Иегова кадь шӧдӥсь-валась но сюлмаськись луэ
«Шудо, кин куанер сярысь сюлмаське!» (ПС. 40:2).
1. Кызьы Иеговалэн ужась-тыршисьёсыз ог-огзэс яратэмзэс возьмато?
ИНМАРЛЭН калыкез — со духовной семья, кытын ваньмыз ог-огзэс ярато (1 Иоанн 4:16, 21). Куддыръя христианъёс вын-агайёссы понна троссэ сётыны дась луо, но ӵемгес соос асьсэлэсь яратэмзэс возьмато ӟеч кылъёсынызы но ужъёсынызы, кудъёсыз сокем уг но адӟисько, вылды. Озьы лэсьтыса, ми инмысь Атаймылэсь адӟем кариськомы (Еф. 5:1).
2. Кызьы Иисус яратэмзэ возьматӥз, Иеговалэсь адӟем карыса?
2 Иисус быдэсак адӟем кариз Атаезлэсь. Со шуиз: «Ваньды курадӟыса, шугадӟыса улӥсьёс, лыктэлэ Мон доры, Мон тӥледыз буйгато» (Матф. 11:28, 29). Иисуслэсь адӟем карыса но сюлмаськыса соос сярысь, кинъёслы юрттэт кулэ, ми инмысь Атаймес шумпоттомы, озьы ик асьмеос но шумпотон басьтомы (Пс. 40:2). Ойдолэ эскеромы, кызьы шӧдӥсь-валась луоно семьяын, кенешын но ужан-тыршонын.
СЕМЬЯЯДЫ ШӦДӤСЬ-ВАЛАСЬ ЛУЭ
3. Кызьы карт кышнозэ шӧдӥсь-валась луыны быгатэ? (Учке статья кутсконысь туспуктэмъёсты.)
3 Картъёс пример возьматыны кулэ, кызьы семьяын шӧдӥсь-валась луоно (Еф. 5:25; 6:4). Кылсярысь, Библия косэ соосты кышноосынызы асьсэды визьмо возьыны, яке шӧдонъёссэс лыдэ басьтыны но валаны соосты (1 Пётр 3:7). Валась карт тодэ, со кышноезлэсь трослы пӧртэм ке но, кышноезлэсь устогес ӧвӧл шуыса (Ул.-выл. 2:18). Со валаны тырше кышноезлэсь шӧдонъёссэ но гажа сое. Тани мар вера Канадаысь одӥг христиан кышномурт аслаз картэз сярысь: «Со гажа мынэсьтым шӧдонъёсме. Со уг вера: „Ваньзэ сюлмад эн басьты!“ Озьы ик со быгатэ кылзыны. Куке солы монэ тупатыны кулэ, со лякытэн тупатэ».
4. Мае тодаз возьыны кулэ карт, мурт кышномуртъёсын вераськыкуз?
4 Карт, кудӥз кышноезлэсь шӧдонъёссэ гажа, ноку но мурт кышномуртъёсын флиртовать уз кары но соослы мултэс саклык уз висъя, соосын вераськыкуз но, социальной сетьёс пыр но (Иов 31:1). Со кышноезлы оскымон, малы ке шуоно яратэ кышнозэ, озьы ик со Инмарез яратэ но уродэз-лекез адӟемпотостэм каре. (Лыдӟе Псалтирез 18:15; 96:10.)
5. Кызьы кышно возьматыны быгатэ, картсэ вала шуыса?
5 Карт аслаз йырызлэсь, Иисус Христослэсь, адӟем каре ке, кышноезлы капчигес картсэ гажаны (Еф. 5:22—25, 33). Соку кышно быгатэ картсэ валаны, куке картэзлы кенешлэн ужъёсызлы тросгес дыр висъяно луэ яке кыӵе ке юанъёсты сэрттоно-пертчоно луэ. Тани мар вера Великобританиысь вын-агай: «Куддыръя мынам асме воземея кышное вала, монэ мар ке но сюлмаськытэ шуыса. Соку со Мадёнъёсын 20:5 гожтэм возетъя лэсьтэ. Нош куддыръя чидаса возьма тупась дырез, мынэсьтым малпанъёсме „омыръяса поттон“ понна,— мон солы со сярысь вераны быгатӥсько ке».
6. Кызьы ваньмы асьмеос нылпиослы юрттыны быгатомы мукетъёсыз сярысь малпаськыны? Кыӵе пайда со соослы ваёз?
6 Куке карт но кышно ог-огзэс шӧдыны-валаны тыршо, соос нылпиоссылы туж умой пример возьмато. Озьы ке но соослы нимысьтыз дышетоно на нылпиоссэс мукетъёсыз сярысь малпаськыны но ӟечлыко луыны. Кылсярысь, анай-атайёс нылпиоссылы валэктыны быгато, Эксэйлык юртын бызьылыны уг яра шуыса, нош куноын, аслыд сиён тырыку, мукетъёсыз сярысь вунэтоно ӧвӧл шуыса. Зэм, кенешысь ваньмыз быгато юрттыны анай-атайёслы нылпизэс будэтыны. Кылсярысь, пинал тӥледлы ӧсэз усьтӥз ке, эн вунэтэ сое ушъяны. Ушъям котькинлы кельше, но со юрттоз пиналлы валаны: «Басьтон сярысь, сётыны умойгес» (Ап. уж. 20:35).
КЕНЕШЫН ОГ-ОГДЫЛЫ ШӦДӤСЬ-ВАЛАСЬ ЛУЭ
7. Кызьы Иисус пельтэм муртлы шӧдӥсь-валась луэмзэ возьматӥз но малы со милемыз дышетэ?
7 Одӥг пол, куке Иисус Дас каро музъемтӥ ортче вал, «со доры пельтэм, могаса вераськись муртэ вайизы» (Марк 7:31—35). Иисус со адямиез ваньмыз азьын ӧз эмъя, со «сое калык пӧлысь палэнэ нуиз». Малы? Висёнэныз сэрен со адями калык азьын возьдаське вал, вылды. Иисус сое валаз, луоз, но малпаз солы юрттыны мурт син азьысь палэнын. Ми адямиосты бурмытъяны ум ке но быгатӥське, милемлы вын-агайёсмылэсь но сузэр-апайёсмылэсь кулэяськонъёссэс но шӧдонъёссэс валаны тыршоно. Апостол Павел гожтӥз: «Огмылы огмы юрттӥськыса уломе, яратыса, ӟеч ужъёс лэсьтыса улыны мылкыдмес ӝутоме» (Евр. 10:24). Иисус валаз со пельтэм муртлэсь шӧдонъёссэ, соин ик со сярысь сюлмаськиз. Кыӵе умой пример со милемлы!
8, 9. Кызьы арлыдоослы но сӧсыръёслы саклык висъяны луэ? Вералэ примеръёс.
8 Саклык висъялэ арлыдоослы но сӧсыръёслы. Христиан кенешын со, кӧня тон лэсьтӥськод ужан-тыршонын, валтӥсез уг луы, валтӥсез — яратон (Иоанн 13:34, 35). Яратон милесьтым мылкыдмес ӝутэ юрттыны арлыдо но сӧсыр вын-агайёслы но сузэр-апайёслы Эксэйлык юртэ мыныны но соосын ӵош ӟеч иворез вераны. Ми юрттӥськомы соослы, соос трос лэсьтыны уг ке но быгато ни но соослы юрттон понна трос дыр но кужым кулэ ке но (Матф. 13:23). Майкл, коляскаен ветлӥсь сӧсыр вын-агай, туж тау каре семьяезлы но кенешысь вын-агайёслы но сузэр-апайёслы юрттэмзы понна. Со валэктэ: «Соослэн юрттэменызы мон быгатӥсько кенешлэн пумиськонъёсаз ветлыны но ялан тодытон уже пыриськыны. Мыным тужгес но кельше ӟеч иворез вераны трос калыко интыосын».
9 Трос Вефильёсын арлыдо но сӧсыр вын-агайёс но сузэр-апайёс вань. Сюлмаськись тӧроос валаны тыршо со оскымон ужась-тыршисьёсты но юртто соослы тодытон уже пыриськыны, кылсярысь, гожтэтъёс гожъяны но телефон пыр ӟеч иворез вераны. «Гожтэт гожъян — ми понна туж бадӟым дан»,— шуэ 86 аресъем Билл, кудӥз кыдёкын улӥсь адямиослы гожтэтъёс гожъя. Нэнси, кудӥзлы 90 арес пала, вера: «Мон понна гожтэт гожъян со юнме уж ӧвӧл, нош туж дуно ужан-тыршон. Адямиослы кулэ зэмлыкез тодыны!» Этел, кудӥз вордӥськиз 1921-тӥ арын, вера: «Висьытэк одӥг нунал но уг улӥськы ни. Куддыръя мыным дӥсяськыны но туж секыт». Со шоры учкытэк, Этел шумпотыса телефон пыр ӟеч иворез вера, нош куд-ог адямиосын одӥг пол гинэ уг вераськы. 85 аресъем Барбара валэктэ: «Тазалыке лябен мыным секыт коркась корка ветлыса ӟеч иворез вераны. Нош телефон пыр тодытон юрттэ мыным мукет адямиосын Инмар сярысь вераськыны. Тау, Иегова!» Арлэсь ӧжытгес дыр куспын та но мукет дуно арлыдо вын-агайёс но сузэр-апайёс, кудъёсыз одӥг Вефильын ужало-тыршо, 1 228 час тодытон ужын ортчытӥзы, 6 265 гожтэт гожтӥзы, 2 000-лэсь тросгес пол телефонэн жингыртӥзы но 6 315 публикация вӧлмытӥзы. Макем соос Иеговалэсь сюлэмзэ шумпоттӥзы! (Мад. 27:11).
10. Кызьы ми юрттыны быгатомы вын-агайёсмылы кенешлэн пумиськонъёсысьтыз бадӟым пайда басьтыны?
10 Христиан пумиськонъёсын мукетъёсыз сярысь малпаське. Милям потэ, вын-агайёсмы но сузэр-апайёсмы кенешлэн пумиськонъёсысьтыз бадӟым пайда мед басьтозы шуыса. Ми соослы юрттыны быгатӥськомы. Кызьы? Кылсярысь, мукетъёсызлы медам люкетэ шуыса, пумиськонъёсы дырыз дыръя лыктӥськомы ке. Зэм, шӧдтэк шорысь котькыӵе учыръёс кылдыны быгато, нош ми ялан бере кылиськомы ке, милемлы малпаськоно, кызьы мукетъёсызлы гажаммес возьматоно. Тодады возе, ми Иегова но солэн Пиез доры куное лыктӥськомы шуыса (Матф. 18:20). Нош соослы одно ик гажаммес возьматоно.
11. Малы вын-агайёслы 1 Коринфъёслы 14:40 возетэз уже кутоно?
11 Ми мукетъёссэ шӧдӥсь-валась луэммес возьматомы, таӵе возетэз уже кутӥмы ке: «Но ваньмыз мед луоз озьы, кызьы кулэ, радызъя» (1 Кор. 14:40). Пумиськонын пунктъёсты ортчытӥсь вын-агайёс та возетлэсь кылзӥсько, куке асьсэлэсь пунктсэс дырыз дыръя йылпумъяло. Озьы со вын-агайёс соос бере пунктсэс нуись агайёс сярысь гинэ уг, нош быдэс кенеш сярысь малпасько. Куд-ог вын-агайёслы но сузэр-апайёслы кыдёке бертоно. Мукетъёсызлы транспортэ вуоно. Нош кинъёсты ке но доразы возьмало Адӟись-Ивортӥсь луисьтэм кузпалъёссы.
12. Малы тӧроосты мур гажано но яратоно? (Учке «Гажалэ соосты, кинъёслы кивалтыны оскемын» рамкаез.)
12 Тӧроос кенеш понна мылысь-кыдысь тыршо но вань кужымзэс поныса ӟеч иворез верало, соин ик соосты яратоно но гажано. (Лыдӟе 1 Фессалоникаослы 5:12, 13.) Веранэз ӧвӧл, тӥ туж тау кариськоды соослы ваньмыз понна, мар соос каро. Кызьы соослы тау кареммес возьматоно? Котьку дась луэ соослэсь кылзӥськыны но соослы юрттыны, малы ке шуоно «соос ялан лулъёстэс утён сярысь сюлмасько, тодо уго, тӥ понна кыл кутоно луоз шуыса» (Евр. 13:7, 17).
МАЛПАСЬКЕ АДЯМИОС СЯРЫСЬ, КУДЪЁСЫЗЛЫ ӞЕЧ ИВОРЕЗ ВЕРАСЬКОДЫ
13. Малы дышетэ милемыз со, кызьы Иисус адямиос шоры учкиз?
13 Азьпалзэ ивортыса, Исаия Иисус сярысь вераз: «Чигтэм камыш бодыез уз тӥялты, гыбдась етӥнэз уз кысы» (Ис. 42:3). Иисус адямиосты яратэ вал, соин ик со вала вал адямиосты, кудъёсыз чигтэм камыш боды яке гыбдась етӥн кадь луэмын. Со вал шӧдӥсь-валась, лякыт сямо но чидась. Нылпиос гинэ но со доры кыстӥськизы (Марк 10:14). Зэм, ми ум быгатӥське адямиосты валаны но дышетыны ӵапак Иисус кадь, но ми быгатӥськомы малпаськыны адямиос сярысь, кудъёсызлы ӟеч иворез тодытӥськомы. Ойдолэ вераськомы со сярысь, кызьы адямиосын вераськоно, ку но макем кема.
14. Малы милемлы малпаськоно со сярысь, кызьы ми адямиосын вераськиськомы?
14 Кызьы адямиосын вераськоно? Асьсэлы гинэ пайда утчась но нокинэ жалясьтэм вуз карисьёсын сэрен, нош озьы ик политика но религия удысысь азьмынӥсьёсын сэрен, трос миллион адямиос туннэ возьмаськисьтэк кылем ыжъёс кадь катьтэммемын но пазьгиськемын (Матф. 9:36). Соин ик паймоно ӧвӧл тросэз адямиос нокинлы уг оско ни шуыса, соослэн оскиськонзы ӧвӧл ни. Тӥни малы соосын лякыт луоно но соосты валаны тыршоно. Нош лякыт но валась луэммы адӟиськоз отысь, кыӵе кылъёс ми вераськомы но кыӵе куараен. Ӵем дыръя адямиос Библиез умой уже кутэммы понна гинэ ӟеч иворез уг кылзо, нош кылзо милемыз, малы ке шуоно ми сюлмысь соосын тунсыкъяськиськомы но гажаськомы соосты.
15. Кызьы возьматоно, ми малпаськиськомы шуыса адямиос сярысь, кудъёсызлы ӟеч иворез вераськомы?
15 Адямиослы, кудъёсызлы ми ӟеч иворез вераськомы, шӧдӥсь-валась луэммес пӧртэм амалэн возьматыны луэ. Вераськомы, кылсярысь, кызьы юанъёс сётъяно. Юанъёс сётъян — со туж умой дышетон амал, но соосты туж гажаса сётъяно. Пионер луыса ужась-тыршись одӥг вын-агай ӟеч иворез вера отын, кытын трос возьдаськись, вераськисьтэм адямиос уло. Со валаз, кулэ ӧвӧл шуыса сётъяны юанъёс, кудъёсыз сэрен адямиос возьдаськыны быгатозы. Со сыӵе юанъёс, кудъёсызлы валэктонэз соос уг тодо яке шонертэм валэктон сётыны быгато, кылсярысь, «Тодӥськоды-а тӥ Инмарлэсь нимзэ?» яке «Мар со сыӵе Инмар Эксэйлык?». Со интые со вера: «Библиысь мон тодӥ, Инмарлэн нимыз вань шуыса. Яра-а мон сое тӥледлы возьмато?» Веранэз ӧвӧл, вань адямиос пӧртэмесь, соин ик милемлы кулэ ӧвӧл кыӵе ке правилоос пуктыны. Но милемлы котьку кулэ адямиос сярысь малпаськыны но гажаны соосты, нош со понна соосты умойгес тодыны тыршоно.
16, 17. Кызьы адямиез шӧдӥсь-валась луэммес возьматоно, ужпум кутыкумы: а) ку соос доры лыктоно? б) макем кема соосын вераськоно?
16 Ку адямиос доры лыктоно? Коркась корка ӟеч иворез веракумы, тодамы возёно, адямиос милемыз уг возьмало шуыса. Соин ик умойгес луысал лыктыны сыӵе дыре, куке соослэн мылкыдзы вань вераськыны (Матф. 7:12). Кылсярысь, тӥ палан улӥсьёс шутэтскон нуналъёсы, огшоры нуналъёсы сярысь, кемагес изё. Соин ик сыӵе вакытэ ӟеч иворез вераны умойгес луысал, дыр, урамын, трос калыко интыосын яке выльысь лыктыны соос доры, кинъёс вазь султо.
17 Макем кема вераськоно? Тросэзлэн адямиослэн дырзы чик ӧвӧл, соин ик, ӧс дорын кема сылытозь, умойгес луысал вакчияк вераськыны (1 Кор. 9:20—23). Куке адямиос адӟо, ми валаськомы шуыса, макем трос соослэн ужъёссы, вуонояз пумиськыкумы, соос милемын мылзы потысагес вераськозы, вылды. Зэм, адямиослы ӟеч иворез веракумы, милемлы кулэ со сямъёсты возьматыны, кудъёсыз Инмарлэн святой духезлэн емышез пӧлы пыро. Соку ми зэмзэ ик «Инмарлэн ужасьёсыз», яке ӵош ужасьёсыз, луомы. Оло нош, ми пыр Иегова кинлы ке зэмлыкез тодыны юрттоз (1 Кор. 3:6, 7, 9).
18. Кызьы Иегова милемыз бакель кароз шӧдӥсь-валась луэммы понна?
18 Озьыен, ойдолэ туж тыршомы шӧдӥсь-валась луыны семьяын, кенешын но ужан-тыршонын. Соку Иегова милемыз бакель кароз али но азьланяз, малы ке шуоно Библиын верамын: «Шудо, кин куанер сярысь сюлмаське! Шугадӟон нуналэ Кузё-Инмар сое мозмытоз. ...Музъем вылын улыны шуд сётоз» (Пс. 40:2, 3).