Инмарлэн законъёсыз но возетъёсыз вылын малпаськыса, возьытлыктэс дышетэ

1. Маин ми пудо-животъёслэсь вылӥынгес луиськомы?

АДЯМИОС пудо-животъёслэсь трослы вылӥынгес луо. Кылсярысь, милям возьытлыкмы вань. Сыӵе кузьым, возьытлык, нырысетӥ адямиослы, Адамлы но Евалы, сётэмын вал ини. Кытысь ми сое тодӥськомы? Иеговалэсь законзэ тӥямзы бере соос пегӟизы — соосты возьытлыксы йырйыны кутскиз.

2. Малы возьытлыкез компасэн ӵошатыны луоз? (Учке статья кутсконысь суредэз.)

² Адямиез, кудӥз аслэсьтыз возьытлыксэ уг дышеты, ӵошатыны луоз кораблен, кудӥзлэн капитанэз сӧриськем компасэз уже кутэ. Сӧриськем компасэн ву вылэ потыны туж кышкыт. Тӧлъёс но океанысь вуос люкетэмен сэрен, корабль сюрессэ ыштыны быгатэ. Компас шонер возьматэ ке, со юрттэ капитанлы шонер сюрестӥ мыныны. Компасэн милесьтым возьытлыкмес ӵошатыны луоз. Возьытлыкмы шонер дышетэмын ке, со юрттоз милемлы шонер сюрес бырйыны.

3. Мар луоз, возьытлыкез ӧм дышетэ ке?

³ Адями возьытлыксэ ӧз дышеты ке, со сое шонертэм ужъёслэсь уз куты (1 Тим. 4:1, 2). Со сяна, со оскытыны но быгатоз, уродэз — со ӟеч шуыса (Ис. 5:20). Иисус вераз аслаз дышетскисьёсызлы: «Вуэ сыӵе дыр, куке котькудӥз тӥледыз виылӥсь мурт со Инмарлы служить каре шуыса малпалоз» (Иоанн 16:2). Ӵапак озьы малпазы Стефанэз но мукет христианъёсты виисьёс (Ап. уж. 6:8, 12; 7:54—60). Малпалэ гинэ: тросэз туж оскись адямиос туж лек йыружъёс лэсьтылӥзы, кылсярысь, адямиосты виылӥзы, но веразы, сыӵе ужъёсты соос Инмар понна лэсьтӥзы шуыса. Но зэмзэ вераса, озьы соос Инмарлэсь законзэ тӥязы (Пот. 20:13). Зэм, возьытлыксы соосты шонертэм сюрестӥ нуэ.

4. Кыӵе учыре возьытлыкмы шонер сюрес возьматоз?

⁴ Кыӵе учыре возьытлыкмы милемлы шонер сюрес возьматоз? Инмарлэн Кылысьтыз законъёс но возетъёс дышето, сьӧлыкъёсмес шарае потто, тупато но визьмало милемыз (2 Тим. 3:16). Соин ик Библиез туж тыршыса дышетӥмы ке, со вылын малпаськимы ке но басьтэм тодон-валанмес улонамы кутӥмы ке, ми быгатомы возьытлыкмес дышетыны но ваньмыз шоры Инмарлэн синмыныз учкыны. Соку оскыны луоз, возьытлыкмы милемыз шонер сюрестӥ нуэ шуыса. Ойдолэ эскеромы, кызьы Иеговалэн законъёсыз но возетъёсыз юртто милемлы возьытлыкмес дышетыны.

ВОЗЬЫТЛЫК НО ИНМАРЛЭН ЗАКОНЪЁСЫЗ

5, 6. Кыӵе пайда ваё милемлы Иеговалэн законъёсыз?

⁵ Инмарлэн законъёсыз милемлы пайда мед ваёзы шуыса, соосты тодыны гинэ ӧжыт. Соосты яратыны но гажаны дышетсконо. Инмарлэн Кылаз верамын: «Уродэз-лекез адӟемпотостэм каре, нош ӟечлыкез — яратэ» (Ам. 5:15). Мар кароно со понна? Со понна тыршоно ваньмыз шоры Иеговалэн синмыныз учкыны. Таӵе пример вераломы. Пуктэ син азяды, тӥ изьыны курадӟиськоды шуыса, но эмъясь ӵектэ тӥледлы пайдаё сиён сиыны, спортэн вырыны но улонады мукет воштӥськонъёс лэсьтыны. Тӥ солэсь кылзӥськиськоды но шӧдӥськоды, ваньмыз со тӥледлы пайда вае шуыса. Пайдаё визь-кенешъёс сётэмез понна тӥ эмъясьлы туж тау кароды, вылды.

⁶ Со выллем ик Кылдытӥсьмы милемлы законъёс сётӥз, кудъёсыз сьӧлыклэн секыт бервылъёсызлэсь утё но улонмес шудогес каро. Малпалэ ай, макем бадӟым пайда ваё милемлы Библиысь законъёс. Соос дышето, уг яра шуыса ӧрекчаськыны, уродзэ малпаны, лушкаськыны, азыса-калгыса ветлыны, лек ужъёс лэсьтыны но тунаськыны-пелляськыны. (Лыдӟе Мадёнъёсты 6:16—19; Усьт. 21:8.) Иеговалэсь эриксэ быдэсъяськомы но солэсь бакель каремзэ адӟиськомы ке, соку милям сюлэммы тау каронэн пачылме но ми солэсь законъёссэ эшшо но юнгес яратыны кутскиськомы.

7. Кызьы юрттэ милемлы Библиын гожтэм учыръёс вылын малпаськон?

⁷ Шумпотоно, малы ке дышетскон понна, милемлы кулэ ӧвӧл шуыса Инмарлэсь законъёссэ тӥяны но ас выламы сьӧлыклэсь секыт бервылъёссэ шӧдыны. Инмарлэсь Кылзэ лыдӟыса, ми мукет адямиослэн янгышъёссы вылын дышетскыны быгатӥськомы. Мадёнъёсын 1:5 верамын: «Визьлыко мурт кылзӥськоз но тодон-валанзэ будэтоз». Библиысь пӧртэм учыръёсты лыдӟыса но соос вылын малпаськыса, ми тросэзлы дышетскиськомы. Кылсярысь, малпалэ, кӧня куректон чидаз Давид эксэй, куке со Иеговалэсь законзэ тӥяз но Вирсавияен азон-калгон сьӧлыке пыриз (2 Экс. 12:7—14). Библиысь со учыр сярысь лыдӟыку, таӵе юанъёс вылын малпаськыны луоз: «Мар карыны быгатысал Давид эксэй, со секыт сьӧлыкез лэсьтонтэм но солэн секыт бервылъёсызлэсь курадӟонтэм вылысь? Мон со выллем югдуре шеди ке, быгато-а мон кужым шедьтыны, шонер ужпум кутон понна? Мар мон каро: Иосиф сямен бызьыса кошко яке Давид сямен сьӧлыклы сётско?» (Ул.-выл. 39:11—15). Малпаськимы ке, кыӵе секыт бервылъёсы вуттыны быгатэ сьӧлык, ми уродзэ эшшо но юнгес адӟемпотостэм каромы.

8, 9. а) Малы милемлы возьытлык сётэмын? б) Кызьы герӟаськемын возьытлыкмы но Иеговалэн возетъёсыз?

⁸ Ми палэнын возиськыны тыршиськомы солэсь, мае Инмар адӟемпотостэм каре. Нош мар, ми сюримы ке сыӵе югдуре, кудӥз сярысь Библиын шонерак номыр верамын ӧвӧл? Кызьы валано, мар возьма милесьтым Инмар? Та учырын милемлы юрттоз Библия вылэ пыкиськыса дышетэм возьытлыкмы.

⁹ Иегова милемыз туж яратэ. Соин ик со сюлмаськиз, Библиын гожтэмын мед луозы шуыса возетъёс, кудъёсыз возьытлыкенымы ӵош юртто милемлы шонер ужпумъёс кутыны. Со вераз: «Мон Кузё-Инмар тынад Инмаред, тонэ пайдаё ужлы дышетӥсь, тонэ мыноно сюрестӥд нуись» (Ис. 48:17, 18). Куке Библиысь возетъёс вылын малпаськиськомы но лэзиськомы соослы сюлмамы пыӵаны, озьы ми возьытлыкмес дышетӥськомы. Нош со юрттэ милемлы шонер ужпумъёс кутыны.

ВОЗЬЫТЛЫК НО ИНМАРЛЭН ВОЗЕТЪЁСЫЗ

10. Мар со сыӵе возет но кызьы Иисус дышетыкуз возетъёсты уже кутӥз?

¹⁰ Возет — со валтӥсь зэмлык, кудӥз вылын малпаськыса, ми шонер ужпумъёс кутыны быгатӥськомы. Возетэз валан понна, тодоно, кызьы малпаське Закон Сётӥсь но малы со сётӥз милемлы со яке та законэз. Музъем вылын ужакуз-тыршыкуз, Иисус валтӥсь зэмлыкъёсты усьтӥз, солэн дышетскисьёсыз мед валалозы, соослэн ужъёссы, мылкыдзы гинэ но, умой яке урод бервылъёсы вутто шуыса. Кылсярысь, со дышетӥз, йыркуръяськон лек ужъёсы вуттыны быгатэ шуыса, нош кин ке шоры ӝуатскем мылкыдын учкон — кузпалэз азон-калгон сьӧлыке кыскыны (Матф. 5:21, 22, 27, 28). Милям потэ ке, возьытлыкмы шонер сюрес мед возьматоз шуыса, милемлы котьку Инмарлэсь возетъёссэ санэ пононо. Соку ми Инмарез данъяны быгатомы (1 Кор. 10:31).

11. Макем пӧртэм луыны быгатэ возьытлык?

¹¹ Куддыръя кык христианъёслэн Библия вылэ пыкиськыса дышетэм возьытлыксы одӥг югдур шоры пӧртэм сямен учке. Басьтомы, кылсярысь, вина юонэз. Библия кӧня ке вина юэмлэсь уг куты. Со алэ ортчыт трос но вис карытэк вина юэмлэсь (Мад. 20:1; 1 Тим. 3:8). Нош христиан мурт трос вина уг юы ке, вера-а со, солы номыр сярысь малпаськоно ӧвӧл ни шуыса? Уг. Солэн возьытлыкез ӧжыт вина юыны лэзе ке но, солы малпано на мукетъёсызлэн возьытлыксы сярысь.

12. Кызьы Римъёслы 14:21 возет юрттоз милемлы мукетъёсызлэсь возьытлыксэс гажаны?

¹² Павел вера вал, христианъёслы мукетъёсызлэсь возьытлыксэс гажано шуыса. Со гожтӥз: «Тынад братэд медаз канжаськы яке визь сынаськонэ медаз сюры, яке медаз катьтэммы шуиськод ке, соку, эсьмаса, сӥль сиытэк, вина юытэк, номыр сыӵе-таӵезэ лэсьтытэк улод» (Рим. 14:21). Дась-а тӥ куштӥськыны солэсь, мар карыны праводы вань, вын-агайды тӥ понна медаз канжаськы шуыса, кудӥзлэн возьытлыкез тӥлесьтыд пӧртэм луэ? Зэмлыкез тодэмзылэсь азьло куд-ог вын-агайёс трос вина юизы, нош собере ужпум кутӥзы чик но вина юытэк улыны. Веранэз ӧвӧл, милям уг поты, соос пӧлысь кудӥз ке азьлоез борды мед кутскоз но аслыз изъян мед ваёз шуыса (1 Кор. 6:9, 10). Возьматозы-а кузёос яратэмзэс, куное лыктэм вын-агай юыны пумит луэм бере но, сое кужмысь вина юыны косӥзы ке?

13. Кызьы Тимофей мукетъёсызлэсь возьытлыксэс гажамзэ возьматӥз, соос ӟеч иворез мед кылзозы шуыса?

¹³ Куке Тимофейлы ог 20 арес вал, вылды, со соглаш кариськиз вандӥськон сямез ортчыны, со туж вӧсь вал ке но. Со солы соглаш кариськиз, иудейёс, кудъёсызлы со ӟеч иворез вераны кулэ вал, соин сэрен медаз канжаське шуыса. Солэн мылкыдыз апостол Павеллэн кадь вал (Ап. уж. 16:3; 1 Кор. 9:19—23). Адӟем кариськоды-а тӥ Тимофейлэсь? Дась-а тӥ мукетъёсыз понна малэсь ке но куштӥськыны яке вӧсь луонэз чиданы?

«БЫДЭ ВУОНЭ ДЫРТОМЕ»

14, 15. а) Мар кароно, духовноез ласянь быдэ вуон понна? б) Кызьы духовноез ласянь быдэ вуэм христиан мурт мукетъёсыз шоры учке?

¹⁴ Вань христианъёслы, «Христослэн дышетонэзлэн кутсконэз бордысь потыса», быдэ вуонэ дыртоно (Евр. 6:1). Но быдэ вуон ас эрказ уг лыкты. Со понна милемлы кужым пононо. Милемлы Библиысь тросгес тодон-валан басьтоно но отысь зэмлыкъёсты умойгес валаны дышетсконо. Тӥни малы милемлы выльысь но выльысь тодамы вайыто, макем кулэ Библиез котькуд нунал лыдӟыны (Пс. 1:1—3). Тӥ асьтэлы сыӵе ужпум пуктӥды-а? Пуктӥды ке, соку тӥ Иеговалэсь законъёссэ но возетъёссэ умойгес валалоды.

¹⁵ Христианъёс понна тужгес но кулэ луись закон — яратыны Инмарез но яратыны матысьёсмес, асьмеды кадь ик. Иисус аслаз дышетскисьёсызлы вераз: «Куспады яратонды луиз ке, тӥ Мынам дышетскисьёсы шуыса, тӥледыз ваньмыз тодмалозы» (Иоанн 13:35). Иаков, Иисуслэн выныз, яратонэз «эксэй закон» шуыса нимаз (Иак. 2:8). Нош Павел вераз: «Яратон — со Инмар законэз быдэсъян» (Рим. 13:10). Ми солы ум паймиське, малы ке шуоно Библиын верамын: «Инмар — со яратон» (1 Иоанн 4:8). Инмарлэн яратонэз со шӧдон гинэ ӧвӧл. Аслэсьтыз яратэмзэ со ужъёсыныз возьматӥз. Иоанн гожтӥз: «Инмар асьмемыз яратонзэ тазьы усьтӥз: Со Аслэсьтыз одӥг гинэ Пизэ дунне вылэ ыстӥз, Со пыр асьмеос улон мед басьтомы шуыса» (1 Иоанн 4:9). Ми яратӥськомы ке Иеговаез, Иисусэз, вын-агайёсмес но мукет адямиосты, со вера, ми духовноез ласянь быдэ вуэм христианъёс шуыса (Матф. 22:37—39).

16. Малы духовноез ласянь быдэ вуыса, ми тросгес дунъяны кутскиськомы Инмарлэсь возетъёссэ?

¹⁶ Духовноез ласянь быдэ вуыса, ми тросгес дунъяны кутскиськомы Инмарлэсь возетъёссэ. Малы? Малы ке шуоно законъёсты кыӵе ке нимысьтыз учыръёсы гинэ кутыны луэ, нош возетъёсты трос пӧртэм учыръёсын кутыны быгатӥськомы. Кылсярысь, пинал уг вала, кыӵе кышкытлык вайыны быгато урод эшъёс, соин ик, пиналзэс утён понна, анай-атайёс правилоос куто (1 Кор. 15:33). Нош будэмезъя пинал ачиз малпаськыны дышетске Библиысь возетъёс вылын но солы луыса ачиз умой эшъёс бырйыны быгатэ. (Лыдӟе 1 Коринфъёслы 13:11; 14:20.) Библиысь возетъёс вылын малпаськыса, ми умойгес валаны кутскиськомы, кызьы Инмар учке со яке та юан шоры, но милям возьытлыкмы эшшо умойгес юрттӥсь луэ.

17. Малы вераны луоз, визьмо ужпумъёс кутон понна, милям ваньмыз вань шуыса?

¹⁷ Милям ваньмыз вань сыӵе визьмо ужпумъёс кутон понна, кудъёсыз Инмарез шумпоттысалзы. Инмарлэн Кылысьтыз законъёсты но возетъёсты умой валаськомы ке, соку ми тодӥсь-валась, ӟеч ужъёсты лэсьтыны дась луомы (2 Тим. 3:16, 17). Соин ик, «Инмарлэсь эриксэ валаны» тыршон понна, милемлы туж кулэ быгатыны Библиысь возетъёсты шедьтыны (Еф. 5:17). Милемлы юрттоз «Возьмаськон Башнялэн публикациосызлэн индекссы» (ӟуч), «Публикациосъя эскерыны юрттэт» (ӟуч) но эскерон понна мукет тӥрлыкъёс. Соослы луыса ас поннамы Библиез дышетон но семьяен йыбырттонмы зэмзэ ик пайдаё луозы.

БИБЛИЯЯ ДЫШЕТЭМ ВОЗЬЫТЛЫК — ЗЭМОС БАКЕЛЬ КАРОН

18. Мар сётэ милемлы Иеговалэн законъёсызъя но возетъёсызъя улэммы?

¹⁸ Мар милемлы сётэ Иеговалэн законъёсызъя но возетъёсызъя улэммы? Псалтирьын 118:97—100 гожтэмын: «Макем мон Тынэсьтыд закондэ яратӥсько! Нунал лумбыт со сярысь малпаськисько. Аслад курон-косонъёсыныд Тон монэ тушмонъёсы сярысь визьмогес карид, Тынад курон-косонъёсыд котьку но мынам сюлмам уло. Вань дышетӥсьёсылэсь мон визьмогес луи, уго курон-косонъёсыд бордысь аслым визь-нод басьтӥсько. Пересьёслэсь тросгес валаны кутски, уго Тынэсьтыд косонъёстэ сюлмам возисько». Библиысь законъёс но возетъёс вылын малпаськон понна нимысьтыз дыр висъяськомы ке, соку ми визьмогес луиськомы но соосты умойгес валаны кутскиськомы. Возьытлыкмес Инмарлэн законъёсыз но возетъёсыз вылэ пыкиськыса дышетыны тыршыса, ми «Христослэн тыр луонэзлэн арескозяз» быдэ вуомы (Еф. 4:13).