¿Mi xuʼ skoltaun Vivlia sventa ximuyubaj xchiʼuk li kutsʼ kalale?

Li kʼusi chal Vivliae

Xuʼ. Jkʼeltik batel junantik tojobtaseletik ta Vivlia ti skoltaoj ta smiyonal xa noʼox utsʼ alaliletik sventa xmuyubajik noʼoxe.

1. Nupunemukot lek ta registro civil. Kʼalal chnupunik li chaʼvoʼ krixchanoetike, chakʼ yeik ti jmoj˗o oyik ta sjunul xkuxlejalike. Mi jech la spasike, xuʼ me xmuyubaj li ta yutsʼ yalalike (Mateo 19:4-6).

2. Akʼo ta ilel ti akʼanoj li anup achiʼile xchiʼuk ichʼo ta mukʼ. Taje jaʼ skʼan xal ti jechuk jpasbe li jnup jchiʼiltik jech kʼuchaʼal ta jkʼantik pasbel eke (Mateo 7:12; Efesios 5:25, 33).

3. Mu xayayijesvan ta akʼopojel. Skotoluk me ora oyuk slekil avoʼonton, akʼo mi oy kʼusi kʼux la avichʼ albel o pasbel (Efesios 4:31, 32). Xi onoʼox yaloj Vivlia ta Proverbios 15:1: «Kʼalal xlamet noʼox chijtakʼave, chchʼak lokʼel li skʼakʼal oʼontonale, yan mi chyayijesvan ti kʼu yelan chijkʼopoje, tslikes skapemal jolil».

4. Mu xa mukul sati anup achiʼil. Mu me stakʼ ti lek xa chavil o ti chakʼan xa chachiʼin ta vayel li buchʼu maʼuk anup achiʼile (Mateo 5:28). Xi chalbutik li Vivliae: «Ichʼbiluk me ta mukʼ avuʼun akotolik li nupunele, mu me sokes sbaik li buchʼutik nupunemike» (Ebreos 13:4).

5. Ta slekiluk me avoʼonton xatsʼites li avalab anichʼnabe. Mu me stakʼ ti xavakʼbe skotol li kʼusi tskʼanike o ti xakʼel noʼox li kʼusi chopol tspasike. Jech xtok, skʼan me ti mu xbat ta mas avuʼun ti kʼu yelan chavakʼbe mantale (Proverbios 29:15; Kolosenses 3:21).