Li Jeovae tskʼatajes ta paraiso li balumile

1. ¿Kʼusi laj yalbe j-israeletik li j-alkʼop Isaiase?

LI J-ALKʼOP Isaiase laj yal ti Jeovae jaʼ «li Dios ti melel snaʼ xkʼopoje». Li jpʼel kʼop ta ebreo «melel» xie, jaʼ skʼan xal «jechuk» (Is. 65:16). Jech xtok, jaʼ skʼan xal «jaʼ jech kʼotuk ta pasel» o «ta melel». Li ta Vivliae, ep ta velta chal jechuk sventa xakʼ ta ilel ti melel kʼusi chalik li Jeova xchiʼuk li Jesuse. Jaʼ yuʼun, li kʼusi tskʼan chalbe j-israeletik li Isaiase jaʼ ti persa chakʼ kʼotuk pasel kʼusi tskʼan li Jeovae, yuʼun kʼotem ta pasel li kʼusi yaloje.

2. ¿Kʼu yuʼun xuʼ jpat koʼontontik ta sventa li kʼusi yaloj tspas Jeova ta jelavele? ¿Kʼusi ta jchantik li ta xchanobil liʼe?

² ¿Mi xuʼ jchʼuntik li kʼusi yaloj tspas Diose? Te van 800 jabil ta mas tsʼakal li ta skʼakʼalil j-alkʼop Isaiase, li jtakbol Pabloe laj yal ti kʼu yuʼun xuʼ jchʼuntik li kʼusi yaloj tspas Jeovae, xi laj yale: «Mu snaʼ sjut kʼop li Diose» (Ebr. 6:18). ¿Mi mu jechuk ti muʼyuk chlokʼ talel chiʼpikʼan voʼ xchiʼuk lekil voʼ li ta sat voʼe? Jaʼ jech ta stojolal li Jeova eke, yuʼun jaʼ te chlik talel ta stojolal li kʼusi melele. Jaʼ yuʼun, muʼyuk chlokʼ ta ye jutbil kʼopetik. Jech oxal, xuʼ jchʼuntik skotol li kʼusi chal Jeovae ti te tsakal skʼoplal li kʼusi yaloj tspas ta jelavele. Li ta xchanobil liʼe, ta xichʼ takʼel liʼe: ¿kʼusi yaloj tspas Jeova li ta jelavele? xchiʼuk ¿kʼuxi jnaʼojtik ti chkʼot ta pasel li kʼusi yaloje?

¿KʼUSI YALOJ TSPAS LI JEOVAE?

3. 1) ¿Kʼusi ti chakʼan chavil chkʼot ta pasele? (Apokalipsis 21:​3, 4). 2) ¿Kʼusi chalik yantik kʼalal ta jkʼelbetik li teksto taje?

³ Li kʼusi chkalbetik batel skʼoplale toj tsots skʼoplal chilik li yajtuneltak Jeovae (kʼelo Apokalipsis 21:​3, 4). Li Jeovae chal ti «muʼyuk xa lajelal, muʼyuk xa at-oʼonton, muʼyuk xa okʼel ta skoj vokolil xchiʼuk mi jaʼuk xa kʼusi kʼux chkaʼitik». Li teksto taje ep ta velta ta jtunestik sventa jpatbetik yoʼonton li krixchanoetike xchiʼuk chkalbetik kʼu yelan li kuxlejal ta Paraisoe. Xi chalik junantik kʼalal chaʼiik taje: «Toj kʼupil sba yaʼeluk, pe mu jnaʼ mi chkʼot onoʼox ta pasel».

4. 1) ¿Kʼusi chaʼtos snaʼoj xa onoʼox li Jeovae? 2) Sventa jchʼuntik li kʼusi yaloje, ¿kʼusitik to yan laj yalbutik li Jeovae?

⁴ Li Jeovae snaʼoj xa onoʼox ti ta jtunestik ta cholmantal li kʼusi la stsʼiba jtakbol Juan ta sventa li Paraisoe. Jech xtok, snaʼoj xa onoʼox ti epal krixchanoetik vokol chaʼiik xchʼunel li kʼusitik yaloj tspas Jeovae (Is. 42:9; 60:2; 2 Kor. 4:​3, 4). ¿Kʼuxi xuʼ jkoltatik yantik sventa xchʼunik li kʼusi chal ta Apokalipsis 21:​3, 4? Xchiʼuk ¿kʼuxi xuʼ jtsatsubtas li xchʼunel koʼontontik ta stojolal Jeova xchiʼuk li kʼusi yaloj tspase? Li Jeovae maʼuk noʼox laj yalbutik li kʼusi snopoj tspase, yuʼun laj yalbutik srasonal xtok ti persa chkʼot ta pasele. Jkʼeltik batel.

LI KʼUSI YALOJ JEOVAE CHKʼOT TA PASEL

5. ¿Bu tekstoal chal ti xuʼ jchʼuntik li kʼusi yaloj tspas Jeovae, xchiʼuk kʼusi chal?

⁵ Li ta tekstoetik liʼe, te ta jtabetik srasonal ti kʼu yuʼun xuʼ jchʼuntik li kʼusi chal Jeova ta sventa li Paraisoe, xi chale: «Xi laj yal li buchʼu te chotol ta chotlebal sventa ajvalile: ‹¡Kʼelavil!, ta jpas ta achʼ skotol li kʼusitike›. Xi laj yal xtoke: ‹Tsʼibao, yuʼun tukʼ xchiʼuk melel li kʼusitik laj yichʼ alele›. Xi laj yalbune: ‹¡Kʼot xa yorail! Alfaun xchiʼuk Omegaun, li slikeb xchiʼuk slajebe›» (Apok. 21:​5, 6 sbavokʼal).

6. ¿Kʼu yuʼun tstsatsubtas xchʼunel koʼontontik li kʼusi chal Apokalipsis 21:​5, 6 ta sventa li kʼusi yaloj tspas Jeovae?

⁶ ¿Kʼu yuʼun tstsatsubtas xchʼunel koʼontontik li teksto ta Apokalipsis ta sventa li kʼusi yaloj tspas Jeovae? Yuʼun li kʼusi chal li ta tekstoetik taje xkoʼolaj ti la spas firmar jlik vun li Jeovae, taje jaʼ skʼan xal ti persa chkʼot ta pasel li kʼusi yaloje.b Li ta Apokalipsis 21:3 xchiʼuk 4 te chal li kʼusi yaloj tspas Jeovae. Li versikuloetik 5 xchiʼuk 6 xkoʼolaj ti te ta xakʼ sfirma li Jeovae, jaʼ xkaltik, ti chal ta jamal ti chkʼot ta pasel li kʼusi yaloje. Jkʼeltik batel ti kʼu yuʼun xuʼ jchʼuntik li kʼusi ta xal Jeovae.

7. ¿Buchʼu chlik kʼopojuk li ta versikulo 5, xchiʼuk kʼu yuʼun ti toj kʼupil sbae?

⁷ Xi chlik yal li versikulo 5: «Li buchʼu te chotol ta chotlebal sventa ajvalile» (Apok. 21:5 sbavokʼal). Toj kʼupil sba yuʼun jaʼ kʼopoj stuk li Jeovae, maʼuk laj yal jun anjel mi jaʼuk li Jesuse. Oxib to velta jech lik kʼopojuk Jeova li ta slivroal Apokalipsise. Jaʼ yuʼun, jchʼunojtik ta melel «ti mu snaʼ sjut [kʼop]» li Jeovae (Tito 1:2). Xuʼ jchʼuntik li kʼusi chal Apokalipsis 21:​5, 6.

«¡KʼELAVIL!, TA JPAS TA ACHʼ SKOTOL LI KʼUSITIKE»

8. ¿Kʼusi chal Jeova sventa jchʼuntik li kʼusi yaloj tspase? (Isaias 46:10).

⁸ Avie jaʼ xa kalbetik skʼoplal kʼalal «¡Kʼelavil!» xi li Jeovae (Apok. 21:5). Li jpʼel kʼop ta griego taje ep ta velta ta xal li ta Apokalipsise. Xi chal jlik livro ta sventa li jpʼel kʼop taje: «Jaʼ sventa skʼel o xchikinta li jun krixchanoe». ¿Kʼusi ti skʼan jchikintatike? Xi chal li Diose: «Ta jpas ta achʼ skotol li kʼusitike». Akʼo mi jaʼ onoʼox chal Jeova li kʼusi tspas ta jelavele, chakʼ ta ilel ti persa chkʼot ta pasel li kʼusi yaloje (kʼelo Isaias 46:10).

9. 1) ¿Kʼusi chakʼ jnoptik kʼalal chal «ta jpas ta achʼ skotol li kʼusitike»? 2) ¿Kʼusi chkʼot ta stojolal li vinajel xchiʼuk li balumil avie?

⁹ Jaʼ xa kalbetik skʼoplal li kʼusi chal ta versikulo 5 ta kapitulo 21: «Ta jpas ta achʼ skotol li kʼusitike». Li ta kapitulo liʼe, chakʼ jnoptik ti oy chaʼtos kʼusi tspas li Jeovae: chkʼexta xchiʼuk chachʼubtas. Baʼyel kalbetik skʼoplal li kʼusi chichʼ kʼextaele, xi chal Apokalipsis 21:1: «Yuʼun echʼ xa li mol vinajel xchiʼuk li mol balumile». Li mol vinajele jaʼ skʼoplal li ajvaliletik ti jaʼ pasbilik ta mantal yuʼun li Satanas xchiʼuk li spukujtake (Mat. 4:​8, 9; 1 Juan 5:19). Kʼalal chal balumil ta Vivliae, bakʼintike jaʼ chalbe skʼoplal li jnaklejetike (Jen. 11:1; Sal. 96:1). Jaʼ yuʼun, li «mol balumile» jaʼ skʼan xal li chopol krixchanoetik avi kʼakʼale. Taje jaʼ skʼan xal ti Jeovae maʼuk noʼox tskʼan tslekubtas jutuk li «vinajel» xchiʼuk li «balumile», yuʼun chakʼbe slajeb ta j-echʼel xchiʼuk chkʼexta ta «jun achʼ vinajel xchiʼuk jun achʼ balumil», jaʼ xkaltik, jun achʼ ajvalil xchiʼuk achʼ jnaklejetik.

10. ¿Kʼu yelan tspas ta achʼ skotol kʼusitik li Jeovae?

¹⁰ Li ta Apokalipsis 21:5 chalbutik kʼuxi tspas ta achʼ skotol li Jeovae. Chachʼubtas li balumile xchiʼuk tspas ta tukʼil krixchanoetik li jnaklejetike. Jech kʼuchaʼal laj yal li Isaiase chkʼataj ta jun kʼupil sba paraiso li balumile jech kʼuchaʼal li nichimaltik Eden toʼoxe. Li voʼotik eke ta xkichʼtik lekubtasel o achʼubtasel ta jujuntalutik. Li Jeovae ta xpoxta li koxoetike, li maʼsatetike, li pakʼchikinetike xchiʼuk ta xchaʼkuxes li buchʼutik chamemike (Is. 25:8; 35:​1-7).

«TUKʼ XCHIʼUK MELEL LI KʼUSITIK LAJ YICHʼ ALELE» XCHI’UK «¡KʼOT XA YORAIL!»

11. ¿Kʼusi laj yalbe Jeova ti akʼo spas li Juane, xchiʼuk kʼu yuʼun?

¹¹ Li Jeovae xi to laj yalbe li Juane: «Tsʼibao, yuʼun tukʼ xchiʼuk melel li kʼusitik laj yichʼ alele» (Apok. 21:5). Maʼuk noʼox laj yalbe Juan ti akʼo stsʼibae, yuʼun laj yalbe srasonal xtok ti kʼu yuʼun skʼan jech spase, xi laj yalbee: «Yuʼun tukʼ xchiʼuk melel li kʼusitik laj yichʼ alele», jaʼ xkaltik, ti xuʼ jchʼuntik li kʼusi chal Diose. Bal to ti la xchʼunbe smantal Jeova li Juane xchiʼuk ti la stsʼibae. Koliyal taje, xuʼ jkʼeltik ta Vivlia li kʼusi yaloj Dios ta sventa li Paraisoe xchiʼuk ti jnopbetik skʼoplal li kʼusitik kʼupilik sba ta jtatik ta jelavele.

12. ¿Kʼu yuʼun xuʼ xal Jeova «¡Kʼot xa yorail!»?

¹² Xi chal li Jeovae: «¡Kʼot xa yorail!» (Apok. 21:6). Li kʼusi laj yal Jeova ta sventa li paraisoe xkoʼolaj ti kʼot xa ta pasele. Ti jech chale jaʼ ta skoj ti muʼyuk kʼusi chmakat-o sventa xkʼot ta pasel li kʼusi yaloje. ¿Kʼusi to yan chalbutik Jeova sventa jchʼuntik ti chkʼot ta pasel li kʼusi chale?

«ALFAUN XCHIʼUK OMEGAUN»

13. ¿Kʼu yuʼun «Alfaun xchiʼuk Omegaun» xi li Jeovae?

¹³ Jech kʼuchaʼal laj xa jchantike, li Juane oxib to velta kʼopoj laj yil li Jeovae (Apok. 1:8; 21:​5, 6; 22:13). Ta yoxibal velta xi laj yal li Jeovae: «Alfaun xchiʼuk Omegaun». Li alfae jaʼ li baʼyel alfaveto ta griego kʼope, li omegae jaʼ li slajeb alfaveto ta griegoe. Kʼalal «Alfaun xchiʼuk Omegaun» xi li Jeovae, chakʼ ta aʼiel ti tstsutses li kʼusi tslikese.

14. 1) Albo junuk skʼelobil bakʼin laj yal «Alfa» li Jeovae xchiʼuk bakʼin ta xal «Omega» 2) ¿Kʼusi ta xalbutik Jeova li ta Jenesis 2:​1-3?

¹⁴ Kʼalal laj xa ox spas Adan xchiʼuk Eva li Jeovae, laj yal li kʼusi oy ta yoʼonton tspas ta sventa li krixchanoetike xchiʼuk ta sventa li balumile. Xi chal kaʼitik li Vivliae: «Akʼbatik bendision yuʼun Dios, xi albatike: ‹Epajanik, pʼolanik, nojesik li balumile, ventainik›» (Jen. 1:28). Kʼalal laj yal Jeova li kʼusi oy ta yoʼontone, xkoʼolaj ti laj yal «Alfae». Mi tukʼil krixchanoetik xa ox li snitilulal Adan xchiʼuk Evae, ta snojesik li balumile xchiʼuk tskʼatajesik ta jun paraiso. Mi kʼot li skʼakʼalil taje, xkoʼolaj ti chal «Omega» li Jeovae. Kʼalal laj xa ox spas «li vinajele xchiʼuk li balumile xchiʼuk skotol li kʼusitik te oye», jaʼ te vinaj ti ta onoʼox spas li kʼusi oy ta yoʼontone. ¿Kʼuxi la spas? Jaʼo kʼalal laj yal Jeova ti chʼul xa li svukubal kʼakʼale (kʼelo Jenesis 2:​1-3). ¿Kʼusi skʼan xal taje? Jaʼ ti chkʼot ta pasel li kʼusi snopoj Jeova tspas ta stojolal li krixchanoetike xchiʼuk ta sventa li balumile. Li ta slajebaltik xa svukubal kʼakʼale, chkʼot ta pasel skotol li kʼusitik snopoj tspas Jeovae.  

15. ¿Kʼu yuʼun mu xa xkʼot ta pasel yileluk li kʼusi oy ox ta yoʼonton Jeovae?

¹⁵ Kʼalal laj xa ox stoy sbaik li Adan xchiʼuk Evae, kʼotik ta jpas muliletik xchiʼuk la sjelubtasbeik mulil xchiʼuk lajelal li snitilulalike (Rom. 5:12). Ta skoj li kʼusi kʼot ta pasele, ¿mi mu xa van xuʼ snojes ta lekil xchiʼuk ta tukʼil krixchanoetik li balumile? Li Jeovae, ¿mi muʼyuk van chkʼot skʼakʼalil chal «Omega» ta skoj li kʼusi la spas Satanase? Taje xuʼ van jech chakʼ kaʼitik, xuʼ van la snop Diablo ti mu xa kʼusi stakʼ spas li Jeovae. Li kʼusi xuʼ ox spase jaʼ ti xakʼbe slajeb li Adan xchʼik Evae, vaʼun ti spas yan nupultsʼakal sventa xkʼot ta pasel li kʼusi oy ox ta yoʼonton tspas ta sventa li krixchanoetike. Ti jechuk la spas li Jeovae, li Diabloe laj yal ti jaʼ jutkʼop jechuke. ¿Kʼu yuʼun? Yuʼun jech kʼuchaʼal chal ta Jenesis 1:28 li Jeovae yalojbe xa onoʼox Adan xchiʼuk Eva ti tsnojesik balumil li snitilulaltake.

16. ¿Kʼu van yuʼun la snop Satanas ti muʼyuk onoʼox tspas Jeova li kʼusi oy ta yoʼontone?

¹⁶ Yan ti kʼusi xuʼ ox la snop li Satanase jaʼ ti xakʼ Jeova ti snojesik balumil li yalab xnichʼnabik Adan xchiʼuk Evae, jaʼ noʼoxe jpasmuliletik chkomik-o (Ekl. 7:20; Rom. 3:23). Ti jechuk kʼot ta pasele, li Satanase laj yal jechuk ti mu xkʼot ta pasel yuʼun Jeova li kʼusi tskʼane. ¿Kʼu yuʼun? Yuʼun li kʼusi oy ox ta yoʼonton li Jeovae mu xkʼot ta pasel, ti tsnojes ta tukʼil krixchanoetik li balumile.

17. Ta skoj li stoyobbail Satanas, Adan xchiʼuk Evae, ¿kʼusi la spas Jeova sventa xkʼot ta pasel li kʼusi oy ta yoʼontone, xchiʼuk kʼusi kʼot ta pasel? (Kʼelo xtok li lokʼole).

¹⁷ Li kʼusi la spas Jeova sventa xakʼ kʼotuk pasel li kʼusi oy ta yoʼontone chʼayal van kʼot yoʼonton yuʼun li Satanase (Sal. 92:5). Kʼalal laj yakʼ Jeova ti xil yalab xnichʼnab li Adan xchiʼuk Evae, laj yakʼ ta ilel ti mu snaʼ sjut kʼope xchiʼuk ti chkʼot onoʼox ta pasel li kʼusi chale. ¿Kʼusi la spas li Jeovae? Jaʼ ti x-ayan junuk nitilulal sventa spoj lokʼel ta mulil li snitilulaltak Adan xchiʼuk Evae, vaʼun jaʼ jech chkʼot ta pasel li kʼusi oy ta yoʼontone (Jen. 3:15; 22:18). Li Satanase muʼyuk van xtal ta sjol ti tstak talel Xnichʼon sventa spoj li krixchanoetike. ¿Kʼu yuʼun? Yuʼun li pojelal laj yakʼe jaʼ te laj yakʼ ta ilel ti kʼanvaneme (Mat. 20:28; Juan 3:16). Yuʼun li Satanase mi jsetʼuk snaʼ xkʼanvan. Jaʼ yuʼun, ¿kʼusi van chkʼot ta pasel koliyal li pojelal laj yakʼ Jeovae? Kʼalal jutuk xa ox skʼan xlaj li jmil jabile, li snitilulaltak Adan xchiʼuk Eva ti tukʼil xchiʼuk jchʼunej mantaletik xa oxe, ta xkuxiik ta jun balumil ti kʼatajem xa ox ta jun paraisoe. Jech kʼuchaʼal oy onoʼox ta yoʼonton Jeova ta slikebale, vaʼun jaʼ to te chal «Omega» li Jeovae.

KʼUXI XUʼ JTSATSUBTAS XCHʼUNEL KOʼONTONTIK TA SVENTA LI PARAISOE

18. ¿Kʼusi oxib srasonal chakʼbutik Jeova sventa jpat koʼontontik ta sventa li kʼusi yaloj tspase? (Kʼelo xtok li rekuadro «Oxib srasonal sventa jpat koʼontontik ta sventa li kʼusi yaloj tspas Jeovae»).

¹⁸ Li ta xchanobil liʼe, laj kilbetik srasonaltak ti chkʼataj ta jun paraiso li balumile. ¿Kʼusi xuʼ xkalbetik yantik ti chkʼot ta pasel li kʼusi yaloj tspas Diose? Baʼyel, yuʼun jaʼ yaloj stuk Jeova ti tspase, xi chal Apokalipsise: «Xi laj yal li buchʼu te chotol ta chotlebal sventa ajvalile: ‹¡Kʼelavil!, ta jpas ta achʼ skotol li kʼusitike›». Ta skoj ti oy spʼijil xchiʼuk sjuʼele, ta onoʼox xkʼot ta pasel yuʼun. Xchibal, li Vivliae chal ti xkoʼolaj xa kʼotem ta pasel li kʼusi oy ta yoʼonton tspase, jaʼ yuʼun xi chale: «Yuʼun tukʼ xchiʼuk melel li kʼusitik laj yichʼ alele», xi to chale: «¡Kʼot xa yorail!». Yoxibal, kʼalal oy kʼusi chlik spas li Jeovae, persa ta stsutses, jaʼ yuʼun xi chale: «Alfaun xchiʼuk Omegaun». Vaʼun, li Jeovae chakʼ ta ilel ti jaʼ jun jutkʼop li Satanase.

19. ¿Kʼusi xuʼ xapas mi oy buchʼu vokol chaʼi xchʼunel ti chkʼataj ta paraiso li balumile?

¹⁹ Teyuk me ta ajol mi oy buchʼu laj avalbe ta cholmantal ta sventa li kʼusi yaloj tspas Diose, mas me tstsatsub li xchʼunel avoʼontone. Jaʼ yuʼun, mi oy buchʼu mu xchʼun li kʼusi chal ta Apokalipsis 21:4 xchiʼuk mi xi laj yalbote: «Toj kʼupil sba yaʼeluk, pe mu jnaʼ mi chkʼot ta pasel». ¿Kʼusi van xuʼ xapas? Xuʼ van xakʼelbe xchiʼuk xavalbe smelolal kʼusi chal li ta versikulo 5 xchiʼuk 6. Akʼbo yil ti ta onoʼox xkʼot ta pasel yuʼun Jeova li kʼusi yaloje ti xkoʼolaj yakʼoj sfirma ta jlik vune (Is. 65:16).