Кызьы «выль адями» луоно

1, 2. а) Малы ми «выль адями» луыны быгатӥськомы? б) «Выль адямилэн» кыӵе сямъёсыз сярысь верамын Колоссыослы 3:10—14?

«ВЫЛЬ адями», кудӥз сярысь Библиын вераське, Инмарлы укшатыса кылдытэмын (Еф. 4:24; Кол. 3:10). Ми но «выль адями» луыны быгатӥськомы. Малы? Малы ке шуоно Иегова адямиосты аслыз укшатыса кылдытӥз. Нош со возьматэ, ми солэсь умой сямъёссэ адӟем карыны быгатӥськомы шуыса (Ул.-выл. 1:26, 27; Еф. 5:1).

² Веранэз ӧвӧл, куддыръя милям шонертэм мыл потонъёсмы кылдо, малы ке шуоно ми тырбыдэстэмэсь вордӥськимы. Со сяна, ми вылын шӧдӥськыны быгатэ на со, кыӵе адямиос ми котырын. Озьы ке но, Иеговалэн юрттэмезлы луыса, ми быгатӥськомы солы ярамон адямиос луыны. Инмарлы ярамон адямиос луыны мылкыдмес юнматон понна, ойдолэ эскеромы «выль адямилэсь» куд-ог сямъёссэ, кудъёсыз сярысь апостол Павел святой духлэн кивалтэмез улсын гожтӥз. (Лыдӟы Колоссыослы 3:10—14.) Озьы ик ми эскеромы, кызьы со сямъёсты Инмарлы ужан-тыршонын возьматыны быгатомы.

«ВАНЬДЫ ТӤ ОДӤГ МУГОР»

3. Вералэ «выль адямилэсь» одӥгзэ сямзэ.

³ Христианъёсты «выль адями» луыны ӧтьыса, Павел вераз «выль адямилэн» одӥгез валтӥсь сямыз сярысь — вылтус шоры учкисьтэм луон сярысь. Со гожтӥз: «Ӧвӧл ни грек но, иудей но, вандӥськем но, вандӥськытэк кылем мурт но, варвар но, скиф но, ляльчи но, эрико улӥсь но»a. Малы христиан кенеш люкиськыны кулэ ӧвӧл таӵе тодметъёсъя: кулэн тусызъя, кыӵе калыкысь луэмъя, узыр яке куанер луэмъя? Малы ке шуоно Христослэн ваньмыз зэмос дышетскисьёсыз — со «одӥг мугор» (Кол. 3:11; Гал. 3:28).

4. а) Кызьы Иеговалэн ужась-тыршисьёсызлы мукет адямиос шоры учконо? б) Мар люкетыны быгатэ христианъёслы огкылысь улыны?

⁴ Христианъёс, кудъёсыз «выль адями» луизы, гажало вын-агайёссэс но сузэр-апайёссэс, озьы ик мукет адямиосты но. Соос уг учко узыр-а, куанер-а соос, кыӵе кылын соос верасько (Рим. 2:11). Куд-ог шаеръёсын со капчиен уг сётӥськы. Кылсярысь, Лымшор Африкаын тросэз Иеговалэн Адӟись-Ивортӥсьёсыз али ке но уло на котькуд расалы нимысьтыз висъям интыосын. Карын уло сьӧд куо адямиос, нош карлэн котыраз — тӧдьы куо адямиос. Вань на сыӵе интыос но, кытын уло соос, кинъёс пӧртэм расаысь анай-атайёслэсь вордскемын. Соин ик, Лымшор Африкаысь вын-агайёсмылэсь мылкыдзэс ӝутон понна «сюлэмъёссэс усьтыны», яке выльёсыныз тодматскыны, 2013-тӥ арын коньывуонэ Кивалтӥсь кенеш соглаш луиз нимысьтыз ужрад ортчытыны. Со ужрадлы луыса, вын-агайёс но сузэр-апайёс ог-огенызы умойгес тодматскыны быгатысалзы (2 Кор. 6:13). Кызьы со ортчыны кулэ вал?

5, 6. а) Кыӵе ужрад радъямын вал одӥг шаерын, Инмарлэн ужась-тыршисьёсызлэсь кусыпъёссэс тупатон понна? (Учке статья кутсконысь туспуктэмъёсты.) б) Вералэ, кыӵе емышъёс вайиз со ужрад?

⁵ Со ужрадъя кык кенешъёс, кудъёсаз христианъёс пӧртэм расаосысь луо яке пӧртэм кылъёсын верасько, дырын-дырын шутэтскон нуналъёссэс ӵош ортчытъяло. Вын-агайёс но сузэр-апайёс ӵош тодытон уже пырисько, кенешъёсы ветло но ог-огзэс куное ӧтчало. Со ужрадэ сюлэсь трос кенешъёс пыриськизы ини, но улосысьтызы филиал со пумысен трос умой кылъёс кылӥз, Адӟись-Ивортӥсь луисьтэм адямиослэсь но. Кылсярысь, одӥг священник вераз: «Мон Адӟись-Ивортӥсь ӧвӧл, но вераме потэ, тӥляд тодытон ужды туж усто радъямын шуыса, но тӥ пӧртэм расаосысь луиськоды ке но, ог-огеныды тупаса улӥськоды». Кызьы со ужрад Лымшор Африкаысь вын-агайёс но сузэр-апайёс вылын шӧдӥськиз?

⁶ Коса кылын вераськись Нома нимо сузэр, кудӥз туж огшоры улэ, нырысь уг дӥсьты вал ас дораз ӧтьыны англи кылын вераськись кенешысь тӧдьы куо вын-агайёсты. Нош тӧдьы куо Адӟись-Ивортӥсьёсын ӵош ужамез-тыршемез но соос доры куное ветлэмез бере со шумпотыса вераз: «Соос огшоры адямиос, ӵапак ми кадесь ик!» Соин ик, куке солэн кенешезлэн черодэз вуиз англи кылын вераськись кенешысь вын-агайёсты но сузэр-апайёсты ас доразы ӧтьыны, Нома сиён дасяз но куноосты ӧтиз. Куноосыз пӧлын тӧдьы куо тӧро но вал. Нома вераз: «Мон абдрай, куке со тӧро чик но пумит ӧз луы выж вылысь пластиклэсь лэсьтэм ящик вылэ пуксьыны». Со ужрад али ке но мынэ на, но солы луыса, тросэз вын-агайёс но сузэр-апайёс выль эшъёс шедьтӥзы, но соослэн мылкыдзы вань эшшо но тросгес эшъёс шедьтыны.

«ДӤСЯСЬКЕ-ШОБЫРСКЕ ГАЖАСЬ-ЖАЛЯСЬ, ЛЯКЫТ СЯМО ЛУОНЛЭН ДӤСЬКУТЭНЫЗ»

7. Малы милемлы гажась-жалясь луоно?

⁷ Шайтанлэн дуннеез бырытозь, ми шуг-секытъёсын пумиськыломы, кылсярысь, ужтэк кылёнэн, секыт висёнъёсын, уйылон-уллянъёсын, инкуазь шимучыръёсын, лушкаськонэн. Ог-огмылы шуг-секытъёс дыръя юрттыны мед быгатомы шуыса, милемлы сюлмысь гажась-жалясь луоно. Гажась-жалясь луимы ке, со милесьтым мылкыдмес ӝутоз мукет адямиосын лякытэсь луыны (Еф. 4:32). Та сямъёс «выль адямилэн» сямъёсыз пӧлы пыро. Соос юрттозы милемлы Инмарлэсь адӟем карыны но мукетъёссэ буйгатыны (2 Кор. 1:3, 4).

8. Кыӵе емышъёс ваёз, ми кенешысь ваньзэс гажамы-жалямы но соосын асьмеды лякыт возимы ке? Вералэ пример.

⁸ Кызьы ми эшшо но тросгес саклыкмес висъяны быгатӥськомы мукет шаерысь лыктэмъёслы но куанер улӥсь вын-агайёслы но сузэр-апайёслы? Милемлы соосын эшъяськоно но валаны юрттоно, кенешын соосты туж дунъяло шуыса (1 Кор. 12:22, 25). Эскеромы Данникарл нимо вын-агайлэсь учырзэ, кудӥз Филиппиныысь Японие улыны лыктӥз. Уж дораз сое, мукет ужасьёссэс кадь, уг ярато вал. Одӥг пол со Иеговалэн Адӟись-Ивортӥсьёсызлэн пумиськоназы лыктӥз. Тани мар со вера: «Отын ваньзы кадь японецъёс вал, но ваньзы соос монэ тодмо муртсэс кадь туж шуныт пумитазы». Вын-агайёс асьсэды соин туж лякыт возизы. Со юрттӥз солы Иеговалы матэгес кариськыны. Данникарл пылатӥськиз но али тӧро луыса ужа-тырше. Кенешысьтызы тӧроос лыдъяло, со но солэн Дженнифер кышноез кенешсылы зэмос бакель карон луо шуыса. Со вын-агайёс верало: «Соос пионер луыса ужало-тыршо но огшоры уло. Озьы соос умой адӟем карон возьмато, кызьы Инмарлэсь Эксэйлыксэ нырысетӥ интые пуктоно» (Лука 12:31).

9, 10. Вералэ учыръёсты, кудъёсыз возьмато, кызьы бакель каремын луо соос, кинъёс ужан-тыршонын гажась-жалясь луо.

⁹ Мукетъёсызлы Эксэйлык сярысь ӟеч иворез вераськомы ке, милям луонлыкмы кылдэ «вань адямиослы ӟеч уж» лэсьтыны (Гал. 6:10). Мукет шаерысь лыктэмъёсты гажаменызы-жаляменызы, тросэз Адӟись-Ивортӥсьёс туж тыршизы соослэсь кылзэс дышетыны (1 Кор. 9:23). Со туж умой емышъёс вайиз. Озьы, Австралиысь Тиффани нимо сузэр, Брисбенысь суахили кылын вераськись кенешлы юрттон понна, суахили кылэз дышетӥз. Со кылэз дышетыны секыт вал ке но, со Тиффанилэсь улонзэ туж тунсыко кариз. Сузэрмы вера: «Ужан-тыршондэс тунсыкогес каремды потэ ке, мукет кылын вераськись кенеш — со самой со, мар тӥледлы кулэ. Тӥ ас карысьтыды кошкытэк, пӧртэм шаеръёсы вуиськоды кадь. Тӥ умойгес валаны кутскиськоды, мар со сыӵе калыккуспо вынлык, но ас синмыныды адӟиськоды солэсь огкылысь улэмзэ».

¹⁰ Тани Япониысь кузпалъёслэн но соослэн Сакико нылзылэн примерзы. Сакико тодаз вае: «90-тӥ аръёсы ӟеч иворез веракумы, ми ӵем дыръя Бразилиысь татчы улыны лыктэмъёсты пумитаськомы вал. Куке ми португал кылын Библиысь возьматӥськомы вал Усьтӥськонэз 21:3, 4, Псалтирез 36:10, 11, 29 яке мукет кылбуръёсты, соос туж сак лыдӟо вал соосты, нош куд-огъёсызлэн синвуоссы ик пото вал». Сакиколэн семьяез мукет шаерысь лыктэмъёсты гажа-жаля вал, соин ик соослэн мылкыдзы ӝутскиз эшшо но тросгес карыны. Сакико азьланьтэ: «Со адямиослы зэмлыкез тодыны юрттон вылысь, ми быдэс семьяен португал кылэз дышетыны малпамы». Берлогес та семья португал кылын кенешез кылдытыны юрттӥз. Вань со аръёс ӵоже Сакико но солэн анаез но атаез тросэзлы мукет шаерысь лыктэмъёслы Иеговалэн ужась-тыршисьёсыз луыны юрттӥзы. «Милемлы трос кужым пононо луиз, португал кылэз дышетон понна. Но бакель каронъёс шоры учконо ке, кудъёссэ ми басьтӥмы, со трос ӧвӧл,— шуэ Сакико.— Ми со понна туж тау кариськомы Иеговалы». (Лыдӟы Апостолъёслэсь ужъёссэс 10:34, 35.)

ДӤСЯСЬКЕ-ШОБЫРСКЕ ВОСТЭМ ЛУОНЛЭН ДӤСЬКУТЭНЫЗ

11, 12. а) Малы шонер мылкыдмы луыны кулэ, «выль адями» луон понна? б) Мар юрттоз милемлы азьланяз но востэм сямо луыны?

¹¹ Милям «выль адями» луэммы потэ, малы ке шуоно озьы милям Инмарез данъяммы потэ, нош асьмелы дан утчаммы уг поты. Тодады вае: тырбыдэс кылчин гинэ но, вылтӥяськыны кутскеменыз, сьӧлыказ. (Ӵошатэ Иезекиильлэсь 28:17.) Нош сьӧлыко адямиослы вылтӥяськыны кутскыны эшшо но капчигес! Озьы ке но, востэм луыны, яке астэ мукетъёсызлэсь пичигес шуыса лыдъяны, луэ. Мар милемлы юрттоз?

¹² Востэм сямо луон понна, милемлы котькуд нунал Инмарлэн Кылыз вылын малпаськыны кулэ (К. Зак. 17:18—20). Кылсярысь, милемлы малпаськыны кулэ со вылын, малы Иисус дышетӥз но кызьы со, музъем вылын ужакуз-тыршыкуз, востэм луэмзэ возьматӥз (Матф. 20:28). Иисус апостолъёсызлэсь пыдъёссэс но миськиз (Иоанн 13:12—17). Со сяна, милемлы ӵемысь вӧсяськоно но Инмарлэсь святой духсэ куроно. Со юрттоз милемлы асьмеды мукетъёсызлэсь вылӥе пуктон мылкыдын нюръяськыны (Гал. 6:3, 4; Флп. 2:3).

13. Кыӵе емышъёс вае востэм луэммы?

¹³ Лыдӟы Мадёнъёсты 22:4. Востэм сям Иеговалэн вань зэмос ужась-тыршисьёсызлы кулэ. Со туж умой емышъёс вае. Ми востэмесь ке, со юрттэ кенешын огъя но тупаса улыны. Со сяна, Иегова милемыз бакель кароз. Апостол Пётр гожтӥз: «Ваньды ог-огдылы тэрытскыса, зӥбыт-востэм улэ, малы ке шуоно „вылӥ мылкыдоослы Инмар пумит кариське, нош зӥбыт-востэм улӥсьёслы дэлет сётэ“» (1 Пётр 5:5).

ДӤСЯСЬКЕ-ШОБЫРСКЕ ЗӤБЫТ, КЕМА ЧИДАСЬ ЛУОНЛЭН ДӤСЬКУТЭНЫЗ

14. Кин туж умой пример возьматэ, кызьы зӥбыт но кема чидась луоно?

¹⁴ Туннэ со адямиез, кудӥз зӥбыт но кема чидась луэ, ӵемысь ляб адями шуыса лыдъяло. Макем со шонертэм! Со умой сямъёс пото Инмар бордысь, кудӥз Дунне вылын самой кужмо луэ. Иегова милемлы туж умой пример возьматэ, кызьы зӥбыт но кема чидась луоно (2 Пётр 3:9). Тодады вае, кызьы со кылчинъёс пыр Авраамлэн но Лотлэн вазиськемъёссылы ответ сётылӥз (Ул.-выл. 18:22—33; 19:18—21). Яке малпаське со сярысь, кызьы Иегова кылзӥськисьтэм израиль калыкез 1 500 арлэсь кемагес чидаз (Иез. 33:11).

15. Кытысь адӟиськиз Иисуслэн зӥбыт сямо но чидась луэмез?

¹⁵ Иисус Христос зӥбыт сямо адями вал (Матф. 11:29). Дышетскисьёсыныз со ассэ туж чидась адями кадь возиз но тырмымтэоссы шоры чиньы пыр учкиз. Музъем вылын ужакуз-тыршыкуз, Иисусэз религиозной кивалтӥсьёс туж ӵем урод кылъёсын тышкасько но янгыше уськыто вал. Озьы ке но, кулытозяз со зӥбыт сямо но кема чидась кылиз. Юбо вылын курадӟыкуз, Иисус Атаезлэсь вӧсяськыса куриз простить карыны соосты, кинъёс сое казнить каризы. Со вераз Иеговалы: «Мар лэсьтэмзэс соос уг тодо» (Лука 23:34). Макем умой пример возьматӥз Иисус, кызьы сокем секыт дыръёсы зӥбыт сямо но чидась луоно! (Лыдӟы 1 Пётрлэсь 2:21—23.)

16. Кызьы ми зӥбыт сямо но чидась луэммес возьматыны быгатӥськомы?

¹⁶ Кызьы ми возьматыны быгатӥськомы, зӥбыт сямо но чидась луиськомы шуыса? Колоссы карысь христианъёслы гожъякуз, Павел одӥгез амал сярысь вераз: «Ог-огеныды лякытэсь, гажась-жалясесь луэ, огдылэсь огды сьӧлыкъёстэс куштэ, кызьы Инмар Христос пыр тӥлесьтыд сьӧлыкъёстэс куштӥз» (Еф. 4:32). Зэмзэ но, та кылъёслэсь кылзӥськон понна, милемлы зӥбыт сямо но чидась луоно. Вын-агайёсмес но сузэр-апайёсмес простить карыса, ми юрттӥськомы кенешлы огкылысь улыны.

17. Малы милемлы зӥбыт сямо но чидась луоно?

¹⁷ Христианъёслы зӥбыт сямо но чидась луоно — со Инмарлэн куронэз. Со сямъёсын милям утиськонмы герӟаськемын (Матф. 5:5; Иак. 1:21). Нош самой валтӥсез: сыӵе сямъёсты возьматыса, ми Иеговаез данъяськомы но мукетъёсызлы Библиысь визь-кенешъёсъя улыны юрттӥськомы (Гал. 6:1; 2 Тим. 2:24, 25).

«ЯРАТОНЭН ДӤСЯСЬКЕ-ШОБЫРСКЕ»

18. Кызьы герӟаськемын яратон но вылтус шоры учкытэк улон?

¹⁸ Вань сямъёс, кудъёссэ ми эскеримы, яратонэн герӟаськемын. Тодамы ваёмы, кыӵе визь-кенеш сётоно луиз Иаков, Иисуслэн дышетскисез, со вын-агайёслы, кудъёсыз узыр адямиосты, куанеръёссэ сярысь, юнгес ярато вал. Со валэктӥз, асьсэды озьы возьыса, соос «Эксэй законэз» тӥяло шуыса, кудаз верамын: «Матысьтэ астэ ачид кадь ик яраты». Иаков ватсаз на, соос вылтус шоры учко ке, сьӧлыкало шуыса (Иак. 2:8, 9). Ми адямиосты вань сюлмысьтымы яратӥськомы ке, ми ум учке со шоры, кыӵе расаысь соос луо, узыр-а соос яке куанер-а.

19. Малы милемлы яратонэн дӥсяськыны-шобырскыны кулэ?

¹⁹ Яратон озьы ик «кема чида, гажа-жаля». Со «уг вылтӥяськы» (1 Кор. 13:4). Азьланяз но адямиослы Эксэйлык сярысь ӟеч иворез веран понна, милемлы чидась, лякыт сямо но зӥбыт-востэм луоно (Матф. 28:19). Та сямъёс юртто милемлы кенешысь вань вын-агайёсын но сузэр-апайёсын тупаса улыны. Кыӵе пайда вае сыӵе яратон? Солы луыса, кенешъёс огкылысь уло, нош со Иеговаез данъя но мукет адямиосты зэмлык пала кыске. Тӥни малы «выль адями» луон сярысь веран таӵе яркыт кылъёсын йылпумъяське: «Эшшо яратонэн дӥсяське-шобырске, со дун-шектэм луонлэн [«тупаса улонлэн», ВД] шорсюлмыз луэ» (Кол. 3:14).

«ВИЗЬМЫНЫДЫ, ДУХЕНЫДЫ МЕД ВЫЛЬМОДЫ»

20. а) Кыӵе юанъёс вылын малпаськоно милемлы но малы? б) Мае ми туж возьмаськомы?

²⁰ Котькудмылы юано асьмелэсь: «Мар мыным кароно на, вужмем адями луонлэсь „дӥськутсэ“ одӥг пол но пыраклы кылён понна?» Милемлы ӟырдыт вӧсяськоно Инмарлы, солэсь юрттэт курыса, но кароно ваньзэ, мае быгатӥськомы, шонертэм малпанъёсын нюръяськон но сьӧлыко ужъёслэсь палэнскон понна, кудъёсыз Инмарлэн Эксэйлыказ пырыны люкетозы (Гал. 5:19—21). Со сяна, таӵе юан вылын малпаськоно: «Выльмисько-а мон визьмыным но духеным?» (Еф. 4:23, 24). Тырбыдэс луытозямы, милемлы туж тыршыны кулэ, «выль адями» луон понна. Пуктэ син азяды, макем умой луоз, куке ваньзы, кинэ ми тодӥськомы, «выль адями» луозы но Инмарлэсь сямъёссэ быдэсак адӟем карозы!