Юрттэ беженецъёслы Иеговалы шумпотыса ужаны-тыршыны

1, 2. а) Маин пумисько куд-ог вын-агайёсмы но сузэр-апайёсмы? б) Кыӵе юанъёс кылдо соин сэрен?

«БУРУНДИЫН геноцид кутскон нуналэ милям быдэс семьямы ёросысь конгрессын вал,— тодаз вае Лийе нимо вын-агай.— Ми адӟимы бызьыса мынӥсь но ыбылӥськись адямиосты. Утиськон понна, анаелы, атаелы но соослэн нылпиоссылы, нош ми 11 кузя вал, озьы ик бызьыса кошконо луиз. Сьӧрамы ми мае но сое гинэ басьтыса вуимы. Семьяысьтымы куд-огъёсыз, 1 600 иськем ортчыса, беженецъёслэн Малавиысь лагерязы вуизы. Мукетъёсыз кин кытчы пазьгиськизы».

² Алигес беженецъёслэн лыдзы, кудъёсызлы ожъёс яке уйылон-уллянъёсын сэрен улон интыоссэс куштыса кошконо луиз, нырысетӥзэ 65 миллионлэсь тросгес луизa. Соос пӧлын трос сюрс Иеговалэн Адӟись-Ивортӥсьёсыз но. Тросэз асьсэлэсь ӵыжы-выжыоссэс но улэм-вылэмзэс ыштӥзы. Кыӵе шуг-секытъёсын куд-огъёсыз пумиськизы азьланяз? Кызьы ми юрттыны быгатӥськомы со вын-агайёслы но сузэр-апайёслы, шуг-секытъёс шоры учкытэк, шумпотыса Иеговалы ужаны-тыршыны? (Пс. 99:2). Но мар милемлы кароно, Иеговаез тодӥсьтэм беженецъёслы ӟеч иворез вераммы пайда мед ваёз шуыса?

БЕЖЕНЕЦЪЁСЛЭН УЛОНЗЫ

3. Малы Иисуслы, озьы ик солэн тросэзлы дышетскисьёсызлы но, вордӥськем палъёсысьтызы кошконо луиз?

³ Одӥг пол Иеговалэн кылчинэз Иосифлы вераз, Ирод эксэй Иисусэз виыны малпа шуыса. Соку Иисуслэн анаез но атаез соин ӵош Египетэ пегӟизы. Соос отын, Ирод кулытозь, улӥзы (Матф. 2:13, 14, 19—21). Трос аръёс ортчыса, Иисуслэн дышетскисьёсыз, уйылон-уллянъёсын сэрен, «Иудеялэн но Самариялэн пӧртэм палъёсаз пазьгиськоно луизы» (Ап. уж. 8:1). Иисус азьло ик тодӥз, тросэзлы солэн дышетскисьёсызлы вордӥськем палъёсысьтызы кошконо луоз шуыса, соин ик вераз: «Одӥгысьтыз городысь тӥледыз уллязы ке, мукетаз бызе» (Матф. 10:23). Кыӵе гинэ муг медаз луы, малы адямилы улон интызэ куштыса кошконо луиз, ӵем дыръя со туж секыт луэ.

4, 5. Кыӵе кышкытлыкъёсын пумисько беженецъёс: а) сюрес вылазы; б) лагерьын?

⁴ Улон интызэс куштыса кошкемъёс сюрес вылазы трос кышкытлыкъёсын пумиськыны быгато. Беженецъёслэн лагерязы но соосты капчи улон уг возьма. Тани мар вера Лийелэн Гад нимо выныз: «Ми мынӥмы трос арня ӵоже. Котыр туж трос шӧйёс кыллё вал. Соку мыным 12 арес вал. Мынам пыдъёсы туж тӧрназы, соин ик мон кури монэ кельтыны. Атаелэн уг поты вал, мон кивалтӥсьёслы пумит ӝутскемъёслэн ки улазы мед сюром шуыса, соин ик со монэ ас вылаз нуиз. Иеговалы вӧсяськыса но солы оскиськыса, ми быгатӥмы вормыны нуналлы быдэ кылдӥсь шуг-секытъёсты. Луыло вал сыӵе нуналъёс но, куке ми, манго сяна, кудъёссэ ми мыныкумы ишкалтӥськомы вал, номыре но ӧм сиылэ» (Флп. 4:12, 13).

⁵ Лийелэн тросэз ӵыжы-выжыосыз беженецъёслэн ООН-эн кылдытэм лагерьёсазы улӥзы. Отын но соос кышкыттэм интыын ӧй вал. Тани мар вера Лийе, кудӥз али ёросэз чаклась луыса ужа-тырше: «Отын ваньмыз сямен ужтэк пукизы. Адямиос ог-огзы сярысь кыл вӧлдӥзы, юизы, азартной шудонъёсын шудӥзы, лушкаськизы но азыса-калгыса улӥзы». Ваньмыз со уродэз медаз пыӵа шуыса, Иеговалэн Адӟись-Ивортӥсьёсызлы, кудъёсыз со лагерьёсын улӥзы, кенешлэн ужъёсаз тросгес пыриськоно вал (Евр. 6:11, 12; 10:24, 25). Соослэн Иеговаен кусыпъёссэс утемзы потэ вал, соин ик соос дырзэс пайдаё ортчытъязы. Тросэз пионеръёс луыса ужазы-тыршизы. Соос оскизы, вуоз шуыса сыӵе нунал, куке соос та лагерьысь потозы, озьы ик, кызьы вуиз нунал, куке израиль пиос луоё кыр дуннеысь потӥзы. Сыӵе оскон юрттӥз вын-агайёслы но сузэр-апайёслы умой мылкыдын улыны (2 Кор. 4:18).

БЕЖЕНЕЦЪЁСЛЫ ЯРАТОНДЭС ВОЗЬМАТЭ

6, 7. а) Мар карыны милесьтым мылкыдмес ӝутэ «Инмарлэн яратонэз»? б) Вералэ пример.

⁶ «Инмарлэн яратонэз» милесьтым мылкыдмес ӝутэ ог-огмес яратыны, тужгес но шуг-секытъёсын пумиськыкумы. (Лыдӟы 1 Иоаннлэсь 3:17, 18.) Нырысетӥ даурын, Иудеяысь христианъёс сиёнлы ёрмыса улыку, вын-агайёс сюлмаськизы соослы юрттэт ыстон сярысь (Ап. уж. 11:28, 29). Со сяна, Павел но Пётр христианъёсты ӧтизы куно карисесь луыны (Рим. 12:13; 1 Пётр 4:9). Христианъёслы соослэн кенешазы куное лыктэм вын-агайёсты шумпотыса пумитано бере, соку макем мылысь-кыдысь пумитано соосты, кинъёслы утиськон понна пегӟоно луиз, яке соосты, кинъёсты оскон понна уйыло-улляло! (Лыдӟы Мадёнъёсты 3:27.)b

⁷ Кемалась ӧвӧл Украиналэн шундыӝужанпалысьтыз трос сюрс Иеговалэн Адӟись-Ивортӥсьёсызлы — пиосмуртъёслы, кышномуртъёслы но нылпиослы — ожен но уйылон-уллянъёсын сэрен, улон интыоссэс куштыса кошконо луиз. Жаляса верано луэ: куд-огез соос пӧлысь бырыны шедизы. Троссэ соос пӧлысь ас доразы басьтӥзы Украиналэн пӧртэм палъёсысьтыз вын-агайёсмы но сузэр-апайёсмы, озьы ик Россиысь Адӟись-Ивортӥсьёс но. Кыказ ик шаеръёсын вын-агайёс тодазы возизы, та дуннелэн луоно ӧвӧл шуыса. Соос политика удысын нокин пала кариськытэк улӥзы но «Ӟеч Иворез тодытӥзы» (Иоанн 15:19; Ап. уж. 8:4).

ЮРТТЭ БЕЖЕНЕЦЪЁСЛЫ ОСКОНЗЭС ЮНМАТЫНЫ

8, 9. а) Кыӵе шуг-секытъёсын пумиськыны быгато беженецъёс мукет шаерын? б) Малы милемлы чидаса юрттоно соослы?

⁸ Куд-огъёсызлы ас шаеразы ик мукет интые кошкыса улоно луиз, нош мукетъёсызлы мурт шаере кошконо но чылкак выль интые улыны интыяськоно луиз. Куддыръя кивалтӥсьёс беженецъёслы сиён-юон, дӥськут но улон инты сёто, но беженецъёс со сиёнлы дышемын ӧвӧл. Соос, кинъёс шуныт палъёсын улэмын, нырысетӥзэ, вылды, кезьыт палъёсы лыктэмын но кызьы дӥсяськыны уг тодо. Нош гуртысь лыктэмъёслы шуг валаны, кызьы туала техникаен выроно.

⁹ Куд-ог шаеръёсын кивалтӥсьёс программаос радъяло, кудъёсыз беженецъёслы выль югдуръёслы дышыны юртто. Но ӵем дыръя беженецъёслэсь возьмало, кӧня ке толэзь улыса, соос асьсэос асьсэ сярысь сюлмаськозы ини шуыса. Сыӵе воштӥськонъёс туж секытэн сётӥсько. Малпалэ гинэ: соослы выль кыл дышетоно; выль катъёсты тодоно; асьсэды возёно озьы, кызьы та шаерын асьсэды возё; пӧртэм тыриськонъёсты тыроно, школае ветлоно, нылпиосты дышетоно озьы, кызьы куро та шаерын — но ваньзэ сое огдыре лэсьтоно! Быгатысалды-а тӥ, чидаса но вын-агайёсты но сузэр-апайёсты гажамдэс возьматыса, юрттыны соослы со шуг-секытъёсты вормыны? (Флп. 2:3, 4).

10. Кызьы ми вын-агайёслэсь, кудъёсыз беженецъёс луизы, осконзэс юнматыны быгатомы? (Учке статья кутсконысь туспуктэмез.)

¹⁰ Со сяна, куддыръя кивалтӥсьёс вын-агайёсмылы, кудъёсыз беженецъёс луизы, кенешен герӟаськыны люкето. Вын-агайёсмы соглаш уг карисько ке сыӵе уже, кудӥз соослы кенешлэн пумиськонъёсаз ветлыны люкетэ, куд-ог кивалтӥсьёс кышкато, соослы уз юрттэ ни но шаерысьтызы уллялозы шуыса. Вал сыӵе учыръёс но, куке вын-агайёс кышкаменызы соглаш кариськизы. Соин ик милемлы ӝоггес пумиськоно Адӟись-Ивортӥсьёсын, кудъёсыз милям шаерамы лыктӥзы. Кулэ возьматыны, ми соосты яратӥськомы но соос сярысь сюлмаськиськомы шуыса. Ужъёсынымы юрттэммы но соосты яратэммы соослэсь осконзэс юнматыны быгатоз (Мад. 12:25; 17:17).

ЮРТТЭ БЕЖЕНЕЦЪЁСЛЫ УЖЪЁСЫН

11. а) Маин юрттоно беженецъёслы мукет шаере лыктэмзы бере? б) Кызьы беженецъёс куно карись вын-агайёслы тау каремзэс возьматыны быгато?

¹¹ Милемлы сюлмаськоно луоз, вылды, лыктэм беразы вын-агайёсмылэн сиён-юонзы, дӥськутсы но мукет кулэ луись арбериоссы мед луозы шуысаc. Пичи гинэ кузьым но, кылсярысь, галстук, соослы туж дуно луоз. Куке беженецъёс уг возьмало, соослы юрттозы шуыса, нош сюлмысь тау каро, озьы соос луонлык сёто куно карись вын-агайёслы но сузэр-апайёслы юрттэмзылэсь шумпотон басьтыны. Беженецъёс ялан мукетъёсызлэсь юрттэмзэс возьмаса пукизы ке, соос асьсэды гажамысь дугдыны быгатозы, озьы ик вын-агайёсын кусыпъёссы но сӧриськыны быгатозы (2 Фес. 3:7—10). Но соослы чик ӧз юрттэ ке, соос улыны уз быгатэ.

12, 13. а) Кызьы беженецъёслы ужъёсын юрттыны луэ? б) Вералэ пример.

¹² Милям трос коньдонмы ӧвӧл ке но, ми беженецъёслы юрттыны быгатомы, соослы дырмес но саклыкмес висъяса. Кылсярысь, ми быгатомы валэктыны соослы, кызьы транспортэн ветлоно, кызьы уж яке улон инты шедьтоно, кытысь умой но дунтэм сиён-юон басьтоно, кытчы юрттэт курыса вазиськоно яке кытысь но кыӵе тӥрлык басьтоно, кудӥныз коньдон поттыны луоз. Нош тужгес но кулэ юрттыны соослы кенешын асьсэды доразы кадь шӧдыны. Луонлыкты вань ке, ӵектэ соослы тӥледын ӵош кенешлэн пумиськонъёсаз ветлыны. Валэктэ соослы, кызьы тӥ палан адямиосын Эксэйлык сярысь вераськоно. Ӧте ӟеч иворез ӵош вераны.

¹³ Куке одӥг кенеше ньыль егит вын-агайёс лыктӥзы, кудъёсыз беженецъёс луизы, тӧроос дышетӥзы соосты машина нуллыны, компьютерен печатланы, резюме гожъяны, озьы ик, Иеговалы тросгес ужан-тыршон понна, дырзэс радъяны (Гал. 6:10). Ӝоген ньыльназы ик соос пионеръёс луизы. Тӧроос юрттэмен но пуктэм ужпумъёссэс быдэстыны тыршеменызы, со вын-агайёс Инмарен кусыпъёссэс ӝог юнматӥзы но ӧз сётэ Шайтанлэн дуннеезлы соосты ас палаз кыскыны.

14. а) Кыӵе мылкыдын нюръяськоно беженецъёслы? б) Вералэ пример.

¹⁴ Вань христианъёслы сямен ик, беженецъёслы но ваньбур люканы мылкыдын нюръяськоно луэ, кудӥз Иеговаен кусыпъёсыз сӧрыны быгатэ, но пумит сылоно ваньбур люканы мылкыдэз ӝутӥсьёслыd. Лийе, кудӥзлэн кылъёсыз статьялэн кутсконаз гожтэмын вал, озьы ик семьяысьтызы мукет нылпиос но, тодазы возё, малы дышетӥз соослэн атайзы Инмарлы оскон пумысен, куке соослы утиськон понна пегӟыса кошконо луиз. Лийе вера: «Атае куяз ваньзэ, мартэк улыны луэ вал,— одӥг арбери бӧрсьы мукетсэ. Собере со буш сумкаез ӝутӥз но пальпотыса шуиз: „Та сяна, милемлы номыр но кулэ ӧвӧл ни!“» (Лыдӟы 1 Тимофейлы 6:8.)

ЭН ВУНЭТЭ СО СЯРЫСЬ, МАР ТУЖГЕС НО КУЛЭ БЕЖЕНЕЦЪЁСЛЫ

15, 16. Кызьы ми беженецъёслы юрттыны быгатӥськомы: а) духовно? б) эмоционально?

¹⁵ Духовной но эмоциональной юрттэт беженецъёслы, коньдонэн юрттэт сярысь но, кулэгес луэ (Матф. 4:4). Тӧроос сыӵе вын-агайёслы юрттыны быгато соослэн кылынызы литература басьтыны но соослэсь кылзэс тодӥсь Адӟись-Ивортӥсьёсын герӟаськыны. Тросэзлы беженецъёслы ӵыжы-выжыосынызы, бускельёсынызы но кенешенызы люкиськоно луиз. Соин ик Инмарлэн калыкез пӧлын соос шӧдыны кулэ, Иегова соосыз яратэ но гажа-жаля шуыса. Соос сое ӧз шӧдэ ке, соку соос юрттэт утчалозы Адӟись-Ивортӥсь луисьтэм ӵыжы-выжыоссылэсь яке ас шаерысьтызы адямиослэсь, кудъёсыз валало соосыз но соослэсь шуг-секытъёссэс (1 Кор. 15:33). Беженецъёслы юрттӥмы ке шӧдыны, кенешын соосты ярато шуыса, озьы ми адӟем каромы Иеговалэсь, кудӥз сюлмаське сыӵе адямиос сярысь (Пс. 146:9, ВД).

¹⁶ Иисуслэн но солэн анай-атаезлэн учыразы сямен ик, куддыръя беженецъёс но уз быгатэ вордӥськем палъёсазы берытскыны, шаеразы соосты уйылӥсь-уллясьёс кивалтыку. Со сяна, кызьы валэктэ Лийе, «тросэз, кин адӟиз, кызьы ӵыжы-выжыоссэс сантэмазы яке виизы, малпаны ик кышкало нылпиосынызы отчы берытскон сярысь». Юрттон понна соослы, кинъёслы сыӵе кышкыт маке пыр потоно луиз, вын-агайёслы гажась-жалясь, яратӥсь, лякыт сямо луыны но зӥбыт-востэм визьмын улыны кулэ (1 Пётр 3:8). Уйылон-уллянъёсын сэрен куд-ог беженецъёс адямиослэсь палэнскыны кутскизы, но соос возьдасько, дыр, вераны, тужгес но нылпиоссы азьын, со сярысь, мае соос чидано луизы. Юалэ асьтэлэсь: «Мон соос интыын луысал ке, мае мон возьмасал мукетъёсызлэсь?» (Матф. 7:12).

АДӞИСЬ-ИВОРТӤСЬ ЛУИСЬТЭМ БЕЖЕНЕЦЪЁСЛЫ ӞЕЧ ИВОРЕЗ ВЕРАЛЭ

17. Кызьы Эксэйлык сярысь ивор беженецъёслы юрттэ?

¹⁷ Туннэ тросэз беженецъёс лыкто со шаеръёсысь, кытын тодытон уж лэземын ӧвӧл. Но Иеговалэн Адӟись-Ивортӥсьёсызлэн ӟеч иворез тыршыса вераменызы сэрен, трос сюрс беженецъёс «Эксэйлык сярысь кылэз» нырысьсэ кыло со шаерын, кытчы соос лыктӥзы (Матф. 13:19, 23). Тросэз, кинъёслы туж секыт, буйгатскон шедьто милям пумиськонъёсамы но вераны быгато: «Зэмзэ ик, Инмар тӥ пӧлын» (Матф. 11:28—30; 1 Кор. 14:25).

18, 19. Кызьы визьнодо луоно, беженецъёслы ӟеч иворез вераку?

¹⁸ Соослы, кинъёс беженецъёслы ӟеч иворез верало, чакласьконо но визьнодо луоно (Матф. 10:16; Мад. 22:3). Куке беженецъёс асьсэлэн сюлэмшугъяськонъёссы сярысь верало, соосты туж сак кылзэ, но политика сярысь эн вераське. Тӥ но, мукетъёсыз но кышкытлык улэ медад сюре шуыса, кылзӥське кивалтэтлэсь, кудзэ сётэ филиал но шаерысьтыды кивалтӥсьёс. Тырше тодыны, малы оско беженецъёс, кыӵе соослэн сямъёссы, но гажалэ соослэсь учконъёссэс. Кылсярысь, куд-ог шаеръёсын улӥсьёс туж чаклало сое, кызьы дӥсяськемын кышномурт. Соин ик, беженецъёслы ӟеч иворез вераны дасяськыкуды, дӥсяське озьы, мед адӟиськоз, тӥ соослэсь сямъёссэс гажаськоды шуыса.

¹⁹ Иисуслэн мадёнысьтыз ӟеч сямо Самария мурт сямен ик, ми тыршиськомы юрттыны соослы, кинъёс курадӟо, Адӟись-Ивортӥсь луисьтэм адямиослы но (Лука 10:33—37). Тужгес но умой амал, кызьы соослы юрттыны луэ,— ӟеч иворез вераны. Тани мар вера одӥгез тӧро, кудӥз трос беженецъёслы юрттӥз ини: «Соослы кутсконаз ик валэктыны кулэ, ми Иеговалэн Адӟись-Ивортӥсьёсыз луиськомы шуыса, но ми коньдонэн ум юрттӥське, нош нырысь ик юрттӥськомы адямиослы Инмарен умой кусыпъёс тупатыны. Со сярысь ӧм ке вералэ, куд-огез милемыз кылзоз, аслыз пайда басьтон понна гинэ».

УМОЙ ЕМЫШЪЁС

20, 21. а) Ми беженецъёслы возьматӥськомы ке, соосты яратӥськомы шуыса, кыӵе со емышъёс вае? б) Мае ми эскеромы мукетаз статьяын?

²⁰ Беженецъёслы возьматӥськомы ке, ми соосты яратӥськомы шуыса, со умой емышъёс вае. Одӥг сузэрмылэн семьяезлы, уйылон-уллянъёсын сэрен, Эритреяысь пегӟыса кошконо луиз. Ньылез нылпиосыз тямыс нунал ӵоже курадӟыса луоё кыр дуннеетӥ потэмзы бере Суданэ вуизы. Сузэрмы вера: «Суданысь вын-агайёс соосыз матысь ӵыжы-выжыоссэс кадь пумитазы. Соос сётӥзы сиён-юон, дӥськут, улон инты но сюрес вылэ коньдон. Иеговалэн Адӟись-Ивортӥсьёсыз сяна, кин эшшо тодмотэм адямиосты ас дораз басьтоз на, соос одӥг Инмарлы йыбыртто шуыса гинэ?» (Лыдӟы Иоаннлэсь 13:35.)

²¹ Нош мар вераны луоз нылпиос сярысь, кудъёсыз анай-атаенызы ӵош мукет шаере улыны кошко? Мукетаз статьяын ми эскеромы, кызьы ваньмы асьмеос соослы юрттыны быгатомы шумпотыса Иеговалы ужаны-тыршыны.