Кӧня дыр?

МАР тӥ кариськоды, куке тӥляд тодэмды потэ, кӧня дыр? Тӥ час шоры учкиськоды, луоз. Нош мар тӥ вераськоды, куке тӥлесьтыд юало: «Кӧня дыр?» Сое пӧртэм амалэн вераны луэ.

Кылсярысь, час вылын 13:30. Пӧртэм адямиос сое пӧртэм сямен вералозы. Кин ке но вералоз, али дас куинь час куамын минут шуыса, мукетыз — час но куамын минут, нош куинетӥез — одӥг но ӝыны.

Библиез лыдӟыкуды, тӥ малпаськиды, луоз, кызьы со вакытэ адямиос дырез веразы. Еврей Гожтэмъёсын таӵе кылъёс но веранъёс пумисько: «ӵукна», «нуназе шор» но «ӝыт» (Ул.-выл. 8:11; 19:27; К. Зак. 28:29). Нош куддыръя дырез шонергес вераллязы.

Вашкала дыръёсы каръёсын возьмаськисьёс вал, кудъёсыз уйин карын улӥсьёслэсь умзэс утизы. Трос дауръёс ӵоже израиль калык уез куинь возьмаськон вакытъёслы люкылӥз. Кылсярысь, Судьяос книгаын 7:19 «уйшор уйин возьмаськисьёслэн воштӥськонзы» сярысь верамын. Нош со дырлы, куке музъем вылэ Иисус лыктӥз, еврейёс, грекъёслэсь но римъёслэсь адӟем карыса, уез ньыль возьмаськон вакытъёслы люкыны кутскизы.

Возьмаськон вакытъёс сярысь Евангелиосын но верамын. Кылсярысь, куке Иисус ву вылтӥ пыж доры мынӥз, кудаз дышетскисьёсыз вал, соку «ӵукна пал, ӟардон азьын» возьмаськон вакыт вал (Матф. 14:25). Лукалэсь 12:38 Иисус вераз «уйшоре» но «ӵук ӟардон азьын» возьмаськон вакытъёс сярысь.

Куке Иисус дышетскисьёсызлы вераз: «Сак улэ, уд тодӥське уго, ку бертоз коркалэн кузёез — ӝыт-а яке уйшор уе- а, атасъёс чоръяны кутскыку-а яке ӵукна-а», со ньылез ик возьмаськон вакытъёс сярысь вераз (Марк 13:35). Нырысетӥез вакыт, «ӝыт», кутске вал шунды пуксем бере но быре вал кызь одӥг часын. Кыкетӥез, «уйшор уй», кызь одӥг часысен кутскыса, уйшоре быре вал. Куинетӥез возьмаськон вакыт, «атасъёс чоръяны кутскон», уйшорысен куинь часозь кыстӥське вал. Иисусэз кырмон уе, атас ӵапак куинетӥ вакытэ чортӥз, дыр (Марк 14:72). Ньылетӥез возьмаськон вакыт, «ӵукна», куинь часысен шунды ӝужанозь кыстӥське вал.

Озьыен, вашкала дыръёсы асьмелэн кадь часъёс ӧй вал ке но, адямиос дырез вераны быгато вал.