Мукетъёссэ зэмлыклы дышетӥсько, ачим пельтэм ке но

МЫНАМ анай-атае 1910-тӥ аръёсы Тбилисиысь (Грузия) Канадае улыны кошкизы. Соос интыяськизы Саскачеван ёросысь пичи гинэ Пелли гуртэ, Канадалэн шундыпуксён палаз. Мон вордӥськи 1928-тӥ арын но куать нылпиос пӧлысь самой пичиез вал. Атае вордскемелэсь азьлогес ик кулӥз, нош анае — куке мон туж пичи вал. Ӝоген 17 аресъем Луси нимо бадӟым апае но кулӥз. Монэ, агайёсме но апайёсме дораз улыны басьтӥз Ник ӵужагаймы.

Ӵужагаймы фермаяз валъёс вордӥз. Одӥг пол, куке мон ветлыны кутски вал ини, семьяосы адӟизы, мон ужпиез быжтӥз кыскасько шуыса. Монэ вал ӵыжемлэсь кышкаменызы, соос черекъяны кутскизы, монэ отысь кошкыны косыса. Нош мон ӧй кошкы. Мон соослы тыбырыным сылӥ но черекъямзэс ӧй кылы. Вал монэ соку ӧз ӵыжы, нош семьяосы валазы, мон номыре уг кылӥськы шуыса.

Матысь тодмомы ӵектӥз монэ пельтэмъёслы школае сётыны, соин ик Ник ӵужагаймы нуиз монэ Саскатунэ (Саскачеван ёрос). Со школа дормылэсь кыдёкын вал. Мыным, вить аресъем пияшлы, туж кышкыт вал. Ӵыжы-выжыосыным мон адӟиськылӥ праздникъёсы но гужем каникулъёсы дыръя гинэ. Пумен мон жестовой кылэз дышетӥ но, мукет нылпиосын эшъяськыса, дырме шулдыр ортчытъяй.

БИБЛИЫСЬ ЗЭМЛЫКЕН ТОДМАТСКИСЬКО

1939-тӥ арын мынам кыкетӥез апае, Мэрион, Билл Данильчуклы бызиз но, соос монэ но Франсес апайме доразы басьтӥзы. Ӵыжы-выжыосмы пӧлысь соос нырысетӥосыз, кинъёс Иеговалэн Адӟись-Ивортӥсьёсыныз тодматскизы. Гужем каникулъёсы дыръя соос дорын улыкум, соос, кызьы быгатӥзы, озьы тыршизы мыным Библиысь тодэмзэс вераны. Зэмзэ вераса, вераськыны милемлы капчи ӧй вал, малы ке шуоно соос жестовой кылэз уг тодо вал. Озьы ке но, соос шӧдӥзы, мыным Иегова сярысь тодыны туж кельше шуыса. Мон валай: со, мар каро соос, Библияя луэ. Соин ик мон соосын ӵош ӟеч иворез вераны кутски. Кема ик дыр ӧз ортчы, мон пылатӥськыны мылкыд кари но, 1941-тӥ арын 5-тӥ куарусёнэ Билл монэ андан чанын пылатӥз, кудӥз колодчаысь йӧ кадь кезьыт вуэн тырмытэмын вал.

Гужем 1946-тӥ арын ми ветлӥмы конгрессэ Кливлендэ (Огайо штат, США). Конгресслэн нырысетӥ нуналаз апайёсы гожъязы мыным конгресслэсь программазэ, мон сое валаны мед быгатом шуыса. Нош кыкетӥ нуналаз мон тодӥ, пельтэм вын-агайёслы но сузэр-апайёслы конгрессэз жестовой кылэ берыкто шуыса. Мыным туж кельшиз со конгресс, малы ке шуоно мон нырысьсэ умой валай Библиысь зэмлыкез!

БИБЛИЫСЬ ЗЭМЛЫКЛЫ ДЫШЕТӤСЬКО

Кемалась ик ӧвӧл Кыкетӥ дунневыл ож йылпумъяськиз. Соин ик шаерын национализм вӧлмемын вал. Конгресс бере школаям берытскыса, мон ужпум кутӥ Иеговалы оскиськымон кыльыны. Мон дугдӥ лэсьтэмысь сое, мар одно ик лэсьтоно вал дышетскисьёслы: флагез данъямысь но шаерлэсь гимнзэ кырӟамысь, праздникъёсты пусъемысь но черке ветлэмысь. Дышетӥсьёслы со ӧз яра. Соос кышкатъязы монэ но пӧяса тыршизы, мон осконэлэсь мед куштӥськом шуыса. Ваньзэ сое ӵош дышетскисьёсы адӟизы но со сярысь трос вераськонъёс поттылӥзы. Со мыным умой муг луиз соослы ӟеч иворез вераны. Озьы куинь пияшъёслы — Ларри Андрософфлы, Норман Диттриклы но Имил Шнайдерлы — сюлмазы зэмлык пыӵаз но, соос али ке но Иеговалы оскымон ужало-тыршо.

Кыӵе гинэ каре медам лыкты, мон котьку тыршисько вал зэмлык сярысь пельтэм адямиослы вераны. Озьы, Монреалын, пельтэмъёслэн огазеяськоназы, мон егит пияшлы, Эдди Тейгерлы, ӟеч иворез верай. Со йыружъёсын вырисьтэм бандалэн ёзчиез вал. Эдди милям вын-агаймы луиз но кулытозяз Лаваль карын (Квебек ёрос) жестовой кенешын ужаз-тыршиз. Эшшо мон тодматски на Хуан Арданесэн, кудӥз, Верия карын улӥсьёс сямен, ваньзэ пыр-поч эскере вал, Библиысь кылъёс зэм луо-а шуыса тодон понна (Ап. уж. 17:10, 11). Со но Адӟись-Ивортӥсь луиз но кулытозяз ик Оттаваын (Онтарио ёрос) тӧро луыса ужаз-тыршиз.

1950-тӥ арын мон Ванкувере улыны кошки. Мон туж яратӥсько ке но ӟеч иворез пельтэм адямиослы вераны, одӥг учырез ноку но уг вунэты. Урамын мон Крис Спайсер нимо кылӥсь кышномуртэн вераськи. Со журналъёслы гожтӥськыны соглаш кариськиз но Гари картэз доры лыктыны куриз на. Ми туж кема вераськимы картэныз, карандашен бумага вылэ гожъяса. Со бере ми трос аръёс ӵоже соосын ӧм адӟиське ни. Макем мон пайми, куке соос Торонтоын (Онтарио ёрос) конгрессын, трос калык пӧлысь монэ адӟыса, дорам лыктӥзы! Со нуналэ Гари пылатӥськыны дасяськем вылэм. Та паймымон учыр возьматӥз мыным, макем кулэ котькуд тупась учыре ӟеч иворез вераны, малы ке шуоно ми ум тодӥське, кытын но ку зэмлыклэн кидысэз удалоз.

Берлогес мон Саскатунэ берытски. Отын мон одӥг кышномуртэн тодматски, кудӥз куриз монэ кыкто пельтэм нылъёсыныз, Джин но Джоан Роттенбергеръёсын, Библиез дышетыны. Соос дышетскизы пельтэмъёслы школаын, кудаз мон куке но дышетски вал. Ӝоген соос ӵош дышетскисьёссылы ӟеч иворез вераны кутскизы. Озьы классысьтызы вить адями Иеговалэн Адӟись-Ивортӥсез луиз. Одӥгез соос пӧлысь — Юнис Колин. Ми Юнисэн тодматскимы, бадӟым классъёсын дышетскыкум. Тодӥсько на, кызьы со мыным конфетсэ мычиз но эшъёс луыны быгатомы-а шуыса юаз. Дыр ортчыса, Юнис улонам нимысьтыз инты басьтӥз: со мынам кышное луиз!

Куке Юнислэн анаез солэсь Библиез дышетэмзэ тодӥз, со куриз, школалэн директорез нылызлы Библиез дышетыны медаз ни лэзьы шуыса. Соку директор нылашлэсь Библиез дышетон понна публикациоссэ талаз. Озьы ке но Юнислэн юн мылкыдыз вал азьланяз но Иегова сярысь тодыны. Со анай-атаезлы ивортӥз, пылатӥськыны малпа шуыса, нош соос солы веразы: «Иеговалэн Адӟись-Ивортӥсез луид ке, ми тонэ дорысьтымы улляломы!» 17 арескын Юнис дорысьтыз кошкиз но, сое одӥг христиан семья ас дораз басьтӥз. Со дышетонзэ азьланьтӥз но собере пылатӥськиз. 1960-тӥ арын ми кузпалъяськимы, нош Юнислэн анаез но атаез сюанамы ӧз лыктэ. Дыр ортчемъя соос адӟизы, малы ми оскиськомы но кызьы нылпиосмес будэтӥськомы, но милемыз гажаны кутскизы.

ИЕГОВА ЯРАТЫСА СЮЛМАСЬКЕ МОН СЯРЫСЬ

Ми Юнисэн сизьым пиосты будэтӥмы. Ваньзы соос кылӥсесь. Со капчи ӧй вал, но ми сюлмаськимы, соос жестовой кылэз мед тодозы шуыса. Солы луыса, ми быгатӥмы соосын вераськыны но зэмлыклы дышетыны. Милемлы туж юртто вал кенешысь вын-агайёс но сузэр-апайёс. Кылсярысь, одӥг пол пимылэсь Эксэйлык юртын урод кылъёсын вераськемзэ кылыса, одӥг атай милемлы со сярысь гожтыса ивортӥз. Соин ми дырыз дыръя сое тупатыны быгатӥмы. Ньылез пиосмы — Джеймз, Джерри, Николас но Стивен — ас семьяосынызы ӵош Иеговалы оскымон ужало-тыршо. Ваньзы соос тӧроос. Николас аслаз Дебора кышноеныз Британиысь филиалын жестовой кылэ берыктыны юртто, нош Стивен но солэн Шаннон кышноез США-ысь филиалын жестовой кылэ берыктӥсьёс луыса ужало-тыршо.

40 ар ӵош улэммылы толэзь тырмыса ӧз вуы, Юнис, ракен висьыса, кулӥз. Кема дыр ӵоже со висёнэныз нюръяськиз. Юнис юн оске вал, улӟытыса султытон луоз шуыса, но со солы кужым сётэ вал. Мон туж возьмасько со нуналэз, куке выльысь сое адӟо!

2012-тӥ арын тулыспалэ мон уси но макеслыме чигтӥ. Собере валай, юрттӥсьёстэк мынам улэме уз луы ни шуыса. Соин ик мон пие но кенэ доры улыны мынӥ. Ми ваньмы Калгари карысь жестовой кенеше ветлӥськомы, кытын мон тӧро луыса ужасько-тыршисько. Уд оске, но со мынам нырысетӥез жестовой кенеше! Вань аръёс ӵоже, 1946-тӥ арысен кутскыса, мон англи кылын вераськись кенеше ветлӥ. Мар юрттӥз мыным Инмарен кусыпъёсме утьыны? Иегова анайтэм-атайтэмъёслы юрттыны кыл сётэмзэ быдэстӥз (Пс. 9:35). Мон туж тау карисько ваньмызлы, кин мыным юрттыны тыршиз — конгресслэсь программазэ гожъяз, жестовой кылэз дышетӥз но жестовой кылэ берыктӥз!

Вераны кулэ, куддыръя мынам киосы ик лэзиськылӥзы, но ваньзэ куштэме потылӥз, малы ке шуоно мон уг валаськы вал, мар сярысь верало кенешлэн пумиськонъёсаз, яке мукет адямиос пельтэмъёслэсь кулэяськонъёссэс лыдэ уг ик басьто кадь потэ вал. Сыӵе дыръёсы мон тодам вайылӥ Пётрлэсь Иисуслы верам кылъёссэ: «Кузё-Инмаре! Кин доры милемлы мыноно? Тынад быронтэм улонлэн кылъёсыз вань» (Иоанн 6:66—68). Мон ёзо мукет пельтэм вын-агайёс но сузэр-апайёс сямен мон чиданы дышетски. Мон дышетски оскиськыны Иеговалы но солэн организациезлы. Макем мон бакель каремын вал со понна! Табере туж шумпотӥсько, аслам кылыным публикациос лыдӟыны быгатӥсько шуыса но американ жестовой кылын ортчытӥськись пумиськонъёсы ветлыны. Зэм, улонэ шоры учкыса, кудзэ мон Ваньзэ быгатӥсь Иегова Инмармылы сӥзи, вераны быгатӥсько, мынам улонэ туж шудо вал шуыса!