10-тӥ люкет
Инмарен кылдытэм паймымон выль дунне
1, 2. Мар луоз чылкытатӥсь Армагеддон ож бере?
МАР ЛУОЗ Инмарлэн чылкытатӥсь Армагеддон ожез бере? Со бере туж чебер но умой выль улон кутскоз. Армагеддон дыръя улэп кылемъёс, кудъёсыз Инмарлэн кивалтэтэзлы оскымон луэмзэс возьматӥзы ини, выль дуннее пыртэмын луозы. Макем паймымон луоз со выль вапум, куке Инмар адямиосты бакель кароз!
2 Соос, кинъёс улэп кылёзы, Инмар Эксэйлыклэн кивалтэмез улсын рай кылдытыны кутскозы. Соос вань кужымзэс сётозы со ужъёслы, кудъёсыз пайда ваёзы со дыре улӥсь вань адямиослы. Музъем пумен чебер, адямиослы шумпотон ваись улон интылы пӧрмоз, кытын ожъёс уз луэ ни.
Уродэз шонерлыкен воштэмын луоз
3. Малы Армагеддон бере ик улон капчи луоз?
3 Ваньмыз со Шайтанлэсь дуннезэ быдтыса гинэ луыны быгатоз. Уз луэ ни керетон ӝутӥсь адями кивалтэтъёс но зэмос луисьтэм религиос. Шайтан адямиосты сурась малпанъёссэ вӧлмытыны уз быгаты ни; вань ужрадъянъёс, кудъёсыз сыӵе малпанъёсты вӧлмыто, Шайтанлэн дуннееныз ӵош быдтэмын луозы. Малпа гинэ: Шайтанлэн урод малпанъёс пыӵатӥсь дуннеез быдэсак быдтэмын! Макем капчи луоз соку!
4. Вера, кыӵе воштӥськон луоз дышетон удысын?
4 Соку адями кивалтэмлэн уродэ вуттӥсь малпанъёсыз воштэмын луозы Инмарлэн ӟеч дышетонэныз. «Вань нылпиостэ Кузё-Инмар дышетоз» (Исаия 54:13). Сыӵе арысь аре кыстӥськись но пайда ваись дышетонлы луыса, «зарезьёслэн вуэн пачылмыса улэмзы кадь, музъем выл Кузё-Инмар тодонэн пачылмыса улоз» (Исаия 11:9). Адямиос уродэзлы уз дышетске ни, нош «дунне вылын улӥсьёс шонерлыко улонлы» дышетскозы (Исаия 26:9). Котькуд нунал умой малпанъёсын но ужъёсын тырмемын луоз (Апостолъёслэн ужъёссы 17:31; Филиппыын улӥсьёслы 4:8).
5. Мар луоз вань урод ужъёсын но урод адямиосын?
5 Озьыен, вийылонъёс, ог-огдэ вӧсь каронъёс, сантэманъёс, лушкаськонъёс но мукет йыружъёс уз луэ ни. Нокин но уз курадӟы ни муртъёслэн лек ужъёссылэсь. Притчи книгаын 10:30 (НМ) верамын: «Шонерлыко улӥсь дауръёс ӵоже пыд йылаз юн сылоз, нош шонертэм улӥсьёс музъем вылын уз улэ».
Адямиос выльысь тазалыко луозы
6, 7. а) Мае быдтоз Эксэйлыклэн кивалтэмез? б) Кызьы сое возьматӥз Иисус, музъем вылын улыкуз?
6 Выль дуннеын нырысетӥ пумит султонлэн уродэсь бервылъёсыз быдтэмын луозы. Кылсярысь, Эксэйлыклэн кивалтэмез висёнъёсты но пересьмонэз быдтоз. Али тон тазалыктэ умоен лыдъяськод ке но, аръёс ортчыса, тынад синъёсыд бездозы, пиньёсыд бырозы, пельыд урод кылыны кутскоз, куэд кисыриё луоз, мугор пушъёсыд уродмозы, собере кулонэд но вуоз.
7 Озьы ке но, таӵе курадӟон ваись бервылъёс, кудъёсыз асьмелы нырысетӥ адямиослэсь кылемын, ӝоген вунозы. Тодӥськод на-а тон, мар возьматӥз Иисус тазалык пумысен, музъем вылын улыкуз? Библия вера: «Со доры туж трос калык лыктэм, сьӧразы чутъёсты, синтэмъёсты, кылтэмъёсты, сӧсырмемъёсты,— трос мукетъёссэ ваиллям но Иисуслэн пыд азяз соосты пуктылӥллям; соосты Со йӧнатэм. Озьы, кылтэмъёслэсь вераськемзэс кылыса, сӧсырмемъёслэсь йӧнамзэс, пыдтэмъёслэсь ветлэмзэс, синтэмъёслэсь синмо луэмзэс адӟыса, калык паймем» (Матфей 15:30, 31).
8, 9. Вера, кыӵе шудо улон луоз выль дуннеын, дун-шектэм тазылыкез берыктэм бере?
8 Макем шудо улон луоз выль дуннеын, куке асьмелэн вань висёнъёсмы быдтэмын луозы! Асьмеос ноку но, урод тазалыкмы сэрен, ум курадӟе ни. «Улӥсьёс пӧлысь одӥгез но уз шуы: „Мон висисько“. «Соку синтэмъёслэн синъёссы усьтӥськозы, пельтэмъёслэн пельзы кылыны кутскоз. Соку чут мурт пужей кадь тэтчоз, кылтэм мурт кырӟаны кутскоз» (Исаия 33:24; 35:5, 6).
9 Шумпотон ӧвӧл-а со, ӵукналы быдэ сайкаса, астэ тазалыкоен шӧдыны? Мӧйыос шум уз потэ-а тодыны, соослы выльысь егит дыр кужымзы берытскиз шуыса, но азьланяз соос дун-шектэмесь луозы, кыӵеесь вал нырысь Адам но Ева? Библия кыл сётэ: «Соку солэн мугорыз, егит дырыз сярысь, чылкытгес луоз; егит дырысьтыз улон нуналъёсаз со берытскоз» (Иов 33:25). Кыӵе шумпотон ваёз очкиосты, кылон аппаратъёсты, бодыосты но эмъюмъёсты куштон! Ноку но кулэ уз луэ ни эмъюртъёс, эмъясьёс но пинь эмъясьёс.
10. Мар луоз кулонэн?
10 Адямиослэн сыӵе юн тазалыксы луиз ке, кулэмзы но уз поты ни. Но соослы кулоно уз луы ни, малы ке шуоно адямиос тыр-быдэстэм луонлэн но кулонлэн ки улысьтызы мозмытэмын луозы. Христослы «вань тушмонъёссэ Аслаз пыд выжыяз уськытытозяз, Солы эксэйын пукыны кулэ уго. Вань тушмонъёс пӧлысь самой пумаз быдтэмын луоз кулон». «Инмарлэн кузьымез — пумтэм вапумъёсы улон» (1 Коринфын улӥсьёслы 15:25, 26; Римын улӥсьёслы 6:23; учкы озьы ик Исаия 25:8).
11. Кызьы Усьтӥськон книгаын выль дуннеысь бакель каронъёс сярысь огазеяса верамын?
11 Ваньзэ та бакель каронъёсты огазеяса, кудъёссэ сюлмаськись Инмар адямиос вылэ райын кисьтоз, Библилэн берпуметӥ книгаез вера: «Инмар соослэн син улысьтызы вань синкылизэс ӵушоз. Кулон уз ни луы, бӧрдон но, викышъян но, висён но уз ни луэ,— уго мар вал азьвыл ваньмыз со ортчиз-кошкиз» (Усьтӥськон 21:3, 4).
Кулэмъёслэн улӟыса султэмзы
12. Кызьы Иисус солы Инмарен сётэм улӟытъян луонлыксэ возьматӥз?
12 Иисус, висисьёсты эмъям но сӧсырмемъёсты бурмытъям сяна, тросгес лэсьтӥз. Со озьы ик кулэм адямиосты но улӟытъяз. Озьы со улӟытъяны паймымон луонлыксэ возьматӥз, кудзэ солы Инмар сётӥз. Тодӥськод на-а тон учырез, куке Иисус лыктӥз одӥг пиосмурт доры, солэн нылыз кулэм бере. Иисус кулэм ныллы вераз: «Нылаш, тыныд верасько, султы». Мар луиз собере? «Нылмурт соку ик султэм но ветлыны кутскем». Тае адӟись адямиос «туж паймиллям». Макем бадӟым шумпотон вал со! (Марк 5:41, 42; учкы озьы ик Лука 7:11—16; Иоанн 11:1—45).
13. Кыӵе адямиос улӟытэмын луозы?
13 Выль дуннеын шонер улэмъёс но, шонер улымтэос но кулэмысь улӟытыса султытэмын луозы (Апостолъёслэн ужъёссы 24:15). Со дыре Иисус солы Инмарен сётэм кулэмысь улӟытъян луонлыксэ уже кутоз, малы ке шуоно со вераз: «Мон — улӟытыса султон но улон. Мыным оскись кулӥз ке но, улоз» (Иоанн 11:25). Озьы ик со шуиз: «Шайгуосысьёс ваньмыз [кинэ Инмар тодаз возе] Инмар Пилэсь куаразэ кылозы но потозы» (Иоанн 5:28, 29; Улон кыл. Псалтирь).
14. Мар быдтэмын луоз кулонэн валче?
14 Кыӵе бадӟым шумпотон луоз быдэс музъем вылын, куке кулэмъёс, матысь адямиосынызы ӵош улон понна, улӟыны кутскозы! Газетъёсын уз гожъялэ ни кулэмъёс сярысь, мар адямиослы куректон вае. Со интые мукет иворъёс луозы, вылды,— выль улӟытэмъёс сярысь ялонъёс. Со шумпотон ваёз соослы, кин соосты яратэ. Озьыен, уз луэ ни кулэмъёсты ватонъёс, кулэмъёсты сутон тылскемъёс но шайвылъёс!
Зэмос тупаса улон
15. Кызьы Михейлэн азьпалзэ ивортыса верамез быдэсмоз?
15 Котькуд удысын зэмос тупаса улон луоз. Ожъёс, ожъёсты ӝутӥсьёс но пыӵал тӥрлык поттон вунэтэмын луозы. Малы? Малы ке шуоно пӧртэм йӧскалыкъёс, выжыос но расаос вискы керетон кизись малпанъёс быдтэмын луозы. Соку, зэмзэ но, «калык уз ӝуты ни мечсэ калык вылэ, но уз дышетске ни ожмаськыны» (Михей 4:3, НМ).
16. Мар лэсьтоз Инмар, ожъёс медаз луэ ни шуыса?
16 Со паймоно кадь потоз, малы ке шуоно адямиослэн вань улонзы ӵоже ялан мыно вир кисьтӥсь ожъёс. Сыӵе югдур кылдӥз, калыкъёс адямиослэн но убиръёслэн кивалтэмзы улсын улэмен. Выль дуннеын, Эксэйлыклэн кивалтэмез улсын, тани мар луоз: «Лыктэлэ но Господьлэсь ужъёссэ адӟелэ... Музъем пумозь ожмаськонъёсты дугдытылыса, пукыӵез сузмытӥз, шибодыез но тӥялтӥз, ожмаськон уробоосты тылын сутӥз» (Псалом 45:9, 10).
17, 18. Кыӵе кусыпъёс луозы адямиос но пӧйшуръёс вискын выль дуннеын?
17 Озьы ик адямиос но пӧйшуръёс тупаса улозы, кызьы улӥзы Эдемын (Кылдытонлэн кутсконэз 1:28; 2:19). Инмар вера: «Ас калыке понна со нуналэ мон пӧйшуръёсын, инмын лобась кылдытэмъёсын но музъем вылтӥ нюжтӥськись улэп макеосын сӥзён куто... соослы кышкатэк улон сёто» (Осия 2:18, НМ).
18 Кыӵе луоз со тупаса улон? «Соку кион ыжпиен огазьын улозы; барс кечпиен огазьын выдыса кыллёзы; кунян но, левпи но, ош но огазьын улозы, пичи пи соосты валтыса нуллоз». Адямилы но, ог-огзылы но пӧйшуръёс ноку кышкытлык уз вае ни. «Лев, ош музэн, куро сиёз»! (Исаия 11:6—9; 65:25).
Музъемез райлы пӧрмытон
19. Кыӵе луоз музъем?
19 Быдэс музъем адямиослы рай улон интылы пӧрмытэмын луоз. Соин ик Иисус пиосмуртлы, кудӥз солы оскиз, кыл сётыны быгатӥз: «Монэн огазьын райын тон луод». Библиын верамын: «Луоё кыр, кӧс музъем шулдыръяськоз, калыктэм музъем шумпотоз, лилия кадь со сяськаяськоз. ...Луоё кырын вуос потозы, кыр дуннеын ву ӧръёс усьтӥськозы» (Лука 23:43; Исаия 35:1, 6).
20. Малы адямиос сютэм уз улэ ни?
20 Инмар Эксэйлык кивалтыку, трос миллион адямиос сютэм уз улэ ни. «Музъем вылын, гурезьёс йылын пачыл нянь мед луоз; солэн емышъёсыз... веттаськозы». «Кыр писпу но музъем емышъёссэс сётозы, но соос кышкатэк улозы ас музъем вылазы» (Псалом 71:16; Иезекииль 34:27, НМ).
21. Мар луоз юртъертэк кылёнэн, баракъёсын но йыружен тырмем интыосын?
21 Соку куанер улон, юртъертэк кылемъёс, баракъёс яке йыружен тырмем интыос уз луэ ни. «[Адямиос] коркаос пуктылыса отын улозы, виноград мерттозы, соослэсь емышсэ сиёзы. Муртъёслы улыны уз пуктэ, мукетъёслы сиыны уз мерттэ». «Котькудӥз соос пӧлысь ас виноград ваез но инжирез улын пукоз, но нокин уз кышкаты ни соосты» (Исаия 65:21, 22; Михей 4:4, НМ).
22. Кызьы Библиын Инмар кивалтэтлэн бакель каронъёсыз сярысь вераське?
22 Райын адямиос ваньмыныз таин но трос мукетыныз бакель каремын луозы. Псаломын 144:16 вераське: «Тынэсьтыд кидэ усьтӥськод но, ӟеч мылкыдэдъя, вань улӥсьёсты тыр кариськод». Паймонэз ӧвӧл, Библиын азьпалэз сярысь верамын: «Нош востэмлыкоос музъем басьтозы но трос каньыллыкен куанозы... Шонерлыко адямиос музъем басьтозы но пумтэм дауръёс ӵоже со вылын улозы» (Псалом 36:11, 29).
Вань курадӟонъёсты быдтон
23. Кызьы Инмар асьмелэсь вань чидам курадӟонъёсмес быдтоз?
23 Инмар Эксэйлыклэн кивалтэмез быдтоз вань изъянэз, кудӥз адямиослы ортчем куать сюрс ар ӵоже ваемын вал. Со дыре шумпотон трослы бадӟымгес луоз, адямиосын чидам пӧртэм курадӟонъёс сярысь. Нокыӵе урод тодэ ваёнъёс улонэз ноку но шимес уз каре ни. Умой малпанъёс но ужъёс, кудъёсыз адямиослэн улоназы котькуд нунал луозы, сюлэмез вӧсь карись тодэ ваёнъёсты пумен ӵушозы.
24, 25. а) Мар луыны кулэ, Исаиялэн азьпалзэ верамезъя? б) Малы асьмеос оскыны быгатӥськомы, азьвыл курадӟонъёс тодамы но уз лыктэ ни шуыса?
24 Сюлмаськись Инмар вера: «Мон выль ин [адямиосын кивалтӥсь выль ин Эксэйлык], выль музъем [шонерлыко улӥсь адямиос] кылдытӥсько, азьвылъёссэ-вужъёссэ буре уз ни вае, тодаз уз ни вае. Нош тӥ, мар Мон лэсьтӥсько-кылдытӥсько, со понна пумтэм вапумъёс ӵоже шулдыръяськыса, шумпотыса улоды». «Табере быдэс дунне шутэтске, каньыллыкен улэ но шумпотыса кырӟа» (Исаия 14:7; 65:17, 18).
25 Озьыен, аслаз Эксэйлыкез пыр Инмар быдэсак воштоз сыӵе кема кыстӥськись урод югдурез. Со бакель каронзэ асьме вылэ пырак улон ӵоже кисьтоз, кудӥз уродэзлэсь бервылзэ ӵушыса куштоз. Озьы Инмар юн сюлмаськемзэ возьматоз. Соку азьвыл чидам куректонъёс тодамы но уз лыктэ ни.
26. Малы Инмар пӧртэм азьвыл курадӟонъёсмес умоеныз воштоз?
26 Тӥни кызьы Инмар асьмелы, та дуннеын вань курадӟеммы понна, умоен берыктоз. Со тодэ, асьмеос янгыш ӧвӧл, тырбыдэстэмесь вордӥськимы шуыса, малы ке шуоно тырбыдэстэм луон асьмелы Адамлэсь но Евалэсь выжиз. Асьмеос янгыш ӧвӧл, та шайтан дуннеын вордӥськимы шуыса, малы ке шуоно Адам но Ева Инмарлы оскымон кыльысалзы ке, соку асьмеос райын вордӥськысалмы. Соин Инмар, асьмемыз юн жаляса, азьвыл секыт улонмес умоеныз воштоз.
27. Кыӵе азьпалазэ вераса ивортэмъёс паймымон амалэн выль дуннеын быдэсмозы?
27 Выль дуннеын адямиос эрико луозы, мар сярысь верамын Римын улӥсьёслы гожтэтын 8:21, 22: «Инмар нылпиослэн кадь ик данлыко эрикез басьтон понна, вань кылдытэм макеос сисьмонлэн зӥбет улысьтыз мозмытэмын луозы шуыса оскиськонэн. Тодӥськомы, кызьы вань кылдытэм дунне туннэ нуналозь нуны ваись кадь ӝуштэ, курадӟе». Соку адямиос та вӧсяськонлэсь быдэсак быдэсмемзэ адӟозы: «Тынад Эксэйлыкед мед лыктоз; Тынад эрикедъя мед луоз музъем вылын но инмын кадь ик» (Матфей 6:10). Паймымон улон Рай музъем вылын возьматоз, кыӵе инмын улон.
[Суредъёс, 23-тӥ бам]
Выль дуннеын мӧйыослы выльысь егит дыр кужымзы берытскоз
[Суред, 24-тӥ бам]
Выль дуннеын вань висёнъёс но сӧсырмонъёс палэнтэмын луозы
[Суред, 25-тӥ бам]
Выль дуннеын кулэмъёс улыны улӟытэмын луозы
[Суред, 26-тӥ бам]
«Уз дышетске ни ожмаськыны»
[Суредъёс, 27-тӥ бам]
Райын адямиос но пӧйшуръёс вискын зэмос тупаса улон луоз
[Суред, 27-тӥ бам]
Инмар кизэ усьтоз но, ӟеч мылкыдызъя, вань улӥсьёсты тыр кароз
[Суред, 28-тӥ бам]
Инмарлэн Эксэйлыкез, вань курадӟеммы понна, умоен берыктоз