Мар тодыны кулэ пумиськылонъёс сярысь

1, 2. Мар верало куд-огъёсыз пумиськылон вакыт сярысь?

ӴЕМ ДЫРЪЯ пумиськылон вакыт трос шумпотон вае. Тросэз таин соглаш кариськозы. Тӥ али пумиськылӥськоды ке, тӥляд но потэ, луоз, та дыр тӥледлы шумпотон гинэ мед ваёз шуыса. Эфиопиысь Ци́онa сузэр вера: «Куке ми картэным пумиськылӥмы, со туж шудо вакыт вал! Ми кулэ луись юанъёсты эскеримы, озьы ик трос серекъямы но. Мон туж шумпотӥсько вал, пумитай шуыса сое, кинэ мон яратӥсько но кин монэ яратэ».

² Нош тани мар вера Нидерландыысь Але́ссио агай: «Со дыр, куке ми кышноеным пумиськылӥмы, туж умой вал. Озьы ке но милям шуг-секытъёсмы но вал». Та статьяын ми эскеромы, кыӵе шуг-секытъёсын пумиськыны быгато соос, кинъёс пумиськыло, но Библиысь кыӵе возетъёс соослы юрттыны быгато. Озьы ик ми тодомы, кызьы кенешысь мукет агайёслэн но сузэръёслэн соослы юрттэмзы луэ.

ТОДАДЫ ВОЗЕ ПУМИСЬКЫЛОН ВАКЫТЛЭСЬ УЖПУМЗЭ

3. Кыӵе ужпумез пумиськылон вакытлэн? (Мадёнъёс 20:25).

³ Пумиськылон вакыт трос шумпотон вае ке но, агайлы но сузэрлы, кудъёсыз пумиськыло, тодазы возёно, та дыр куспын соослы кулэ луись ужпум кутоно шуыса. Соос кузпалъяськыны малпазы ке, соку сюан нуналазы соос Иегова азьын кылзэс сётозы, музъем вылын улытозязы ог-огзэс яратозы но гажалозы шуыса. Ми котькыӵе сётэм кылмес быдэстыны тыршиськомы, озьы ик кузпалъяськыку сётэм кылмес но. (Лыдӟе Мадёнъёсты 20:25.) Пумиськылыкузы агайлы но сузэрлы кулэ ог-огзэс умойгес тодыны но валаны, соос ог-огзылы тупало-а, уг-а. Соос ужпум кутӥзы ке, уз кузпалъяське шуыса, со уз возьматы, соос мае ке шонертэм лэсьтӥзы шуыса. Со возьматоз, пумиськылон вакыт ас ужпумзэ быдэстӥз шуыса,— со соослы ужпум кутыны юрттӥз.

4. Малы ваньмылы пумиськылон вакыт шоры шонер учконо?

⁴ Тон пумиськылон вакыт шоры шонер учкид ке, соку уд кутскы пумиськылыны соин, кинэ аслыд тупась кузпалэн уд лыдъяськы. Но пумиськылон вакытлэн ужпумез сярысь тодазы возёно ваньмызлы, кузпалъяськымтэ христианъёслы гинэ ӧвӧл. Кылсярысь, куд-огъёсыз малпало, кинъёс ке но пумиськылыны кутскизы ке, соос одно ик кузпалъяськозы шуыса. Кызьы соку асьсэды шӧдо пумиськылӥсь христианъёс? Мели́сса, Огазеяськем Штатъёсысь бызьымтэ сузэр, вера: «Куддыръя, пумиськылӥсь агаез но сузэрез адӟыса, куд-огъёсыз соослы мултэс саклык висъяло но туж возьмало, ку соос кузпалъяськозы. Соин сэрен пумиськылӥсь христианъёс валазы ке но, ог-огзылы уг тупало шуыса, пумиськылэмысь уг дугдо. Нош соос, кинъёс уг пумиськыло, сыӵе югдурез адӟыса, со сярысь малпаны ик кышкало».

ОГ-ОГДЭС УМОЙ ТОДЭ

5, 6. Мае тодыны кулэ ог-огзы сярысь соослы, кинъёс пумиськыло? (1 Пётр 3:4).

⁵ Тон али кинэн ке пумиськылӥськод ке, мар тыныд юрттоз ужпум кутыны, кузпалъяськоно-а, ӧвӧл-а? Тыршы адямиез умой тодыны. Валамон, тон со сярысь мар ке но тодӥськод ини. Но пумиськылыку валаны кулэ, мар «адямилэн сюлэм пушказ». (Лыдӟе 1 Пётрлэсь 3:4.) Кылсярысь, тодоно, кыӵе адямилэн Иеговаен кусыпъёсыз, кыӵе солэн сямъёсыз но кызьы со малпаське. Дыр ортчыса, тон валэктон шедьтод таӵе юанъёслы: «Со мыным умой кузпал луоз-а? (Мад. 31:26, 27, 30; Еф. 5:33; 1 Тим. 5:8). Быгатомы-а ми ог-огмес яратыны но ог-огмы сярысь сюлмаськыны? Быгатомы-а ми ог-огмылэн тырмымтэосмы шоры синмес ворсаны? (Рим. 3:23)»b. Учконо ӧвӧл, мар огкадез тӥляд вань. Учконо, дась-а тӥ, пӧртэмлыкъёсты шоры учкытэк, ӵош улыны.

⁶ Мае эшшо тодыны кулэ на адями сярысь? Туж зол синмаськемдылэсь азьло тӥляд потоз, вылды, эскеремды кулэ луись юанъёсты, кылсярысь, тупало-а ас азяды пуктэм ужпумъёсты. Но пумиськылыны кутскемды бере ик ваньмыз сярысь одно ик вераськоно ӧвӧл. Кылсярысь, тазалык сярысь, коньдонэн герӟаськем шуг-секытъёс сярысь но улонысь секыт учыръёс сярысь берлогес но вераськыны луоз. (Ӵошатэ Иоаннлэсь 16:12.) Али ик мае ке верамед уг поты ке, вера, тон дась ӧвӧл на шуыса. Но эн вунэты: куке но сое верано луоз. Малы ке шуоно, кузпалъяськоно-а, ӧвӧл-а шуыса ужпум кутон понна, ог-огеныды, номыре ватытэк, вераськыны кулэ.

7. Мар карыны быгато агай но сузэр, кудъёсыз пумиськыло, ог-огзэс умойгес тодон понна? (Озьы ик учке «Тӥ ог-огдылэсь кыдёкын улӥськоды ке» рамкаез.) (Озьы ик учке суредъёсты.)

⁷ Кызьы тодыны луэ, мар адямилэн сюлмаз? Одӥгез умой амал — номыре ватытэк вераськыны: юанъёс сётъяны но сак кылзыны (Мад. 20:5; Иак. 1:19). Мар со понна кароно? Ӵош лэсьтэ сыӵе ужъёсты, кудъёсыз дыръя вераськыны луэ. Кылсярысь, ӵош сиське, кыре поталэ но тодытэ. Озьы ик умойгес тодматскыны луэ, эшъёсын но семьяен дырез ортчытыса. Со сяна, быдэсъялэ сыӵе ужъёсты, кудъёсыз тӥледлы адӟыны юрттозы, кызьы тӥ асьтэды пӧртэм учыръёсын но пӧртэм адямиосын возиськоды. Тани мар лэсьтӥз Нидерландыысь А́свин агай, куке Али́сия кышноеныз пумиськылэ гинэ вал: «Ми быдэсъямы сыӵе ужъёсты, кудъёсыз милемлы юрттӥзы ог-огмес умойгес тодыны. Кылсярысь, ми ӵош сиён пӧрамы но корка котырысь мукет ужъёсты ӵош быдэсъямы. Озьы ми адӟимы ог-огмылэсь умой но ляб палъёсмес».

8. Кыӵе пайда вае Библиез ӵош эскерон?

⁸ Озьы ик тӥ быгатӥськоды ог-огдэс умойгес тодыны, Библиез ӵош эскерыса. Кузпалъяськиды ке, тӥледлы семьяен йыбырттонлы дыр висъяно луоз, Инмар семьяяды нырысетӥ интыын мед луоз шуыса (Екк. 4:12). Соин ик умой луысал пумиськылыкуды ик ини Библиез ӵош эскерыны. Соос, кинъёс пумиськыло, семья ӧвӧл на но агай сузэрлы йыр уг луы на. Озьы ке но, Библиез ӵош эскерыса, тӥ адӟоды, юнэсь-а кыкнадылэн но Иеговаен кусыпъёсты. Огазеяськем Штатъёсысь Макс но Ла́йза кузпалъёс верало, кыӵе эшшо пайда вае на Библиез ӵош эскерон. Макс вера: «Пумиськылыны кутскеммы бере ик ми ӵош эскеримы пумиськылонъёс, сюан но семьяен улон сярысь статьяосты. Огшоры вераськыку, сыӵе юанъёсты эскерыны секыт луысал».

МАР СЯРЫСЬ ЭШШО МАЛПАНЫ КУЛЭ НА

9. Мае лыдэ басьтоно агайлы но сузэрлы, кудъёсыз быръё, кинлы вераны пумиськылэмзы сярысь?

⁹ Кинлы вераны кулэ пумиськылэмды сярысь? Тӥ асьтэос бырйиськоды. Оло нош, кутсконаз тӥ куд-огъёсызлы гинэ вералоды (Мад. 17:27). Соку тӥледлы мултэс саклык уз висъялэ но трос юанъёс уз сётъялэ. Но нокинлы ӧд вералэ ке, тӥ дырдэс ӵош гинэ ортчытъялоды, вылды. Нош со кышкыт. Соин ик умой луысал кинлы ке вераны. Соку со быгатоз тӥледлы умой визь-кенеш сётыны яке кызьы ке юрттыны (Мад. 15:22). Кылсярысь, вераны луэ куд-ог ӵыжы-выжыослы, юн осконэн эшъёслы яке тӧроослы.

10. Мар юрттоз агайлы но сузэрлы пумиськылыкузы азон-калгонлэсь палэнскыны? (Мадёнъёс 22:3).

¹⁰ Мар кароно, пумиськылыку азон-калгонлэсь палэнскон понна? Дырдэс ӵош ортчытэмдыя, тӥ ог-огдылы золгес но золгес синмаськоды. Мар соку юрттоз азон-калгонлэсь палэнскыны? (1 Кор. 6:18). Эн вераське со сярысь, мар азон-калгонэн герӟаськемын, калыктэм интыын кыкнады гинэ эн кыле но чаклалэ, кӧня вина юиськоды (Еф. 5:3). Озьы ӧд лэсьтэ ке, шӧдонъёсты йырдэс поромытозы но асьтэды шонер возьыны секыт луоз. Ялан вераське со сярысь, кызьы тӥ быгатӥськоды Иеговаез шумпоттыны но ог-огдылы гажамдэс возьматыны. (Лыдӟе Мадёнъёсты 22:3.) Тани мар юрттӥз Эфиопиысь Дави́т но А́лмаз кузпалъёслы. Соос верало: «Ми дырмес ортчытъямы калыко интыосын яке эшъёсмы пӧлын. Машинаын яке коркан ми кыкнамы гинэ ноку ӧм кыльылэ. Та милемыз визь сынаськонъёслэсь утиз».

11. Мае лыдэ басьтоно пумиськылӥсь агайлы но сузэрлы, куке соос ужпум куто, яра-а соослы мусояськыны?

¹¹ Нош быгато-а агай но сузэр, кудъёсыз пумиськыло, ог-огзэс мусояны? Кусыпъёсты юнмамъя, тӥ ужпум кутоды, вылды, быгатӥськоды шуыса. Но ӧд ке чаклаське, шӧдонъёсты йырдэс поромытозы но тӥледлы секыт луоз валаны, тӥ ог-огдылы зэмзэ ик тупаськоды-а, уд-а (Кырӟ. 1:1; 2:6). Со сяна, лулмугорлэн кулэ каронъёсызлы сётскыса, тӥ сьӧлыке но пырыны быгатоды (Мад. 6:27). Соин ик пумиськылыны кутскыкуды ик, Библиысь возетъёсты лыдэ басьтыса, ужпум кутэ, кызьы асьтэды возёды (1 Фес. 4:3—7)c. Юалэ асьтэлэсь: «Асьмеды воземмы сэрен мукетъёсыз асьсэды умойтэм уз шӧдэ-а? Асьмеды воземмы асьмелэсь ик шонертэм мылпотонъёсмес уз пуромыты-а?»

12. Мар сярысь вунэтоно ӧвӧл, тупамтэос кылдыку?

¹² Мар тӥ кариськоды, тупамтэос кылдыку? Куддыръя кылды уг тупа ке, возьматэ-а со, тӥ ог-огдылы уд тупаське шуыса? Котьку ик уг. Тупамтэос котькинлэн кылдыло. Кусыпъёссы юнэсь мед луозы шуыса, кузпалъёслы ог-огзыя тупатскыны тыршоно. Со, кызьы тӥ али шуг-секытъёсты сэрттӥськоды-пертчиськоды, возьматэ, быгатоды-а тӥ азьланяз соосты сэрттыны-пертчыны. Юалэ асьтэлэсь: «Быгатӥськомы-а ми кыӵе ке юанъёсты эскерыны керетытэк но ог-огмес гажаса? Тыршиськомы-а ми соку ик янгышъёсмес валаны но соосты тупатыны? Ӝог-а ми ог-огмес простить кариськомы?» (Еф. 4:31, 32). Тӥ али ик ини котькыӵе муген споръяськиськоды ке, кузпалъяськемды бере югдур умойгес уз луы, дыр. Тон валаськод ке, адями тыныд уг тупа шуыса, кыкнадылы ик умойгес луоз пумиськылэмысь дугдыныd.

13. Мар юрттоз пумиськылӥсь агайлы но сузэрлы валаны, кӧня дыр пумиськылоно?

¹³ Кӧня дыр пумиськылоно? Дыртон номыр умойзэ уг вайы (Мад. 21:5). Соин ик пумиськылоно сомында, кӧня кулэ, ог-огдэс умой тодон понна. Но нокыӵе мугтэк кема пумиськылоно ӧвӧл. Библиын гожтэмын: «Кема дыр ӵоже быдэсмисьтэм оскиськон сюлэмез шугъяськытэ» (Мад. 13:12). Озьы ик, кемагес пумиськылэмдыя, тӥледлы лулмугорлэсь кулэ каронъёссэ кутыны секытгес но секытгес луоз (1 Кор. 7:9). Соин ик эн малпалэ, кӧня дыр тӥледлы пумиськылыны кулэ на. Со интые малпаське: «Мар мыным тодыны кулэ на адями сярысь, ужпум кутон понна?»

КЫЗЬЫ ЮРТТОНО СООСЛЫ, КИНЪЁС ПУМИСЬКЫЛО?

14. Кызьы ми ваньмы юрттыны быгатӥськомы соослы, кинъёс пумиськыло? (Озьы ик учке суредэз.)

¹⁴ Тодмоосмы пӧлысь кин ке пумиськылэ ке, кызьы милям соослы юрттэммы луэ? Кылсярысь, ми быгатӥськомы соосты ӧтьыны ӵош сиськыны, семьяен йыбырттонамы яке ӵош шутэтскыны (Рим. 12:13). Ваньмыз та юрттоз соослы ог-огзэс умойгес тодыны. Оло нош, тӥ соослы юрттыны быгатӥськоды, соосын ӵош кытчы ке мыныса яке соосты ас дорады ӧтьыса, соос кыкназы гинэ медаз кыле шуыса (Гал. 6:10). Асвин но Алисия кузпалъёс туж тау каро агайёслы но сузэръёслы, кудъёсыз соослы юрттӥзы. Алисия тодаз вае: «Ми туж шумпотӥськомы вал, куке куд-огъёсыз милемыз куное ӧтьылӥзы, ми ӵош, но со дыре ик калык пӧлын луыны мед быгатомы шуыса». Агай но сузэр тӥледыз ӧтизы ке соосын дырзэс ортчытыны, шумпотыса соглаш кариське. Соосты кыназы гинэ эн кельтэ, но со дыре ик ялан сьӧразы эн ветлэ, соос ог-огенызы вераськыны мед быгатозы шуыса (Флп. 2:4).

15. Кызьы эшшо юрттыны луэ на соослы, кинъёс пумиськыло? (Мадёнъёс 12:18).

¹⁵ Озьы ик ми юрттыны быгатӥськомы соослы, кинъёс пумиськыло, соин, мае вераськомы но мае ум вераське. Куддыръя со понна асьмеды киямы кутоно. (Лыдӟе Мадёнъёсты 12:18.) Кылсярысь, милям мукетъёсызлы туж вераммы потэ, кин ке но пумиськылыны кутскиз шуыса. Но эн дыртэ. Оло нош, пумиськылӥсьёслэн асьсэлэн со сярысь мукетъёсызлы верамзы потэ. Озьы ик милемлы соос сярысь кыл вӧлдоно ӧвӧл но кутэм ужпумъёссэс тэргано ӧвӧл (Мад. 20:19; Рим. 14:10; 1 Фес. 4:11). Со сяна, пумиськылӥсь агайлы но сузэрлы верано ӧвӧл сое, маин сэрен соос асьсэды умойтэм шӧдысалзы но малпасалзы, соослы одно ик кузпалъяськыны кулэ шуыса. Эли́з сузэр но солэн картэз тодазы ваё: «Ми асьмеды туж умойтэм шӧдӥмы, куке мукетъёсыз милемыз сюанмы сярысь юало вал, нош ми асьмеос со сярысь ӧм кенеше на вал».

16. Кызьы асьмеды возёно, агай но сузэр пумиськылэмысь дугдӥзы ке?

¹⁶ Нош кызьы асьмеды возёно, агай но сузэр пумиськылэмысь дугдӥзы ке? Юалляськоно ӧвӧл но кин ке пала дур басьтоно ӧвӧл (1 Пётр 4:15). Лия сузэр вера: «Пӧртэм вераськонъёс ветлӥзы, малы ми пумиськылэмысь дугдӥмы. Сыӵе вераськонъёс монэ туж вӧсь каризы». Кызьы вераськиз ини та статьяын, агайлэн но сузэрлэн пумиськылэмысь дугдэмзы уг возьматы, соос мае ке шонертэм лэсьтӥзы шуыса. Ӵем дыръя со возьматэ, пумиськылон вакыт ас ужпумзэ быдэстӥз шуыса,— со юрттӥз агайлы но сузэрлы ужпум кутыны. Озьы ке но пумиськылыны дугдэмзы бере агайлэн но сузэрлэн сюлэмзы вӧсь луыны быгатэ но соос шӧдыны быгато, огназы кылизы шуыса. Соин ик милемлы малпано, кызьы соослы юрттоно (Мад. 17:17).

17. Мар карыны тыршоно агайлы но сузэрлы пумиськылыкузы?

¹⁷ Кызьы ми адӟимы, пумиськылон вакыт шумпотон но, шуг-секытъёс но вае. Дже́ссика сузэр вера: «Ог-огмес умой тодон понна, милемлы туж тыршоно луиз. Но ми ум жаляське, солы трос дырмес но кужыммес висъямы шуыса». Тӥ али пумиськылӥськоды ке, тырше ог-огдэс умой тодыны. Соку пумиськылон вакытты ас ужпумзэ быдэстоз — со тӥледлы юрттоз визьмо ужпум кутыны.