Визьмо адямиосын эшъяськыса, мон визьмо луи

ТАИЗ ӵукна Брукингсын (США, Лымшор Дакота штат) туж кезьыт вал. Кынтӥсь омыр вера вал, ӝоген тол вуоз шуыса. Мон но эшшо кӧня ке адями кынмемысь дыр-р-р куалекъяса сылӥмы кеносын, туж бадӟым пудо-живот люктан чан дорын, кудаз кезьыт ву лэземын вал. Мар ми отын каримы? Вае мон верало тӥледлы.

ЕГИТ ДЫРЫ

Мон вордӥськи 1936-тӥ арын 7-тӥ южтолэзе. Ньыль нылпиос пӧлысь мон самой пичиез вал. Ми улӥмы пичи гинэ фермаын Лымшор Дакоталэн шундыӝужанпалаз. Милям семьямы фермаын трос ужаз ке но, уж улонамы валтӥсез ӧй вал. 1934-тӥ арын мынам анае но атае пылатӥськизы но Иеговалэн Адӟись-Ивортӥсьёсыз луизы. Соос асьсэлэсь улонзэс инмысь Иегова Атаймылы сӥзизы, соин ик соос понна нырысетӥ интыын вал Инмарлэсь эриксэ быдэсъян. Мынам Кларенс песятае, нош берлогес атаелэн Алфред агаез но, Кондиысь (Лымшор Дакота штат) пичи кенешамы эштослэн ужась-тыршисьёсыз вал (соку озьы нимаськиз тӧроослэн кенешсылэсь ужзэс радъясь).

Милям семьяямы кенешлэсь пумиськонъёссэ уг кельтыло вал но ялан, коркась корка ветлыса, адямиослы Библиысь ӟеч иворез верало вал. Анай-атаймы умой пример возьмато но дышето вал милемыз. Со юрттӥз милемлы Иеговаез яратыны. Мон но мынам Дороти апае ивортӥсьёс луимы, куке милемлы куать арес вал. Нош 1943-тӥ арын мон гожтӥськи Инмарлы ужан-тыршон школае, кудзэ соку гинэ ортчытъяны кутскизы.

Улонамы бадӟым инты басьтэ вал конгрессъёсы ветлон. 1949-тӥ арын Су-Фолс карын (Лымшор Дакота штат) ортчись конгрессын вын-агай Грант Сьютер вераз «Та дуннелэн быронэз матынгес, тӥляд малпамды сярысь!» речез. Мон али ке но тодам вайисько на со речез. Грант Сьютер нимысьтыз пусйиз, ваньмыз Инмарлы сӥзиськем христианъёс вань кужымзэс сётыны кулэ шуыса Инмарлэн Эксэйлыкез сярысь ӟеч иворез веранлы. Со мынэсьтым мылкыдме ӝутӥз улонме Иеговалы сӥзьыны. Со арын ик вуонояз ёросысь конгрессын, кудӥз ортчиз 12-тӥ шуркынмонэ Брукингсын, мон пылатӥськи — кезьыт кеносын, кудӥз сярысь мон кутсконаз верай вал. Соку пылатӥськонлы дасям интыын — цинкен шобыртэм андан чанын — ньыль адями пылатӥськиз.

Пылатӥськем берам мон пионер луыны ужпум пуктӥ. Пионер луыса ужаны-тыршыны мон кутски 1952-тӥ арын 1-тӥ толшорысен, куке мыным 15 арес вал. Библиын гожтэмын: «Визьмо муртэн кусып возись ачиз но визьмо луоз», нош милям семьяямы визьмоосыз трос вал, кудъёсызлы кельшиз, мон пионер луыны ужпум кутӥ шуыса (Мад. 13:21). Ӵем дыръя монэн ӵош ӟеч иворез вераны ветлэ вал атаелэн 60 аресъем Джулиус агаез. Со мынэсьтым трослы бадӟымгес вал ке но, милемлы туж кельше вал ӵош тодытыны. Со туж визьмо но улонэз адӟем адями вал, но мон тросэзлы дышетски солэсь. Ӝоген Дороти но пионер луиз.

ЁРОСЭЗ ЧАКЛАСЬЁСЛЭН ЮРТТЭМЗЫ

Кӧня мон асме тодӥсько, анае но атае ёросэз чакласьёсты но соослэсь кышнооссэс ӵемысь ми доры куное ӧтчаллязы. Мыным туж юрттӥзы Джесси но Линн Кантуэллъёс. Вераны луоз, соос шоры учкыса, мон пионер луи. Кузпалъёс мыным саклык висъязы, соин ик мынам мылкыды ӝутскиз Инмарлы ужан-тыршонэн герӟаськем ужпумъёс пуктыны. Куке соос ми вӧзысь кенешъёсы лыкто вал, куддыръя монэ но сьӧразы ӟеч иворез вераны басьтылӥзы. Макем умой вал соку!

Кантуэллъёс бере милям кенешамы лыктӥз мукетыз ёросэз чаклась, Бад Миллер, аслаз Джоан кышноеныз. Соку мыным 18 арес тырмиз, но армие мынон дыры вуиз. Нырысь армие басьтон комиссия монэ сыӵе ужез быдэсъяны косӥз, кудӥз, мон малпамъя, пумит луэ Иисуслэн косонэзлы — политика удысын нокин пала кариськытэк улыны. Нош мынам Эксэйлык сярысь ӟеч иворез вӧлмытэме потэ вал (Иоанн 15:19). Соин ик мон кури, монэ священнослужительёс радэ мед пыртозы шуыса.

Мон туж шумпотӥ, куке Миллер агай мылкыд кариз монэн ӵош армие басьтон комиссиен пумиськыны, малы ке шуоно со туж умой тодэ вал Библиез но кылызлы кисыяз уг пыры вал. Со мыным туж юрттӥз! Берлогес, 1954-тӥ арын гудырикошконэ, армие басьтон комиссия монэ священнослужительёс радэ пыртӥз. Табере мынам луонлыке кылдӥз Иеговалы ужан-тыршонын тросгес лэсьтыны.

Трос дыр ортчыса ӧз вуы, монэ ӧтизы Вефиле, Возьмаськон Башнялэн фермаяз ужаны. Со интыяськемын вал Нью-Йоркын, Статен-Айленд шормуӵын. Мон куинь ар пала отын тырши. Со дыръёсыз мон шумпотыса тодам вайисько, малы ке шуоно отын мон туж визьмо вын-агайёсын но сузэр-апайёсын ужай.

ВЕФИЛЬЫН УЖАН-ТЫРШОН

Милям фермаямы WBBR радиостанция вал на. Иеговалэн Адӟись-Ивортӥсьёсыз сое уже кутӥзы 1924-тӥ арысен 1957-тӥ арозь. Фермаын 15—20 адями гинэ тыршиз. Ми пӧлысь тросэз егитэсь вал, но милемлы тросэзлы дышетсконо на вал. Озьы ик, милемын ӵош тыршиз вӧйын зырӟем Элдон Вудуорт агай, кудӥз милесьтым трослы бадӟымгес вал. Со туж визьмо вал но, атай сямен сюлмаськыса, тросэзлы милемыз дышетӥз. Куке тырбыдэстэм луэммы сэрен кыӵе ке шуг-секытъёс кылдо вал, Вудуорт агай шуэ вал: «Паймоно кадь, Инмарлэн ужась-тыршисьёсыз тырбыдэстэмесь ке но, кыӵе ужъёс со лэсьтэ соос пыр».

Милемлы бадӟым шуд усиз Фредерик Френц агаен ӵош ужаны. Туж паймытэ вал, макем со визьмо но макем умой тодэ Библиез. Со котькудмылы саклык висъяны дыр шедьтылӥз. Сиён милемлы пӧзьтӥз Харри Петерсон. Зэмзэ вераса, солэн фамилиез — Папаргиропулос, но Петерсон фамилиез вераны капчигес вал! Со но вӧйын зырӟемын вал но туж яратӥз ӟеч иворез вераны. Петерсон агай Вефильын, вань кужымзэ поныса, тыршиз ке но, тодытон уже пыриськытэк ӧз кыльылы. Котькуд толэзе со сюлэсь трос журналъёс вӧлмытылӥз. Со но Библиез туж умой тодэ вал но тросэзлы юанъёсмылы валэктонъёс сётъя вал.

ВИЗЬМО СУЗЭР-АПАЙЁСЛЭСЬ ДЫШЕТСКИСЬКО

Фермаын будэтэм емышъёсты отын ик толалтэлы дасяло вал. Котькуд ар Вефиль семьялы ми ог 45 сюрс банка емышъёсты толалтэлы дасяса кельтылӥмы. Мыным шуд усиз Этта Хут нимо туж визьмо сузэрен ӵош тыршыны. Вань рецептъёсты со ачиз малпа вал. Милемын ӵош ужаны ветлӥзы кенешысь сузэръёс, нош Этта соослэсь ужзэс радъяны юрттӥз. Этта ачиз туж умой тодэ вал, кызьы аслэсьтыз ужзэ быдэсъяно, озьы ке но со тыршылӥз умой пример возьматыны, кызьы вын-агайёсты гажано, кудъёсыз фермаысь уж понна кыл куто вал. Мыным туж кельше вал, кызьы со Иеговаен пуктэм вын-агайёслэсь кылзӥське.

Милемлы юрттыны ветлӥсь егит сузэръёс пӧлын вал Анджела Роумено. Библиез дышетыны солы юрттӥз Этта. Озьы, Вефильын тыршыкум, мон пумитай на эшшо одӥг визьмо сузэрез. Ми кузпалъяськимы 1958-тӥ арын, оштолэзе, но 58 ар ӵоже ини ӵош шумпотыса Иеговалы ужаськомы-тыршиськомы. Вань та аръёс ӵоже Анджи Иеговалы оскымон вал. Со туж юнматӥз милесьтым кусыпъёсмес. Кыӵе гинэ шуг-секытъёсын ми медам пумиське, мон кышноелы быдэсак оскиськыны быгатӥсько.

МИССИОНЕР НО ЁРОСЭЗ ЧАКЛАСЬ ЛУЫСА УЖАН-ТЫРШОН

1957-тӥ арын Статен-Айленд шормуӵысь радиостанциез вузам бере мон Бруклинысь Вефильын кӧня ке ужай-тырши на. Сюанмы бере мон Вефильысь кошки но, ми Анджиен ӵош куинь ар пала Статен-Айленд шормуӵын пионеръёс луыса ужамы-тыршимы. Кӧня ке дыр ӵоже мон радиостанцимылэн выль кузёосыз дорын но ужай. Табере со WPOW шуыса нимаське вал.

Анджиен ми огшоры улыны тыршимы, малы ке шуоно милям потэ вал дась луэммы мыныны отчы, кытын юрттэтмы кулэ луысал. Но тани, 1961-тӥ арлэн кутсконаз милемыз ӧтизы Фолс-Сити каре (Небраска штат) нимысьтыз пионеръёс луыса ужаны-тыршыны, но ми соглаш кариськимы. Отчы вуэммы бере ик милемыз Эксэйлыклы ужан-тыршон школае ӧтизы. Соку одӥг толэзьем дышетскон Саут-Лансингын (Нью-Йорк штат) ортче вал. Милемлы туж кельше вал дышетскыны. Ми шумпотыса малпамы, кызьы ми Небраскае берытскомы но басьтэм тодон-валанмес уже кутомы. Макем ми паймимы, куке милемыз Камбоджае миссионеръёс луыса ужаны-тыршыны ыстӥзы! Азиысь та паймымон шаерын ваньмыз, мае ми адӟимы, кылӥмы но веръямы, милемлы выль вал. Милям туж потэ вал отын улӥсьёслы ӟеч иворез вераммы.

Нош политика удысын югдур воштӥськемен, милемлы Лымшор Вьетнаме кошконо луиз. Жаляса верано луэ, кык ар ортчыса, мынам тазалыке туж уродмиз но, милемлы дорамы берытскытэк ӧз луы ни. Тазалыкме юнматэм бере ик ми выльысь пионеръёс луыса ужаны-тыршыны кутскимы.

1965-тӥ арын южтолэзе, милемлы ӵектӥзы пӧртэм кенешъёсты юнматыса ужаны-тыршыны. 33 ар ӵоже мон ёросэз чаклась но улосэз чаклась луыса ужай-тырши, со сяна, трос дыр висъяй на конгрессъёсты ортчытонэн герӟаськем ужлы. Мон туж яратӥсько вал конгрессъёсты, соин ик мон шумпотыса юрттылӥ соосты дасяны но ортчытыны. Кӧня ке ар ми ужамы-тыршимы Нью-Йоркын, кытын конгрессъёс ӵем дыръя ортчо вал «Янки» стадионын.

ВЕФИЛЕ БЕРЫТСКОН НО БИБЛЕЙСКОЙ ШКОЛАОС

Трос аръёс ӵоже ми Анджиен быдэсъямы пӧртэм тунсыко ужъёсты, кудъёсыз куддыръя секытэсь но вал. Кылсярысь, 1995-тӥ арын монэ Ужан-тыршонэз умоятон школаын дышетыны куризы. Нош куинь ар ортчыса, милемыз Вефиле ӧтизы. Макем бадӟым шумпотон вал берытскыны отчы, кытын ньыльдон ар талэсь азьло мон вань дырме сётыса Инмарлы ужаны-тыршыны кутски. Вефильын мон ужан-тыршонэз радъясь ёзэтын тырши, озьы ик пӧртэм школаосын дышетӥ. 2007-тӥ арын, Кивалтӥсь кенешлэн ужпум кутэмезъя, кылдӥз выль ёзэт — библейской школаосты радъясь ёзэт. Со кыл кутыны кулэ вал Вефильын ортчись школаос понна. Кӧня ке ар ӵоже мон со ёзэтлэн чакласез вал.

Берпуметӥ аръёсы Инмарлы ужаны-тыршыны дышетон удысын трос воштӥськонъёс вал. 2008-тӥ арын выль школа ортчыны кутскиз — Кенешысь тӧроослы школа. Школа кылдэм дырысен кык ар куспын отын 12 сюрслэсь тросгес тӧроос дышетскизы. Соосыз дышетӥзы Паттерсонын но Бруклинын. Табере со школа мукет интыосын но ортчытӥське. 2010-тӥ арын Ужан-тыршонэз умоятон школаез нимазы — Кышнояськымтэ вын-агайёслы библейской школа. Со сяна, кылдытӥзы на выль школаез, кудзэ Кузпалъёслы библейской школа шуыса нимазы.

2014-тӥ арын куарусёнэ та кык школаосты огазеязы но Эксэйлыкез тодытӥсьёслы школа шуыса нимазы. Табере отын дышетскыны быгато кызьы кузпалъёс, озьы ик кузпалъяськымтэ вын-агайёс но сузэр-апайёс. Макем шумпотӥзы ивортӥсьёс, куке тодӥзы, та школа соослэн шаеразы но ортчоз шуыса! Зэмзэ но шумпотоно, тросгес но тросгес христианъёс та выллем школаосын дышетскыны быгато шуыса. Мыным туж кельше тодматскыны соосын, кинъёс дась отын дышетскыны.

Аслэсьтым улонме тодам вайыса — пылатӥськон дырысен туннэ нуналозь,— мон ялан Иеговалы тау карисько визьмо вын-агайёс но сузэр-апайёс понна, кудъёсыз юрттӥзы мыным со сярысь тросгес тодыны но солы умойгес ужаны-тыршыны. Кин ке но мынэсьтым егитгес вал, кин ке но — арлыдогес, кин ке но мукет калыкысь вал, но ваньзылэн соослэн Иеговаен юн кусыпъёссы вал. Соос ужъёсынызы но, сямъёсынызы но возьматӥзы, соос Иеговаез юн ярато шуыса. Мон туж шумпотӥсько, Иеговалэн калыкез пӧлын мынам трос визьмо эшъёсы вань шуыса, кудъёсызлэсь мон дышетскыны быгатӥсько.