Li kʼusitik tsjakʼ jkʼelvunetike
¿Bakʼin ta jkechantik xcholel li lekil aʼyeje?
Xi laj yal li Jesuse: «Li lekil aʼyejetik ta sventa li Ajvalilale ta xichʼ cholel ta spʼejel balumil sventa xaʼi skotol li jteklumetike, vaʼun ta xtal li slajebe» (Mat. 24:14). K’alal «slajeb» xi li ta Mateo 24:6, 13 xchiʼuk 14, li ta griego kʼope jaʼ télos. Jaʼ skʼoplal ti chlaj ta j-echʼel ta Armajedon li sbalumil Satanase (Apok. 16:14, 16). Jaʼ yuʼun chaʼa, ta jcholtik-o batel li lekil aʼyejetik jaʼ to mi jutuk xa ox tajek skʼan xlik li Armajedone. Taje jaʼ skʼan xal ti chjel ti kʼu yelan kabinojbetik tal smelolale.
Kabinojtik toʼox talel ti jaʼo ta jkechantik xcholel lekil aʼyej kʼalal mi laj xa ox yichʼ lajesel li Mukʼta Babilonia xchiʼuk mi lik xa ox li mukʼta tsatsal vokolile (Apok. 17:3, 5, 15, 16). Jchʼunojtik toʼox ti kʼalal chlik li mukʼta tsatsal vokolile, jaʼo te chkʼot ta tsutsel «li sjabilal ti chakʼ ta ilel slekil yoʼonton Jeovae» (Is. 61:2). Jech xtok, jnopojtik toʼox ti jaʼ noʼox kuxul chkomik li buchʼutik tukʼ xa onoʼox chtunik ta stojolal Jeova kʼalal skʼan toʼox xlik li mukʼta tsatsal vokolile. Kalojtik ti jaʼ jech chkʼot ta stojolalik kʼuchaʼal li judaetik ti kuxul komik kʼalal laj yichʼ lajesel li Jerusalen ta sjabilal 607 kʼalal muʼyuk toʼox talem Jesuse. Yuʼun kak xa onoʼox yichʼoj smarkailik ta skoj ti chichʼik xa onoʼox ta mukʼ Jeova xchiʼuk ti spʼajojik li kʼusi chopole (Esek. 5:11; 9:4). Pe li kʼusi jchʼunojtik toʼoxe mu sta-o xchiʼuk li kʼusi laj yal Jesus ta Mateo 24:14. Yuʼun tee chakʼ ta aʼiel ti xuʼ to xchʼamik lekil aʼyej li krixchanoetik kʼalal jutuk xa ox tajek skʼan xlaj ta j-echʼel li sbalumil Satanas ta Armajedone.
Ti jelel xa chkaʼibetik smelolal li Mateo 24:14 chjel xtok ti kʼu yelan chkaʼibetik smelolal li Apokalipsis 16:21, ti te chalbe skʼoplal li mukʼtik bote. Kʼalal ta jchajbetik lek skʼoplal li chib tekstoetik taje, te chkakʼtik venta ti jmoj snitojbe sba skʼoplale. ¿Kʼuxi taje? Yuʼun jaʼ te chvinaj ti kʼu yelan chaʼiik lekil aʼyej li krixchanoetike. Jech kʼuchaʼal la stsʼiba li jtakbol Pabloe, li buchʼutik oy ta yoʼonton chkolike «smuil xa kuxlejal» chaʼiik li lekil aʼyeje, pe li buchʼutik skontrainojik Diose, muʼyuk lek chaʼiik li lekil aʼyeje, «smuil xa lajelal» chaʼiik (2 Kor. 2:15, 16). Spʼajojik tajek, yuʼun li lekil aʼyej chkaltike jamal chakʼ ta ilel ti chopol tajek li sbalumil Satanase xchiʼuk ti poʼot xa tajek skʼan xichʼ lajesele (Juan 7:7; 1 Juan 2:17; 5:19).
Jech xtok, li Apokalipsis 16:21 chal ti «solel toj tsots tajek» li mukʼtik bote. Xaval yaʼeluke, kʼalal jaʼo xyaket li mukʼta tsatsal vokolile, stuk xa noʼox jech li cholmantal ta jpastike. Vaʼun, mas to chichʼ akʼel ta ojtikinbel li sbi Jeova ti muʼyuk bu jech ilbil-oe (Esek. 39:7). Vaʼun chaʼa, kʼalal lajem xa ox li Mukʼta Babiloniae, ¿mi jaʼ skʼan xal ti oy to buchʼutik chchʼamik li lekil aʼyej ti xkoʼolaj chaʼiik ta smuil kuxlejale? Mase oy to buchʼutik chchʼamik. Yuʼun yikʼaluk van chvul ta sjolik o jaʼ to te chakʼik venta ti melel li kʼusi voʼne xa onoʼox kalojtik ti chichʼ lajesel li jecheʼ relijionetike.
Jaʼtik jech kʼot ta pasel li ta Ejipto kʼalal laj yakʼ tal lajuneb vokolil li Jeovae. Kʼalal laj xa ox yakʼbe kastigo «skotol li diosetik ta Ejiptoe», «te tijil batik epal krixchanoetik» ti maʼuk j-israeletik sventa jmoj xlokʼik batel xchiʼuk li steklumal Diose (Eks. 12:12, 37, 38). Li buchʼutik maʼuk j-israeletike lik van yichʼik ta mukʼ Jeova ta skoj ti laj yilik kʼot ta pasel li lajuneb vokolil laj yal Moisese.
Buchʼuuk ti tskʼan chichʼ ta mukʼ Jeova kʼalal lajem xa ox li Mukʼta Babiloniae, xuʼ me skoltaik li yermanotak Kristo ti liʼ to oyik ta balumile, vaʼun chkʼotik ta chijetik (Mat. 25:34-36, 40). Pe taje jaʼ noʼox me te chlaj yorail kʼalal jutuk xa ox tajek skʼan xlik li Armajedone xchiʼuk ti jaʼo chmuyik ta vinajel li buchʼutik tʼujbilik ti liʼ to oyik ta balumile.
Li kʼusi achʼ laj yichʼ jambel smelolal liʼe jamal chakʼ ta ilel ti toj echʼ xa noʼox kʼanvanem li Jeovae xchiʼuk ti oy xkʼuxul yoʼontone. Yuʼun li stuke «mu skʼan ti oy buchʼu xbat ta lajelal junuke; moʼoj, li kʼusi tskʼane jaʼ ti [jsutes koʼonton jkotoltike]» (2 Ped. 3:9).