7-тӥ люкет_
Кытчы вуттӥз пумит султон?
1–3. Кызьы улон возьматӥз, Инмарлэн алэмез шонер вал шуыса?
ИНМАРЛЭН кывалтыны правоез сярысь ӝутэм юанэз учконо ке, кытчы вуттӥз дауръёс ӵоже кыстӥськись адямилэн кивалтэмез, кудӥз Инмарлэсь куронъёссэ лыдэ уг басьты? Возьматӥзы-а адямиос, соос Инмарлэсь умойгес кивалтӥсьёс луо шуыса? Адямиослэсь ог-огзэс жалясьтэм луэмзэс учконо ке, валамон, ӧз.
2 Нырысетӥ адямиос, Инмар кивалтэтлэсь палэнтӥськемзы бере, куректон бӧрсьы куректонэн пумиськизы. Соос курадӟонъёс ваизы асьсэлы но соос выжыысь потэм адямиослы. Но соослы нокинэ янгыше уськытыны вал, асьсэды сяна. Инмарлэн кылыз вера: «Котькин но аслаз кырсь малпанъёсызлы сётӥськыса, мылкыдзэ отчы понэ ке, соин со ассэ визь сынаськон улэ сётэ» (Иаков 1:14).
3 Улон возьматӥз, Инмарлэн алэмез шонер вал шуыса. Со вераз вал, адямиос Инмарлэн кивалтэмез улысь потӥзы ке, дыр ортчыса, ваньзы кулыса бырозы (Кылдытонлэн кутсконэз 2:17; 3:19). Зэм но, адямиос Инмарлэн кивалтэмез улысь потӥзы, но пумен тазалыксы уродмиз, соос пересьмизы но кулӥзы.
4. Малы ми ваньмы тырбыдэстэмесь вордӥськиськомы, висиськомы но кулӥськомы?
4 Римын улӥсьёслы 5:12 валэктэмын, мар луиз бератаз соослэн выжыенызы: «Соин ик, кызьы одӥг адями пыр дунне вылэ сьӧлык пыриз, нош сьӧлык пыр кулон лыктӥз, соин сэрен, кулон вань адямиос доры вуиз». Соин, куке Адам но Ева Инмарлэн кивалтэтэзлы пумит султӥзы, соос тырбыдэстэм сьӧлыкасьёс луизы. Генетикалэн катъёсызъя, ваньзэ, мае соос выжызылы сётыны быгатӥзы, со — асьсэлэн тырбыдэстэм луэмзы. Соин сэрен асьмеос ваньмы тырбыдэстэмесь вордӥськиськомы, висиськомы но кулӥськомы.
5, 6. Мар возьматӥз дыр адямиослэн тупаса улон но азинсконъёс вайыны тыршемзы пумысен?
5 Ортчизы трос дауръёс. Одӥг быдӟым эксэйлык воштӥз мукетсэ. Пӧртэм пумо кивалтон амалъёс эскеремын вал. Нош адямиос выльысь но выльысь шуг-секытъёсын пумиськылӥзы. Кин ке но малпаны быгатысал, куать сюрс ар ортчыса, адямиос быдэс дуннеын тупаса, шонерлыко но ваньбуро улонын азинлыко луозы шуыса. Но со дырлы соос ӟеч сямо, жалясесь но огъя ужез нуыны быгатӥсесь луыны кулэ вал ини.
6 Нош улонын ваньмыз мукет сямен луэ. Одӥгез но адямиен кылдытэм кивалтэт вань адямиослы тупаса но ваньбуро улон ӧз вайы на. Кызьы адӟимы, XX-тӥ даурын гинэ нацистъёсын трос миллион калыкъёс быдтэмын но 100 миллионлэсь тросгес адямиос ожъёсын виемын вал. Асьсэлэсь пӧртэм луэмзы понна адӟемпотостэм каремен но политика удысын ченгешонъёс кылдэмен, асьме дыре лыдъяны луонтэм трос адямиос курадӟытэмын, пудо-животэз кадь виемын но пытсэт улэ ворсамын вал.
Туала югдур
7. Мар вераны луоз адямиос пӧлын туала кылдэм югдур сярысь?
7 Озьы ик учкы быдэс дуннеын адямиос пӧлын кылдэм югдур шоры. Йыружъёс но жалясьтэм луон эксэйясько. Наркотикъёсыз кутон, азыса-калгыса ветлэмен, палась висёнъёс паськыт вӧлмемын. Трос миллион адямиос кулонэ вуттӥсь СПИД-эн висьыны кутско. Котькуд ар туж трос адямиос сютэм улыса яке висьыса куло, нош со дыре ик вань сыӵе адямиос, кудъёсыз туж узыр уло. Адямиос инкуазез кырсёмыто но музъем ваньбурез быдто. Котькытын семьяос куашкало но нравственной нормаосты дунъян усе. Зэм ик, туала улон Шайтанлэсь, «та даурлэн инмарезлэсь», юрӟым кивалтэмзэ возьматэ. Дунне, кудӥныз со кивалтэ, урод мылкыдо, лек но быдэсак сӧриськемын (2 Коринфын улӥсьёслы 4:4).
8. Малы ми ум быгатӥське адямиослэсь азинсконъёссэс зэмос азинсконэн ниманы?
8 Инмар адямиослы наука удысын но ваньбур поттонын азинлыко луыны тырмыт дыр сётӥз. Но луоз-а сое зэмос азинсконэн ниманы, куке пукыӵ но ньӧл воштэмын вал пулемётъёсын, танкъёсын но ядерной ожмаськон тӥрлыкъёсын? Со-а азинскон, куке адямиос инсьӧре лобаны быгато, нош музъем вылын ог-огенызы тупаса улыны уг быгато? Со-а азинскон, куке адямиос кышкало ӝытазе урамъёстӥ ветлыны, нош куд-ог интыосын — нуназе но?
Мар возьматӥз дыр
9, 10. а) Мае возьматӥзы ортчем дауръёс? б) Малы Инмар эрико луонэз берен ӧз басьты?
9 Дыр возматӥз, адямиос Инмарлэн кивалтэмезтэк азинлыко луыны уг быгато шуыса. Со озьы ик, кызьы соос уг быгато сиёнтэк, вутэк но омыртэк улыны. Валамон, кызьы асьмеос сиёнтэк, вутэк но омыртэк улыны кылдытэмын ӧй вал, озьы ик кылдытэмын ӧй вал Инмарлэн кивалтэмезтэк улыны.
10 Урод ужъёсты быдтытэк, Инмар весяклы возьматӥз, кыӵе ӝожмыт бервылъёсы вуттэ эрико луонэз шонертэм амалэн кутон. Эрико луыны быгатон сыӵе дуно кузьым луэ бере, Инмар сое адямиослэсь берен ӧз басьты, но соослы адӟыны луонлык сётӥз, кытчы вуттэ сое шонертэм амалэн кутон. Инмарлэн Кылаз зэм верамын: «Уг быгаты мынӥсь ас вамышъёсызлы сюрес возьматыны». Со озьы ик шонер вера: «Адямилэн адямиен кивалтэмез солы урод вае» (Иеремия 10:23, НМ; Экклезиаст 8:9, НМ).
11. Быдтӥз-а курадӟонъёсты адямилэн кудӥз ке кивалтэтэз?
11 Адямиослэн куать сюрс ар ӵоже кивалтэмзы, кудӥзлы Инмар дыр сётӥз, яркыт возьматэ, адями курадӟонъёсты быдтыны уг быгаты шуыса. Но со сое ноку но быдтыны ӧз быгаты. Кылсярысь, ас дыраз Израильлэн Соломон эксэез, туж визьмо, узыр кивалтӥсь луыса но, адями кивалтэтлэсь урод бервылъёссэ тупатыны ӧз быгаты (Экклезиаст 4:1—3). Озьы ик туннэ но, техника удысысь выль азинсконъёсты кутыса но, дуннеысь азьмуртъёс уг быгато курадӟонъёсты быдтыны. Эшшо но кышкытэз, кызьы возьматӥз улон, Инмарлэсь кивалтэтсэ лыдэ басьтытэк улӥсь адямиос, курадӟонъёсты быдтэм интые, соослэсь лыдзэс будэтӥзы.
Инмарлэн азьпалзэ адӟыны быгатэмез
12—14. Кыӵе пайда вае трос дауръёслы Инмарлэн курадӟонъёсты соку ик быдтымтэез?
12 Инмарлэн курадӟонъёсты быдтымтэез асьмелы трос кайгу ваиз. Но Инмар азьпала учкиз. Уго со тодӥз, кема дыр ортчыса, умой воштӥськонъёс луозы шуыса. Инмарлэн малпамез кылдытэмъёсызлы, кӧня ке арлы яке кӧня ке сюрс арлы гинэ ӧвӧл, миллион аръёслы, пырак дауръёслы, пайда ваёз.
13 Азьланяз кин ке эрико луонэз шонертэм амалэн кутӥз ке, но Инмарлэсь ужъёссэ умойтэмен лыдъяны кутскиз ке, соку солы, ас малпанъёсыз шонер луо шуыса, возьматыны дыр висъяны кулэ уз луы ни. Пумит султӥсьёслы сюрс аръёс ӵоже тырмыт дыр сётыса, Инмар возьматӥз, вуоно пырак улонын дуннелэн пӧртэм интыосаз та выллем кылдэм югдуръёсты уз чида ни шуыса.
14 Инмарлэн та дырозь курадӟонъёсты быдтымтэез возьматоз, ваньмыз, мар солэн эрикезъя уг луы, азинлыко луыны уг быгаты. Валамон луоз, адямиослэн яке духовной кылдытэмъёслэн Инмарлэн куронъёсыныз герӟаськисьтэм малпанъёссы трос дауръёслы пайда вайыны уз быгатэ. Озьыен, Инмарлэн солы пумит мынӥсьёсты соку ик быдтыны правоез луоз. «Законлы пумит улӥсьёсты ваньзэс быдтоз» (Псалом 144:20; Римын улӥсьёслы 3:4).
[Суред, 15-тӥ бам]
Нырысетӥ адямиос Инмарлэсь кылзӥськытэк улонэз быръемзы бере, пересьмизы но кулӥзы
[Суредъёс, 16-тӥ бам]
Инмарлэсь кылзӥськисьтэм адями кивалтэт ваньзэ уродзэ гинэ вае
[Источник сярысь тодэт]
U.S. Coast Guard photo