«Улон но ужан-тыршон» ужан тетрадьлы малпанъёс
6—12-ТӤ ГУДЫРИКОШКОН
ИНМАРЛЭН КЫЛЫСЬТЫЗ УЗЫРЛЫК | ЛУКА 17, 18
Духовной марӟанъёсты утчаськомы
(Лука 17:7—10) Ляльчиез гырыса яке пудо возьмаса бусыысь бертӥз ке, кин тӥ пӧлысь солы шуоз: „Ӝог лыкты, пуксьы ӝӧк сьӧры“? 8 Озьы шуэм интые, уз шуы-а солы: „Ӝыт нянь мыным дася, путодэ дум но, мон сиськытозь, юытозь, мыным ужа, бӧрысь ачид си, ю“? 9 Солэсь косонзэ быдэстэмез понна та ляльчилы со тау кароз-а? Уз, дыр. 10 Озьы ик тӥ но, вань косэмез быдэстӥды ке, шуэ: „Ми номырлы ярасьтэм ляльчиос, малы ке шуоно лэсьтӥмы сое гинэ, мае кулэ вал лэсьтыны“».
nwtsty эскерон понна материал (Лк 17:10)
номырлы ярасьтэм Яке «пайда вайисьтэм». Иисуслэн верамез уг поты вал, ляльчиос, солэн дышетскисьёсыз, асьсэзы номырлы ярасьтэм яке пайда вайисьтэм лыдъяны кулэ шуыса. Матысь кылбуръёсты лыдэ басьтоно ке, «номырлы ярасьтэм» кылъёс возьмато, ляльчиос зӥбыт-востэмесь шуыса, соос асьсэлы нимысьтыз саклык яке дан висъяны уг куро шуыса. Библиез эскерись куд-ог тодосчиос лыдъяло, татын бадӟыматыса верамын шуыса но ляльчиослэн кылъёссы возьмато: «Ми огшоры ляльчиос, нимысьтыз саклык висъяны ярантэмесь».
(Лука 18:8) Тӥледлы верасько: ӝоген соослы дурбасьтоз. Нош Адями Пи лыктӥз ке, шедьтоз на меда музъем вылысь осконэз?»
nwtsty эскерон понна материал (Лк 18:8)
осконэз Татын Иисус вераз сыӵе оскон сярысь, кудӥз солэн мадёнысьтыз палкышнолэн вал (Лк 18:1—8). Адямилэн сыӵе осконэз вань ке, со оске, вӧсяськон юрттэ шуыса но Инмар аслэсьтыз быръемъёссэ утёз шуыса. Иисус оскон пумысен юанлы валэктон ӧз сёты соин, вылды, дышетскисьёсыз мед малпаськозы шуыса, макем юн соослэн осконзы. Иисус та мадёнэз вераз валэктэмез бере, кыӵе шуг-секытъёсын пумиськоно луоз солэн дышетскисьёсызлы. Озьы со пусйиз, макем кулэ вӧсяськон но оскон (Лк 17:22—37).
13—19-ТӤ ГУДЫРИКОШКОН
ИНМАРЛЭН КЫЛЫСЬТЫЗ УЗЫРЛЫК | ЛУКА 19, 20
Духовной марӟанъёсты утчаськомы
(Лука 19:43) Уго тон доры вуозы сыӵе нуналъёс,— тушмонъёсыд, окопъёс гудыса, тонэ котыртозы, котыр ласянь тонэ ӝиптозы,
nwtsty эскерон понна материал (Лк 19:43)
окопъёс Татын ха́ракс грек кыл кутӥське, кудӥз Христиан Грек Гожтэмъёсын одӥг пол гинэ пумиське. Со возьматэ «йылсатэм юбоез яке майыгез, кудъёсыныз интыез котырто; юбоез», нош озьы ик «коръёслэсь лэсьтэм ожмаськон юнматэмез». Иисуслэн кылъёсыз а. в. 70-тӥ арын быдэсмизы, куке Титлэн кивалтэмез улсын рим ожгарчиос Иерусалимез коръёслэсь лэсьтэм борддорен котыртӥзы. Титлэн куинь ужпумез вал: иудейёс пегӟыны медаз быгатэ, сютэм улыса, соос мед сётскозы но карез ӝоггес басьтыны. Сыӵе борддорез ӝутон понна, рим ожгарчиос Иерусалим котырысь вань писпуосты коразы.
(Лука 20:38) Инмар — кулэмъёслэн Инмарзы ӧвӧл, Со — улэпъёслэн Инмарзы. Инмар азьын ваньмыз улэпесь».
nwtsty эскерон понна материал (Лк 20:38)
Инмар азьын ваньмыз улэпесь Библиысь адӟиське, Инмарлэсь палэнскыса улӥсь адямиос солэн син азяз кулэмын ини шуыса (Еф 2:1; 1Тм 5:6). Мукет ласянь учконо ке, Иеговалэн оскымон ужась-тыршисьёсыз, кудъёсыз кулэмын ини, солэн син азяз улэпесь, малы ке шуоно со соосты одно ик улӟытоз (Рм 4:16, 17).
20—26-ТӤ ГУДЫРИКОШКОН
ИНМАРЛЭН КЫЛЫСЬТЫЗ УЗЫРЛЫК | ЛУКА 21, 22
Духовной марӟанъёсты утчаськомы
(Лука 21:33) Ин но музъем бырозы, нош Мынам кылъёсы уз быре.
nwtsty эскерон понна материалъёс (Лк 21:33)
Ин но музъем бырозы Библиысь мукет кылбуръёсысь адӟиське, ин но музъем ноку уз быре шуыса (Ул 9:16; Пс 103:5; Ек 1:4). Соин ик Иисус татын бадӟыматыса вераз, вылды. Иисуслэн верамез потэ вал, дыр, луыны быгатымтэез но луысал ке, ин но музъем бырысалзы ке, солэн кылъёсыз быдэсмозы шуыса. (Ӵошатэ Мф 5:18.) Озьы ик, Иисус символической ин но музъем сярысь вераны быгатэ вал, кудъёсыз Усьт 21:1 «азьвылэз ин» но «азьвылэз музъем» шуыса нимасько.
Мынам кылъёсы уз быре Грек кылын та кылбурысь кылъёс возьмато, Иисуслэн кылъёсыз одно ик быдэсмозы шуыса.
(Лука 22:28—30) Визь сынаськыса улон дыръёсы тӥ Монэн огазьын вал. 29 Кызьы Мыным Атае Эксэйлык сӥзиз, Мон но тӥледлы Эксэйлык сӥзисько, 30 Эксэйлыкысьтым ӝӧк сьӧрам мед сиёды, мед юоды, Израильлэсь дас кык выжыоссэ судить карыны престолъёс вылэ мед пуксёды».
bw551 16 б., 15, 16 абз.
Тӥ «священникъёслэн эксэйлыксы» луоды
15 Ӝытанэз пусйыны косэмез бере, Иисус оскымон дышетскисьёсыныз тупанкыл кутӥз, кудзэ ӵем дыръя Эксэйлык сярысь тупанкыл шуо. (Лыдӟе Лукалэсь 22:28—30.) Мукет тупанкылъёсы Иегова пыриське, нош тазэ ачиз Иисус зырӟем дышетскисьёсыныз кутӥз. «Кызьы Мыным Атае Эксэйлык сӥзиз» кылъёс возьмато, вылды, «Мелхиседеклэн чинэзъя пумтэм вапумлы» священник луон сярысь тупанкылэз, кудзэ Иегова Иисусэн кутӥз (Евр. 5:5, 6).
16 Иисуслэн дас одӥг оскымон апостолъёсыз визь сынаськыса улон дыръяз соин огазьын вал. Эксэйлык сярысь тупанкыл оскытэ, соос, Иисусэн ӵош инмын престолъёс вылын пукыса, эксэйёс луыса кивалтозы но священникъёс луыса ужалозы-тыршозы шуыса. Нош таӵе дан та дас одӥг адямиослы гинэ сётэмын уз луы. Данъям Иисус апостол Иоаннлы адӟытонын возьматскиз но вераз: «Вормисьлы Асэным ӵош Аслам престол вылам пуксьыны луонлык сёто, кызьы Мон но вормем берам Аслам Атаеным ӵош Солэн престол вылаз пукси» (Усьт. 3:21). Озьыен, Эксэйлык сярысь тупанкыл 144 000 зырӟем христианъёсын кутэмын (Усьт. 5:9, 10; 7:4). Со соослы Христосэн ӵош инмын кивалтыны законъя право сётэ. Сое ӵошатыны луэ соин, кызьы сӥё-дано семьяысь нылмурт бызе кивалтӥсь эксэйлы но соин ӵош кивалтыны право басьтэ. Священной Гожтэмын зырӟем христианъёс нимасько Христослэн «кышноез», «сьӧлыкамтэ дун-чылкыт вылькен», кудӥз Христослы курамын (Усьт. 19:7, 8; 21:9; 2 Кор. 11:2).
27-ТӤ ГУДЫРИКОШКОН — 2-ТӤ КУАРУСЁН
ИНМАРЛЭН КЫЛЫСЬТЫЗ УЗЫРЛЫК | ЛУКА 23, 24
Духовной марӟанъёсты утчаськомы
(Лука 23:31) Вожектӥсь писпуэн озьы каро ке, нош кӧсэныз мар луоз?!»
nwtsty эскерон понна материал (Лк 23:31)
Вожектӥсь писпуэн... кӧсэныз Татын Иисус иудей калык сярысь вераз, вылды. Та калык кельше вал куасьмись писпулы, кудӥз ӧжыт вожектэ на, малы ке шуоно соку иудейёс пӧлын Иисус но солы оскисьёс вал. Нош Иисусэз кортӵогазы но Инмарлы оскымон иудейёс святой дух басьтӥзы но духовной Израильлэн люкетэз луизы (Рм 2:28, 29; Гл 6:16). Соку израиль калык куасьмем писпу кадь луиз, Инмарлэн син азяз кулӥз (Мф 21:43).
(Лука 23:33) «Кымес» шуон интые вуэм беразы отын Сое кортӵогазы, йыруж лэсьтӥсьёсты — одӥгзэ бурпалаз, нош мукетсэ — паллян палаз.
nwtsty суред
Пыдтыш лыын кортӵог
Туспуктэмын возьматэмын адямилэн пыдтыш лыэзлэн копиез 11,5 см кузьда кортӵоген. (Учкы mwb17.12 5 б.) Та лы — пиосмуртлэн, кудӥзлэн лысьӧмъёсыз 1968-тӥ арын Иерусалимлэн уйпал люкетаз гудыса утчаськонъёс дыръя шедьтэмын вал. Та адями, Рим кун кивалтыку, улэм. Со возьматэ, адямиез, пу юбо борды кортӵогаса, виыны быгато вал шуыса. Сыӵе ик кортӵогъёсты рим ожгарчиос уже кутӥзы, вылды, Иисусэз юбо вылын виыкузы. Кортӵоген лысьӧмъёс шедьтэмын вал оссуариын — из ящикын, кудаз тыро вал кулэм адямилэсь лыоссэ мугорыз сисьмем бере. Татысь адӟиське, юбо вылын вием адямиосты бератаз ватыны быгато вал шуыса.