Секыт дыръя Иегова тӥледлы юрттоз

1, 2. Маин асьме югдурмы тупа Иерусалиме берытскем еврейёслэн югдурзылы? (Учке «Аггейлэн, Захариялэн но Ездралэн улон нуналъёссы» схемаез.)

СЮЛМАСЬКИСЬКОДЫ-А тӥ со сярысь, мар тӥледыз азьланяз возьма? Оло нош, тӥ уждэс ыштӥды но уд тодӥське, кызьы семьядэс сюдоно-вордоно. Яке тӥ матысь адямиосты понна сюлмаськиськоды, малы ке шуоно шаерады бугыръяськонъёс луыло, кивалтӥсьёс тодытон ужез нуыны люкето но адямиос, ӟеч иворез кылыкузы, лекъяськыны кутско. Соку умой луысал эскерыны, кызьы Иегова вашкала дыръя израиль калыклы юрттылӥз та выллем шуг-секытъёс пыр потыны.

² Вавилонысь Иерусалиме берытскон понна, еврейёслы юн оскон кулэ вал. Малы ке шуоно соослы Вавилонысь улэм-вылэмзэс кельтоно вал но кошконо вал шаере, кудӥз сярысь соос пӧлысь тросэз туж ик трос ӧз тодэ. Отчы вуэмзы бере ик соос шуг-секытъёсын пумиськизы. Кылсярысь, семьяоссэс сюдон-вордон понна, соослэн коньдонзы уг тырмы вал, Персияын бугыръяськонъёс луылӥзы, нош артысь калыкъёс соослы пумитъяськизы. Таин сэрен куд-огъёсызлы храмез пуктонлы валтӥсь саклыксэс висъяны секыт вал. Соин ик асьме вакытлэсь азьло 520-тӥ ар котырын Иегова соос доры ыстӥз кык пророкъёссэ, Аггеез но Захарияез. Соос калыклэсь мылкыдзэ ӝутыны кулэ вал Иеговалы ужаны-тыршыны (Агг. 1:1; Зах. 1:1). Пророкъёс соослы сётэм ужез туж умой быдэстӥзы. Но ог 50 ар ортчыса, еврейёслэн мылкыдзы нош ик пуксиз. Соку Вавилонысь Иерусалиме ыстэмын вал Ездра, «Моисей пыр сётэм законзэ тодӥсь-валась мурт вал со». Со калыклэсь мылкыдзэ ӝутӥз но юрттӥз Иеговалы ужан-тыршонэз улоназы нырысетӥ интые пуктыны (Езд. 7:1—6).

3. Кыӵе юанъёсты ми эскеромы? (Мадёнъёс 22:19).

³ Аггей но Захария израиль калыклы юрттӥзы Иегова вылэ оскиськыса улыны, артысь калыкъёс соослы пумитъяськыса улӥзы ке но. Та пророкъёслэн кылъёссы милемлы но юрттозы, кыӵе гинэ шуг-секытъёсын ми медам пумиське. (Лыдӟе Мадёнъёсты 22:19.) Ми эскеромы Аггейлэсь но Захариялэсь азьпалзэ ивортонъёссэс, озьы ик учкомы, кыӵе пример возьматӥз милемлы Ездра. Со сяна, ми тодомы: кыӵе шуг-секытъёсын пумиськизы Иерусалиме берытскем еврейёс? Малы милемлы туж секыт дыръя но Иеговалы ужан-тыршонэз нырысетӥ интые пуктоно? Но кызьы секыт дыръя Иеговалы осконмес юнматоно?

КЫӴЕ ШУГ-СЕКЫТЪЁССЫ ВАЛ ИЕРУСАЛИМЕ БЕРЫТСКЕМ ЕВРЕЙЁСЛЭН

4, 5. Малы храмез пуктӥсьёслэн мылкыдзы пуксьыны кутскиз?

⁴ Иерусалиме берытскемзы бере еврейёслы трос уж быдэстоно вал. Вакчи дыр куспын соос Иеговалы курбон сётон ӝӧк пуктӥзы но храмлы инъет понӥзы (Езд. 3:1—3, 10). Но ӝоген соослэн мылкыдзы пуксьыны кутскиз, малы ке шуоно, храмез пуктон сяна, соослы асьсэлы улон инты лэсьтоно, бусыоссэс кизёно но семьяоссэс сюдоно-вордоно вал (Езд. 2:68, 70). Озьы ик тушмонъёссы люкетыны кутскизы храмез тупатыны (Езд. 4:1—5).

⁵ Со сяна, пленысь берытскем израиль калыклэн коньдонэн герӟаськем шуг-секытъёсыз вал, озьы ик шаеразы югдур капчи ӧй вал. Соослэн шаерзы Персидской империе пыриз. Асьме вакытлэсь азьло 530-тӥ арын Кир II кулэм бере со интые кивалтыны кутскиз Камби́з II. Со Египетэн ожмаськыны мынӥз. Куке солэн ожгарчиосыз израиль музъемъёс пыр ортчылӥзы, соос еврейёслэсь сиён, ву но кӧлон инты куро вал, вылды. Таин сэрен израиль калыклы эшшо но секытгес луиз. Камбиз II кулэм бере Персияын Дарий I эксэй луиз. Со кивалтыку, империын югдур умойгес ӧз луы. Пӧртэм интыосын адямиос бугыръяськыны кутскылӥзы. Вань та шуг-секытъёсын сэрен куд-огъёсыз сюлмаськизы, кызьы соос семьяоссэс сюдозы-вордозы, озьы ик малпазы, Иеговалы храм пуктыны дыр ӧз вуы на шуыса (Агг. 1:2).

6. Кыӵе эшшо шуг-секытъёсын пумиськизы на еврейёс но кызьы соосты оскытӥз Захария? (Захария 4:6, 7).

⁶ Лыдӟе Захариялэсь 4:6, 7. Коньдонэн герӟаськем шуг-секытъёссы но шаерын секыт югдур сяна, еврейёсты уйылӥзы-уллязы на. Асьме вакытлэсь азьло 522-тӥ арын тушмонъёссылэн узатэмзыя кивалтӥсьёс Иеговалэсь храмзэ пуктыны ӧз лэзе ни. Но Захария калыкез оскытӥз, номыр шоры учкытэк, Иегова соослы юрттоз шуыса. Асьме вакытлэсь азьло 520-тӥ арын Дарий эксэй еврейёслы лэзиз пуктӥськон ужъёсты азьланьтыны, соослы коньдон сётӥз но мукет сямен юрттӥськиз (Езд. 6:1, 6—10).

7. Кызьы Иегова еврейёсты бакель кариз, куке соос храмез пуктон борды басьтӥськизы?

⁷ Аггей но Захария пыр Иегова аслаз ужась-тыршисьёсызлы кылзэ сётӥз, соос храмез тупатыны кутскизы ке, со соосын луоз шуыса (Агг. 1:8, 13, 14; Зах. 1:3, 16). Аггей но Захария калыклэсь мылкыдзэ ӝутыны быгатӥзы. Соин ик соос асьме вакытлэсь азьло 520-тӥ арын пуктӥськон ужъёсты азьланьтӥзы. Вить ар но ӧз ортчы, храм пуктэмын вал. Шуг-секытъёсыз шоры учкытэк, израиль калык Иеговалэсь ужзэ нырысетӥ интые пуктӥз, нош Иегова соослы улон понна ваньзэ кулэзэ сётӥз но юн осконэн улыны юрттӥз. Ваньмыз та соослы юрттӥз Иеговалы шумпотыса ужаны-тыршыны (Езд. 6:14—16, 22).

ИНМАРЛЫ УЖАН-ТЫРШОНЭЗ КОТЬКУ НО НЫРЫСЕТӤ ИНТЫЕ ПУКТЭ

8. Кызьы кылъёс, кудъёсыз гожтэмын Аггейлэн 2:4, юртто милемлы Инмарлы ужан-тыршонэз нырысетӥ интые пуктыны? (Озьы ик учке сноскаез.)

⁸ Ӝоген бадӟым куректон вуоз, соин ик али туж кулэ адямиослы ӟеч иворез вераны (Марк 13:10). Но милям коньдонэн герӟаськем шуг-секытъёсмы вань ке яке кивалтӥсьёс ужмес нуыны люкето ке, ужан-тыршонэз нырысетӥ интые пуктыны секыт луэ. Мар юрттоз Инмарлэн Эксэйлыкезлы валтӥсь саклыкмес висъяны? Оскыны кулэ, «Саваоф Кузё-Инмар»b ми палан шуыса. Эксэйлыклэсь ужъёссэ асьме ужъёсмылэсь вылӥегес пуктӥмы ке, Инмар милемлы юрттоз. Соин ик милемлы номырлэсь кышкано ӧвӧл. (Лыдӟе Аггейлэсь 2:4.)

9, 10. Кызьы одӥг кузпалъёс ас вылазы шӧдӥзы, кылъёс, кудъёсыз гожтэмын Матфейлэсь 6:33, зэм луо шуыса?

⁹ Ойдолэ тодматскомы Олег но Иринаc кузпалъёсын, кудъёсыз пионеръёс луыса ужало-тыршо. Соос мукет интые кошкизы, со интыысь кенешлы юрттон понна. Отын выль уж шедьтытэк, соослэн коньдонэн герӟаськем шуг-секытъёссы кылдӥзы. Озьы соос быдэс ар ӵоже улӥзы. Мар соослы юрттӥз? Соос ялан ас вылазы Иеговалэсь юрттэмзэ шӧдӥзы. Озьы ик соослы вын-агайёс но сузэр-апайёс юрттӥзы. Олег, кудӥзлэн мылкыдыз ик куашка вал ини, вера: «Та юрттӥз милемлы улонын самой валтӥсезлы саклыкмес висъяны». Та кузпалъёс тодытон уже пыриськизы но со дыре ик уж утчазы.

¹⁰ Огпол, тодытыса бертэмзы бере, Олег но Ирина адӟизы, ӧс выжыязы сиён-юонэн кык пакет сылэ шуыса. Берлогес соос тодӥзы, та кузьымез, 160 иськем ортчыса, соослы эшсы вайиз шуыса. Олег вера: «Со нуналэ ми шӧдӥмы, Иегова но кенеш милемыз туж ярато шуыса. Ми валамы, туж секыт дыръя но Иегова аслэсьтыз ужась-тыршисьёссэ уг кельты шуыса» (Матф. 6:33).

11. Малы милям оскеммы луэ, Иеговалэсь ужзэ вань кужмысьтымы быдэсъяны тыршимы ке?

¹¹ Иеговалэн потэ, ми дышетскисьёсты дасян ужлы валтӥсь саклыкмес мед висъяломы шуыса, малы ке шуоно та уж адямиослэсь улонзэс уте. Кызьы вераськиз ини 7-тӥ абзацын, Аггей Иеговалэсь калыксэ ӧтиз храмез пуктон борды выльысь басьтӥськыны. Инмар кылзэ сётӥз, соос кылзӥськизы ке, соосты бакель кароз шуыса (Агг. 2:18, 19). Ми но оскыны быгатӥськомы: вань кужмысьтымы Иеговалэсь ужзэ быдэсъяны тыршимы ке, со милемыз одно ик бакель кароз.

КЫЗЬЫ ИЕГОВАЛЫ ОСКОНМЕС ЮНМАТОНО

12. Малы Ездралы но мукет еврейёслы юн оскон кулэ вал?

¹² Асьме вакытлэсь азьло 468-тӥ арын Ездра но еврей калыклэн кыкетӥ люкетэз Вавилонысь Иерусалиме мыныны потӥзы. Отчы мынон понна, соослы юн оскон кулэ вал. Малы ке шуоно соос сьӧразы трос зарни но азвесь басьтӥзы, кудзэ эксэй соослы сётӥз храмез пуктыны. Нош сюрес вылын ваньзэ тае таланы быгато вал (Езд. 7:12—16; 8:31). Со сяна, Иерусалиме вуыса, еврейёс валазы, отын но кышкыт шуыса. Малы ке шуоно карын улӥсьёсыз трос ӧй вал, нош борддоръёсты но капкаез тупатыны кулэ вал. Но Ездра Иегова вылэ оскиськиз. Кызьы ми но Иегова вылэ оскиськыса улыны быгатӥськомы?

13. Мар Ездралэсь Иеговалы осконзэ юнматӥз? (Озьы ик учке сноскаез.)

¹³ Ездра адӟиз, кызьы Иегова аслэсьтыз калыксэ секыт дыръя утиз. Асьме вакытлэсь азьло 484-тӥ арын Ахашверош эксэй косон поттӥз Персидской империысь вань еврейёсты быдтыны. Со вакытэ Ездра Вавилонын улӥз, вылды (Есф. 3:7, 13—15). Та косонъя сое но виыны быгато вал! Эксэйлэн косонэз сярысь тодыса, «вань улосвылъёсысь» еврейёс визязы, бӧрдӥзы но Иеговалэсь юрттэтсэ куризы (Есф. 4:3). Малпалэ гинэ, мае шӧдӥзы Ездра но мукет еврейёс, куке тушмонъёссы, кудъёсыз соосты виыны малпало вал, асьсэос виемын вал! (Есф. 9:1, 2). Со учыр Ездраез вуоно шуг-секытъёслы дасяз но осконзэ юнматӥз, Иегова аслэсьтыз калыксэ утьыны быгатэ шуысаd.

14. Мае валаз одӥг сузэр, куке Иегова солы секыт дыръя юрттӥз?

¹⁴ Куке ми адӟиськомы, кызьы Иегова ми сярысь секыт дыръя сюлмаське, милям осконмы юнма, со ми сярысь азьланяз но сюлмаськоз шуыса. Тани Анастасия сузэрлэн учырез, кудӥз Шундыӝужанпал Европаын улэ. Нейтралитет возён понна, солы ужысьтыз кошконо луиз. Со вера: «Азьвыл коньдонтэк мон ноку ӧй кыльылы». Со азьланьтэ: «Мон Иеговалы вӧсяськи но адӟи, со мон сярысь туж сюлмаське шуыса. Мон нош ик куке но ужме ыштӥ ке, мон уг кышка. Инмысь Атае мон сярысь туннэ сюлмаське бере, со мон сярысь ӵуказе но сюлмаськоз».

15. Мар юрттӥз Ездралы Иеговалы юн оскыны? (Ездра 7:27, 28).

¹⁵ Ездра ас вылаз шӧдӥз Иеговалэсь юрттэмзэ. Ездра тодаз вайылӥз трос учыръёсты, куке Иегова солы юрттылӥз. Соин ик со юн оскиз аслаз Инмарезлы. Висъялэ саклыктэс «Инмарелэн Кузё-Инмарлэн киыз мон вылын вал» верамлы. (Лыдӟе Ездралэсь 7:27, 28.) Аслаз книгаяз та выллем кылъёсты Ездра куать пол вера (Езд. 7:6, 9; 8:18, 22, 31).

16. Кыӵе учыръёсы адӟыны луэ Иеговалэсь юрттэмзэ? (Озьы ик учке суредэз.)

¹⁶ Секыт дыръя Иегова милемлы но юрттыны быгатэ. Кылсярысь, конгрессэ мынон понна, ми ужан интыысьтымы кузёмылэсь куриськиськомы. Яке, кенешлэн вань пумиськонъёсаз ветлон понна, ми ужан дырмес воштыны куриськомы. Куке ми лэсьтӥськомы ваньзэ, мае быгатӥськомы, ми адӟомы, кызьы Иегова милемлы юрттэ. Ваньмыз малпаммылэсь но умойгес пӧрмыны быгатэ. Соку Иеговалы осконмы эшшо но юнмалоз.

17. Кызьы Ездра секыт дыръя зӥбыт-востэм луэмзэ возьматӥз? (Учке вылбамысь суредэз.)

¹⁷ Ездра зӥбыт-востэм луэмзэ возьматӥз но Иеговалэсь юрттэтсэ куриз. Ездралэн туж трос ужъёсыз вал. Таин сэрен сюлмаськыкуз, со зӥбыт-востэмен Иеговалы вӧсяськиз (Езд. 8:21—23; 9:3—5). Куке еврейёс адӟизы, кызьы Ездра секыт дыръя Иегова вылэ оскиське, соос сое буйгатылӥзы но солэсь адӟем каризы (Езд. 10:1—4). Куке ми сюлмаськиськомы, милям улон понна ваньмыз кулэез луоз-а, уз-а, яке семьяенымы ваньмыз умой-а, ӧвӧл-а шуыса, милемлы юн осконэн Иеговалы вӧсяськоно.

18. Мар кароно, Иеговалы осконмы эшшо но юнгес мед луоз шуыса?

¹⁸ Куке ми Иеговалэсь юрттэтсэ куриськомы но огъя оскисьёсмылэсь юрттэтсэс ум палэнтӥське, Инмарлы осконмы эшшо но юнма. Тани Эрика сузэрлэн учырез, кудӥзлэн куинь нылпиосыз вань. Со туж бадӟым куректонэн пумиськиз. Вакчи дыр куспын солэн вордӥськымтэ нылпиез но яратоно картэз кулӥзы. Но со котьку Иеговалы юн оскиськыса улӥз. Ортчемез шоры учкыса, со вера: «Уг луы тодыны, кызьы Иегова тыныд юрттоз. Со паймымон амалэн юрттыны быгатэ. Ӵем дыръя вӧсяськонъёсылы Иегова вын-агайёс но сузэр-апайёс пыр ответ сётылӥз. Соос мыным туж дырыз дыръя юрттӥзы. Эшъёсмылы сюлэммес усьтӥмы ке, соос милемлы юрттыны быгатозы».

АЗЬЛАНЯЗ НО ИЕГОВА ВЫЛЭ ОСКИСЬКЕ

19, 20. Малы дышетскыны луэ еврейёслэсь, кудъёсыз Иерусалиме берытскыны ӧз быгатэ?

¹⁹ Милям тросэзлы дышетскеммы луэ со еврейёслэсь но, кудъёсыз Иерусалиме берытскыны ӧз быгатэ. Кин ке но арлыдо вал ини, кин ке но секыт висьыса улӥз, нош кин ке но семьязэ кельтыны ӧз быгаты. Но ваньзы соос шумпотыса юрттӥзы соослы, кинъёс Иерусалиме берытскизы, соослы ваньзэ кулэзэ сётыса (Езд. 1:5, 6). Соос одӥг пол гинэ ӧз юрттӥське, дыр. Еврей калыклэн нырысетӥ группаез Иерусалиме берытскем бере ог 19 ар ортчыса но, Вавилонэ кылемъёс Иерусалиме юрттэт ыстӥзы (Зах. 6:10).

²⁰ Ми ум ке быгатӥське Иеговалы ужаны-тыршыны сомында, кӧня милям потэ, кимес лэзёно ӧвӧл, малы ке шуоно Иегова сюлмысь тыршеммес адӟе. Кытысь ми сое тодӥськомы? Иегова Захариялы шуиз зарнилэсь но азвесьлэсь венец лэсьтыны, кудзэ ыстӥзы Вавилонэ кылем еврейёс (Зах. 6:11). Та венец лэсьтэмын вал, жалятэк сётэм кузьымъёссы сярысь «буре ваён понна» (Зах. 6:14). Иегова милесьтым но секыт дыръя ужам-тыршеммес ноку уз вунэты (Евр. 6:10).

21. Мар милемлы юрттоз азьланяз но Иегова вылэ оскиськыса улыны?

²¹ Ми берпум нуналъёсы улӥськомы. Соин ик малпано ӧвӧл, азьланяз улон капчигес луоз шуыса. Югдур эшшо но уродгес луыны быгатэ (2 Тим. 3:1, 13). Но сюлмаськоно ӧвӧл. Эн вунэтэ, мар вераз Инмар аслаз калыкезлы Аггей улон нуналъёсы: «Мон тӥледын... ...Эн кышкалэ!» (Агг. 2:4, 5). Ми вань сюлмысьтымы тыршимы ке Иеговалэсь эриксэ быдэсъяны, со милемыз уз кельты. Та статьяын ми эскеримы Аггейлэсь но Захариялэсь азьпалзэ ивортонъёссэс. Озьы ик тодӥмы, кыӵе адӟем карон возьматӥз Ездра. Басьтэм тодон-валанмес улонамы пыртыса, ми быгатомы Иегова вылэ оскиськыса улыны, кыӵе гинэ секыт медам луы.