Оске Азьветлӥсьмылы — Христослы

1, 2. Кыӵе секыт уж сётэмын вал Иисус Навинлы Моисей кулэм бере?

«МОИСЕЙ, Мынам ляльчие, кулӥз: султы но Иордан вамен выж, тон но, тынад вань калыкед но израиль пиослы Мынам сётэм музъемам пыре»,— Иеговалэн та кылъёсыз кема кылӥськизы на Иисус Навинлэн пель сьӧраз (Иис. Н. 1:1, 2). 40 ар пала со Моисейлэн юрттӥсез вал, нош али солы Моисей интые султоно.

² Моисей кема дыр ӵоже Израиль калыклэн азьветлӥсез вал, соин ик Иисус Навин сюлмаськиз, вылды, кызьы Израиль калык та ивор шоры учкоз (К. Зак. 34:8, 10—12). Тани мар верамын одӥг справочникын Иисус Навинлэн 1:1, 2 гожтэм кылъёс сярысь: «Кызьы азьло дыръёсы, озьы ик али но кивалтӥсьлэн воштӥськемез кун понна тужгес но секыт но кышкыт вакыт».

3, 4. Малы вераны луоз, Иисус Навин Иеговалы юнме ӧз оскиськы шуыса? Кыӵе милям юанмы кылдыны быгатоз?

³ Иисус Навинлэн сюлмаськыны мугъёсыз вал ке но, кӧня ке нунал ортчыса, со солы оскем ужез быдэстыны кутскиз (Иис. Н. 1:9—11). Со Иеговалы оскиськиз, но со солы юрттӥз. Библиын верамын, Инмар Иисус Навинлы косонъёс сётъяз но Израиль калыкен кылчин пыр кивалтӥз шуыса. Со кылчин Инмарлэн одӥг гинэ вордскем Пиез вал, вылды, кудӥз Библиын «Кыл» шуыса нимамын (Пот. 23:20—23; Иоанн 1:1).

⁴ Иеговалэн юрттэменыз, Израиль калык азьветлӥсезлэн воштӥськемезлы сокем ӧз куректы. Туннэ Иеговалэн организацияз озьы ик бадӟым воштӥськонъёс ортчо. Инмарлэн организациезлэсь туж ӝог азьлань мынэмзэ адӟыса, милям юанмы кылдыны быгатоз: «Кыӵе милям мугъёсмы вань оскыны Азьветлӥсьмылы, Иисус Христослы?» (Лыдӟе Матфейлэсь 23:10.) Та юанлы валэктон сётон понна, ойдолэ эскеромы, кызьы азьвыл, воштӥськонъёс дыръя, Иегова аслаз калыкеныз кивалтӥз.

КИН ИНМАРЛЭСЬ КАЛЫКСЭ СӤЗЕМ МУЗЪЕМЕ ВАЛТЫСА НУИЗ?

5. Кинэ пумитаз Иисус Навин Иерихон вӧзын? (Учке статья кутсконысь суредэз.)

⁵ Ӝоген Израиль калык Иордан тупала выжем бере Иисус Навин Иерихон вӧзын тодмотэм муртэ пумитаз. Солэн кияз меч вал. Иисус Навин юаз солэсь: «Тон милямъёс пӧлысь-а яке тушмонъёсмы радысь-а?» Макем со паймиз, куке тодӥз, тодмотэм мурт — со «Кузё-Инмарлэн ожгарчиосызлэн азьвалтӥсьсы» шуыса, кудӥз Инмарлэсь калыксэ утьыны лыктӥз! (Лыдӟе Иисус Навинлэсь 5:13—15.) Библиысь мукет кылбуръёсын верамын ке но, Иисус Навинэн Иегова ачиз вераськиз шуыса, валамон луэ, Инмар Иисус Навинэн кылчин пыр вераськиз шуыса, кызьы со азьло дыръёсы вераське вал (Пот. 3:2—4; Иис. Н. 4:1, 15; 5:2, 9; Ап. уж. 7:38; Гал. 3:19).

6—8. а) Малы Иеговалэн куд-ог косонъёсыз умойтэм но шонертэм кадь потыны быгатысалзы? б) Малы со косонъёс визьмо но дырыз дыръя вал? (Учке сноскаез.)

⁶ Кылчин Иисус Навинлы валамон валэктӥз, кызьы Иерихонэз басьтоно. Солэн куд-ог валэктонъёсыз нырысь умойтэм яке шонертэм кадь потыны быгатысалзы. Кылсярысь, Иегова вань пиосмуртъёслы вандӥськон сямез ортчытыны косӥз. Нош со возьматэ вал, соос кӧня ке нунал ӵоже ожмаськыны уз быгатэ шуыса. Кулэ-а вал вандӥськон сямез ӵапак со вакытэ ортчытыны? (Ул.-выл. 34:24, 25; Иис. Н. 5:2, 8).

⁷ Израиль ожгарчиос кышкало вал, вылды, станзы вылэ тушмон урдскиз ке, соос семьяоссэс утьыны уз быгатэ шуыса. Но тани станын ивор вӧлмиз: «Иерихон ворсаськиз, израиль пиослэсь кышкаса ворсаськиз» (Иис. Н. 5:16). Веранэз ӧвӧл, югдурлэн шӧдтэк шорысь воштӥськемез Израиль калыклэсь осконзэ юнматӥз, Иеговалы оскыны луэ шуыса.

⁸ Со сяна, Иегова Израиль калыкез Иерихон вылэ урдскыны ӧз лэзьы. Со интые соослы нуналаз одӥг пол кар котыртӥ ортчоно вал — озьы куать нунал ӵоже лэсьтоно вал, нош сизьыметӥ нуналаз карлэн котыртӥз сизьым пол ортчоно вал. Куд-ог ожгарчиос малпазы, дыр: «Чик юнме дыр но кужым быдтон гинэ со!» Нош Израильлэн Азьветлӥсез, Иегова, умой тодэ вал, мар со каре. Солэн малпанэз быдэсмиз. Израиль калык валаз, Иеговалэн сётэм косонэз визьмо вал шуыса, малы ке шуоно, солэсь кылзӥськыса, соос Иерихонэз ожмаськытэк басьтыны быгатӥзы но соослэн осконзы юнмаз (Иис. Н. 6:1—4; Евр. 11:30)a.

9. Малы милемлы кылзӥськоно косонъёслэсь, кудъёссэ Иеговалэн организациез сётэ? Вералэ пример.

⁹ Малы дышетскыны луэ та учырысь? Куддыръя ми пумозяз ум валаське, малы Инмарлэн организациез выль амалъёсты уже кутэ. Кылсярысь, нырысь ми ум тодӥське вал, кулэ-а ас поннамы Библиез эскерон дыръя, ужан-тыршонын но кенешлэн пумиськонъёсаз электрон тӥрлыкъёсты уже кутыны. Нош соосты уже кутыны кутскыса, ми трос пайдазэ адӟимы. Иеговалэн организацияз ортчем воштӥськонъёслэсь пайдазэ адӟиськомы ке, милям осконмы юнма но асьмеды вын-агайёсын но сузэр-апайёсын одӥг семья кадь шӧдӥськомы.

ХРИСТОС НЫРЫСЕТӤ ДАУРЫН ХРИСТИАН КЕНЕШЕЗ ВАЛТЫСА НУЛЛӤЗ

10. Кин юрттӥз Иерусалимысь кивалтӥсь кенешлы вандӥськон сямез ортчытъян сярысь юанэз сэрттыны-пертчыны?

¹⁰ Корнилий христиан осконэ выжем бере ог 13 ар ортчиз ини. Нош куд-огез еврей калыкысь потэм христианъёс азьвыл сямен ик малпало вал, вандӥськон сямез ортчытъяно шуыса (Ап. уж. 15:1, 2). Антиохияын со пумысен вын-агайёс куспын ченгешонъёс кутскем бере ужпум кутэмын вал, Павел Иерусалиме мыноз но кивалтӥсь кенешез та юанэз сэрттыны-пертчыны куроз шуыса. Кин со ужпумез кутӥз? Павел верамъя, со отчы мынӥз «Инмар... валан сётэм бере». Веранэз ӧвӧл, со югдуръёсын Христос кивалтӥз, кивалтӥсь кенеш кылдэм ченгешонъёсты мед дугдытоз шуыса (Гал. 2:1—3).

11. а) Кызьы учко вал еврей калыкысь потэм христианъёс вандӥськон сям шоры? б) Кызьы Павел возьматӥз, Иерусалимысь тӧроослэсь кутэм ужпумзэс гажа шуыса? (Озьы ик учке сноскаез.)

¹¹ Христослэн кивалтэмез улсын кивалтӥсь кенеш валэктӥз, мукет калыкысь христианъёслы вандӥськон сямез ортчытоно ӧвӧл шуыса (Ап. уж. 15:19, 20). Со шоры учкытэк, трос аръёс ортчыса но еврей калыкысь потэм тросэз христианъёс азьвыл сямен ик пиоссылы вандӥськон сямез ортчытъязы. Нош куке Иерусалимысь тӧроос тодӥзы Павел сярысь кыл вӧлдэмез, со Моисейлэсь законзэ уг чакла шуыса, соос Павелэз мае ке паймымонзэ лэсьтыны куризы (Ап. уж. 21:20—26)b. Солы кулэ вал, сьӧраз ньыль адямиез басьтыса, храме мыныны но соосын ӵош чылкытатӥськон сямез ортчыны. Соку ваньмыз адӟысалзы, со Законэз чакла шуыса. Тӧроослэн косонзы Павеллы умойтэм кадь потыны быгатысал. Со вала вал: та шуг-секыт кылдӥз, малы ке шуоно еврей калыкысь потэм христианъёс вандӥськон сярысь юанэз шонертэм валало. Озьы ке но со дунъяз тӧроослэсь тупаса улон вайыны тыршемзэс но вылтӥяськытэк соослэсь косонзэс быдэстӥз. Нош малы Иисус та юанэз сокема сэрттытэк-пертчытэк улӥз, со дыре куке Моисейлэн законэз Иисус кулэм бере аслэсьтыз ужпумзэ быдэсъямысь дугдӥз? (Кол. 2:13, 14).

12. Кызьы валэктыны луоз сое, малы Христос вандӥськон сярысь юанэз сокема сэрттытэк-пертчытэк улӥз?

¹² Со яке та воштӥськонъёсын соглаш кариськон понна, дыр кулэ луоз, вылды. Озьы вал еврей калыкысь потэм христианъёсын (Иоанн 16:12). Куд-огъёсыз соос пӧлысь малпало вал, вандӥськон сям азьвыл сямен ик адямилэсь Иеговаен матысь кусып воземзэ возьматэ шуыса (Ул.-выл. 17:9—12). Нош кинлэн ке мукет еврейёслэсь пӧртэм луэмез уг поты вал, малы ке шуоно уйылон-уллянъёслэсь кышка вал (Гал. 6:12). Дыр ортчыса, Павеллэн гожтэтъёсыз пыр Христос соослы выль валэктонъёс сётӥз (Рим. 2:28, 29; Гал. 3:23—25).

ХРИСТОС ТУННЭ НО АСЛЭСЬТЫЗ КЕНЕШСЭ ВАЛТЫСА НУЭ

13. Мар юрттоз милемлы Христослэн вань куронъёсызлэсь кылзӥськыны?

¹³ Ми пумозяз ум ке валаське, малы Иеговалэн организацияз со яке та воштӥськонъёс ортчо, луоз малпаськыны со вылын, кызьы Христос вашкала дыръёсы Инмарлэн калыкеныз кивалтӥз. Кызьы Иисус Навин улыку, озьы ик нырысетӥ даурын но Христос визьмо куронъёс пуктылӥз, Иеговалэсь калыксэ утён вылысь но соослэсь осконзэс но тупаса улонзэс юнматон вылысь (Евр. 13:8).

14—16. Кызьы «оскиськымон, визьмо ляльчилэн» визь-кенешъёс но косонъёс сётъямез возьматэ, Христослэн осконмес юнматыны юрттэмез потэ шуыса?

¹⁴ Туннэ «оскиськымон, визьмо ляльчи» дырыз дыръя милемлы кулэ луись визь-кенешъёс но косонъёс сётъя (Матф. 24:45). Со возьматэ, Иисус ми сярысь сюлмаське шуыса. Марк, кудӥзлэн ньыль нылпиосыз, вера: «Шайтан, семьяос вылэ урдскыса, кенешъёсыз лябӟытыны тырше. Но али милемлы косэмын котькуд арняе семьяен йыбырттон ортчытъяны. Соин ик семьяослэн йыръёссы валало, озьы соос семьяоссэс утьыны косэмын шуыса».

¹⁵ Иисуслэсь милемын кивалтэмзэ адӟыса, ми валаськомы, солэн осконмес юнматыны юрттэмез потэ шуыса. Тани мар вера Патрик нимо тӧро: «Нырысь куд-огъёсызлэн мылкыдзы куашказ, куке тодӥзы, шутэтскон нуналъёсы тодытонлы сӥзем пумиськон пичи группаосын ортчоз шуыса. Но со воштӥськон возьматӥз, Иисус уг вунэты шуыса соос сярысь, кинъёс возьдасько но тодытон уже уг пырисько. Сыӵе вын-агайёс но сузэр-апайёс шӧдӥзы, соосыз дунъяло но соос но огъя ужын юрттӥськыны быгато шуыса. Со соослэсь осконзэс юнматӥз».

¹⁶ Осконмес юнматыны юрттэм сяна, Христос юрттэ на тодытон ужез нырысетӥ интые пуктыны, малы ке шуоно со али самой кулэ уж. (Лыдӟе Марклэсь 13:10.) Андре, кудӥз алигес тӧро луиз, тырше котьку кылзӥськыны выль косонъёслэсь, кудъёссэ Инмарлэн организациез сётэ. Со вера: «Вефильын ужась-тыршись вын-агайёслэсь но сузэр-апайёслэсь лыдзэс кулэстон тодамы вайытэ, пум матын ини шуыса но вань кужыммес тодытон ужлы сётоно шуыса».

КЫЗЬЫ ХРИСТОСЛЭСЬ КУТЭМ УЖПУМЪЁССЭ ГАЖАММЕС ВОЗЬМАТОМЫ

17, 18. Малы милемлы умой луысал малпаськыны со сярысь, кыӵе пайда вайизы берпум воштӥськонъёс?

¹⁷ Эксэймылэн, Иисус Христослэн, сётэм косонъёсыз милемлы котьку пайда ваё. Соин ик кулэ малпаськыны со сярысь, кыӵе пайда вайизы милемлы берпум воштӥськонъёс. Тӥ быгатоды семьяен йыбырттонады вераськыны со сярысь, кызьы юрттӥзы тӥледлы котькуд арняе ортчись пумиськонъёсын но тодытон ужен герӟаськем воштӥськонъёс.

¹⁸ Ми валаськомы ке, малы Иеговалэн организациез милемлы визь-кенешъёс но косонъёс сётъя но кыӵе соос милемлы пайда ваё, милям мылкыдмы луоз соосты санэ поныны но кылзӥськыны. Кылсярысь, ужпум кутэмын вал печатлам публикациослэсь лыдзэс кулэстыны но публикациосты выль амалэн поттыны. Со луонлык сётэ Иеговалэн организациезлы тросгес коньдон висъяны адямиослы ӟеч иворез веран понна. Сое тодамы возьыса, ми тыршомы ӵемгес уже кутыны электрон публикациосты, нош озьы ик сайтысьтымы аудио- но видеоматериалъёсты. Озьы ми возьматомы Христослэсь кутэм ужпумъёссэ гажаммес, кудӥзлэн потэ, Инмарлэн организациезлэсь коньдонзэ визьмо уже мед кутозы шуыса.

19. Малы милемлы Азьветлӥсьмылэсь кутэм ужпумъёссэ гажаммес возьматоно?

¹⁹ Азьветлӥсьмылэсь, Иисус Христослэсь, кутэм ужпумъёссэ гажаммес возьматыса, ми юрттӥськомы вын-агайёслы но сузэр-апайёслы осконзэс но ог-огенызы кусыпъёссэс юнматыны. Тани мар вера Андре соос сярысь, кинъёслы, Вефильын ужась-тыршисьёслэсь лыдзэс кулэстэмен сэрен, Вефильысь кошконо луиз: «Вефильын ужам-тыршем вын-агайёслэсь но сузэр-апайёслэсь выль югдуръёслы дышемзэс адӟыса, мон соосты эшшо тросгес гажаны кутски но Христослы осконэ будӥз. Та вын-агайёс Иеговалэн инмысь уробоезлэсь уг кылё но солэн организацияз котькыӵе ужез быдэстыны дась».

ОСКОНДЭС ЮНМАТЭ НО АЗЬВЕТЛӤСЬМЫЛЫ ОСКЕ

20, 21. а) Малы ми Азьветлӥсьмылы оскыны быгатӥськомы? б) Кыӵе юанэз ми вуонояз статьяын эскеромы?

²⁰ Ӝоген Иисус Христос Азьветлӥсьмы быдэсак вормисе потоз но «паймымон кышкытлыко ужъёс возьматоз» (Пс. 44:5; Усьт. 6:2). Нош али со дася милемыз со дырлы, куке ми улӟыса султэмъёсты дышетомы но музъемез райлы пӧрмытомы.

²¹ Зырӟем Эксэймы, Иисус Христос, милемыз выль дуннее валтыса мед нуоз шуыса, мар гинэ медаз луы, милемлы солы быдэсак оскыны кулэ. (Лыдӟе Псалтирез 45:2—4.) Но куддыръя улонамы возьмамтэ шорысь воштӥськонъёс луо, кудъёсызлы дышыны секыт. Мар юрттоз милемлы сюлмысьтымы каньыллыкез утьыны но Иеговалы осконмес юнматыны? Со сярысь вераськон мыноз вуонояз статьяын.