Кыӵе тӥляд пиналды луоз, тӥляд пытьытӥды мынӥз ке?
АНАЙ-АТАЙЁСЛЫ
8-тӥ визь-кенеш. Адӟем карымон луэ
МАЕ СО ВОЗЬМАТЭ
Анай-атайёс нылпиоссылы адӟем карымон луо, куке котьку лэсьто сое, мае верало. Тӥляд пиды пӧяськись адями луоз, дыр, со кылӥз ке, кызьы тӥ телефон пыр кузёдылы вераськоды: «Мон висисько», нош асьтэос уд висиське, тӥляд шутэтскемды гинэ потэ.
«Нылпидылы верады ке: „Эн лэсьты озьы, кызьы мон лэсьтӥсько, нош лэсьты озьы, мае мон верасько“, со пайда уз вайы. Нылпиос губка выллем. Соослы пыӵа ваньмыз, мае ми вераськомы но лэсьтӥськомы. Одӥг пол ке но янгышаськод ке, соос сое одно ик адӟо но верало милемлы: „Тӥ уд лэсьтӥське озьы, кызьы вераськоды“» (Дэвид).
БИБЛИЫСЬ ВИЗЬ-КЕНЕШ: «Мукетъёссэ дышетӥськод, нош малы тон астэ ачид уд дышетӥськы? „Эн лушка“ шуиськод но, лушкаськиськод?» (Римъёслы 2:21, 22).
МАЛЫ СО КУЛЭ
Пичи нылпиос но, быдэ вуымтэ пиналъёс но, эшъёссылэсь сярысь, ӵемгес анай-атайёссылэсь адӟем каро. Озьыен, тӥ ваньмызлэсь умойгес юрттыны быгатӥськоды нылпиостылы шонер сюрес вылэ султыны, асьтэос но лэсьтӥськоды ке сое, мае возьмаськоды нылпиостылэсь.
«Одӥг мае ке ик сю пол вераськод, нош нылпи кылэм-адӟем но уг кары кадь. Но одӥг пол гинэ ӧд лэсьты ке сое, мае верад, со соку ик сое адӟе. Ми малпаськомы ке но, нылпиос номыре уг кыло, уг адӟо шуыса, соос ваньзэ адӟо» (Николь).
БИБЛИЫСЬ ВИЗЬ-КЕНЕШ: «Вылӥысь васькись визьлык... оскиськымон луэ» (Иаков 3:17).
МАР КАРЫНЫ ЛУОЗ
Асьтэ шоры палэнысен учке. Кыӵе фильмъёсты тӥ учкиськоды? Кызьы тӥ асьтэды возиськоды кузпалэныды но нылпиосыныды? Кыӵе тӥляд эшъёсты? Сюлмаськиськоды-а тӥ мукетъёсыз сярысь? Огъя вераса, потэ-а тӥляд, нылпиды тӥ кадь мед луоз шуыса?
«Ми картэным ум куриське пиналъёсмес лэсьтыны сое, мае асьмеос ум лэсьтӥське» (Кристин).
Янгышъёсты понна простить карыны куре. Нылпиосты тодо, тӥ но янгышаськоды шуыса. Куке тӥ кузпалдылы яке нылпиостылы вераськоды «вождэ эн вай», озьы тӥ дышетӥськоды соосты пӧяськытэк улыны но мукетъёссэ гажаны.
«Нылпиосмы кылыны кулэ, кызьы ми простить карыны куриськомы но вераськомы, ми шонертэм лэсьтӥмы шуыса. Озьы ӧм лэсьтэ ке, соос уз дыше вераны „Мон янгыш вал“» (Робин).
«Нылпиос анай-атайёссылэсь адӟем каро. Милям примермы — со тужгес но умой амал нылпиосты дышетыны, малы ке шуоно ми котьку соослэн син азязы. Ми усьтэм книга выллем, милемыз котьку „лыдӟо“ но „эскеро“» (Уэндэл).