Библиысь ним вашкала кувшин вылын

2012-тӥ арын археологъёс, сюй гудон уж нуыкузы, сюй кувшинлэсь чалепъёссэ шедьтӥзы, кудӥз ог 3 000 ар талэсь азьло лэсьтэмын вал. Со тодосчиослы туж тунсыко потӥз. Мар сыӵе тунсыкоез вал отын? Тодосчиослы асьсэос чалепъёс тунсыко ӧй вал, соос эскеризы сое, мар гожтэмын соос вылын.

Чалепъёсты огазе люкаса, археологъёс вашкала ханаан кылын гожтэмез адӟизы. Отын гожтэмын вал: «Ешбаал Бен Беда [Бедалэн Ешбаал пиез]». Та нырысетӥез учыр, куке археологъёс та нимез вашкала арбери вылысь шедьтӥзы.

Ешбаал ним Библиын но пумиське. Сыӵе нимыз вал Саул эксэйлэн одӥг пиезлэн (1 Пар. 8:33; 9:39). Профессор Йосеф Гарфинкель, кудӥз сюй гудон ужъёсы пыриськиз, вера: «Тунсыко соиз, Ешбаал ним, кудӥз пумиське Библиын, нош табере археологъёслэн шедьтэмъёссы пӧлын но, Давид эксэй кивалтон дыръёсы гинэ кутӥське вал шуыса». Куд-ог тодосчиос малпамъя, со ним со вакытэ гинэ пумиське вал. Нош ик археологъёслэн шедьтэмъёссы возьмато, со, мар гожтэмын Библиын, зэм луэ шуыса.

Библилэн куд-ог интыосаз Ешбаал ним Иевосфей шуыса гожтэмын, кудаз «баал» люкет «восфей» люкетэн воштэмын (2 Экс. 2:10). Малы? «2 Эксэйлыкъёслэн книгаязы Ешбаал ним уг кутӥськы, вылды, малы ке шуоно со ханаан калыкысь зорлэн Баал нимо инмарезлэн нимызлы тупа,— валэкто тодосчиос,— нош Паралипоменон книгаын со кельтэмын».