Шудо соос, кинъёс шудо Инмарлы ужало-тыршо

1. Малы Иеговалэн ужась-тыршисьёсыз — шудо адямиос? (Учке статья кутсконысь туспуктэмъёсты.)

ИЕГОВАЛЭН АДӞИСЬ-ИВОРТӤСЬЁСЫЗ — шудо адямиос. Кенешлэн пумиськонъёсаз, конгрессъёсын яке эшъёсынызы пумиськыкузы, котьку кылыны луэ, кызьы соос шумпотыса ог-огенызы верасько но серекъяло. Малы соос сокем шудоесь? Малы ке шуоно соос тодо «шудо Инмарез», Иеговаез, солы ужало-тыршо но солэсь адӟем каро (1 Тим. 1:11, ВД; Пс. 15:11). Иеговалэн потэ, ми но со кадь ик шудо мед луомы шуыса. Солы луыса милям шумпотыны трос мугъёсмы вань (К. Зак. 12:7; Екк. 3:12, 13).

2, 3. а) Мар со шудо луон? б) Мар милесьтым шудо улонмес сӧрыны быгатоз?

² Нош мар вераны луоз тӥ сярысь? Лыдъяськоды-а тӥ асьтэды шудо адямиен? Шудо луон — со куке астэ умой шӧдӥськод но улонлы шумпотыса улӥськод. Библия верамъя, адями зэмзэ ик шудо луыны быгатэ соку гинэ, куке сое Инмар бакель каре. Нош та дуннеын шудо улыны капчи ик ӧвӧл. Малы?

³ Милесьтым шудо улонмес сӧрыны быгато таӵе учыръёс: матысь адямимылэн кулэмез, кузпалэн люкиськон, ужез ыштон. Озьы ик, секыт шудо кыльыны, куке милесьтым дуно адямимес кенешысь поттӥзы яке куке семья огкылысь улэмысь дугдӥз. Татчы ватсаны луоз на огъя дышетскисьёсмылэсь яке ӵош ужасьёсмылэсь серем каремзэс, уйылон-уллянъёсты яке оскон понна пытсэтэ пуктонэз, урод тазалыкез, кема кыстӥськись висёнэз но депрессиез. Эн вунэтэ, Иисус Христослэн адямиосты буйгатэмез но соосты шудо каремез потэ шуыса (Матф. 11:28—30). Гурезь йылын тодытыкуз, со вераз, кызьы шудо луоно шуг-секытъёс шоры учкытэк, кудъёсыныз ми пумиськиськомы, Шайтанлэн дуннеяз улыса.

ИНМАРЕН МАТЫСЬ КУСЫПЪЁС ШУДО ЛУЫНЫ ЮРТТО

4, 5. Мар кароно, шудо луон но шудо кылён понна?

⁴ Гурезь йылын тодытыкуз, кутсконаз ик Иисус вераз, маин нырысь ик герӟаськемын шудо луон: «Духовной кулэяськонъёссэс валасьёс шудоесь, малы ке шуоно соослэн Ин Эксэйлыксы вань» (Матф. 5:3, ВД). Та кулэяськонъёсмес валаськомы ке, ми лыдэ басьтомы, милемлы Инмар сярысь тодон-валан басьтыны кулэ, озьы ик солэн юрттэтэз но кивалтэтэз кулэ шуыса. Соку гинэ ми зэм но шудо луомы но осконмес юнматомы, ӝоген Инмар сётэм кылъёссэ быдэстоз шуыса, нош оскиськон, кудзэ сётэ милемлы Инмарлэн Кылыз, милемлы кужым сётоз шуыса (Тит. 2:13).

⁵ Шудмы котырамы кылдэм югдурен герӟаськемын медаз луы шуыса, милемлы Инмарен кусыпъёсмес юнматоно. Апостол Павел гожтӥз: «Котьку но Кузё-Инмар [Иегова] бордын шумпотыса улэ. Эшшо шуисько на: шумпотыса улэ» (Флп. 4:4). Иеговаен кусыпъёсмес юнматэммы потэ ке, милемлы Инмарлэн визьлыкез кулэ. Инмарлэн Кылаз гожтэмын: «Визьлык шедьтэм мурт шудо, визь-нод басьтэм адями шудо... Визьлык басьтӥсьёс-шедьтӥсьёс понна — со улон писпу луэ, шудоесь сое утьыса улӥсь муртъёс» (Мад. 3:13, 18).

6. Мар кароно на, шудо луон понна?

⁶ Котьку шудо луон понна, Инмарлэсь Кылзэ лыдӟоно гинэ ӧвӧл — милемлы соя улоно. Иисус пусйиз сое, тазьы вераса: «Тае тодӥськоды ке, сое быдэсъяськоды ке, тӥ шудоесь» (Иоанн 13:17; лыдӟе Иаковлэсь 1:25). Сотэк духовной кулэяськонъёсыз быдэстыны но зэмзэ ик шудо луыны уг луы. Нош кызьы шудо кыльыны дуннеын, кудаз шудэз ыштыны туж капчи? Ойдолэ малпаськомы со вылын, мар эшшо вераз на Иисус, Гурезь йылын тодытыкуз.

СЯМЪЁС, КУДЪЁСЫЗ ЮРТТО МИЛЕМЛЫ ШУДО ЛУЫНЫ

7. Малы бӧрдӥсьёс шудо луыны быгато?

⁷ «Бӧрдӥсьёс шудоесь: соос буйгалозы» (Матф. 5:4). Нош бӧрдӥсьёс шудо луыны быгато шат? Иисус ӧз вера вань бӧрдӥсьёс сярысь. Сьӧлыклэсь кышкасьтэмъёс но туж сюлмасько, куке та «секыт дыръёсы» бадӟым шуг-секытъёсын пумисько (2 Тим. 3:1). Но сыӵе адямиос асьсэ сярысь гинэ сюлмасько. Соослэн сюлмаськонъёссы Иеговаен кусыпъёссэс уг юнмато, соин ик соос шудоесь уг луо. «Бӧрдӥсьёс», кудъёсыз сярысь Иисус вераз, со соос, кинъёс духовной кулэяськонъёссэс валало но куректо, та дуннеысь секыт югдурез адӟыса. Соос валало сьӧлыко луэмзэс но адӟо, кыӵе урод бервылъёсы вуттэ адямилэн тырбыдэстэм луэмез. Иегова адӟе сыӵе чылкыт сюлэмо адямиосты. Со буйгатэ соосты Библия пыр, юрттэ соослы шудо луыны но пырак улыны оскон басьтыны. (Лыдӟе Иезекиильлэсь 5:11; 9:4.)

8. Кызьы герӟаськемын зӥбыт-востэм луон но шудо луон?

⁸ «Востэмъёс шудоесь: соос музъем басьтозы» (Матф. 5:5). Кызьы герӟаськемын зӥбыт-востэм луон но шудо луон? Библиысь зэмлыкез тодыса, адямиос воштӥсько. Оло нош, куке но соос чурыт, керетӥсь но лек сямоесь вал. Нош табере соос «выльдӥськись выль адями луонэн» дӥсяськизы но «гажась-жалясь, лякыт сямо, зӥбыт-востэм, кема чидась» луизы (Кол. 3:9—12). Сыӵе адямиослэн сюлэмзы каньыллыкен, яратонэн но шумпотонэн тырме. Со сяна, Библия кыл сётэ, соос «музъем басьтозы» шуыса (Пс. 36:8—10, 29).

9. а) Кызьы валано, зӥбыт-востэм адямиос музъем басьтозы шуыса? б) Малы «шонер улонэз... возьмасьёс» шудоесь?

⁹ Кызьы валано, зӥбыт-востэм адямиос музъем басьтозы шуыса верамез? Иисуслэн зырӟем дышетскисьёсыз музъем басьтозы, куке эксэйёс но священникъёс луыса музъемен кивалтозы (Усьт. 20:6). Нош трос миллион адямиос, кудъёсызлэн инмын улыны осконзы ӧвӧл, тырбыдэс луозы но музъем вылын пырак улозы, тупаса улонлы шумпотыса. Сыӵе адямиос сярысь Иисус вераз: «Шонер улонэз сютэм, сюзы куасьмыса возьмасьёс шудоесь» (Матф. 5:6). Соослэн сыӵе мылкыд каронзы быдэсмоз, куке Иегова дунне вылысь вань уродзэ быдтоз (2 Пётр 3:13). Выль дуннеын шонерлыко адямиос шудо луозы но ноку но уз куректэ ни, лек адямиослэн урод ужъёсынызы сэрен (Пс. 36:17).

10. Мае возьматэ гажась-жалясь луон?

¹⁰ «Гажась-жалясьёс шудоесь, малы ке шуоно соосты гажалозы-жалялозы» (Матф. 5:7, ВД). Гажан-жалян возьматэ лякыт сямо луонэз но жалянэз соосты, кинъёс курадӟо. Но гажан-жалян — со лякыт сям гинэ ӧвӧл. Кызьы адӟиське Библиысь, гажась-жалясь адями, мукетъёссэ жалям сяна, тырше на соослы юрттыны.

11. Малы дышетэ милемыз ӟеч сямо Самария мурт сярысь мадён?

¹¹ Лыдӟе Лукалэсь 10:30—37. Иисуслэн ӟеч сямо Самария мурт сярысь мадёназ валамон возьматэмын, кызьы гажась-жалясь луоно. Самария мурт, жугем иудей пиосмуртэз адӟыса, жаляз сое но юрттӥз солы. Иисус мадёнзэ таӵе кылъёсын йылпумъяз: «Мын, тон но озьы ик лэсьты». Аслэсьтыд юаны луоз: «Мон но озьы ик лэсьтӥсько-а? Жалясько-а мон, Самария мурт сямен? Быгатӥсько-а мон тросгес юрттыны кулэяськись адямиослы, кылсярысь, уж вылын юрттыны арлыдоослы, палкышноослы яке нылпиослы, кудъёсызлэн анай-атайёссы Иеговалэн ужась-тыршисьёсыз уг луо? Быгатӥсько-а мон усем мылкыдын улӥсьёслы саклык висъяны но соосты буйгатыны?» (1 Фес. 5:14; Иак. 1:27).

12. Малы гажась-жалясь адямиос шудоесь?

¹² Малы гажась-жалясь адямиос шудоесь? Мукет адямиосты гажаса-жаляса, ми сётонлэсь шумпотон басьтӥськомы. Со сяна, озьы ми Иеговаез шумпоттӥськомы (Ап. уж. 20:35; лыдӟе Еврейёслы 13:16). Адями сярысь, кудӥз мукет адямиос сярысь сюлмаське, Давид эксэй гожтӥз: «Кузё-Инмар сое утёз, возьмалоз солэсь улонзэ, музъем вылын улыны шуд сётоз» (Пс. 40:2, 3). Ми мукет адямиосты гажаськомы-жаляськомы ке, Иегова милемыз но гажалоз-жалялоз. Соку ми пырак дауръёс ӵоже шудо уломы (Иак. 2:13).

МАЛЫ «ЧЫЛКЫТ СЮЛЭМООС» ШУДОЕСЬ

13, 14. Малы «чылкыт сюлэмоос» шудоесь?

¹³ «Чылкыт сюлэмоос шудоесь: соос Инмарез адӟозы» (Матф. 5:8). Чылкыт сюлэмо адямиослэн мылпотонъёссы чылкытэсь. Соин ик милемлы чаклано, чылкытэсь-а милям малпанъёсмы — соку, Иеговалы ужаса-тыршыса, ми солэн син азяз чылкытэсь луомы. (Лыдӟе 2 Коринфъёслы 4:2; 1 Тим. 1:5.)

¹⁴ Чылкыт сюлэмоос Иеговалы ярамонэсь луо, но соос шудоесь, малы ке шуоно соослэн Иеговаен матысь кусыпъёссы. Библиын Инмарлэн кылъёсыз гожтэмын: «Шудоесь соос, кинъёс асьсэлэсь дӥськутсэс миськизы» (Усьт. 22:14, ВД). Зырӟем христианъёс асьсэлэсь дӥськутсэс миськизы шуыны луоз, малы ке шуоно Иегова соосты чылкытэсь шуыса лыдъя но кыл сётэ соослы быронтэм улон сётыны. Соос пырак дауръёс ӵоже шумпотыса солы инмын ужаса-тыршыса улозы. Озьы ик «туж-туж трос калык» но, яке адямиос, кудъёсыз музъем вылын улыны оско, Инмарлэн син азяз шонерлыкоесь луыны но соин эшъяськыны быгато. Библиын гожтэмын: «Ыжпилэн вирыныз соос дӥськутсэс миськизы, чылкыт, тӧдьы каризы» (Усьт. 7:9, 13, 14).

15, 16. Кызьы валано, «чылкыт сюлэмоос» Инмарез адӟыны быгато шуыса?

¹⁵ Инмар вераз: «Адями Монэ адӟыны но улэп кыльыны уг быгаты» (Пот. 33:20). Соку кызьы «чылкыт сюлэмоос» Инмарез адӟыны быгато? Грек кылэз, кудӥз «адӟыны» шуыса берыктӥське, валаны луэ «визьмын валаны, тодыны» шуыса. Соос, кинъёс Инмарез «сюлэм[зылэн] синъёс[ынызы]» адӟо, Инмарез умой тодо но солэсь сямъёссэ дунъяло (Еф. 1:18). Иисус быдэсак адӟем кариз Иеговалэсь, соин ик со вераны быгатӥз: «Монэ адӟись мурт Атаез адӟиз» (Иоанн 14:7—9).

¹⁶ Озьы ик зэмос Инмарлэн ужась-тыршисьёсыз Инмарез «адӟо», куке шӧдо, кызьы со соослы юрттэ (Иов 42:5). Со сяна, соос малпасько паймымон бакель каронъёс сярысь, кудъёссэ Иегова жалятэк сётэ соослы, кинъёс тыршо солэн син азяз чылкытэсь кыльыны но солы оскымон ужаны-тыршыны. Нош зырӟем христианъёс зэмзэ ик Инмарез адӟозы, куке соос улӟытэмын луозы но инме тубозы (1 Иоанн 3:2).

ШУДОЕСЬ, ШУГ-СЕКЫТЪЁС ШОРЫ УЧКЫТЭК

17. Малы тупаса улон вайисьёсты шудоесь шуыны луоз?

¹⁷ «Тупаса улон вайисьёс шудоесь» (Матф. 5:9). Иисуслэн верамезъя, соос, кинъёс мукетъёсыныз тупаса улыны тыршо, шудоесь. Иаков, Христослэн дышетскисез, гожтӥз: «Шонер улонлэсь емышсэ кизё тупаса улонэз вайисьёс» (Иак. 3:18). Кенешын яке семьяямы милям кинэн ке кусыпъёсмы туж ик умоесь ӧвӧл ке, милемлы Иеговаез тэльмырыса куроно, со милемлы тупаса улон вайисьёс луыны мед юрттоз шуыса. Соку Иегова святой духсэ сётоз, кудӥз милемлы христиан сямъёсты возьматыны юрттоз, нош со милемыз шудогес кароз. Иисус пусйиз, макем кулэ аслыд нырысетӥ вамыш лэсьтыны, кинэн ке кусыпъёстэ тупатон понна. Со шуиз: «Соин ик, кузьымдэ курбон сётон интые вайид но, отысен тодад лыктӥз ке, братэдлэн тыныд кыӵе ке но кӧтӝожез вань шуыса, соку курбон сётон ӝӧк доры кузьымдэ кельты, мын, нырысь ик тупа братэныд. Собере лыкты, вай кузьымдэ» (Матф. 5:23, 24).

18, 19. Малы христианъёс шумпото, уйылон-уллянъёсын пумиськыкузы но?

¹⁸ «Мон понна тӥледыз курлазы ке, уллязы ке, котькыӵе но урод кылъёсын юнме куаретӥзы ке, тӥ шудоесь»,— шуиз Иисус. Со валэктӥз: «Шумпотэлэ, шулдыръяськелэ — Инмын басьтоно медды-кузьымды бадӟым. Тӥлесьтыд азьвыл улэм пророкъёсты но озьы ик уллязы» (Матф. 5:11, 12). Куке апостолъёсты жугизы но ӟеч иворез вераны ӧз лэзе, соос «сӥнедрионысь шумпотыса кошкизы». Малы? Соос кыл кутытэмзы понна шум ӧз потэ, соос шумпотӥзы, «Иисуслэн нимыз понна сантэманэз ас вылазы чидано луизы шуыса» (Ап. уж. 5:41).

¹⁹ Туннэ но Иеговалэн ужась-тыршисьёсыз шумпотонзэс уг ышто, куке соосты Иисуслэн нимыз понна уйыло-улляло но куке соос секыт визь сынаськонъёсын пумисько (Лыдӟе Иаковлэсь 1:2—4.) Милемлы но, апостолъёслы сямен ик, курадӟонъёс шумпотон уг ваё. Но визь сынаськонъёс дыръя ми Иеговалы оскымон кылиськомы ке, со юрттоз милемлы соосты чиданы. Тани одӥг пример. 1944-тӥ арын гудырикошконэ Хенрик Дорникез но солэсь агайзэ концлагере келязы. Тунсыко, мар веразы соос сярысь тушмонъёссы: «Соослэсь малпанзэс воштыны уг луы. Курадӟон соослы шумпотон вае». Дорник вын-агай валэктӥз: «Мынам курадӟеме уг поты вал, но мон шумпотӥсько вал, Иеговалы оскымон кыльыны тыршыса, мон, кышкатэк но асме умой возьыса, курадӟонъёсты чидай шуыса... Ӟырдыт вӧсяськонъёс монэ Иегова доры матэгес каризы, но мынам Инмаре оскымон Юрттӥсь луиз».

20. Малы ми шумпотыса ужаськомы-тыршиськомы «шудо Инмарлы»?

²⁰ Куке ми Иеговалы, «шудо Инмарлы», ярамон луиськомы, ми шудо луыны быгатӥськомы, кузёослэн уйылон-уллянъёссы, матысь адямиосмылэн пумитъяськемзы, тазалыкен яке арлыдын герӟаськем шуг-секытъёс шоры учкытэк (1 Тим. 1:11, ВД). Озьы ик милемлы шумпотон ваё «аслэсьтыз верам кылзэ котьку но быдэсъясь Инмарлэн» кыл сётонъёсыз (Тит. 1:2). Куке со соосты быдэстоз, милям тодамы но уз лыктэ азьвыл чидам шуг-секытъёсмы но визь сынаськонъёсмы. Ми син азямы пуктыны но ум быгатӥське, макем умой улон луоз райын но макем шудо ми луомы! Инмарлэн оскымон ужась-тыршисьёсыз «каньыллыклэн трос луэменыз эзылозы» (Пс. 36:11).