkichʼtik kontrainele?

¹⁵ Ti kʼuxi xuʼ xkoltavan li ermanoetike. Kʼalal jaʼo chkichʼtik kontrainele, yikʼaluk van mu xa stakʼ ep ta jtsob jbatik. Jaʼ yuʼun, mas to tsots skʼoplal ti muʼyukuk jkʼoptik xchiʼuk li yantike. Jaʼuk jkontraintik li Satanase, mu jaʼuk jkontrain jbatik li voʼotike. Kakʼtik ta perton mi oy kʼusi chopol la spasbutik li ermanoetike xchiʼuk jchapantik noʼox ta anil li jkʼoptike (Prov. 19:11; Efes. 4:26). Voʼotikuk baʼyel xlokʼ ta koʼontontik skoltael li yantike (Tito 3:14). Ta skoj ti koltavanik li Andréi xchiʼuk li sgrupo sventa cholmantale, la stabeik sbalil skotolik, yuʼun mas xa jmoj oyik kʼuchaʼal jun utsʼ alalil (Sal. 133:1).

16. Jech kʼuchaʼal chal Kolosenses 4:3 xchiʼuk 18, ¿kʼusi xuʼ jpastik ta stojolal li ermanoetik ti yakal chichʼik kontrainele?

¹⁶ Ta smilal xa noʼox kermanotaktik yakal chtunik ta stojolal Jeova akʼo mi mu x˗akʼbat spasik li kabteltike. Junantike yichʼojik chukel ta skoj li kʼusi xchʼunojike. Jpastik orasion ta stojolalik, ta stojolal li yutsʼ yalalike xchiʼuk ta stojolal li ermanoetik ti xuʼ van x˗ochik˗o ta chukel ta skoj ti tskoltaik ta mantal, ti chakʼbeik li kʼusi chtun yuʼunik xchiʼuk ti tspakbeik skʼoplal ta stojolal li ajvaliletike (kʼelo Kolosenses 4:3, 18).c Teuk me ta joltik ti ep tajek sbalil li orasione (2 Tes. 3:1, 2; 1 Tim. 2:1, 2).

17. ¿Kʼuxi xuʼ xlik xa noʼox jchapan jbatik sventa xkuch kuʼuntik li kontrainele?

¹⁷ Xuʼ me xlik xa noʼox achapan aba xchiʼuk avutsʼ avalal sventa xkuch avuʼunik li kontrainele (Ech. 14:22). Mu xanopbe skʼoplal li kʼusitik chopol xuʼ xkʼot ta pasele. Jaʼ mas lek ti xakʼel kʼuxi xuʼ mas to lek xavil aba xchiʼuk Jeova xchiʼuk koltao avalab anichʼnab sventa jechuk spasik eke. Albeik Jeova mi chlik avul avoʼonton chavaʼiike (Sal. 62:7, 8). Albeik skʼoplal ta avutsʼ avalalik ti kʼu yuʼun skʼan jpat koʼontontik ta stojolal Jeovae.d Lek ti xachapan li avalab anichʼnab sventa li kʼusi xuʼ jnuptantik ta anile, pe skʼan xachapan xtok sventa xkuch yuʼunik li kontrainele xchiʼuk ti xachanubtasan ti akʼo spat yoʼontonik ta stojolal Jeovae. Mi jech chapase, lek me tsots yoʼontonik xchiʼuk muʼyuk kʼusi chiʼik˗o.

18. ¿Kʼusi jmalaojtik ta tsʼakal?

¹⁸ Li jun oʼontonal yuʼun Diose jun koʼontontik yuʼun (Filip. 4:6, 7). Li Jeovae jaʼ tstunes sventa xkuch kuʼuntik mi tal jtosuk tsatsal chamel ta spʼejel balumil, kʼalal oy kʼusi ta jnuptantik ta anile o kʼalal chkichʼtik kontrainele. Tstunes xtok li moletik ta tsobobbail ti ta sjunul yoʼontonik chchabiik li ermanoetike xchiʼuk yakʼojbutik jun mukʼta matanal, jaʼ ti xuʼ jkolta jbatik ta jujuntale. Li jun oʼontonal taje chchapanutik sventa xkuch kuʼuntik li kʼusi chtal ta tsʼakale, jech kʼuchaʼal li «mukʼta tsatsal [vokolile]» (Mat. 24:21). Li vaʼ orae, tsots me skʼoplal ti junuk noʼox koʼontontik xchiʼuk ti jkoltatik yantik sventa jechuk xaʼi sbaik eke. Pe mi tsuts li mukʼta tsatsal vokolile, muʼyuk xa me kʼusi ta jnuptantik ti chakʼ vul oʼontone. Jaʼ to me te ta jkʼupintik li kʼusi oy onoʼox ta yoʼonton li Jeovae: jun oʼontonal ta sbatel osil (Is. 26:3, 4).