7-тӥ визь-кенеш. Дышетэ умой сямъёслы

МАЕ СО ВОЗЬМАТЭ

Тӥ асьтэос анай-атайёс бере, тӥляд асьтэлэн эсэпъёсты вань ини, кудъёсызъя тӥ улӥськоды. Кылсярысь, тӥ ужпум кутӥды, пӧяськытэк улоды шуыса. Соку тӥ нылпиостэс но дышетоды, дыр, пӧяськытэк улыны.

Озьы ик тӥляд соослы валэктэмды потоз, туж кулэ шуыса ужась луыны, шонерлыкез яратыны но мукетъёсыз сярысь сюлмаськыны. Сыӵе сямъёслы нылпиосты умой дышетыны пичи дыръязы.

БИБЛИЫСЬ ВИЗЬ-КЕНЕШ: «Улон сюресэзлэн кутсконаз ик пинал пиез визьма-нодъя: пересьмиз ке но уго, со вылысь со уз кожы» (Мадёнъёс 22:6).

МАЛЫ СО КУЛЭ

Асьме вакытэ туж кулэ тодыны, мар умоез, нош мар уродэз луэ. «Туннэ котькытысь адӟыны но лыдӟыны луэ сое, мар умой сямъёсты быдтэ,— шуэ Карен нимо анай.— Нылпиос, вӧзын пукыса ик, сыӵе мае ке учкыны быгато, йырси ик пештырске!»

БИБЛИЫСЬ ВИЗЬ-КЕНЕШ: «[Быдэ вуэмъёслэн] улон-вылон пыр басьтэм визьзы-шӧдонзы ӟечез но, уродэз но висъяны быгатэ ни уго» (Еврейёслы 5:14).

Туж кулэ мукетъёсыз сярысь малпаськыны. Эн вунэтэ «тау» шуыны. Мукетъёсыз сярысь малпаське но котьку юрттыны дась луэ. Туннэ адямиос умой сямъёссэс туж шер возьмато, малы ке шуоно соос электрон тӥрлыказы йырын валче выемын.

БИБЛИЫСЬ ВИЗЬ-КЕНЕШ: «Адямиослы озьы лэсьтэ, кызьы асьтэлы соослэсь лэсьтэмзэс кулэ кариськоды» (Лука 6:31).

МАР КАРЫНЫ ЛУОЗ

Вералэ нылпиостылы, мар умоез, нош мар уродэз луэ. Эскеронъёс возьмато, нылпиос, кудъёсызлы анай-атайёссы вераллязы, кузпалъяськем муртъёслы гинэ ӵош кӧланы яра шуыса, шергес кузпалъяськемзылэсь азьло сексэн выро.

ВИЗЬ-КЕНЕШ. Котькуд тупась учырын тырше валэктыны нылпидылы, мар умоез, нош мар уродэз луэ. Кылсярысь, тӥ иворъёсысь кылӥды ке кыӵе ке лек йыруж сярысь, солы вераны луоз: «Туж кышкыт, адямиос ог-огзэс сокем адӟемпотостэм каро шуыса. Кызьы малпаськод, малы соос сыӵеесь луизы?»

«Нылпиослы ӧд валэкты ке, мар умоез, нош мар уродэз луэ, соослы секытгес шонер быръён лэсьтыны» (Брэндон).

Дышетэ нылпиостэс мукетъёсыз сярысь малпаськыны. Пичи нылпиос но быгато «тау» шуыны но мукетъёссэ гажамзэс возьматыны. Одӥг книгаын верамын: «Нылпиос валало ке, соос сяна, мукет адямиос но вань на шуыса, кылсярысь, семьяязы, классазы яке футбольной командаязы, соос мылысь-кыдысьгес мукетъёсыз сярысь малпасько» (Parenting Without Borders).

ВИЗЬ-КЕНЕШ. Куре нылпиостэс юрттыны тӥледлы корка котырысь ужъёстэс быдэсъяны: соос мед валалозы, мукетъёсызлы юрттыны туж кулэ шуыса.

«Нылпи пичи дырысеныз ик корка котырысь ужъёсты быдэсъяны дышиз ке, солы капчигес луоз, куке со будоз но нимаз улыны кутскоз. Со юрттоз солы кылкутӥсь адями луыны» (Тара).