«Улон но ужан-тыршон» ужан тетрадьлы малпанъёс

1—7-ТӤ КОНЬЫВУОН

ИНМАРЛЭН КЫЛЫСЬТЫЗ УЗЫРЛЫК | ИОАНН 9, 10

Духовной марӟанъёсты утчаськомы

(Иоанн 9:38) Соку со пи шуиз: «Оскисько, Кузё-Инмаре!» но Иисуслы йыбырттӥз.

nwtsty эскерон понна материал (Ин 9:38)

Иисуслы йыбырттӥз Яке «со азе мыкырскиз; солы музъемозь йыбырттӥз; солы мур гажамзэ возьматӥз». Куке проскине́о грек кылэз Иеговалы яке мукет инмаръёслы йыбыртъян сярысь вераськон мыныку уже куто, сое «йыбыртъяны» шуыса берыкто (Мф 4:10; Лк 4:8). Нош та учырын йӧнатэм пиосмурт, кудӥз вордскем дырысеныз синтэм вал, валаз, Иисусэз Инмар ыстӥз шуыса, но солы йыбырттӥз. Со Иисусэз Инмар шуыса ӧз лыдъя, нош сое «Инмар Пиен», Мессияен, лыдъяз, кудӥзлы кужым Инмар сётӥз (Ин 9:35). Пиосмуртлэн Иисуслы йыбырттэмаз номыр паймымонэз ӧй вал. Кылсярысь, Еврей Гожтэмъёсын верамын, адямиос йыбырттылӥзы шуыса пророкъёслы, эксэйёслы но мукетъёсызлы, кинъёс Инмарен ыстэмын вал (1Эк 25:23, 24; 2Эк 14:4—7; 3Эк 1:16; 4Эк 4:36, 37). Тросаз учыръёсын, Иисуслы йыбырттыса, адямиос асьсэлэсь мур гажамзэс возьматылӥзы, малы ке шуоно адӟизы, Инмар солы ӟеч эриксэ возьматэ шуыса (Мф 2:2; 8:2; 14:33; 15:25).

(Иоанн 10:22) Соку Иерусалимысь храмез чылкытатон праздник вуиз, толалтэ вал.

nwtsty эскерон понна материал (Ин 10:22)

чылкытатон праздник Та праздник озьы ик Ханука (еврей кылын ханукка́) шуыса нимаське. Со возьматэ «Усьтон; Сӥзён» шуэмез. 25-тӥ кислеве кутскыса, толэзе, кудӥз толалтэ шунды сылон нуналлы матэгес вал (учкы «Инмарлэн Кылыз мутусъёсын но схемаосын» брошюраез (ӟуч), 19-тӥ люкет), со праздник тямыс нунал кыстӥське вал. Сое пусъё вал Иерусалимысь храмез выльысь сӥземез тодэ ваён понна, кудзэ а. в. азьло 165-тӥ арын сӥзизы. Со храм саптамын вал Сириялэн Антиох IV Эпифан эксэеныз. Озьы со возьматӥз, иудей калыклэсь Инмарзэ, Иеговаез, адӟемпотостэм каре шуыса. Со курбон сётон ӝӧк пуктӥз Иеговалы курбон сётон быдӟым ӝӧк вылэ, кудаз нуналлы быдэ тылын сутӥськись курбонъёс ваё вал. Иеговалэсь храмзэ пумозяз саптан вылысь, Антиох а. в. азьло 168-тӥ арын 25-тӥ кислеве курбон сётон ӝӧк вылын парсез сутӥз но сӥльзэ пӧзьтэм лымыныз быдэс храмез пазяны косӥз. Солэн косэмезъя храмлэсь капкаоссэ сутӥзы, священникъёслэсь комнатаоссэс куашкатӥзы но зарнилэсь курбон сётон ӝӧкез, курбон нянь тырон ӝӧкъёсты но чылкыт зарнилэсь светильникъёсты нуизы. Собере Антиох Иеговалэсь храмзэ Зевслы, Олимплэн языческой инмарезлы, сӥзиз. Кык ар ортчиз но, Иуда Маккавей карез но храмез ожмаськыса выльысь берыктӥз. Храмез саптамлэсь чылкытатэм бере, а. в. азьло 165-тӥ арын 25-тӥ кислеве храмез кыкетӥзэ сӥзизы — Антиох Зевслы юрӟым курбон ваем бере куинь ар ортчыса. Со дырысен храмын нош ик нуналлы быдэ тылын сутӥськись курбонъёс вайылыны кутскизы. Библиын шонерак верамын ӧвӧл, Иегова Иуда Маккавейлы язычникъёсты вормыны юрттӥз но храмез чылкытатыны косӥз шуыса. Но ми тодӥськомы, Иегова зэмос йыбырттонэн герӟаськем малпанъёссэ мукет калыкысь адямиос пыр быдэсъяз шуыса, кылсярысь, Персиялэн Кир эксэез пыр (Ис 45:1). Соин ик вераны луоз, Со Иуда Маккавей пыр малпанзэ быдэстӥз шуыса, кудӥз Инмарлы сӥзиськем калыкысь вал. Библиысь адӟиське, храм сылыны но ужаны кулэ вал, Мессия сярысь, солэн ужамез-тыршемез сярысь но курбон сётэмез сярысь азьпалзэ ивортонъёс мед быдэсмозы шуыса. Озьы ик, храмын левитъёс курбонъёс вайылыны кулэ вал, Мессия вань адямиос понна быдӟым курбон — аслэсьтыз улонзэ — вайытозь (Дн 9:27; Ин 2:17; Евр 9:11—14). Христослэн дышетскисьёсызлы косэмын ӧй вал чылкытатон праздникез пусйыны (Кл 2:16, 17). Со дыре ик нокытын но верамын ӧвӧл, Иисус яке солэн дышетскисьёсыз та праздникез пусйисьёсты тэргазы шуыса.

8—14-ТӤ КОНЬЫВУОН

ИНМАРЛЭН КЫЛЫСЬТЫЗ УЗЫРЛЫК | ИОАНН 11, 12

Духовной марӟанъёсты утчаськомы

(Иоанн 11:49) Нош соос пӧлысь одӥгез, Каиафа, со арлы архиерей луэм мурт, соослы шуиз: «Тӥ номыр но уд тодӥське,

nwtsty эскерон понна материал (Ин 11:49)

архиерей Яке «быдӟым священник». Куке израиль калык эрико калык вал, быдӟым священник аслэсьтыз ужзэ вань улытозяз быдэсъя вал (Лд 35:25). Нош Рим кун кивалтыку, быдӟым священникъёсты пуктылӥзы но санысьтызы куштылӥзы Рим кунэн быръем кивалтӥсьёс но эксэйёс. Рим кивалтӥсьёсын пуктэм Каиа́фа, кудӥз тодэ вал, кызьы кивалтӥсьёсын умой кусыпъёс возёно но тупаса улоно, быдӟым священникын ваньмызлэсь кема улӥз. Быдӟым священник санын со а. в. 18-тӥ ар котырысен а. в. 36-тӥ ар котырозь вал. Каиафа со арлы, яке а. в. 33-тӥ арлы, архиерей луэм мурт шуыса гожтэменыз Иоаннлэн верамез потэ вал, дыр, Каиафа Иисусэз казнить карон аре быдӟым священник вал шуыса. (Учкы fnw «Иисуслэн музъем вылын улонэзлэн берпуметӥ арняез», кудаз возьматэмын, кытын, вылды, Каиафалэн коркаез вал.)

(Иоанн 12:42) Кузёйыръёс пӧлысь но тросэз Солы оскыны кутскизы, но фарисейёсын сэрен, сӥнагогалэсь люкемын медаз луэ шуыса, оскемзэс ватыса возизы.

nwtsty эскерон понна материалъёс (Ин 12:42)

Кузёйыръёс Татын грек кыл, кудӥз «кузёйыръёс» шуыса берыктэмын, Сӥнедрионлэсь, иудей вылӥ судлэсь, ёзчиоссэ возьматэ, вылды. Та кыл ик кутэмын Ин 3:1, кытын верамын Никодим сярысь, кудӥз со судлэн ёзчиез вал.

сӥнагогалэсь люкемын Яке «сӥнагогаысь поттэмын; сӥнагога бордысь люкыса палэнтэмын». Татын кутэмын грек кыл апосина́гогос, кудӥз Ин 9:22; 12:42 но 16:2 гинэ пумиське. Сӥнагогаысь уллям адямилэсь палэнскылӥзы но сое синазькыль карылӥзы. Адями сӥнагогаен кусып воземысь дугдэ ке, солэн семьяез куанер улонэ вуыны быгатэ вал. Сӥнагогаосын, кудъёсаз нырысь ик тодон-валан сётъязы, судъёсты но ортчытъяны быгато вал. Со суд адямиез жугонлы но сӥнагогаысь поттонлы судъяны быгатэ вал.

15—21-ТӤ КОНЬЫВУОН

ИНМАРЛЭН КЫЛЫСЬТЫЗ УЗЫРЛЫК | ИОАНН 13, 14

Духовной марӟанъёсты утчаськомы

(Иоанн 14:6) Иисус солы шуиз: «Мон — сюрес но, зэмлык но, улон но; Мон пыр сяна нокин но Атай доры уг лыкты.

nwtsty эскерон понна материал (Ин 14:6)

Мон — сюрес но, зэмлык но, улон но Иисус — сюрес, малы ке шуоно со пыр гинэ адямиос Инмарлы вӧсяськыны быгато. Озьы ик, со — сюрес, малы ке шуоно солы луыса гинэ ми Инмарен кусыпъёсмес тупатыны быгатӥськомы (Ин 16:23; Рм 5:8). Иисус — зэмлык, малы ке шуоно со зэмлыкез вераз но соя улӥз. Озьы ик, со трос азьпалзэ ивортонъёсты быдэстӥз, кудъёсыз возьмато, Инмарлэсь эриксэ быдэстонын со валтӥсь инты басьтэ шуыса (Ин 1:14; Усьт 19:10). Со азьпалзэ ивортонъёс Христос пыр «вань!» луизы, яке быдэсмизы (2Кр 1:20). Иисус — улон, малы ке шуоно, дун тырыса, со адямиослы «быронтэм улон» басьтыны луонлык сётӥз (1Тм 6:12, 19; Еф 1:7; 1Ин 1:7). Со сяна, Иисус «улон» луоз трос миллион кулэм адямиослы, кудъёсыз улӟытэмын луозы но райын пырак дауръёс ӵоже улыны быгатозы (Ин 5:28, 29).

(Иоанн 14:12) Зэм ик, зэм ик тӥледлы верасько: ужъёсты, кудъёссэ Мон лэсьтӥсько, Мыным оскись мурт но со ужъёсты лэсьтоз, соослэсь но бадӟымзэгес ужъёсты лэсьтоз, малы ке шуоно Мон Аслам Атае доры мынӥсько.

nwtsty эскерон понна материал (Ин 14:12)

соослэсь но бадӟымзэгес ужъёсты Иисус ӧз вера, солэн дышетскисьёсыз солэсь бадӟымгес ужъёс лэсьтозы шуыса. Со вераз, соослэн ужзы паськытгес луоз шуыса. Солэн дышетскисьёсыз тросгес интыосын, тросгес адямиослы ӟеч иворез вералозы но кемагес дыр ӵоже тодытозы. Кызьы адӟиське солэн кылъёсысьтыз, Иисус оске вал, дышетскисьёсыз солэсь ужзэ азьланьтозы шуыса.

22—28-ТӤ КОНЬЫВУОН

ИНМАРЛЭН КЫЛЫСЬТЫЗ УЗЫРЛЫК | ИОАНН 15—17

Духовной марӟанъёсты утчаськомы

(Иоанн 17:21—23) Ваньмыз одӥг-огъя мед луозы, кызьы Тон, Атае, Мон бордын, Мон Тон бордын, соос но Асьме бордын одӥг-огъя мед луозы,— дунне мед оскоз, Тон Монэ ыстӥд шуыса. ²² Тынэсьтыд Мыным сётэм данлыктэ Мон соослы сётӥ: одӥг-огъя мед луозы, кызьы Асьмеос одӥг-огъя луиськомы. ²³ Мон соос бордын, Тон Мон бордын; одӥг-огъя кариськемын мед луозы; дунне мед тодоз, Тон Монэ ыстӥд но соосты, Монэ кадь ик, яратӥд шуыса.

nwtsty эскерон понна материалъёс (Ин 17:21—23)

одӥг-огъя Яке «огкылысь». Иисус вӧсяськиз, солэн зэмос дышетскисьёсыз «одӥг-огъя» мед луозы, яке одӥг ужез огкылысь быдэстыны мед тыршозы шуыса, озьы ик, кызьы со но солэн Атаез «одӥг-огъя» луо, яке одӥг малпанъёсын уло но валче ужало (Ин 17:22). Христианъёслэн ӵапак сыӵе огкылысь тыршемзы сярысь вера Павел 1Кр 3:6—9: соос ог-огенызы но Инмарен валче ужало. (Озьы ик учке Ин 10:30; 17:11.)

одӥг-огъя кариськемын Яке «быдэсак одӥг». Та кылбурын одӥг-огъя кариськонэз Иисус Атаезлэн яратонэныз герӟа. Со малпан ик верамын Кл 3:14. Отын гожтэмын: «Со [яратон] дун-шектэм луонлэн [«тупаса улонлэн», ВД] шорсюлмыз луэ». Одӥг-огъя кариськон уг возьматы, вань христианъёс ог-огзылы тупасесь луо шуыса — быгатонлыкъёсынызы, сямъёсынызы, возьытлыкенызы. Одӥг-огъя кариськон возьматэ, Иисуслэн дышетскисьёсызлэн одӥг ужзы, одӥг осконзы но одӥг дышетонзы шуыса (Рм 15:5, 6; 1Кр 1:10; Еф 4:3; Фп 1:27).

(Иоанн 17:24) Атае! Мынам потэ, Тынад Мыным сётэмъёсыд, кытын Мон, соос но отын Монэн валче мед луозы вал шуыса. Тынэсьтыд Мыным сётэм пиштӥсь данлыкез мед адӟозы, дунне кылдэмлэсь азьвыл ик Тон Монэ яратӥд уго.

nwtsty эскерон понна материал (Ин 17:24)

дунне кылдэмлэсь азьвыл ик Грек кыл, кудӥз «кылдон» шуыса берыктӥське, Евр 11:11 «кидысэз пушказ пыртыса возьыны», яке секытэн луыны, шуыса берыктэмын. Нош та кылбурын «дунне кылдон» кылъёсын Адамлэн но Евалэн нылпиоссылэн вордӥськемзы сярысь верамын, луоз. «Дунне кылдонэз» Иисус Авелен герӟаз, кудӥз нырысетӥез адями вал, шӧдске, кинэ Инмар дун сётыса мозмытыны ярамонэн лыдъяз, но нырысетӥез, кинлэн нимыз «дунне кылдон дырысен улон книгае гожтэмын» (Лк 11:50, 51; Усьт 17:8). Иисуслэн та кылъёсыз, кудъёссэ со Атаезлы вӧсяськыкуз вераз, озьы ик возьмато, Адамлэн но Евалэн нылпиоссы вордӥськемлэсь азьвыл ик ини Инмар аслэсьтыз одӥг гинэ вордӥськем Пизэ яратэ вал шуыса.

29-ТӤ КОНЬЫВУОН — 4-ТӤ ШУРКЫНМОН

ИНМАРЛЭН КЫЛЫСЬТЫЗ УЗЫРЛЫК | ИОАНН 18, 19

Духовной марӟанъёсты утчаськомы

(Иоанн 19:30) Уксусэз веръям бераз Иисус шуиз: «Быдэсмиз!» Но йырзэ мыкыртӥз, лулзэ сётӥз (Инмар кие).

nwtsty эскерон понна материал (Ин 19:30)

лулзэ сётӥз Яке «кулӥз; шокамысь дугдӥз». Татын «лул» кыл (грек кылын пне́ума) возьматыны быгатэ «шокамез» яке «улон кужымез». Озьы вераны луоз лыдэ басьтыса сое, кызьы грек кыл экпне́о (яке «пушкысь шокчыны») кутэмын Мк 15:37 но Лк 23:46 (кытын со «лулыз потӥз» шуыса берыктэмын). Вань малпан, «лулзэ сётӥз» шуыса берыктэм грек кыл возьматэ, Иисус ас мылкыд каремезъя улон понна нюръяськемысь дугдӥз шуыса, малы ке шуоно со сярысь верам вань азьпалзэ ивортонъёс быдэсмизы. Котькызьы мед луоз, но со дась луиз аслэсьтыз «лулзэ виисьёс кие» сётыны (Ис 53:12; Ин 10:11).

(Иоанн 19:31) Пятница вылэмысь субботалы мугоръёсты кирос борды кельтонтэм понна (уго таиз суббота быдӟым нунал вал) иудейёс Пилатлэсь куризы, пыдъюмылъёссэс пыргытыса, соосты кирос бордысь басьтыны.

nwtsty эскерон понна материал (Ин 19:31)

таиз суббота быдӟым нунал вал 15-тӥ нисан, Пасха бере нунал, котькыӵе нуналэ мед тупалоз, со котьку суббота вал (Лв 23:5—7). Та нимысьтыз суббота тупа вал ке огшоры суббота нуналэн (иудейёслэн арнязылэн сизьыметӥ нуналэныз, кудӥз кыстӥське вал пятницае шунды пуксёнысен субботае шунды пуксёнозь), со «быдӟым нуналэн» лыдъяське вал. Ӵапак сыӵе суббота тупаз Иисуслэн кулэмезлэн мукет нуналаз, нош со кулӥз пятницае. А. в. 31-тӥ арысен а. в. 33-тӥ арозь вакытэз басьтыса, одӥгез гинэ ар, кудаз 14-тӥ нисан пятницае тупаз, а. в. 33-тӥ ар вал. Ваньмыз со вера, Иисус 33-тӥ арын 14-тӥ нисанэ кулӥз шуыса.