Номыр но тӥледыз кузьымтэк медаз кельты

1, 2. а) Кыӵе кузьым басьтыны ӵыдытэк витё Инмарлэн ужась-тыршисьёсыз? б) Мар юрттэ милемлы кузьыммес тодамы возьыны? (Учке статья кутсконысь суредэз.)

ДУХЕН зырӟем христианъёслэн туж умой осконзы вань, кудзэ апостол Павел «Инмысь кузьым» шуыса нимаз (Флп. 3:14). Та христианъёс ӵыдытэк витё со дырез, куке соос инмысь Эксэйлыкын Иисус Христосэн ӵош юрттозы адямиослы тырбыдэс луыны (Усьт. 20:6). Макем паймымон кузьым! Мукет ыжъёслы но туж умой кузьым дасямын. Иегова кылзэ сётӥз, соос пырак дауръёс ӵоже музъем вылын улозы шуыса (2 Пётр 3:13).

² Духен зырӟем христианъёс Инмарлы оскымон кыльыны но кузьым басьтыны мед быгатозы шуыса, Павел ӧтиз соосты: «Инмысез сярысь малпаське» (Кол. 3:2). Соослы Инмысь кузьымзэс тодазы возёно вал (Кол. 1:4, 5). Котькыӵе осконмы мед луоз, инмын-а улыны яке музъем вылын-а, ми малпаськиськомы ке со сярысь, мае милемлы Иегова сӥзиз, кузьыммы сярысь ноку но ум вунэтэ (1 Кор. 9:24).

3. Кыӵе кышкытлыкъёс сярысь Павел христианъёслы вераз?

³ Озьы ик, Павел вераз христианъёслы, соос кузьымтэк кыльыны быгатозы шуыса, но вераз, малы озьы луыны быгатоз. Кылсярысь, Колоссыослы гожтэтаз со гожтӥз зэмос луисьтэм христианъёс сярысь, кудъёсыз малпало вал, соос Христослы оскеменызы Инмарлы матэ уг карисько, нош Законэз быдэсъяменызы Инмарлы матэ карисько шуыса (Кол. 2:16—18). Со сяна, Павел вераз на кышкытлыкъёс сярысь, кудъёсыныз ми но пумиськыны быгатомы. Со валэктӥз, мар кароно, азон-калгон мыл потонъёслы медам сётске шуыса, кызьы вын-агайёсын но сузэр-апайёсын кусыпъёсмес тупатоно но кызьы семьяысь шуг-секытъёсмес сэрттоно-пертчоно. Ойдолэ учкомы куд-ог кышкытлыкъёсты, кудъёсыз сярысь Павел Колоссыослы гожтэтаз вераз, но эскеромы солэсь визь-кенешъёссэ.

АЗОН-КАЛГОН МЫЛ ПОТОНЪЁСТЭС «БЫДТЭ»

4. Малы, азон-калгон мыл потонъёсын сэрен, ми кузьымтэк кыльыны быгатӥськомы?

⁴ Христианъёслы паймымон оскиськонзы сярысь тодазы вайытыса, Павел гожтӥз: «Музъем вылысьсэ, мар вань пушкады, ваньзэ быдтэ: азыса-калгыса улонэз, кырсь ужез-малпанэз, азон сьӧлыклы ӝуатскем мылкыдэз, калгонлы-юмшанлы мылкыд лӧпкытонэз, узырлык вӧзы узырлык люкаса улонэз» (Кол. 3:5). Азон-калгон мыл потонъёс туж кужмо луыны быгато, но соос понна ми кузьымтэк кыльыны быгатӥськомы. Тани мар вераз одӥг вын-агай, кудӥз, азон-калгон сьӧлтэтэ сюрыса, кенешез кельтӥз но собере берен берытскиз: «Монэн сокем юн кужым валтӥз, мон марзэ-созэ валатэк ик кыли. Нош куке валай, соку бер вал ини».

5. Мар кароно, кышкытлыкен пумиськыкумы, асьмеды утён понна?

⁵ Вань югдуръёс, кудъёсаз милемлы тужгес но сак луоно, Иеговалэсь шонерлыко эсэпъёссэ медам тӥялэ шуыса. Кылсярысь, пумиськылыны кутскем христианъёслы нырысь ик вераськоно, мар карыны яра, нош мар карыны уг яра, чупаськон но ог-огзы борды йӧтскылон пумысен. Озьы ик вераськоно со сярысь, мар соос карозы, адямитэм интые огназы медаз кыле шуыса (Мад. 22:3). Кышкытлыкен пумиськыны быгатэ вын-агай но, кудӥз командировкае кошке яке кышномуртэн ӵош ужано луэ. Сыӵе кышкытлыкен сузэр-апай но пумиськыны быгатэ (Мад. 2:10—12, 16). Тӥ сыӵе югдуре шедиды ке, соку ик вералэ, тӥ Иеговалэн Адӟись-Ивортӥсез луиськоды шуыса. Асьтэды адӟем карымон возе но эн вунэтэ: флирт умоезлы уг вутты. Озьы ик кышкытлыкен пумиськыны быгатомы, куке мылкыдмы куашкамын яке огнамы кылимы кадь потэ. Сыӵе дыре вӧзамы кин ке но мед луоз кадь потэ, кин милемыз яратэ но вала. Мылкыдмы куашкам дыръя котькыӵе адямилэн саклык висъямез милемлы дуно потоз. Тӥляд но куке сыӵе шӧдонъёсты кылдӥзы ке, вазиське Иеговалы но солэн калыкезлы. Со юрттоз тӥледлы кузьым басьтыны. (Лыдӟы Псалтирез 33:19; Мадёнъёсты 13:21.)

6. Мае тодамы возёно, шулдыръяськон амалъёсты бырйыкумы?

⁶ Азон-калгон мыл потонъёсты «быдтон» понна, милемлы кырсь шулдыръяськонъёслэсь палэнын возиськоно. Тросэз туала шулдыръяськонъёс Содомен Гоморралы кельшо (Иуда 7). Ӵем дыръя книгаос, фильмъёс но телевидение пыр азон-калгонэз умоен возьмато но уг верало, кыӵе урод бервылъёсы вутто сыӵе шулдыръяськон амалъёс. Бырйытэк ваньзэ учкимы, лыдӟимы но кылзӥмы ке, азон-калгон мыл потонъёсты ум ворме. Соин ик быръёно со шулдыръяськонъёсты, кудъёсыз милемыз кузьымтэк уз кельтэ (Мад. 4:23).

«ЯРАТОНЭН ДӤСЯСЬКЕ-ШОБЫРСКЕ»

7. Кыӵе шуг-секытъёс куддыръя кылдо христиан кенешын?

⁷ Христиан кенеш — зэмос бакель карон. Пумиськонъёсамы ми Инмарлэсь Кылзэ дышетӥськомы но ог-огмес буйгатӥськомы. Со юрттэ милемлы котьку но кузьыммес тодамы возьыны. Озьы ке но куддыръя кенешын валамтэос кылдыны быгато. Соосты тупатыны ӧм тырше ке, сюлмамы йыркуръяськон каръяськыны быгатоз. (Лыдӟы 1 Пётрлэсь 3:8, 9.)

8, 9. а) Кыӵе сямъёс милемлы кузьым басьтыны юрттозы? б) Милемыз кин ке ӝоже уськытӥз ке, мар карыны луоз, тупаса улон понна?

⁸ Мар кароно, йыркуръяськон милемыз кузьымтэк медаз кельты шуыса? Павел ӧтиз Колоссы карын улӥсьёсты: «Тӥ Инмарлэн быръемъёсыз, вӧсяськись калык, Солэн яратоно муртъёсыз! Дӥсяське-шобырске гажась-жалясь, лякыт сямо, зӥбыт-востэм, кема чидась луонлэн дӥськутэныз. Ог-огдэс чидаса улэ, кинлэн ке кин ке вылэ йыркурез вань ке, ог-огдылы простить каре, кызьы Христос тӥледлы простить кариз, озьы ик тӥ но простить каре. Эшшо яратонэн дӥсяське-шобырске, со дун-шектэм луонлэн шорсюлмыз [«огъя улонлэн дун-шектэм герӟетэз», ВД] луэ» (Кол. 3:12—14).

⁹ Яратон милемлы ог-огмес простить карыны юрттэ. Мар кароно, вын-агай яке сузэр-апай тӥледыз ӝоже уськытӥз ке? Тодады вае учырез, куке тӥ асьтэос кинэ ке кылыныды яке уженыды ӝоже уськытӥды, нош со тӥледыз простить кариз. Шум ӧд потэ-а тӥ, озьы тӥледлы яратэмзэс возьматӥзы шуыса? (Лыдӟы Екклесиастэз 7:21, 22.) Но тужгес но ми тау кариськомы Иисус Христослэн яратэмезлы, кудзэ со возьматӥз, Инмарлэсь зэмос ужась-тыршисьёссэ одӥг кенеше огазеяса (Кол. 3:15). Ваньмы асьмеос одӥг Инмарез яратӥськомы, одӥг иворез вераськомы но одӥг кадь шуг-секытъёсын пумиськиськомы. Ог-огмес яратыса простить кариськомы ке, ми кусыпъёсмес юнматӥськомы но кузьыммы сярысь тодамы возиськомы.

10, 11. а) Маин кышкыт луэ вожъяськон? б) Мар кароно, вожъяськон милемыз кузьымтэк медаз кельты шуыса?

¹⁰ Вожъяськон но милемыз кузьымтэк кельтыны быгатэ. Библиын вань примеръёс, кудъёсыз тодамы вайыто, макем кышкыт луэ со сям, но чакласькыны косо. Кылсярысь, Каин Авель вынызлы вожъяськыны кутскиз но вииз сое. Корей, Дафан но Авирон, Моисейлы вожъяськыса, солы пумит ӝутскизы. Саул эксэй Давидэз виыны тыршиз, малы ке шуоно солэн азинлыко луэмезлы вожъяськиз. Соин ик паймонэз ӧвӧл, Библиын таӵе кылъёс гожтэмын шуыса: «Уго кытын вожъяськон но ачимъяськон, отын луэ тупатэк улон, вань урод ужъёс» (Иак. 3:16).

¹¹ Сюлэммы яратонэн тырмемын ке, отчы вожъяськон уз каръяськы. Инмарлэн Кылаз верамын: «Яратон кема чида, гажа-жаля; яратон уг вожъяськы» (1 Кор. 13:4). Вожъяськон сюлмамы медаз каръяськы шуыса, милемлы тыршоно ваньмыз шоры Инмарлэн синмыныз учкыны но учкыны вын-агайёс но сузэр-апайёс шоры, одӥг мугор шоры кадь, кудӥз христиан кенеш луэ. Со юрттоз милемлы мукетъёсыз понна шумпотыны, малы ке шуоно Библиын верамын: «Данэ поттӥське ке одӥгез люкет, соин валче вань люкетъёс шумпото» (1 Кор. 12:16—18, 26). Ойдолэ вын-агайёсмылы ум вожъяське, нош шумпотомы соослэн азинлыкъёссылы. Та пумысен умой пример возьматӥз Сауллэн Ионафан пиез. Со Давидлы ӧз вожъяськы, куке Инмар сое ӧз бырйы, нош Давидэз эксэе бырйиз. Ионафан котькыӵе ужын Давидлы юрттӥз (1 Экс. 23:16—18). Быгатӥськомы-а ми Ионафан кадь ик яратэммес возьматыны?

БЫДЭС СЕМЬЯДЫ КУЗЬЫМ МЕД БАСЬТОЗ

12. Библиысь кыӵе визь-кенеш семьяослы кузьым басьтыны юрттэ?

¹² Семьяын тупаса но шудо улон мед луоз шуыса, Библиысь возетъёсты уже кутоно. Соку быдэс семья кузьым басьтоз. Колоссы карын улӥсьёслы гожтэтаз Павел христиан семьяослы умой визь-кенеш сётӥз: «Кышномуртъёс! Асьтэлэн кузпалъёстылы тэрытскыса улэ, со Кузё-Инмарлы ярамон. Пиосмуртъёс! Асьтэлэсь кышноостэс яратэлэ, лекъяськыса-уродъяськыса соосын эн улэ. Нылпиос! Котьмар ласянь но анай-атайёстылэсь кылзӥськисесь луэ, уго со Инмарлы ярамон. Атайёс! Асьтэлэсь нылпиостэс эн керӟегъяськытэ, соос ӝоже усёно медаз луэ» (Кол. 3:18—21). Кыӵе пайда вайыны быгато та кылъёс тӥляд семьядылы?

13. Кызьы христиан кышномурт картсэ Инмар пала берыктыны быгатэ?

¹³ Мар кароно христиан кышномуртлы, солэн картэз Иеговалы уг йыбыртъя ке но солы потэ ке, картэз ассэ соин умойгес возьыны кулэ шуыса? Быроз-а шуг-секыт, со сое ялан йырйыса улӥз ке? Кышноез картсэ вормиз ке но ваньзэ лэсьтыны косӥз ке озьы, кызьы аслыз кулэ, картэз зэмлыкен тунсыкъяськыны кутскоз-а? Уз, дыр. Нош христиан кышномурт картсэ семьяезлэн йырыз луэ шуыса лыдъяз ке, семьяязы тупаса улон луоз. Ассэ озьы возьыса, христиан кышномурт Иеговаез данъялоз, но, кин тодэ, оло со картсэ Инмар пала берыктоз, но соос кыкназы ик ӵош, Иеговалы ужаса-тыршыса, кузьым басьтыны быгатозы. (Лыдӟы 1 Пётрлэсь 3:1, 2.)

14. Мар кароно христиан пиосмуртлы, кудӥзлэн кышноез Иеговалы уг йыбыртъя но сое уг гажа кадь потэ ке?

¹⁴ Нош мар кароно христиан пиосмуртлы, кудӥзлэн кышноез Иеговалы уг йыбыртъя но сое уг гажа кадь потэ ке? Гажалоз-а кышно картсэ, кудӥз со шоры кесяське но возьматыны тырше, кин коркан кузё луэ? Уз! Инмарлэн потэ, семьяослэн йыръёссы Иисуслэсь адӟем мед карозы но кышнооссэс мед яратозы шуыса (Еф. 5:23). Иисус чидаса но яратыса кенешен кивалтэ (Лука 9:46—48). Карт но, Иисус кадь ик, чидась но яратӥсь луиз ке, оло со кышнозэ Инмар пала берыктыны быгатоз, но соос ӵош зэмос Инмарлы ужалозы-тыршозы.

15. Кызьы христиан мурт кышноезлы яратэмзэ возьматыны быгатэ?

¹⁵ Библия картъёслы визь-кенеш сётэ: «Пиосмуртъёс! Асьтэлэсь кышноостэс яратэлэ, лекъяськыса-уродъяськыса соосын эн улэ» (Кол. 3:19). Кышнозэ яратӥсь карт, кылзэ кышнозэ но оскытэ сое, солэсь малпанъёссэ лыдэ басьтэ шуыса (1 Пётр 3:7). Веранэз ӧвӧл, кышноезлэсь котькуд куронзэ картэз уз быдэсты, озьы ке но ӵем дыръя кышноезлэн визь-кенешъёсыз юртто солы визьмо ужпум кутыны (Мад. 15:22). Яратӥсь карт кужмысь уг косы кышнозэ сое гажаны, нош тырше ассэ возьыны озьы, кышноез сое мед гажалоз шуыса. Ӵемысь семья йырлэн кышнозэ но нылпиоссэ яратэмез быдэс семьялэсь мылкыдзэ ӝутэ Иеговалы ужаны-тыршыны но пырак улон басьтон доры кыстӥськыны.

ЕГИТЪЁС, НОМЫР НО ТӤЛЕДЫЗ КУЗЬЫМТЭК МЕДАЗ КЕЛЬТЫ

16, 17. Мар юрттоз егитъёслы анай-атайёссылы вожзэс поттытэк улыны?

¹⁶ Нош мар вераны луоз егитъёс сярысь? Быдэ вуымтэ егитъёслы анай-атайёссы соосты уг валало но асьсэды ортчыт чурыт возё кадь потэ. Соос малпаськыны но быгатозы, кулэ-а улонзэс Иеговалы сӥзьыны, ӧвӧл-а шуыса. Нош тӥ, егитъёс, Иеговаез кельтыны малпады ке, ӝоген валалоды, нокин но тӥледыз анай-атайдылэсь но кенешысь вын-агайёслэсь но сузэр-апайёслэсь юнгес уг яраты шуыса.

¹⁷ Нош анайды но атайды тӥледыз ноку но кыл кутыны ӧй косысалзы ке? Соку тӥ малпасалды, вылды, тӥ соослы нокыӵе ик уд потӥське шуыса (Евр. 12:8). Но тӥледлы уг кельшы, оло, со, кызьы анайды но атайды тӥледыз будэто. Вождэс эн поттэ солы, нош тырше валаны, малы соос озьы будэто. Асьтэды кияды возьыны тырше но, тӥледыз тэргало ке, ӝоже эн усе. Инмарлэн Кылаз гожтэмын: «Визьмо адями кылзэ кутыны быгатэ, визьнодо мурт ассэ бугыръяськыны уг лэзьы» (Мад. 17:27). Азяды ужпум пуктэ визьмо адями луыны, кудӥз быгатэ сётэм визь-кенешез вожзэ поттытэк кылзыны но отысь дышетскыны, саклык висъятэк солы, кызьы со визь-кенеш сётэмын вал (Мад. 1:8). Туж умой, куке анай-атайёс Иеговаез ярато! Соослэн туж потэ, тӥ асьтэлэсь кузьымдэс мед басьтоды шуыса.

18. Малы кузьым сярысь вунэтоно ӧвӧл?

¹⁸ Милемлы туж кельше малпаськыны кузьыммы сярысь — инмын яке рай музъем вылын пырак дауръёс ӵоже улон сярысь. Со быдэсмонтэм малпан гинэ ӧвӧл, со зэмос оскон, кудзэ ачиз Кылдытӥсь сётэ. Библиын верамын, рай музъем «Кузё-Инмарез тодонэн пачылмыса улоз» шуыса (Ис. 11:9). Отын улӥсь адямиосты ачиз Инмар ваньмызлы дышетоз. Сыӵе кузьым понна кужыммес жаляно ӧвӧл. Ойдолэ котьку тодамы возёмы Иеговалэсь кыл сётонзэ, но номыр но милемыз кузьымтэк медаз кельты!