Ми «дуно марӟан» шедьтӥмы

Уинстон, быгатод-а вераны, кызьы тон Инмарез утчад?

Мон будӥ фермаын, кытын ми чабей будэтӥмы. Со интыяськемын Австралиысь Квинсленд штатын. Милям семьямы оскись ӧй вал. Ми палэнын улӥмы, соин ик мон ӵем дыръя семьяеным гинэ кусып вози. 12 арес дыръям мон Инмарез утчаны кутски. Мон Инмарлы вӧсяськи но кури сое юрттыны мыным со сярысь зэмлыкез тодыны. Дыр ортчыса, мон фермаысь кошки но уже интыяськи Аделаида карын (Лымшор Австралия штат). 21 арес дыръям мон Сидней каре мынӥ, отпускме ортчытон понна, но отын Пэм нимо нылашен тодматски. Со вераз мыным англи-израиль религиозной группа сярысь. Отчы пыриськисьёс оско: англи калык кылдӥз Израильлэн ышем выжыосыз пӧлысь — уйпал эксэйлыклэн дас выжыосыз пӧлысь, кудъёсыз асьме вакытлэсь азьло VIII даурын пленэ нуэмын вал. Аделаидае берытскыса, мон со сярысь верай ӵош ужаселы, кудӥз Адӟись-Ивортӥсьёсын Библиез дышетэ вал. Ми соин кӧня ке час ӵоже вераськимы, тужгес но со сярысь, малы оско Иеговалэн Адӟись-Ивортӥсьёсыз, но мон валай, Инмар пичи дыръям вӧсяськемъёсылы ответ сётӥз шуыса. Мон тодӥ Кылдытӥсь сярысь но солэн Эксэйлыкез сярысь зэмлыкез! Озьы мон «дуно марӟан» шедьтӥ (Матф. 13:45, 46).

Пэм, тон но та «дуно марӟанэз» вазь ик утчаны кутскид. Кызьы тон сое шедьтӥд?

Мон будӥ оскись семьяын Кофс-Харбор карын (Выль Лымшор Уэльс штат). Мынам атае но анае, озьы ик анаелэн анай-атайёсыз англи-израиль религиозной группалэн дышетэмезъя уло вал. Вынме, апайме, монэ но анае ласянь троссэ ӵыжы-выжыосме дышетӥзы, англи выжыысь потэм адямиос Инмарлэн быръем калыкез луо шуыса. Нош мон со сярысь мукет сямен малпай, но мынам Инмар доры матэгес кариськеме потэ вал. 14 арес дыръям мон ветлӥ пӧртэм черкъёсы, кудъёсыз милям улосамы вал. Мон англиканъёс, баптистъёс но сизьыметӥ нуналлэн адвентистъёсыз доры ветлӥ, нош соос Инмар сярысь тодыны мыным ӧз юрттэ.

Берлогес ми Сидней каре улыны мынӥмы, кытын мон Уинстонэн тодматски, куке со отын отпускын вал. Кызьы со вераз ини, религия сярысь вераськонъёсмылы луыса со Иеговалэн Адӟись-Ивортӥсьёсыныз Библиез дышетыны кутскиз. Ми ог-огмылы гожтэтъёс гожъямы, но солэн котькуд гожтэтаз Библиысь туж трос кылбуръёс гожтэмын вал. Зэмзэ вераса, нырысь со монэ сюлмаськытӥз, вожме но поттӥз! Но дыр ортчемъя, мон валаны кутски, Уинстонлэн гожъямез зэмлык луэ шуыса.

1962-тӥ арын мон Аделаидае улыны мынӥ, Уинстонлы матынгес луон понна. Со вераськиз Томас но Джанис Слоуман кузпалъёсын, мон соос дорын мед улом шуыса. Азьло соос миссионеръёс луыса Папуа — Выль Гвинея шормуӵын ужазы-тыршизы. Та кузпалъёс асьсэды монэн туж лякытэн возизы. Мыным 18 арес гинэ вал, но соос юрттӥзы мыным Иегова сярысь тросгес тодыны. Озьыен, мон Библиез дышетыны кутски но ӝоген валай, зэмлыкез шедьтӥ шуыса. Кузпалъяськеммы бере ми Уинстонэн, вань дырмес сётыса, Иеговалы ужаны-тыршыны кутскимы. Шуг-секытъёс вал ке но, ужан-тыршонмы милемлы трос бакель каронъёс вайиз, но ми эшшо но золгес дунъямы «дуно марӟанэз» — зэмлыкез.

Уинстон, вера кузпалъяськемды бере нырысетӥ аръёсаз ужам-тыршемды сярысь.

Ӝоген, кузпалъяськеммы бере, Иегова ми азьын трос ӧсъёс пӧлысь нырысетӥ «паськыт ӧсэз» усьтӥз (1 Кор. 16:9). Та «ӧсэ» пырыны мылкыдмес ӝутӥз Джек Портер агай, кудӥз милям пичи кенешамы ёросэз чаклась кадь ветлӥз. (Али ми соин ӵош ужаськомы-тыршиськомы австралазийской филиаллэн комитетаз.) Джек но солэн Розлин кышноез милемлы визь-кенеш сётӥзы пионеръёс луыса ужаны-тыршыны. Та ужан-тыршонын ми вить шудо аръёс ортчытӥмы. Собере, куке мыным 29 арес тырмиз, мыным кышноеным ӵош ӵектӥзы ёросэз чаклась луыса ужаны-тыршыны Чус океанлэн лымшор палысьтыз шормуӵъёсаз, кудъёсыз сярысь со дыре Фиджи шормуӵысь филиал сюлмаське вал. Милемлы ужано-тыршоно вал таӵе шормуӵъёсын: Америкаысь Самоа, Самоа, Вануату, Кирибати, Науру, Ниуэ, Токелау, Тонга но Тувалу.

Со аръёсы куд-ог палэнысь шормуӵъёсын улӥсьёс Иеговалэн Адӟись-Ивортӥсьёсызлы туж ик ӧз оске, соин ик милемлы чакласьконо вал (Матф. 10:16). Кенешъёс пичиесь вал, но куддыръя вын-агайёс пӧлысь нокин но милемлы изён инты сётыны ӧз быгаты. Соку ми со интыын улӥсьёс доры куриськиськомы вал, но соос милемлы котьку шумпотыса улон инты сётылӥзы.

Уинстон, тон берыктон ужен туж тунсыкъяськиськод. Малы?

Со дыре Тонга шормуӵъёсысь вын-агайёслэн тонган кылын кӧня ке гинэ буклетъёссы но брошюраоссы вал. Ужан-тыршонын соос англи кылын поттэм «Истина, ведущая к вечной жизни» книгаез кутӥзы, кудӥзъя Библиез дышетонъёсты ортчытъязы. Соин ик ньыль арня ӵоже ортчытӥськись тӧроослы школа дыръя со шормуӵъёсысь куинь тӧроос, кудъёсыз англи кылэз кӧня ке тодо вал, та книгаез тонган кылэ берыктыны кутскизы. Пэм берыктэмзэс машинкаен печатлаз, но ми сое Америкаысь филиалэ ыстӥмы, кытын собере та книгаез печатласа поттӥзы. Берыктон уж тямыс арня кыстӥськиз. Та книга туж ик умой берыктэмын ӧй вал ке но, тонган калык пӧлысь тросэзлы со зэмлыкез тодыны юрттӥз. Мон но Пэм берыктӥсьёс ӧвӧл, но та уж мылкыдмес ӝутӥз берыктон ужен тунсыкъяськыны.

Пэм, маин пӧртэм луэ шормуӵъёсын улон Австралиын улонлэсь?

Со чылкак мукет улон вал! Одӥг паласен учкыса, отын вал туж трос чибинь выллем нымы-кибыос, комакъёс, туж пӧсь куазь но мускыт омыр, висёнъёс, куддыръя сютэм улон но. Мукет паласен — сюлэмез буйгатӥсь океан, кудзэ адӟыны луэ вал фалеысен — озьы самоа кылын нимало вал Полинезиын ӵем пумиськылӥсь коркаез, кудӥз куро липетэн но борддоръёстэк лэсьтӥське. Толэзё уйёсы ми шумпотыса учкиськомы вал кокос вайись пальмалэн вужерез шоры но океан вылысь толэзьлэн чильдэмез шоры. Сыӵе дыре ми вӧсяськыса но мур малпаськыса улӥмы, но со умоез сярысь малпаськыны мылкыдмес ӝутылӥз.

Ми яратӥмы со интыысь нылпиосты, кудъёсызлы туж тумошо но тунсыко вал тӧдьы адямиосты адӟыны. Одӥг пол Ниуэ шормуӵысь пияш Уинстонлэсь кизэ маялляны кутскиз но вераз: «Мыным кельшо тынад пигонъёсыд». Солэсь азьло та пияш ноку но ӧз адӟылы ки вылысь гонэз но ӧз тоды, кызьы сое шонер нимано.

Милемлы вӧсь вал адӟыны, макем урод югдуръёсын тросэз адямиос улӥзы. Та паймымон чебер интыын эмъяськыны луонлык туж ӧжыт вал, но адямиослы юон ву ӧз тырмылы. Озьы ке но вын-агайёсмылэн мылкыдзы ӧз куашка. Соос сыӵе улонлы дышемын вал. Соос шумпотыса улӥзы, малы ке шуоно семьязы вӧзазы вал, Иеговалы йыбыртъян интызы вал но соос сое данъяны быгатӥзы. Соослэн улэм-вылэмзы юрттӥз милемлы огшоры улыны но тодамы возьыны, мар адямилы тужгес но кулэ луэ.

Пэм, куддыръя дышымтэ югдуръёсын тыныд аслыд вулы ветлоно но сиён дасяно вал. Кызьы тон сое лэсьтыны быгатӥд?

Мон атаелы туж тау карисько. Со тросэзлы монэ дышетӥз, кылсярысь, кызьы тылсконо но кызьы тыл вылын сиён дасяно, озьы ик кызьы улоно, куке туж ӧжыт гинэ арбериосыд вань. Одӥг пол ми Кирибати шормуӵе вуимы но улӥмы коркан, кудӥзлэн липетэз куролэсь, борддоръёсыз бамбуклэсь но выжез коралл кӧльыослэсь лэсьтэмын вал. Выжаз мон тылскемлы инты гудӟи но, пу интые кокослэсь кӧмзэ кутыса, тыл понӥ. Вулы мон мынӥ колодчае, кытын трос кышномуртъёс вал ини. Вуэз соос омырто вал ог кык метр кузьда бодыен, кудӥз борды гозы думылэмын. Со визнанлы укшаз, нош крючок интые корт посуда думемын вал. Кышномуртъёс огез бӧрсьы мукетыз «визнанэз» кушто вал но дырыз дыръя сое ӝогак кыско вал, посуда мед берыктӥськоз но вуэн мед тырмоз шуыса. Мынам черодэ вуытозь, мон малпай, со капчи шуыса. Мон кӧня ке пол тырши, но номыр ӧз пӧрмы: посуда ву вылэ усе но ву вылын уя гинэ вал! Вань со дыр ӵоже берам кышномуртъёслэн серекъямзы кылӥськиз. Собере одӥг кышномурт мыным юрттэтсэ ӵектӥз. Со интыын улӥсь адямиос лякытэсь но юрттыны котьку дасесь вал.

Тӥ кыкнады ик та шормуӵъёсын ужан-тыршонэз яратӥды. Кыӵе учыръёс тужгес но тӥляд тодады кылизы?

Уинстон: Милемлы дыр кулэ вал, куд-ог сям-йылолъёсты валан понна. Кылсярысь, вын-агайёс ӝӧк вылэ пукто вал ваньзэ, марзы соослэн со нуналлы вал. Нырысь ми ӧм тодэ, ӝӧк вылэ пуктэм сиёнэз ваньзэ сиёно ӧвӧл, нош кузёосызлы но кельтоно шуыса, но ми ваньзэ сииськомы вал. Собере ми янгышмес валамы. Номыр шоры учкытэк, вын-агайёс ми шоры валаса учкизы. Но соос туж шумпото вал, куке ми соос доры ӝыны арлы одӥг пол вуылӥмы. Кенешысьтызы вын-агайёсты лыдэ басьтытэк, милемын сяна, мукет Адӟись-Ивортӥсьёсын пумиськыны яке вераськыны соослэн луонлыксы ӧй вал.

Лыктэммес бускельёссы но адӟылӥзы. Тросэз соос пӧлысь малпало вал, вын-агайёс осконзэс асьсэос малпазы шуыса, но уг оско вал, кытын ке но эшшо Адӟись-Ивортӥсьёс вань на шуыса. Соин ик, куке соос адӟизы, вын-агайёс доры мукет шаеръёсысь адямиос лыкто но соослэн сыӵе ик осконзы шуыса, соос валало вал, милям организацимы калыккуспо шуыса, но со соосты туж паймытылӥз.

Пэм: Одӥгез тужгес но вунэтонтэм учыр луиз милемын Кирибати шормуӵын. Отын вал кенеш, кудаз кӧня ке гинэ вын-агайёс но сузэр-апайёс ветлӥзы. Одӥг пол ми доры лыктӥз Синикай Матера тӧро, со сяна мукет тӧроос та шормуӵын ӧй вал ни. Со лыктӥз кудыен, кудаз одӥг гинэ курегпуз вал. «Та тӥледлы»,— вераз со. Со дыре курегпузмы ӵем дыръя уг луылы вал. Та пичи, нош со дыре ик дуно кузьым сюлмамы ик пыриз.

Пэм, кӧня ке аръёс ортчыса тынад нуныед усиз. Мар юрттӥз тыныд та куректон пыр потыны?

Мон пияно луи 1973-тӥ арын. Соку ми Уинстонэн Чус океанысь шормуӵъёсын ужаськомы-тыршиськомы вал. Ми ужпум кутӥмы Австралие берытскыны, но отын, ньыль толэзь ортчыса, мон нунымес ыштӥ. Ми Уинстонэн туж куректӥмы. Дыр ортчыса, милемлы сокем вӧсь ӧй вал ни, нош быдэсак со вӧсь луонмы ортчиз, куке ми 2009-тӥ арын 15-тӥ оштолэзь понна поттэм «Возьмаськон башняез» басьтӥмы. «Лыдӟисьёслэн юанъёссы» рубрикаын эскериськиз таӵе юан: «Нылпи анайлэн кӧт пушказ кулӥз ке, луоз-а оскыны, со улӟоз шуыса?» Статья оскытӥз милемыз, та учырын Иеговалы оскиськыны умойгес луоз шуыса, нош со котьку шонерзэ лэсьтэ. Со бурмытоз туж трос яраосмес, кудъёсыз милям кылдо, та лек дуннеын улыса. Со луоз соку, куке Инмар аслэсьтыз Пизэ «Диаволлэсь ужъёссэ» куашкатыны косоз (1 Иоанн 3:8). Та статьяез лыдӟыса, ми эшшо но золгес дунъяны кутскимы «дуно марӟанэз», кудзэ Иегова ас калыкезлы кузьмаз. Мар ми карысалмы, Инмарлэн Эксэйлыкезлы осконмы ӧй луысал ке!

Нунымес ыштэммы бере ми нош ик, вань дырмес сётыса, ужаны-тыршыны кутскимы. Кӧня ке толэзьёс ӵоже ми Австралиысь Вефильын ужамы, нош собере ёросэз чаклан уже берытскимы. Ньыль ар ӵоже ми Выль Лымшор Уэльс штатын ужамы-тыршимы — кызьы гуртъёсын, озьы ик Сидней карын но. Нош 1981-тӥ арын милемыз ӧтизы Австралиысь филиалэ (азьвыл со озьы нимаське вал), но со дырысен ми татын ужаськомы-тыршиськомы.

Уинстон, али тон австралазийской филиаллэн комитетаз ужаськод-тыршиськод. Юрттэ-а тыныд Чус океанысь шормуӵъёсын ужамед-тыршемед?

Бен, туж юрттэ. Нырысь филиалмес Америкаысь Самоа но Самоа сярысь сюлмаськыны куризы. Собере ми огазеяськимы Выль Зеландиысь филиалэн. Но табере австралазийской филиал сюлмаське таӵе интыос сярысь: Австралия, Америкаысь Самоа но Самоа, Шунды ӝужан пал Тимор, Куклэн шормуӵъёсыз, Ниуэ, Выль Зеландия, Токелау но Тонга. Та шаеръёс пӧлысь тросаз мон ветлӥ филиалысь лэзем агай кадь. Та шормуӵъёсысь оскымон вын-агайёсын но сузэр-апайёсын ӵош ужаме-тыршеме монэ тросэзлы дышетӥз. Солы луыса мон соос сярысь сюлмаськыны быгатӥсько, филиалын ужаса-тыршыса.

Пумаз вераме потэ: мон но Пэм трос пол адӟимы, Инмарез бадӟымъёс гинэ уг, нош нылпиос но утчало шуыса. Милям улонмы но сое возьматэ. Егитъёс но «дуно марӟанэз» утчало, семьязы соосын соглаш уг луы ке но (4 Экс. 5:2, 3; 2 Пар. 34:1—3). Быдэсак оскыны луэ, Иегова яратӥсь Инмар шуыса, но солэн потэ, ваньмыз — егитъёс но, арлыдоос но — пырак улыны мед быгатозы шуыса.

Куке ог ӝыны даур талэсь азьло мон но Пэм Инмарез утчаны кутскимы, ми малпаны ик ӧм быгатэ, маин со йылпумъяськоз. Эксэйлык сярысь зэмлык — номырин ӵошатыны луонтэм марӟан, кудӥз милемлы туж дуно потэ