6-тӥ люкет
Малы Инмар курадӟонъёсты ӧз быдты на
1, 2. Кызьы нырысетӥ адямиос Инмарен кузьмам тужгес но умой кутсконэз тӥязы?
МАР БЕН луиз? Мар тӥяз тужгес но умой кутсконэз, кудзэ Инмар кузьмаз нырысетӥ адямиослы Эдем садын? Малы, райын тупаса улон интые, сюрс аръёс ӵоже лек ужъёс но курадӟонъёс эксэйясько?
2 Малы ке шуоно Адам но Ева асьсэлэсь эрико луонзэс шонертэм амалэн кутӥзы. Соос лыдэ ӧз басьтэ, соос Инмартэк но солэн катъёсызтэк азинлыко луыны кылдытэмын ӧй вал шуыса. Адам но Ева Инмартэк улыны мылкыд каризы, озьы улонзы умойгес луоз шуыса, малпазы. Соин ик соос тӥязы Инмарен гожтэм катъёсыз, кудъёсыз возьмато вал, соос быдэсак эрикоесь ӧвӧл шуыса (Кылдытонлэн кутсконэз, 3-тӥ люкет).
Инмарлэн кивалтэтэз сярысь кылдӥсь юан
3–5. Малы Инмар Адамез но Еваез соку ик ӧз быдты но выльысен ваньзэ ӧз кутскы?
3 Малы Инмар Адамез но Еваез соку ик ӧз быдты, но мукет кузпалъёсты кылдытыса, выльысен ваньзэ ӧз кутскы? Малы ке шуоно вераськон мынӥз солэн ваньмыныз кивалтыны правоез сярысь, яке солэн гинэ быдэс дуннеен кивалтыны быгатэмез сярысь.
4 Кылдӥз юан: кинлэн кивалтыны правоез вань, но кинлэн кивалтэтэз шонер луэ? Инмарлэн ваньзэ быгатӥсь но ваньмызлы Кылдытӥсь луэмез солы право сётэ соосын кивалтыны. Со котькинлэсь но визьмо бере, солэн кивалтэтэз кылдытэмъёсыз понна ваньмызлэсь умой луэ. Но со дыре ик Инмарлэн кивалтэтэз сярысь юан кылдӥз. Оло нош солэн кылдытэменыз — адямиен, маке умойтэм вал-а? Берлогес ми учкомы, кызьы таин герӟаськемын адямилэн дун-чылкыт луэмез сярысь юан?
5 Адямиос Инмарлэсь палэнтӥськемен, кылдӥз мукетыз юан: луозы-а адямиос, Инмарлэн кивалтэмезтэк, азинлыкогес? Веранэз ӧвӧл, Кылдытӥсь та юанлы валэктонэз тодӥз. Тужгес но шонер амал, кудӥз юрттысал адямиослы но сое валаны,— соослы, ас мылкыд каремзыя, быдэсак эрик сётон. Та сюресэз соос ас эриксыя бырйизы, соин ик Инмар ӧз куты соосты сыӵе быръёнлэсь.
6, 7. Малы Инмар адямиослы быдэсак эрико луыны сыӵе кема дыр сётэ?
6 Адямиослы быдэсак эрико луонзэс кутыны тырмыт дыр сётыса, Инмар весяклы возьматоз: адямиослы умойгес Инмарлэн кивалтэтэз улсын улыны яке быдэсак эрико луыны. Та висъям дыр тырмыт луыны кулэ адямиослы быгатыны лэсьтыны сое, мае соос политика, промышленность, наука но медицина удысъёсын вылӥ азинсконэн лыдъяло.
7 Быгатэ-а адямилэн кивалтэтэз Инмартэк азинлыко луыны валан понна, Инмар адямилы туннэ нуналозь кивалтыны эрик сётӥз. Озьы адями ӟечез но уродэз вискысь, яратон но адӟемпотостэм карон вискысь, шонерлыко но шонерлыктэм ужъёс вискысь бырйыны быгатӥз. Со озьы ик пумиськиз аслаз быръемезлэн бервылъёсыныз: ӟечлыкен но тупаса улонэн, яке уродэн но курадӟонъёсын.
Духовной кылдытэмъёслэн пумит султэмзы
8, 9. а) Кызьы инмын пумит султон кутскиз? б) Кинэ Шайтан, Адам но Еваез сяна, пумит султонэ кыскиз?
8 Лыдэ басьтыны кулэ на эшшо одӥг югдурез. Инмарлэн кивалтэтэзлы пумит султӥсьёс пӧлын нырысетӥ адямиос гинэ ӧй вал. Кинъёс улӥзы на со дыре? Духовной кылдытэмъёс. Адямиосты кылдытэмезлэсь азьло, инмын улон понна, Инмар кылдытӥз улонлэсь тужгес но вылӥ формазэ — трос кылчинъёсты. Соос но озьы ик эрико луонэн но Инмар кивалтэтлэсь кылзӥськыса улыны кылдытэмын вал (Иов 38:7; Псалом 103:4; Усьтӥськон 5:11).
9 Библия возьматэ, нырысь ик пумит султон кутскиз инмын. Одӥг духовной кылдытэм быдэсак эрико луыны мылкыд кариз. Озьы ик со мылкыд кариз, адямиос но солы мед йыбырттозы шуыса (Матфей 4:8, 9). Пумит султэм кылчин Адам но Евалэсь пумит султыны мылкыдзэс ӝутӥз. Со пӧяса вераз, Инмар соослэсь маке умойзэ ватэ шуыса (Кылдытонлэн кутсконэз 3:1—5). Соин ик сое Дьявол (кыл вӧлдӥсь) но Шайтан (пумит султӥсь) шуыса нимало. Берлогес со мукет духовной кылдытэмъёсты но пумит султонэ кыскиз. Соосты убиръёс шуыса нимало (Второзаконие 32:17; Усьтӥськон 12:9; 16:14).
10. Кытчы вуттӥз адямиослэн но духовной кылдытэмъёслэн пумит султэмзы?
10 Инмарлы пумит султыса, адямиос Шайтанлэн но солэн убиръёсызлэн ки улазы шедизы. Тӥни малы Библия Шайтанэз «даурлэн „инмарез“» шуыса нимаз, кудӥз «оскисьтэмъёслэсь визьзэс пеймытэн ӵоксаз». Соин ик Инмарлэн Кылыз вера: «Та дуннелэн адямиосыз шайтанлэн ки улаз возисько». Ачиз Иисус Шайтанэз «та дуннелэн эксэез» шуыса нимаз (2 Коринфын улӥсьёслы 4:4; 1 Иоанн 5:19; Иоанн 12:31).
Кык кулэ луись юанъёс
11. Кыӵе мукет юанэн Шайтан Инмарлы пумит мынэмзэ возьматӥз?
11 Шайтан эшшо одӥг юан ӝутӥз на, кудӥныз Инмарлы пумит мынэмзэ возьматӥз. Зэмзэ вераса, со Инмарез янгыше уськытӥз, адямиосты шонертэм кылдытӥз шуыса, но нокинлэн но зӥбет улын шонер ужъёс лэсьтэмез уз поты шуыса. Озьы со вераз, шуг-секытъёсын пумиськыса, соос Инмарез карганы но быгатозы (Иов 2:1—5). Озьыен, Шайтан адямиослэн дун-чылкыт луэмзы сярысь юан ӝутӥз.
12–14. Кызьы висъям дыр Шайтанэн ӝутэм кык юанъёслы шонер валэктон сётыны кулэ вал?
12 Соин ик Инмар тырмыт дыр сётӥз, вань визьмо кылдытэмъёсыз мед адӟозы, кызьы та ӝутэм юанлы валэктон сётэмын луоз, озьы ик Инмарлэн кивалтэтэз сярысь юанлы. (Ӵошаты Римын улӥсьёслы 9:17.) Вань дауръёс ӵоже улон та кык ӝутэм юанъёслы шонер валэктон сётыны кулэ вал.
13 Нырысь ик, мар возьматоз дыр Инмарлэн кивалтэтэз сярысь: шонер луэ-а со? Быгатозы-а адямиос асэнызы асьсэос Инмарлэсь умойгес кивалтыны? Ваёз-а адямиослэн кудӥз ке кивалтэтсы шудо улон, кудаз уз луэ ни ожъёс, йыружъёс но шонертэм ужъёс? Быгатоз-а кудӥз ке соос пӧлысь куанер улонэз быдтыны но котькинлы тырмыт ваньбур сётыны? Вормозы-а соос висёнъёсыз, пересьмонэз но кулонэз? Инмарлэн кивалтэтэз ваньзэ сое быдэстыны малпа вал (Кылдытонлэн кутсконэз 1:26—31).
14 Кыкетӥ ӝутэм юан сярысь верано ке, мар возьматоз висъям дыр кылдытэм адямилэн умой палъёсыз сярысь? Янгышаз-а Инмар, адямиосты кылдытыса? Визь сынаськонъёсын пумиськыса, быгатоз-а кин ке ассэ шонер возьыны? Возьматоз-а кин ке адямиос пӧлысь, эрико адями кивалтэт интые, Инмарлэсь кивалтэтсэ быръе шуыса?
[Суред, 13-тӥ бам]
Инмар адямиослы дыр висъяз лэсьтыны сое, мае соос вылӥ азинсконэн лыдъяло
[Источник сярысь тодэт]
Shuttle: Based on NASA photo