2-тӥ люкет
Курадӟонъёслэсь мозмытэм музъем
1, 2. Кыӵе мукет малпанзы вань тросэзлэн?
НОШ трос миллион адямиос мукет сямен малпало. Соос оско, адямиосты азьпалан туж умой улон возьма шуыса. Соослэн верамзыя, матысь дыре татын, музъем вылын, лек ужъёстэк но курадӟонъёстэк улон луоз. Соос оско, вань уродэз быдтэмын но быдэсак выль дунне кылдытэмын луоз шуыса. Озьы ик соос верало, выль дуннелэн инъетэз, пе, асьме нуналъёсы ик лэсьтӥське ини.
2 Со адямиос оско, выль дуннеын ожъёс, жалясьтэм луон, йыружъёс, шонертэм ужъёс но куанер улон уз луэ ни шуыса. Со висёнъёстэк, кайгутэк, бӧрдонтэк но кулонтэк улон луоз. Со дыре адямиос дун-шектэмесь луозы но рай музъем вылын шумпотыса пырак улозы. Кулэмъёс гинэ но улӟытэмын луозы но пырак улыны быгатозы!
3, 4. Малы соослэн сыӵе юн осконзы?
3 Со быдэсмыны луонтэм чебер малпан гинэ меда? Ӧвӧл. Та малпан пыкиське юн оскон вылэ, кудӥз вера, рай одно ик луоз шуыса (Еврейёслы 11:1). Малы со адямиослэн сыӵе юн осконзы? Малы ке шуоно озьы вераз быдэс дуннеез Кылдытӥсь, кудӥз ваньзэ быгатэ.
4 Инмарлэн кыл сётэмез сярысь Библия вера: «Солэн верам одӥгез но ӟечлыко кылыз быдэсмытэк ӧз кыльы». «Аслэсьтыз верам кылзэ котьку но быдэсъясь Инмар». «Уго Со вераз но — луиз» (Эксэйлыкъёслэн куинетӥ книгазы 8:56; Титлы 1:2; Псалом 32:9).
5. Кыӵе юанъёслы валэктон сётыны кулэ?
5 Инмар музъем вылын рай кылдытыны малпаз бере, малы со курадӟонъёсты азьло ик ӧз быдты? Малы со, куать сюрс ар возьмаса, али гинэ уродзэ быдтыны малпаз? Возьмато-а ортчем дауръёс ӵоже луэм курадӟонъёс, Инмар асьме сярысь уг сюлмаськы яке со ӧвӧл шуыса?